| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
១៧. បសាទករធម្មវគ្គវណ្ណនា
17. Pasādakaradhammavaggavaṇṇanā
៣៦៦. អទ្ធមិទន្តិ សន្ធិវសេន បាឡិយំ រស្សំ កត្វា វុត្តំ, ម-ការោ បទសន្ធិករោតិ អាហ – ‘‘អទ្ធា ឥទ’’ន្តិ។ ឯកំសោ ឯសាតិ ឯកំសោ ហេតុ ឯស លាភានំ។ បាបកំ នាមាតិ អប្បកម្បិ បាបំ នាម ព្យត្តំ ឯកំសេន ន ករោតិ។ តថស្សាតិ តថា សម្មាបដិបជ្ជមានស្ស អស្ស។ អារញ្ញិកត្តំ…បេ.… តេចីវរិកត្តន្តិ ឥមេសំ ធុតធម្មានំ គហណេនេវ ឥតរេសម្បិ តំសភាគានំ គហិតភាវោ ទដ្ឋព្ពោ។ ថាវរប្បត្តភាវោតិ សាសនេ ថិរភាវប្បត្តិ ថេរភាវោ។ អាកប្បស្ស សម្បត្តីតិ ‘‘អញ្ញោ មេ អាកប្បោ ករណីយោ’’តិ ឯវំ វុត្តស្ស អាកប្បស្ស សម្បត្តិ។ កោលបុត្តីតិ កោលបុត្តិយន្តិ អាហ – ‘‘កុលបុត្តភាវោ’’តិ។ សម្បន្នរូបតាតិ ឧបធិសម្បទា។ វចនកិរិយាយាតិ វចនប្បយោគស្ស មធុរភាវោ មញ្ជុស្សរតា។ តេនស្ស លាភោ ឧប្បជ្ជតីតិ ឥទំ ន លាភុប្បាទនូបាយទស្សនបរំ, អថ ខោ ឯវំ សម្មាបដិបជ្ជមានស្ស អនិច្ឆន្តស្សេវ លាភោ ឧប្បជ្ជតីតិ លាភស្ស អព្យភិចារហេតុទស្សនបរំ ទដ្ឋព្ពំ។ យថាហ –
366.Addhamidanti sandhivasena pāḷiyaṃ rassaṃ katvā vuttaṃ, ma-kāro padasandhikaroti āha – ‘‘addhā ida’’nti. Ekaṃso esāti ekaṃso hetu esa lābhānaṃ. Pāpakaṃ nāmāti appakampi pāpaṃ nāma byattaṃ ekaṃsena na karoti. Tathassāti tathā sammāpaṭipajjamānassa assa. Āraññikattaṃ…pe… tecīvarikattanti imesaṃ dhutadhammānaṃ gahaṇeneva itaresampi taṃsabhāgānaṃ gahitabhāvo daṭṭhabbo. Thāvarappattabhāvoti sāsane thirabhāvappatti therabhāvo. Ākappassa sampattīti ‘‘añño me ākappo karaṇīyo’’ti evaṃ vuttassa ākappassa sampatti. Kolaputtīti kolaputtiyanti āha – ‘‘kulaputtabhāvo’’ti. Sampannarūpatāti upadhisampadā. Vacanakiriyāyāti vacanappayogassa madhurabhāvo mañjussaratā. Tenassa lābho uppajjatīti idaṃ na lābhuppādanūpāyadassanaparaṃ, atha kho evaṃ sammāpaṭipajjamānassa anicchantasseva lābho uppajjatīti lābhassa abyabhicārahetudassanaparaṃ daṭṭhabbaṃ. Yathāha –
‘‘អាកង្ខេយ្យ ចេ, ភិក្ខវេ, ភិក្ខុ លាភី អស្សំ ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារានន្តិ, សីលេស្វេវស្ស បរិបូរការី’’តិ (ម. និ. ១.៦៥)។
‘‘Ākaṅkheyya ce, bhikkhave, bhikkhu lābhī assaṃ cīvarapiṇḍapātasenāsanagilānappaccayabhesajjaparikkhārānanti, sīlesvevassa paripūrakārī’’ti (ma. ni. 1.65).
បសាទករធម្មវគ្គវណ្ណនា និដ្ឋិតា។
Pasādakaradhammavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១៧. បសាទករធម្មវគ្គោ • 17. Pasādakaradhammavaggo
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១៧. បសាទករធម្មវគ្គវណ្ណនា • 17. Pasādakaradhammavaggavaṇṇanā
