| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
பஸன்னாகாரகதா²
Pasannākārakathā
ஏவங் தே³ஸனங் தோ²மெத்வா இமாய தே³ஸனாய ரதனத்தயே பஸன்னசித்தோ பஸன்னாகாரங் கரொந்தோ ‘‘ஏஸாஹ’’ந்திஆதி³மாஹ. தத்த² ஏஸாஹந்தி ஏஸோ அஹங். ப⁴வந்தங் கோ³தமங் ஸரணங் க³ச்சா²மீதி ப⁴வந்தங் கோ³தமங் ஸரணந்தி க³ச்சா²மி; ப⁴வங் மே கோ³தமோ ஸரணங், பராயணங், அக⁴ஸ்ஸ தாதா, ஹிதஸ்ஸ ச விதா⁴தாதி இமினா அதி⁴ப்பாயேன ப⁴வந்தங் கோ³தமங் க³ச்சா²மி ப⁴ஜாமி ஸேவாமி பயிருபாஸாமி , ஏவங் வா ஜானாமி பு³ஜ்ஜா²மீதி. யேஸஞ்ஹி தா⁴தூனங் க³திஅத்தோ², பு³த்³தி⁴பி தேஸங் அத்தோ²; தஸ்மா ‘‘க³ச்சா²மீ’’தி இமஸ்ஸ ஜானாமி பு³ஜ்ஜா²மீதி அயம்பி அத்தோ² வுத்தோ. த⁴ம்மஞ்ச பி⁴க்கு²ஸங்க⁴ஞ்சாதி எத்த² பன அதி⁴க³தமக்³கே³ ஸச்சி²கதனிரோதே⁴ யதா²னுஸிட்ட²ங் படிபஜ்ஜமானே ச சதூஸு அபாயேஸு அபதமானே தா⁴ரேதீதி த⁴ம்மோ; ஸோ அத்த²தோ அரியமக்³கோ³ சேவ நிப்³பா³னஞ்ச. வுத்தங் ஹேதங் – ‘‘யாவதா, பி⁴க்க²வே, த⁴ம்மா ஸங்க²தா, அரியோ அட்ட²ங்கி³கோ மக்³கோ³ தேஸங் அக்³க³மக்கா²யதீ’’தி (அ॰ நி॰ 4.34) வித்தா²ரோ. ந கேவலஞ்ச அரியமக்³கோ³ சேவ நிப்³பா³னஞ்ச, அபி ச கோ² அரியப²லேஹி ஸத்³தி⁴ங் பரியத்தித⁴ம்மோபி. வுத்தம்பி ஹேதங் ச²த்தமாணவகவிமானே –
Evaṃ desanaṃ thometvā imāya desanāya ratanattaye pasannacitto pasannākāraṃ karonto ‘‘esāha’’ntiādimāha. Tattha esāhanti eso ahaṃ. Bhavantaṃ gotamaṃ saraṇaṃ gacchāmīti bhavantaṃ gotamaṃ saraṇanti gacchāmi; bhavaṃ me gotamo saraṇaṃ, parāyaṇaṃ, aghassa tātā, hitassa ca vidhātāti iminā adhippāyena bhavantaṃ gotamaṃ gacchāmi bhajāmi sevāmi payirupāsāmi , evaṃ vā jānāmi bujjhāmīti. Yesañhi dhātūnaṃ gatiattho, buddhipi tesaṃ attho; tasmā ‘‘gacchāmī’’ti imassa jānāmi bujjhāmīti ayampi attho vutto. Dhammañca bhikkhusaṅghañcāti ettha pana adhigatamagge sacchikatanirodhe yathānusiṭṭhaṃ paṭipajjamāne ca catūsu apāyesu apatamāne dhāretīti dhammo; so atthato ariyamaggo ceva nibbānañca. Vuttaṃ hetaṃ – ‘‘yāvatā, bhikkhave, dhammā saṅkhatā, ariyo aṭṭhaṅgiko maggo tesaṃ aggamakkhāyatī’’ti (a. ni. 4.34) vitthāro. Na kevalañca ariyamaggo ceva nibbānañca, api ca kho ariyaphalehi saddhiṃ pariyattidhammopi. Vuttampi hetaṃ chattamāṇavakavimāne –
‘‘ராக³விராக³மனேஜமஸோகங், த⁴ம்மமஸங்க²தமப்படிகூலங்;
‘‘Rāgavirāgamanejamasokaṃ, dhammamasaṅkhatamappaṭikūlaṃ;
மது⁴ரமிமங் பகு³ணங் ஸுவிப⁴த்தங், த⁴ம்மமிமங் ஸரணத்த²முபேஹீ’’தி. (வி॰ வ॰ 887);
Madhuramimaṃ paguṇaṃ suvibhattaṃ, dhammamimaṃ saraṇatthamupehī’’ti. (vi. va. 887);
எத்த² ஹி ராக³விராகோ³தி மக்³கோ³ கதி²தோ. அனேஜமஸோகந்தி ப²லங். த⁴ம்மமஸங்க²தந்தி நிப்³பா³னங். அப்படிகூலங் மது⁴ரமிமங் பகு³ணங் ஸுவிப⁴த்தந்தி பிடகத்தயேன விப⁴த்தா ஸப்³ப³த⁴ம்மக்க²ந்தா⁴தி. தி³ட்டி²ஸீலஸங்கா⁴தேன ஸங்ஹதோதி ஸங்கோ⁴, ஸோ அத்த²தோ அட்ட²அரியபுக்³க³லஸமூஹோ. வுத்தஞ்ஹேதங் தஸ்மிங்யேவ விமானே –
Ettha hi rāgavirāgoti maggo kathito. Anejamasokanti phalaṃ. Dhammamasaṅkhatanti nibbānaṃ. Appaṭikūlaṃ madhuramimaṃ paguṇaṃ suvibhattanti piṭakattayena vibhattā sabbadhammakkhandhāti. Diṭṭhisīlasaṅghātena saṃhatoti saṅgho, so atthato aṭṭhaariyapuggalasamūho. Vuttañhetaṃ tasmiṃyeva vimāne –
‘‘யத்த² ச தி³ன்னமஹப்ப²லமாஹு, சதூஸு ஸுசீஸு புரிஸயுகே³ஸு;
‘‘Yattha ca dinnamahapphalamāhu, catūsu sucīsu purisayugesu;
அட்ட² ச புக்³க³லத⁴ம்மத³ஸா தே, ஸங்க⁴மிமங் ஸரணத்த²முபேஹீ’’தி. (வி॰ வ॰ 888);
Aṭṭha ca puggaladhammadasā te, saṅghamimaṃ saraṇatthamupehī’’ti. (vi. va. 888);
பி⁴க்கூ²னங் ஸங்கோ⁴ பி⁴க்கு²ஸங்கோ⁴. எத்தாவதா ச ப்³ராஹ்மணோ தீணி ஸரணக³மனானி படிவேதே³ஸி.
Bhikkhūnaṃ saṅgho bhikkhusaṅgho. Ettāvatā ca brāhmaṇo tīṇi saraṇagamanāni paṭivedesi.
பஸன்னாகாரகதா² நிட்டி²தா.
Pasannākārakathā niṭṭhitā.
