| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၇. ပသာဒကရဓမ္မဝဂ္ဂဝဏ္ဏနာ
17. Pasādakaradhammavaggavaṇṇanā
၃၆၆. အဒ္ဓမိဒန္တိအာဒီသု အဒ္ဓန္တိ ဧကံသာဓိဝစနမေတံ, အဒ္ဓာ ဣဒံ လာဘာနံ, ဧကံသော ဧသ လာဘာနန္တိ ဝုတ္တံ ဟောတိ။ ယဒိဒံ အာရညိကတ္တန္တိ ယော ဧသ အာရညိကဘာဝော။ ဣဒံ ဝုတ္တံ ဟောတိ – အာရညိကဘာဝော နာမ လာဘာနံ ဧကံသော အဝသ္သဘာဝိတာ န သက္ကာ အာရညိကေန လာဘံ န လဘိတုန္တိ။ အာရညိကော ဟိ ဘိက္ခု ‘‘အတ္တနော အရညဝာသသ္သ အနုစ္ဆဝိကံ ကရိသ္သာမီ’’တိ ပာပကံ နာမ န ကရောတိ, အထသ္သ ‘‘အာရညိကော အယံ ဘိက္ခူ’’တိ သဉ္ဇာတဂာရဝော မဟာဇနော စတုပစ္စယေန ပူဇံ ကရောတိ။ တေန ဝုတ္တံ – ‘‘အဒ္ဓမိဒံ, ဘိက္ခဝေ, လာဘာနံ ယဒိဒံ အာရညိကတ္တ’’န္တိ။ သေသပဒေသုပိ ဧသေဝ နယော။ ဧတ္ထ ပန ဗာဟုသစ္စန္တိ ဗဟုသ္သုတဘာဝော။ ထာဝရေယ္ယန္တိ စိရပဗ္ဗဇိတတ္တာ ထာဝရပ္ပတ္တဘာဝော။ အာကပ္ပသမ္ပဒာတိ စီဝရဂ္ဂဟဏာဒိနော အာကပ္ပသ္သ သမ္ပတ္တိ။ ပရိဝာရသမ္ပဒာတိ သုစိပရိဝာရတာ။ ကောလပုတ္တီတိ ကုလပုတ္တဘာဝော။ ဝဏ္ဏပောက္ခရတာတိ သမ္ပန္နရူပတာ။ ကလ္ယာဏဝာက္ကရဏတာတိ ဝစနကိရိယာယ မဓုရဘာဝော။ အပ္ပာဗာဓတာတိ အာရောဂ္ယသမ္ပတ္တိ။ အရောဂော ဟိ ဘိက္ခု အတ္တနော သရီရကလ္ယာဏတာယ ဝိပသ္သနာဓုရေ စ ဂန္ထဓုရေ စ ပရိပူရကာရီ ဟောတိ, တေနသ္သ လာဘော ဥပ္ပဇ္ဇတီတိ။
366.Addhamidantiādīsu addhanti ekaṃsādhivacanametaṃ, addhā idaṃ lābhānaṃ, ekaṃso esa lābhānanti vuttaṃ hoti. Yadidaṃ āraññikattanti yo esa āraññikabhāvo. Idaṃ vuttaṃ hoti – āraññikabhāvo nāma lābhānaṃ ekaṃso avassabhāvitā na sakkā āraññikena lābhaṃ na labhitunti. Āraññiko hi bhikkhu ‘‘attano araññavāsassa anucchavikaṃ karissāmī’’ti pāpakaṃ nāma na karoti, athassa ‘‘āraññiko ayaṃ bhikkhū’’ti sañjātagāravo mahājano catupaccayena pūjaṃ karoti. Tena vuttaṃ – ‘‘addhamidaṃ, bhikkhave, lābhānaṃ yadidaṃ āraññikatta’’nti. Sesapadesupi eseva nayo. Ettha pana bāhusaccanti bahussutabhāvo. Thāvareyyanti cirapabbajitattā thāvarappattabhāvo. Ākappasampadāti cīvaraggahaṇādino ākappassa sampatti. Parivārasampadāti suciparivāratā. Kolaputtīti kulaputtabhāvo. Vaṇṇapokkharatāti sampannarūpatā. Kalyāṇavākkaraṇatāti vacanakiriyāya madhurabhāvo. Appābādhatāti ārogyasampatti. Arogo hi bhikkhu attano sarīrakalyāṇatāya vipassanādhure ca ganthadhure ca paripūrakārī hoti, tenassa lābho uppajjatīti.
သောဠသ ပသာဒကရဓမ္မာ နိဋ္ဌိတာ။
Soḷasa pasādakaradhammā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၇. ပသာဒကရဓမ္မဝဂ္ဂော • 17. Pasādakaradhammavaggo
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၇. ပသာဒကရဓမ္မဝဂ္ဂဝဏ္ဏနာ • 17. Pasādakaradhammavaggavaṇṇanā
