| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
17. පසාදකරධම්‌මවග්‌ගවණ්‌ණනා
17. Pasādakaradhammavaggavaṇṇanā
366. අද්‌ධමිදන්‌තිආදීසු අද්‌ධන්‌ති එකංසාධිවචනමෙතං, අද්‌ධා ඉදං ලාභානං, එකංසො එස ලාභානන්‌ති වුත්‌තං හොති. යදිදං ආරඤ්‌ඤිකත්‌තන්‌ති යො එස ආරඤ්‌ඤිකභාවො. ඉදං වුත්‌තං හොති – ආරඤ්‌ඤිකභාවො නාම ලාභානං එකංසො අවස්‌සභාවිතා න සක්‌කා ආරඤ්‌ඤිකෙන ලාභං න ලභිතුන්‌ති. ආරඤ්‌ඤිකො හි භික්‌ඛු ‘‘අත්‌තනො අරඤ්‌ඤවාසස්‌ස අනුච්‌ඡවිකං කරිස්‌සාමී’’ති පාපකං නාම න කරොති, අථස්‌ස ‘‘ආරඤ්‌ඤිකො අයං භික්‌ඛූ’’ති සඤ්‌ජාතගාරවො මහාජනො චතුපච්‌චයෙන පූජං කරොති. තෙන වුත්‌තං – ‘‘අද්‌ධමිදං, භික්‌ඛවෙ, ලාභානං යදිදං ආරඤ්‌ඤිකත්‌ත’’න්‌ති. සෙසපදෙසුපි එසෙව නයො. එත්‌ථ පන බාහුසච්‌චන්‌ති බහුස්‌සුතභාවො. ථාවරෙය්‍යන්‌ති චිරපබ්‌බජිතත්‌තා ථාවරප්‌පත්‌තභාවො. ආකප්‌පසම්‌පදාති චීවරග්‌ගහණාදිනො ආකප්‌පස්‌ස සම්‌පත්‌ති. පරිවාරසම්‌පදාති සුචිපරිවාරතා. කොලපුත්‌තීති කුලපුත්‌තභාවො. වණ්‌ණපොක්‌ඛරතාති සම්‌පන්‌නරූපතා. කල්‍යාණවාක්‌කරණතාති වචනකිරියාය මධුරභාවො. අප්‌පාබාධතාති ආරොග්‍යසම්‌පත්‌ති. අරොගො හි භික්‌ඛු අත්‌තනො සරීරකල්‍යාණතාය විපස්‌සනාධුරෙ ච ගන්‌ථධුරෙ ච පරිපූරකාරී හොති, තෙනස්‌ස ලාභො උප්‌පජ්‌ජතීති.
366.Addhamidantiādīsu addhanti ekaṃsādhivacanametaṃ, addhā idaṃ lābhānaṃ, ekaṃso esa lābhānanti vuttaṃ hoti. Yadidaṃ āraññikattanti yo esa āraññikabhāvo. Idaṃ vuttaṃ hoti – āraññikabhāvo nāma lābhānaṃ ekaṃso avassabhāvitā na sakkā āraññikena lābhaṃ na labhitunti. Āraññiko hi bhikkhu ‘‘attano araññavāsassa anucchavikaṃ karissāmī’’ti pāpakaṃ nāma na karoti, athassa ‘‘āraññiko ayaṃ bhikkhū’’ti sañjātagāravo mahājano catupaccayena pūjaṃ karoti. Tena vuttaṃ – ‘‘addhamidaṃ, bhikkhave, lābhānaṃ yadidaṃ āraññikatta’’nti. Sesapadesupi eseva nayo. Ettha pana bāhusaccanti bahussutabhāvo. Thāvareyyanti cirapabbajitattā thāvarappattabhāvo. Ākappasampadāti cīvaraggahaṇādino ākappassa sampatti. Parivārasampadāti suciparivāratā. Kolaputtīti kulaputtabhāvo. Vaṇṇapokkharatāti sampannarūpatā. Kalyāṇavākkaraṇatāti vacanakiriyāya madhurabhāvo. Appābādhatāti ārogyasampatti. Arogo hi bhikkhu attano sarīrakalyāṇatāya vipassanādhure ca ganthadhure ca paripūrakārī hoti, tenassa lābho uppajjatīti.
සොළස පසාදකරධම්‌මා නිට්‌ඨිතා.
Soḷasa pasādakaradhammā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 17. පසාදකරධම්‌මවග්‌ගො • 17. Pasādakaradhammavaggo
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 17. පසාදකරධම්‌මවග්‌ගවණ්‌ණනා • 17. Pasādakaradhammavaggavaṇṇanā
