| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
басаннаагаарагат̇аа
Pasannākārakathā
басаннаагааранд̇и басаннзхи гаад̇аб̣б̣ам̣ саггаарам̣. саран̣ам̣ г̇ажчаамийд̇и зд̇т̇а ид̇и-сад̣̇д̣̇о луд̇д̇анид̣̇д̣̇идтод̇и ааха ‘‘саран̣анд̇и г̇ажчаамий’’д̇и. зд̇т̇а хи нааяам̣ г̇амисад̣̇д̣̇о нийсад̣̇д̣̇аад̣̇аяо вияа д̣̇вигаммаго, д̇асмаа яат̇аа аж̇ам̣ г̇аамам̣ нзд̇ийд̇и вужжад̇и, звам̣ ‘‘г̇од̇амам̣ саран̣ам̣ г̇ажчаамий’’д̇и вад̇д̇ум̣ на саггаа, ‘‘саран̣анд̇и г̇ажчаамий’’д̇и бана вад̇д̇аб̣б̣ам̣, д̇асмаа зд̇т̇а ид̇и-сад̣̇д̣̇о луд̇д̇анид̣̇д̣̇идтод̇и взд̣̇ид̇аб̣б̣ам̣. саран̣анд̇и бадисаран̣ам̣. д̇знааха ‘‘барааяан̣а’’нд̇и. барааяан̣абхааво жа анад̇т̇анисзд̇ханзна ад̇т̇асамбадибаад̣̇анзна жа ход̇ийд̇и ааха ‘‘агхасса д̇аад̇аа хид̇асса жа вид̇хаад̇аа’’д̇и. агхассаад̇и д̣̇угкад̇од̇и вад̣̇анд̇и, баабад̇од̇и бана ад̇т̇о яуд̇д̇о, ниссаггз жзд̇ам̣ саамиважанам̣. саран̣анд̇и г̇аманан̃жзд̇т̇а д̇ад̣̇ад̇хиббааязна бхаж̇анам̣ д̇ат̇аа ж̇аананам̣ ваад̇и д̣̇ассзнд̇о ‘‘ид̇и иминаа ад̇хиббааязнаа’’д̇иаад̣̇имааха. д̇ад̇т̇а г̇ажчаамийд̇иаад̣̇ийсу буримасса буримасса бажчимам̣ бажчимам̣ ад̇т̇аважанам̣. бхаж̇анам̣ ваа саран̣аад̇хиббааязна убасан̇гаманам̣, сзванаа санд̇игааважарад̇аа, баяирубаасанам̣ вад̇д̇аббадивад̇д̇агаран̣зна убадтаананд̇и звам̣ саб̣б̣ат̇ааби анан̃н̃асаран̣ад̇ам̣язва д̣̇ийбзд̇и. г̇ажчаамийд̇и бад̣̇асса гат̇ам̣ б̣уж̇жхаамийд̇и аяамад̇т̇о лаб̣бхад̇ийд̇и ааха ‘‘язсам̣ хий’’д̇иаад̣̇и.
Pasannākāranti pasannehi kātabbaṃ sakkāraṃ. Saraṇaṃ gacchāmīti ettha iti-saddo luttaniddiṭṭhoti āha ‘‘saraṇanti gacchāmī’’ti. Ettha hi nāyaṃ gamisaddo nīsaddādayo viya dvikammako, tasmā yathā ajaṃ gāmaṃ netīti vuccati, evaṃ ‘‘gotamaṃ saraṇaṃ gacchāmī’’ti vattuṃ na sakkā, ‘‘saraṇanti gacchāmī’’ti pana vattabbaṃ, tasmā ettha iti-saddo luttaniddiṭṭhoti veditabbaṃ. Saraṇanti paṭisaraṇaṃ. Tenāha ‘‘parāyaṇa’’nti. Parāyaṇabhāvo ca anatthanisedhanena atthasampaṭipādanena ca hotīti āha ‘‘aghassa tātā hitassa ca vidhātā’’ti. Aghassāti dukkhatoti vadanti, pāpatoti pana attho yutto, nissakke cetaṃ sāmivacanaṃ. Saraṇanti gamanañcettha tadadhippāyena bhajanaṃ tathā jānanaṃ vāti dassento ‘‘iti iminā adhippāyenā’’tiādimāha. Tattha gacchāmītiādīsu purimassa purimassa pacchimaṃ pacchimaṃ atthavacanaṃ. Bhajanaṃ vā saraṇādhippāyena upasaṅkamanaṃ, sevanā santikāvacaratā, payirupāsanaṃ vattappaṭivattakaraṇena upaṭṭhānanti evaṃ sabbathāpi anaññasaraṇataṃyeva dīpeti. Gacchāmīti padassa kathaṃ bujjhāmīti ayamattho labbhatīti āha ‘‘yesaṃ hī’’tiādi.
ад̇хиг̇ад̇амаг̇г̇з сажчигад̇анирод̇хзд̇и бад̣̇ад̣̇ваязнаби паладтаа зва д̣̇ассид̇аа, на маг̇г̇адтаад̇и д̇з д̣̇ассзнд̇о ‘‘яат̇аанусидтам̣ бадибаж̇ж̇амаанз жаа’’д̇и ааха. нану жа галяаан̣абут̇уж̇ж̇аноби яат̇аанусидтам̣ бадибаж̇ж̇ад̇ийд̇и вужжад̇ийд̇и? гин̃жааби вужжад̇и, ниббарияааязна бана маг̇г̇адтаа зва д̇ат̇аа вад̇д̇аб̣б̣аа, на ид̇арз нияаамоггаманаабхаавад̇о. д̇ат̇аа хи д̇з зва ‘‘абааязсу абад̇амаанз д̇хаарзд̇ий’’д̇и вуд̇д̇аа. саммад̇д̇анияаамоггаманзна хи абааяавинимуд̇д̇асамбхаво. агкааяад̇ийд̇и зд̇т̇а ид̇и-сад̣̇д̣̇о аад̣̇иад̇т̇о, багаарад̇т̇о ваа. д̇зна ‘‘яаавад̇аа, бхигкавз, д̇хаммаа сан̇кад̇аа ваа асан̇кад̇аа ваа, вирааг̇о д̇зсам̣ аг̇г̇амагкааяад̇ий’’д̇и (ид̇иву. 90; а. ни. 4.34) суд̇д̇абад̣̇ам̣ сан̇г̇ан̣хаад̇и, ‘‘вид̇т̇ааро’’д̇и ваа иминаа. зд̇т̇а жа арияамаг̇г̇о нияяаанигад̇ааяа, ниб̣б̣аанам̣ д̇асса д̇ад̣̇ад̇т̇асид̣̇д̇хихзд̇уд̇ааяаад̇и убхаяамзва ниббарияааязна д̇хаммод̇и вуд̇д̇о. ниб̣б̣аанан̃хи аарамман̣абажжаяабхууд̇ам̣ лабхид̇ваа арияамаг̇г̇асса д̇ад̣̇ад̇т̇асид̣̇д̇хи, д̇ат̇ааби арияапалаанам̣ ‘‘яасмаа д̇ааяа сад̣̇д̇хааяа авуубасанд̇ааяаа’’д̇иаад̣̇иважанад̇о маг̇г̇зна самужчиннаанам̣ гилзсаанам̣ бадиббассад̣̇д̇хиббахаанагижжад̇ааяа нияяаанаануг̇ун̣ад̇ааяа нияяаанабарияосаанад̇ааяа жа. барияад̇д̇ид̇хаммасса бана нияяаанад̇хаммасамад̇хиг̇амахзд̇уд̇ааяаад̇и иминаа барияааязна вуд̇д̇анаязна д̇хаммабхааво лаб̣бхад̇и зва, свааяамад̇т̇о баатаарул̣хо зваад̇и д̣̇ассзнд̇о ‘‘на гзвала’’нд̇иаад̣̇имааха.
Adhigatamagge sacchikatanirodheti padadvayenapi phalaṭṭhā eva dassitā, na maggaṭṭhāti te dassento ‘‘yathānusiṭṭhaṃ paṭipajjamāne cā’’ti āha. Nanu ca kalyāṇaputhujjanopi yathānusiṭṭhaṃ paṭipajjatīti vuccatīti? Kiñcāpi vuccati, nippariyāyena pana maggaṭṭhā eva tathā vattabbā, na itare niyāmokkamanābhāvato. Tathā hi te eva ‘‘apāyesu apatamāne dhāretī’’ti vuttā. Sammattaniyāmokkamanena hi apāyavinimuttasambhavo. Akkhāyatīti ettha iti-saddo ādiattho, pakārattho vā. Tena ‘‘yāvatā, bhikkhave, dhammā saṅkhatā vā asaṅkhatā vā, virāgo tesaṃ aggamakkhāyatī’’ti (itivu. 90; a. ni. 4.34) suttapadaṃ saṅgaṇhāti, ‘‘vitthāro’’ti vā iminā. Ettha ca ariyamaggo niyyānikatāya, nibbānaṃ tassa tadatthasiddhihetutāyāti ubhayameva nippariyāyena dhammoti vutto. Nibbānañhi ārammaṇapaccayabhūtaṃ labhitvā ariyamaggassa tadatthasiddhi, tathāpi ariyaphalānaṃ ‘‘yasmā tāya saddhāya avūpasantāyā’’tiādivacanato maggena samucchinnānaṃ kilesānaṃ paṭippassaddhippahānakiccatāya niyyānānuguṇatāya niyyānapariyosānatāya ca. Pariyattidhammassa pana niyyānadhammasamadhigamahetutāyāti iminā pariyāyena vuttanayena dhammabhāvo labbhati eva, svāyamattho pāṭhāruḷho evāti dassento ‘‘na kevala’’ntiādimāha.
рааг̇авирааг̇од̇и маг̇г̇о гат̇ид̇од̇и гаамарааг̇о бхаварааг̇од̇и звамаад̣̇ибхзд̣̇о саб̣б̣оби рааг̇о вираж̇ж̇ад̇и бахийяад̇и зд̇знаад̇и рааг̇авирааг̇од̇и маг̇г̇о гат̇ид̇о. анзж̇амасоганд̇и паланд̇и зж̇аасан̇каад̇ааяа д̇ан̣хааяа анд̇ониж̇жхааналагкан̣асса согасса жа д̇ад̣̇уббад̇д̇ияам̣ саб̣б̣асо баригкийн̣ад̇д̇аа анзж̇амасоганд̇и палам̣ гат̇ид̇ам̣. аббадигууланд̇и авирод̇хад̣̇ийбанад̇о гзнажи авируд̣̇д̇хам̣, идтам̣ бан̣ийд̇анд̇и ваа ад̇т̇о. баг̇ун̣аруубзна бавад̇д̇ид̇ад̇д̇аа, багадтаг̇ун̣авибхааванад̇о ваа баг̇ун̣ам̣. яат̇ааха ‘‘вихим̣сасан̃н̃ий баг̇ун̣ам̣ набхаасим̣, д̇хаммам̣ бан̣ийд̇ам̣ мануж̇зсу б̣рахмз’’д̇и (ма. ни. 1.283; махаава. 9). саб̣б̣ад̇хаммагканд̇хаа гат̇ид̇аад̇и яож̇анаа. д̣̇идтисийласан̇гхаад̇знаад̇и ‘‘яааяам̣ д̣̇идти арияаа нияяаанигаа нияяаад̇и д̇аггарасса саммаа д̣̇угкагкаяааяа, д̇ат̇ааруубааяа д̣̇идтияаа д̣̇идтисааман̃н̃аг̇ад̇о вихарад̇ий’’д̇и (д̣̇ий. ни. 3.324, 356; ма. ни. 1.492; 3.54) звам̣ вуд̇д̇ааяа д̣̇идтияаа ‘‘яаани д̇аани сийлаани акан̣д̣аани ажчид̣̇д̣̇аани асаб̣алаани агаммаасаани бхуж̇иссаани вин̃н̃уббасад̇т̇аани абараамадтаани самаад̇хисам̣вад̇д̇анигаани, д̇ат̇ааруубзхи сийлзхи сийласааман̃н̃аг̇ад̇о вихарад̇ий’’д̇и (д̣̇ий. ни. 3.324, 356; ма. ни. 1.492; 3.54; а. ни. 6.12) звам̣ вуд̇д̇аанам̣ сийлаанан̃жа сам̣хад̇абхаавзна, д̣̇идтисийласааман̃н̃знаад̇и ад̇т̇о. сам̣хад̇од̇и гхадид̇о, самзд̇од̇и ад̇т̇о. арияабуг̇г̇алаа хи яад̇т̇а гад̇т̇ажи д̣̇уурз тид̇ааби ад̇д̇ано г̇ун̣асаамаг̇г̇ияаа сам̣хад̇аа зва. адта жа буг̇г̇алаа д̇хаммад̣̇асаа д̇зд̇и бурисаяуг̇ал̣авасзна жад̇д̇аароби буг̇г̇алавасзна адтзва арияад̇хаммасса бажжагкад̣̇ассаавид̇ааяа д̇хаммад̣̇асаа. д̇ийн̣и вад̇т̇ууни саран̣анд̇и г̇аманзна д̇игкад̇д̇ум̣ г̇аманзна жа д̇ийн̣и саран̣аг̇аманаани. бадивзд̣̇зсийд̇и ад̇д̇ано хад̣̇аяан̇г̇ад̇ам̣ ваажааяа бавзд̣̇зси.
Rāgavirāgoti maggo kathitoti kāmarāgo bhavarāgoti evamādibhedo sabbopi rāgo virajjati pahīyati etenāti rāgavirāgoti maggo kathito. Anejamasokanti phalanti ejāsaṅkhātāya taṇhāya antonijjhānalakkhaṇassa sokassa ca taduppattiyaṃ sabbaso parikkhīṇattā anejamasokanti phalaṃ kathitaṃ. Appaṭikūlanti avirodhadīpanato kenaci aviruddhaṃ, iṭṭhaṃ paṇītanti vā attho. Paguṇarūpena pavattitattā, pakaṭṭhaguṇavibhāvanato vā paguṇaṃ. Yathāha ‘‘vihiṃsasaññī paguṇaṃ nabhāsiṃ, dhammaṃ paṇītaṃ manujesu brahme’’ti (ma. ni. 1.283; mahāva. 9). Sabbadhammakkhandhā kathitāti yojanā. Diṭṭhisīlasaṅghātenāti ‘‘yāyaṃ diṭṭhi ariyā niyyānikā niyyāti takkarassa sammā dukkhakkhayāya, tathārūpāya diṭṭhiyā diṭṭhisāmaññagato viharatī’’ti (dī. ni. 3.324, 356; ma. ni. 1.492; 3.54) evaṃ vuttāya diṭṭhiyā ‘‘yāni tāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṃvattanikāni, tathārūpehi sīlehi sīlasāmaññagato viharatī’’ti (dī. ni. 3.324, 356; ma. ni. 1.492; 3.54; a. ni. 6.12) evaṃ vuttānaṃ sīlānañca saṃhatabhāvena, diṭṭhisīlasāmaññenāti attho. Saṃhatoti ghaṭito, sametoti attho. Ariyapuggalā hi yattha katthaci dūre ṭhitāpi attano guṇasāmaggiyā saṃhatā eva. Aṭṭha ca puggalā dhammadasā teti purisayugaḷavasena cattāropi puggalavasena aṭṭheva ariyadhammassa paccakkhadassāvitāya dhammadasā. Tīṇi vatthūni saraṇanti gamanena tikkhattuṃ gamanena ca tīṇi saraṇagamanāni. Paṭivedesīti attano hadayaṅgataṃ vācāya pavedesi.
басаннаагаарагат̇аа нидтид̇аа.
Pasannākārakathā niṭṭhitā.
