| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
३. ततियवग्गो
3. Tatiyavaggo
१. पसन्नचित्तसुत्तं
1. Pasannacittasuttaṃ
२१. वुत्तञ्हेतं भगवता, वुत्तमरहताति मे सुतं –
21. Vuttañhetaṃ bhagavatā, vuttamarahatāti me sutaṃ –
‘‘इधाहं, भिक्खवे, एकच्चं पुग्गलं पसन्नचित्तं एवं चेतसा चेतो परिच्च पजानामि – ‘इमम्हि चायं समये पुग्गलो कालं करेय्य यथाभतं निक्खित्तो एवं सग्गे’। तं किस्स हेतु? चित्तं हिस्स, भिक्खवे, पसन्नं। चेतोपसादहेतु खो पन, भिक्खवे, एवमिधेकच्चे सत्ता कायस्स भेदा परं मरणा सुगतिं सग्गं लोकं उपपज्जन्ती’’ति। एतमत्थं भगवा अवोच। तत्थेतं इति वुच्चति –
‘‘Idhāhaṃ, bhikkhave, ekaccaṃ puggalaṃ pasannacittaṃ evaṃ cetasā ceto paricca pajānāmi – ‘imamhi cāyaṃ samaye puggalo kālaṃ kareyya yathābhataṃ nikkhitto evaṃ sagge’. Taṃ kissa hetu? Cittaṃ hissa, bhikkhave, pasannaṃ. Cetopasādahetu kho pana, bhikkhave, evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti. Etamatthaṃ bhagavā avoca. Tatthetaṃ iti vuccati –
‘‘पसन्नचित्तं ञत्वान, एकच्चं इध पुग्गलं।
‘‘Pasannacittaṃ ñatvāna, ekaccaṃ idha puggalaṃ;
एतमत्थञ्च ब्याकासि, बुद्धो भिक्खून सन्तिके॥
Etamatthañca byākāsi, buddho bhikkhūna santike.
‘‘इमम्हि चायं समये, कालं कयिराथ पुग्गलो।
‘‘Imamhi cāyaṃ samaye, kālaṃ kayirātha puggalo;
सुगतिं उपपज्जेय्य, चित्तं हिस्स पसादितं॥
Sugatiṃ upapajjeyya, cittaṃ hissa pasāditaṃ.
‘‘यथा हरित्वा निक्खिपेय्य, एवमेव तथाविधो।
‘‘Yathā haritvā nikkhipeyya, evameva tathāvidho;
चेतोपसादहेतु हि, सत्ता गच्छन्ति सुग्गति’’न्ति॥
Cetopasādahetu hi, sattā gacchanti suggati’’nti.
अयम्पि अत्थो वुत्तो भगवता, इति मे सुतन्ति। पठमं।
Ayampi attho vutto bhagavatā, iti me sutanti. Paṭhamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / १. पसन्नचित्तसुत्तवण्णना • 1. Pasannacittasuttavaṇṇanā
