| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༦. པཱསརཱསིསུཏྟཾ
6. Pāsarāsisuttaṃ
༢༧༢. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཨཐ ཁོ བྷགཝཱ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ སཱཝཏྠིཾ པིཎྜཱཡ པཱཝིསི། ཨཐ ཁོ སམྦཧུལཱ བྷིཀྑཱུ ཡེནཱཡསྨཱ ཨཱནནྡོ ཏེནུཔསངྐམིཾསུ; ཨུཔསངྐམིཏྭཱ ཨཱཡསྨནྟཾ ཨཱནནྡཾ ཨེཏདཝོཙུཾ – ‘‘ཙིརསྶུཏཱ ནོ, ཨཱཝུསོ ཨཱནནྡ, བྷགཝཏོ སམྨུཁཱ དྷམྨཱི ཀཐཱ། སཱདྷུ མཡཾ, ཨཱཝུསོ ཨཱནནྡ, ལབྷེཡྻཱམ བྷགཝཏོ སམྨུཁཱ དྷམྨིཾ ཀཐཾ སཝནཱཡཱ’’ཏི། ‘‘ཏེན ཧཱཡསྨནྟོ ཡེན རམྨཀསྶ བྲཱཧྨཎསྶ ཨསྶམོ ཏེནུཔསངྐམཐ; ཨཔྤེཝ ནཱམ ལབྷེཡྻཱཐ བྷགཝཏོ སམྨུཁཱ དྷམྨིཾ ཀཐཾ སཝནཱཡཱ’’ཏི། ‘‘ཨེཝམཱཝུསོ’’ཏི ཁོ ཏེ བྷིཀྑཱུ ཨཱཡསྨཏོ ཨཱནནྡསྶ པཙྩསྶོསུཾ།
272. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho bhagavā pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Atha kho sambahulā bhikkhū yenāyasmā ānando tenupasaṅkamiṃsu; upasaṅkamitvā āyasmantaṃ ānandaṃ etadavocuṃ – ‘‘cirassutā no, āvuso ānanda, bhagavato sammukhā dhammī kathā. Sādhu mayaṃ, āvuso ānanda, labheyyāma bhagavato sammukhā dhammiṃ kathaṃ savanāyā’’ti. ‘‘Tena hāyasmanto yena rammakassa brāhmaṇassa assamo tenupasaṅkamatha; appeva nāma labheyyātha bhagavato sammukhā dhammiṃ kathaṃ savanāyā’’ti. ‘‘Evamāvuso’’ti kho te bhikkhū āyasmato ānandassa paccassosuṃ.
ཨཐ ཁོ བྷགཝཱ སཱཝཏྠིཡཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ ཨཱཡསྨནྟཾ ཨཱནནྡཾ ཨཱམནྟེསི – ‘‘ཨཱཡཱམཱནནྡ, ཡེན པུབྦཱརཱམོ མིགཱརམཱཏུཔཱསཱདོ ཏེནུཔསངྐམིསྶཱམ དིཝཱཝིཧཱརཱཡཱ’’ཏི། ‘‘ཨེཝཾ, བྷནྟེ’’ཏི ཁོ ཨཱཡསྨཱ ཨཱནནྡོ བྷགཝཏོ པཙྩསྶོསི། ཨཐ ཁོ བྷགཝཱ ཨཱཡསྨཏཱ ཨཱནནྡེན སདྡྷིཾ ཡེན པུབྦཱརཱམོ མིགཱརམཱཏུཔཱསཱདོ ཏེནུཔསངྐམི དིཝཱཝིཧཱརཱཡ། ཨཐ ཁོ བྷགཝཱ སཱཡནྷསམཡཾ པཊིསལླཱནཱ ཝུཊྛིཏོ ཨཱཡསྨནྟཾ ཨཱནནྡཾ ཨཱམནྟེསི – ‘‘ཨཱཡཱམཱནནྡ, ཡེན པུབྦཀོཊྛཀོ ཏེནུཔསངྐམིསྶཱམ གཏྟཱནི པརིསིཉྩིཏུ’’ནྟི། ‘‘ཨེཝཾ, བྷནྟེ’’ཏི ཁོ ཨཱཡསྨཱ ཨཱནནྡོ བྷགཝཏོ པཙྩསྶོསི།
Atha kho bhagavā sāvatthiyaṃ piṇḍāya caritvā pacchābhattaṃ piṇḍapātapaṭikkanto āyasmantaṃ ānandaṃ āmantesi – ‘‘āyāmānanda, yena pubbārāmo migāramātupāsādo tenupasaṅkamissāma divāvihārāyā’’ti. ‘‘Evaṃ, bhante’’ti kho āyasmā ānando bhagavato paccassosi. Atha kho bhagavā āyasmatā ānandena saddhiṃ yena pubbārāmo migāramātupāsādo tenupasaṅkami divāvihārāya. Atha kho bhagavā sāyanhasamayaṃ paṭisallānā vuṭṭhito āyasmantaṃ ānandaṃ āmantesi – ‘‘āyāmānanda, yena pubbakoṭṭhako tenupasaṅkamissāma gattāni parisiñcitu’’nti. ‘‘Evaṃ, bhante’’ti kho āyasmā ānando bhagavato paccassosi.
༢༧༣. ཨཐ ཁོ བྷགཝཱ ཨཱཡསྨཏཱ ཨཱནནྡེན སདྡྷིཾ ཡེན པུབྦཀོཊྛཀོ ཏེནུཔསངྐམི གཏྟཱནི པརིསིཉྩིཏུཾ། པུབྦཀོཊྛཀེ གཏྟཱནི པརིསིཉྩིཏྭཱ པཙྩུཏྟརིཏྭཱ ཨེཀཙཱིཝརོ ཨཊྛཱསི གཏྟཱནི པུབྦཱཔཡམཱནོ། ཨཐ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘ཨཡཾ, བྷནྟེ, རམྨཀསྶ བྲཱཧྨཎསྶ ཨསྶམོ ཨཝིདཱུརེ། རམཎཱིཡོ, བྷནྟེ, རམྨཀསྶ བྲཱཧྨཎསྶ ཨསྶམོ; པཱསཱདིཀོ, བྷནྟེ, རམྨཀསྶ བྲཱཧྨཎསྶ ཨསྶམོ། སཱདྷུ, བྷནྟེ, བྷགཝཱ ཡེན རམྨཀསྶ བྲཱཧྨཎསྶ ཨསྶམོ ཏེནུཔསངྐམཏུ ཨནུཀམྤཾ ཨུཔཱདཱཡཱ’’ཏི། ཨདྷིཝཱསེསི བྷགཝཱ ཏུཎྷཱིབྷཱཝེན།
273. Atha kho bhagavā āyasmatā ānandena saddhiṃ yena pubbakoṭṭhako tenupasaṅkami gattāni parisiñcituṃ. Pubbakoṭṭhake gattāni parisiñcitvā paccuttaritvā ekacīvaro aṭṭhāsi gattāni pubbāpayamāno. Atha kho āyasmā ānando bhagavantaṃ etadavoca – ‘‘ayaṃ, bhante, rammakassa brāhmaṇassa assamo avidūre. Ramaṇīyo, bhante, rammakassa brāhmaṇassa assamo; pāsādiko, bhante, rammakassa brāhmaṇassa assamo. Sādhu, bhante, bhagavā yena rammakassa brāhmaṇassa assamo tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena.
ཨཐ ཁོ བྷགཝཱ ཡེན རམྨཀསྶ བྲཱཧྨཎསྶ ཨསྶམོ ཏེནུཔསངྐམི། ཏེན ཁོ པན སམཡེན སམྦཧུལཱ བྷིཀྑཱུ རམྨཀསྶ བྲཱཧྨཎསྶ ཨསྶམེ དྷམྨིཡཱ ཀཐཱཡ སནྣིསིནྣཱ ཧོནྟི། ཨཐ ཁོ བྷགཝཱ བཧིདྭཱརཀོཊྛཀེ ཨཊྛཱསི ཀཐཱཔརིཡོསཱནཾ ཨཱགམཡམཱནོ། ཨཐ ཁོ བྷགཝཱ ཀཐཱཔརིཡོསཱནཾ ཝིདིཏྭཱ ཨུཀྐཱསིཏྭཱ ཨགྒལ༹ཾ ཨཱཀོཊེསི། ཝིཝརིཾསུ ཁོ ཏེ བྷིཀྑཱུ བྷགཝཏོ དྭཱརཾ། ཨཐ ཁོ བྷགཝཱ རམྨཀསྶ བྲཱཧྨཎསྶ ཨསྶམཾ པཝིསིཏྭཱ པཉྙཏྟེ ཨཱསནེ ནིསཱིདི། ནིསཛྫ ཁོ བྷགཝཱ བྷིཀྑཱུ ཨཱམནྟེསི – ‘‘ཀཱཡནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ? ཀཱ ཙ པན ཝོ ཨནྟརཱཀཐཱ ཝིཔྤཀཏཱ’’ཏི ? ‘‘བྷགཝནྟམེཝ ཁོ ནོ, བྷནྟེ, ཨཱརབྦྷ དྷམྨཱི ཀཐཱ ཝིཔྤཀཏཱ, ཨཐ བྷགཝཱ ཨནུཔྤཏྟོ’’ཏི། ‘‘སཱདྷུ, བྷིཀྑཝེ! ཨེཏཾ ཁོ, བྷིཀྑཝེ, ཏུམྷཱཀཾ པཏིརཱུཔཾ ཀུལཔུཏྟཱནཾ སདྡྷཱ ཨགཱརསྨཱ ཨནགཱརིཡཾ པབྦཛིཏཱནཾ ཡཾ ཏུམྷེ དྷམྨིཡཱ ཀཐཱཡ སནྣིསཱིདེཡྻཱཐ། སནྣིཔཏིཏཱནཾ ཝོ, བྷིཀྑཝེ, དྭཡཾ ཀརཎཱིཡཾ – དྷམྨཱི ཝཱ ཀཐཱ, ཨརིཡོ ཝཱ ཏུཎྷཱིབྷཱཝོ’’།
Atha kho bhagavā yena rammakassa brāhmaṇassa assamo tenupasaṅkami. Tena kho pana samayena sambahulā bhikkhū rammakassa brāhmaṇassa assame dhammiyā kathāya sannisinnā honti. Atha kho bhagavā bahidvārakoṭṭhake aṭṭhāsi kathāpariyosānaṃ āgamayamāno. Atha kho bhagavā kathāpariyosānaṃ viditvā ukkāsitvā aggaḷaṃ ākoṭesi. Vivariṃsu kho te bhikkhū bhagavato dvāraṃ. Atha kho bhagavā rammakassa brāhmaṇassa assamaṃ pavisitvā paññatte āsane nisīdi. Nisajja kho bhagavā bhikkhū āmantesi – ‘‘kāyanuttha, bhikkhave, etarahi kathāya sannisinnā? Kā ca pana vo antarākathā vippakatā’’ti ? ‘‘Bhagavantameva kho no, bhante, ārabbha dhammī kathā vippakatā, atha bhagavā anuppatto’’ti. ‘‘Sādhu, bhikkhave! Etaṃ kho, bhikkhave, tumhākaṃ patirūpaṃ kulaputtānaṃ saddhā agārasmā anagāriyaṃ pabbajitānaṃ yaṃ tumhe dhammiyā kathāya sannisīdeyyātha. Sannipatitānaṃ vo, bhikkhave, dvayaṃ karaṇīyaṃ – dhammī vā kathā, ariyo vā tuṇhībhāvo’’.
༢༧༤. ‘‘དྭེམཱ, བྷིཀྑཝེ, པརིཡེསནཱ – ཨརིཡཱ ཙ པརིཡེསནཱ, ཨནརིཡཱ ཙ པརིཡེསནཱ།
274. ‘‘Dvemā, bhikkhave, pariyesanā – ariyā ca pariyesanā, anariyā ca pariyesanā.
‘‘ཀཏམཱ ཙ, བྷིཀྑཝེ, ཨནརིཡཱ པརིཡེསནཱ? ཨིདྷ, བྷིཀྑཝེ, ཨེཀཙྩོ ཨཏྟནཱ ཛཱཏིདྷམྨོ སམཱནོ ཛཱཏིདྷམྨཾཡེཝ པརིཡེསཏི, ཨཏྟནཱ ཛརཱདྷམྨོ སམཱནོ ཛརཱདྷམྨཾཡེཝ པརིཡེསཏི, ཨཏྟནཱ བྱཱདྷིདྷམྨོ སམཱནོ བྱཱདྷིདྷམྨཾཡེཝ པརིཡེསཏི, ཨཏྟནཱ མརཎདྷམྨོ སམཱནོ མརཎདྷམྨཾཡེཝ པརིཡེསཏི, ཨཏྟནཱ སོཀདྷམྨོ སམཱནོ སོཀདྷམྨཾཡེཝ པརིཡེསཏི, ཨཏྟནཱ སཾཀིལེསདྷམྨོ སམཱནོ སཾཀིལེསདྷམྨཾཡེཝ པརིཡེསཏི།
‘‘Katamā ca, bhikkhave, anariyā pariyesanā? Idha, bhikkhave, ekacco attanā jātidhammo samāno jātidhammaṃyeva pariyesati, attanā jarādhammo samāno jarādhammaṃyeva pariyesati, attanā byādhidhammo samāno byādhidhammaṃyeva pariyesati, attanā maraṇadhammo samāno maraṇadhammaṃyeva pariyesati, attanā sokadhammo samāno sokadhammaṃyeva pariyesati, attanā saṃkilesadhammo samāno saṃkilesadhammaṃyeva pariyesati.
‘‘ཀིཉྩ, བྷིཀྑཝེ, ཛཱཏིདྷམྨཾ ཝདེཐ? པུཏྟབྷརིཡཾ, བྷིཀྑཝེ, ཛཱཏིདྷམྨཾ, དཱསིདཱསཾ ཛཱཏིདྷམྨཾ, ཨཛེལ༹ཀཾ ཛཱཏིདྷམྨཾ, ཀུཀྐུཊསཱུཀརཾ ཛཱཏིདྷམྨཾ, ཧཏྠིགཝཱསྶཝལ༹ཝཾ ཛཱཏིདྷམྨཾ, ཛཱཏརཱུཔརཛཏཾ ཛཱཏིདྷམྨཾ། ཛཱཏིདྷམྨཱ ཧེཏེ, བྷིཀྑཝེ, ཨུཔདྷཡོ། ཨེཏྠཱཡཾ གཐིཏོ 1 མུཙྪིཏོ ཨཛ྄ཛྷཱཔནྣོ ཨཏྟནཱ ཛཱཏིདྷམྨོ སམཱནོ ཛཱཏིདྷམྨཾཡེཝ པརིཡེསཏི།
‘‘Kiñca, bhikkhave, jātidhammaṃ vadetha? Puttabhariyaṃ, bhikkhave, jātidhammaṃ, dāsidāsaṃ jātidhammaṃ, ajeḷakaṃ jātidhammaṃ, kukkuṭasūkaraṃ jātidhammaṃ, hatthigavāssavaḷavaṃ jātidhammaṃ, jātarūparajataṃ jātidhammaṃ. Jātidhammā hete, bhikkhave, upadhayo. Etthāyaṃ gathito 2 mucchito ajjhāpanno attanā jātidhammo samāno jātidhammaṃyeva pariyesati.
‘‘ཀིཉྩ, བྷིཀྑཝེ, ཛརཱདྷམྨཾ ཝདེཐ? པུཏྟབྷརིཡཾ, བྷིཀྑཝེ, ཛརཱདྷམྨཾ, དཱསིདཱསཾ ཛརཱདྷམྨཾ, ཨཛེལ༹ཀཾ ཛརཱདྷམྨཾ, ཀུཀྐུཊསཱུཀརཾ ཛརཱདྷམྨཾ, ཧཏྠིགཝཱསྶཝལ༹ཝཾ ཛརཱདྷམྨཾ , ཛཱཏརཱུཔརཛཏཾ ཛརཱདྷམྨཾ། ཛརཱདྷམྨཱ ཧེཏེ, བྷིཀྑཝེ, ཨུཔདྷཡོ། ཨེཏྠཱཡཾ གཐིཏོ མུཙྪིཏོ ཨཛ྄ཛྷཱཔནྣོ ཨཏྟནཱ ཛརཱདྷམྨོ སམཱནོ ཛརཱདྷམྨཾཡེཝ པརིཡེསཏི།
‘‘Kiñca, bhikkhave, jarādhammaṃ vadetha? Puttabhariyaṃ, bhikkhave, jarādhammaṃ, dāsidāsaṃ jarādhammaṃ, ajeḷakaṃ jarādhammaṃ, kukkuṭasūkaraṃ jarādhammaṃ, hatthigavāssavaḷavaṃ jarādhammaṃ , jātarūparajataṃ jarādhammaṃ. Jarādhammā hete, bhikkhave, upadhayo. Etthāyaṃ gathito mucchito ajjhāpanno attanā jarādhammo samāno jarādhammaṃyeva pariyesati.
‘‘ཀིཉྩ, བྷིཀྑཝེ, བྱཱདྷིདྷམྨཾ ཝདེཐ? པུཏྟབྷརིཡཾ, བྷིཀྑཝེ, བྱཱདྷིདྷམྨཾ, དཱསིདཱསཾ བྱཱདྷིདྷམྨཾ, ཨཛེལ༹ཀཾ བྱཱདྷིདྷམྨཾ, ཀུཀྐུཊསཱུཀརཾ བྱཱདྷིདྷམྨཾ, ཧཏྠིགཝཱསྶཝལ༹ཝཾ བྱཱདྷིདྷམྨཾ། བྱཱདྷིདྷམྨཱ ཧེཏེ, བྷིཀྑཝེ, ཨུཔདྷཡོ། ཨེཏྠཱཡཾ གཐིཏོ མུཙྪིཏོ ཨཛ྄ཛྷཱཔནྣོ ཨཏྟནཱ བྱཱདྷིདྷམྨོ སམཱནོ བྱཱདྷིདྷམྨཾཡེཝ པརིཡེསཏི།
‘‘Kiñca, bhikkhave, byādhidhammaṃ vadetha? Puttabhariyaṃ, bhikkhave, byādhidhammaṃ, dāsidāsaṃ byādhidhammaṃ, ajeḷakaṃ byādhidhammaṃ, kukkuṭasūkaraṃ byādhidhammaṃ, hatthigavāssavaḷavaṃ byādhidhammaṃ. Byādhidhammā hete, bhikkhave, upadhayo. Etthāyaṃ gathito mucchito ajjhāpanno attanā byādhidhammo samāno byādhidhammaṃyeva pariyesati.
‘‘ཀིཉྩ, བྷིཀྑཝེ, མརཎདྷམྨཾ ཝདེཐ? པུཏྟབྷརིཡཾ, བྷིཀྑཝེ, མརཎདྷམྨཾ, དཱསིདཱསཾ མརཎདྷམྨཾ, ཨཛེལ༹ཀཾ མརཎདྷམྨཾ, ཀུཀྐུཊསཱུཀརཾ མརཎདྷམྨཾ, ཧཏྠིགཝཱསྶཝལ༹ཝཾ མརཎདྷམྨཾ། མརཎདྷམྨཱ ཧེཏེ, བྷིཀྑཝེ, ཨུཔདྷཡོ། ཨེཏྠཱཡཾ གཐིཏོ མུཙྪིཏོ ཨཛ྄ཛྷཱཔནྣོ ཨཏྟནཱ མརཎདྷམྨོ སམཱནོ མརཎདྷམྨཾཡེཝ པརིཡེསཏི།
‘‘Kiñca, bhikkhave, maraṇadhammaṃ vadetha? Puttabhariyaṃ, bhikkhave, maraṇadhammaṃ, dāsidāsaṃ maraṇadhammaṃ, ajeḷakaṃ maraṇadhammaṃ, kukkuṭasūkaraṃ maraṇadhammaṃ, hatthigavāssavaḷavaṃ maraṇadhammaṃ. Maraṇadhammā hete, bhikkhave, upadhayo. Etthāyaṃ gathito mucchito ajjhāpanno attanā maraṇadhammo samāno maraṇadhammaṃyeva pariyesati.
‘‘ཀིཉྩ, བྷིཀྑཝེ, སོཀདྷམྨཾ ཝདེཐ? པུཏྟབྷརིཡཾ, བྷིཀྑཝེ, སོཀདྷམྨཾ, དཱསིདཱསཾ སོཀདྷམྨཾ, ཨཛེལ༹ཀཾ སོཀདྷམྨཾ, ཀུཀྐུཊསཱུཀརཾ སོཀདྷམྨཾ, ཧཏྠིགཝཱསྶཝལ༹ཝཾ སོཀདྷམྨཾ། སོཀདྷམྨཱ ཧེཏེ, བྷིཀྑཝེ, ཨུཔདྷཡོ། ཨེཏྠཱཡཾ གཐིཏོ མུཙྪིཏོ ཨཛ྄ཛྷཱཔནྣོ ཨཏྟནཱ སོཀདྷམྨོ སམཱནོ སོཀདྷམྨཾཡེཝ པརིཡེསཏི།
‘‘Kiñca, bhikkhave, sokadhammaṃ vadetha? Puttabhariyaṃ, bhikkhave, sokadhammaṃ, dāsidāsaṃ sokadhammaṃ, ajeḷakaṃ sokadhammaṃ, kukkuṭasūkaraṃ sokadhammaṃ, hatthigavāssavaḷavaṃ sokadhammaṃ. Sokadhammā hete, bhikkhave, upadhayo. Etthāyaṃ gathito mucchito ajjhāpanno attanā sokadhammo samāno sokadhammaṃyeva pariyesati.
‘‘ཀིཉྩ, བྷིཀྑཝེ, སཾཀིལེསདྷམྨཾ ཝདེཐ? པུཏྟབྷརིཡཾ, བྷིཀྑཝེ, སཾཀིལེསདྷམྨཾ, དཱསིདཱསཾ སཾཀིལེསདྷམྨཾ, ཨཛེལ༹ཀཾ སཾཀིལེསདྷམྨཾ , ཀུཀྐུཊསཱུཀརཾ སཾཀིལེསདྷམྨཾ, ཧཏྠིགཝཱསྶཝལ༹ཝཾ སཾཀིལེསདྷམྨཾ, ཛཱཏརཱུཔརཛཏཾ སཾཀིལེསདྷམྨཾ། སཾཀིལེསདྷམྨཱ ཧེཏེ, བྷིཀྑཝེ, ཨུཔདྷཡོ། ཨེཏྠཱཡཾ གཐིཏོ མུཙྪིཏོ ཨཛ྄ཛྷཱཔནྣོ ཨཏྟནཱ སཾཀིལེསདྷམྨོ སམཱནོ སཾཀིལེསདྷམྨཾཡེཝ པརིཡེསཏི། ཨཡཾ, བྷིཀྑཝེ, ཨནརིཡཱ པརིཡེསནཱ།
‘‘Kiñca, bhikkhave, saṃkilesadhammaṃ vadetha? Puttabhariyaṃ, bhikkhave, saṃkilesadhammaṃ, dāsidāsaṃ saṃkilesadhammaṃ, ajeḷakaṃ saṃkilesadhammaṃ , kukkuṭasūkaraṃ saṃkilesadhammaṃ, hatthigavāssavaḷavaṃ saṃkilesadhammaṃ, jātarūparajataṃ saṃkilesadhammaṃ. Saṃkilesadhammā hete, bhikkhave, upadhayo. Etthāyaṃ gathito mucchito ajjhāpanno attanā saṃkilesadhammo samāno saṃkilesadhammaṃyeva pariyesati. Ayaṃ, bhikkhave, anariyā pariyesanā.
༢༧༥. ‘‘ཀཏམཱ ཙ, བྷིཀྑཝེ, ཨརིཡཱ པརིཡེསནཱ? ཨིདྷ, བྷིཀྑཝེ, ཨེཀཙྩོ ཨཏྟནཱ ཛཱཏིདྷམྨོ སམཱནོ ཛཱཏིདྷམྨེ ཨཱདཱིནཝཾ ཝིདིཏྭཱ ཨཛཱཏཾ ཨནུཏྟརཾ ཡོགཀྑེམཾ ནིབྦཱནཾ པརིཡེསཏི, ཨཏྟནཱ ཛརཱདྷམྨོ སམཱནོ ཛརཱདྷམྨེ ཨཱདཱིནཝཾ ཝིདིཏྭཱ ཨཛརཾ ཨནུཏྟརཾ ཡོགཀྑེམཾ ནིབྦཱནཾ པརིཡེསཏི, ཨཏྟནཱ བྱཱདྷིདྷམྨོ སམཱནོ བྱཱདྷིདྷམྨེ ཨཱདཱིནཝཾ ཝིདིཏྭཱ ཨབྱཱདྷིཾ ཨནུཏྟརཾ ཡོགཀྑེམཾ ནིབྦཱནཾ པརིཡེསཏི, ཨཏྟནཱ མརཎདྷམྨོ སམཱནོ མརཎདྷམྨེ ཨཱདཱིནཝཾ ཝིདིཏྭཱ ཨམཏཾ ཨནུཏྟརཾ ཡོགཀྑེམཾ ནིབྦཱནཾ པརིཡེསཏི, ཨཏྟནཱ སོཀདྷམྨོ སམཱནོ སོཀདྷམྨེ ཨཱདཱིནཝཾ ཝིདིཏྭཱ ཨསོཀཾ ཨནུཏྟརཾ ཡོགཀྑེམཾ ནིབྦཱནཾ པརིཡེསཏི, ཨཏྟནཱ སཾཀིལེསདྷམྨོ སམཱནོ སཾཀིལེསདྷམྨེ ཨཱདཱིནཝཾ ཝིདིཏྭཱ ཨསཾཀིལིཊྛཾ ཨནུཏྟརཾ ཡོགཀྑེམཾ ནིབྦཱནཾ པརིཡེསཏི། ཨཡཾ, བྷིཀྑཝེ, ཨརིཡཱ པརིཡེསནཱ།
275. ‘‘Katamā ca, bhikkhave, ariyā pariyesanā? Idha, bhikkhave, ekacco attanā jātidhammo samāno jātidhamme ādīnavaṃ viditvā ajātaṃ anuttaraṃ yogakkhemaṃ nibbānaṃ pariyesati, attanā jarādhammo samāno jarādhamme ādīnavaṃ viditvā ajaraṃ anuttaraṃ yogakkhemaṃ nibbānaṃ pariyesati, attanā byādhidhammo samāno byādhidhamme ādīnavaṃ viditvā abyādhiṃ anuttaraṃ yogakkhemaṃ nibbānaṃ pariyesati, attanā maraṇadhammo samāno maraṇadhamme ādīnavaṃ viditvā amataṃ anuttaraṃ yogakkhemaṃ nibbānaṃ pariyesati, attanā sokadhammo samāno sokadhamme ādīnavaṃ viditvā asokaṃ anuttaraṃ yogakkhemaṃ nibbānaṃ pariyesati, attanā saṃkilesadhammo samāno saṃkilesadhamme ādīnavaṃ viditvā asaṃkiliṭṭhaṃ anuttaraṃ yogakkhemaṃ nibbānaṃ pariyesati. Ayaṃ, bhikkhave, ariyā pariyesanā.
༢༧༦. ‘‘ཨཧམྤི སུདཾ, བྷིཀྑཝེ, པུབྦེཝ སམྦོདྷཱ ཨནབྷིསམྦུདྡྷོ བོདྷིསཏྟོཝ སམཱནོ ཨཏྟནཱ ཛཱཏིདྷམྨོ སམཱནོ ཛཱཏིདྷམྨཾཡེཝ པརིཡེསཱམི, ཨཏྟནཱ ཛརཱདྷམྨོ སམཱནོ ཛརཱདྷམྨཾཡེཝ པརིཡེསཱམི, ཨཏྟནཱ བྱཱདྷིདྷམྨོ སམཱནོ བྱཱདྷིདྷམྨཾཡེཝ པརིཡེསཱམི, ཨཏྟནཱ མརཎདྷམྨོ སམཱནོ མརཎདྷམྨཾཡེཝ པརིཡེསཱམི, ཨཏྟནཱ སོཀདྷམྨོ སམཱནོ སོཀདྷམྨཾཡེཝ པརིཡེསཱམི, ཨཏྟནཱ སཾཀིལེསདྷམྨོ སམཱནོ སཾཀིལེསདྷམྨཾཡེཝ པརིཡེསཱམི། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ཀིཾ ནུ ཁོ ཨཧཾ ཨཏྟནཱ ཛཱཏིདྷམྨོ སམཱནོ ཛཱཏིདྷམྨཾཡེཝ པརིཡེསཱམི, ཨཏྟནཱ ཛརཱདྷམྨོ སམཱནོ…པེ॰… བྱཱདྷིདྷམྨོ སམཱནོ… མརཎདྷམྨོ སམཱནོ… སོཀདྷམྨོ སམཱནོ… ཨཏྟནཱ སཾཀིལེསདྷམྨོ སམཱནོ སཾཀིལེསདྷམྨཾཡེཝ པརིཡེསཱམི? ཡཾནཱུནཱཧཾ ཨཏྟནཱ ཛཱཏིདྷམྨོ སམཱནོ ཛཱཏིདྷམྨེ ཨཱདཱིནཝཾ ཝིདིཏྭཱ ཨཛཱཏཾ ཨནུཏྟརཾ ཡོགཀྑེམཾ ནིབྦཱནཾ པརིཡེསེཡྻཾ, ཨཏྟནཱ ཛརཱདྷམྨོ སམཱནོ ཛརཱདྷམྨེ ཨཱདཱིནཝཾ ཝིདིཏྭཱ ཨཛརཾ ཨནུཏྟརཾ ཡོགཀྑེམཾ ནིབྦཱནཾ པརིཡེསེཡྻཾ, ཨཏྟནཱ བྱཱདྷིདྷམྨོ སམཱནོ བྱཱདྷིདྷམྨེ ཨཱདཱིནཝཾ ཝིདིཏྭཱ ཨབྱཱདྷིཾ ཨནུཏྟརཾ ཡོགཀྑེམཾ ནིབྦཱནཾ པརིཡེསེཡྻཾ, ཨཏྟནཱ མརཎདྷམྨོ སམཱནོ མརཎདྷམྨེ ཨཱདཱིནཝཾ ཝིདིཏྭཱ ཨམཏཾ ཨནུཏྟརཾ ཡོགཀྑེམཾ ནིབྦཱནཾ པརིཡེསེཡྻཾ, ཨཏྟནཱ སོཀདྷམྨོ སམཱནོ སོཀདྷམྨེ ཨཱདཱིནཝཾ ཝིདིཏྭཱ ཨསོཀཾ ཨནུཏྟརཾ ཡོགཀྑེམཾ ནིབྦཱནཾ པརིཡེསེཡྻཾ, ཨཏྟནཱ སཾཀིལེསདྷམྨོ སམཱནོ སཾཀིལེསདྷམྨེ ཨཱདཱིནཝཾ ཝིདིཏྭཱ ཨསཾཀིལིཊྛཾ ཨནུཏྟརཾ ཡོགཀྑེམཾ ནིབྦཱནཾ པརིཡེསེཡྻ’ནྟི།
276. ‘‘Ahampi sudaṃ, bhikkhave, pubbeva sambodhā anabhisambuddho bodhisattova samāno attanā jātidhammo samāno jātidhammaṃyeva pariyesāmi, attanā jarādhammo samāno jarādhammaṃyeva pariyesāmi, attanā byādhidhammo samāno byādhidhammaṃyeva pariyesāmi, attanā maraṇadhammo samāno maraṇadhammaṃyeva pariyesāmi, attanā sokadhammo samāno sokadhammaṃyeva pariyesāmi, attanā saṃkilesadhammo samāno saṃkilesadhammaṃyeva pariyesāmi. Tassa mayhaṃ, bhikkhave, etadahosi – ‘kiṃ nu kho ahaṃ attanā jātidhammo samāno jātidhammaṃyeva pariyesāmi, attanā jarādhammo samāno…pe… byādhidhammo samāno… maraṇadhammo samāno… sokadhammo samāno… attanā saṃkilesadhammo samāno saṃkilesadhammaṃyeva pariyesāmi? Yaṃnūnāhaṃ attanā jātidhammo samāno jātidhamme ādīnavaṃ viditvā ajātaṃ anuttaraṃ yogakkhemaṃ nibbānaṃ pariyeseyyaṃ, attanā jarādhammo samāno jarādhamme ādīnavaṃ viditvā ajaraṃ anuttaraṃ yogakkhemaṃ nibbānaṃ pariyeseyyaṃ, attanā byādhidhammo samāno byādhidhamme ādīnavaṃ viditvā abyādhiṃ anuttaraṃ yogakkhemaṃ nibbānaṃ pariyeseyyaṃ, attanā maraṇadhammo samāno maraṇadhamme ādīnavaṃ viditvā amataṃ anuttaraṃ yogakkhemaṃ nibbānaṃ pariyeseyyaṃ, attanā sokadhammo samāno sokadhamme ādīnavaṃ viditvā asokaṃ anuttaraṃ yogakkhemaṃ nibbānaṃ pariyeseyyaṃ, attanā saṃkilesadhammo samāno saṃkilesadhamme ādīnavaṃ viditvā asaṃkiliṭṭhaṃ anuttaraṃ yogakkhemaṃ nibbānaṃ pariyeseyya’nti.
༢༧༧. ‘‘སོ ཁོ ཨཧཾ, བྷིཀྑཝེ, ཨཔརེན སམཡེན དཧརོཝ སམཱནོ སུསུཀཱལ༹ཀེསོ , བྷདྲེན ཡོབྦནེན སམནྣཱགཏོ པཋམེན ཝཡསཱ ཨཀཱམཀཱནཾ མཱཏཱཔིཏཱུནཾ ཨསྶུམུཁཱནཾ རུདནྟཱནཾ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛིཾ། སོ ཨེཝཾ པབྦཛིཏོ སམཱནོ ཀིཾ ཀུསལགཝེསཱི 3 ཨནུཏྟརཾ སནྟིཝརཔདཾ པརིཡེསམཱནོ ཡེན ཨཱལཱ༹རོ ཀཱལཱམོ ཏེནུཔསངྐམིཾ། ཨུཔསངྐམིཏྭཱ ཨཱལཱ༹རཾ ཀཱལཱམཾ ཨེཏདཝོཙཾ – ‘ཨིཙྪཱམཧཾ, ཨཱཝུསོ ཀཱལཱམ, ཨིམསྨིཾ དྷམྨཝིནཡེ བྲཧྨཙརིཡཾ ཙརིཏུ’ནྟི། ཨེཝཾ ཝུཏྟེ, བྷིཀྑཝེ, ཨཱལཱ༹རོ ཀཱལཱམོ མཾ ཨེཏདཝོཙ – ‘ཝིཧརཏཱཡསྨཱ; ཏཱདིསོ ཨཡཾ དྷམྨོ ཡཏྠ ཝིཉྙཱུ པུརིསོ ནཙིརསྶེཝ སཀཾ ཨཱཙརིཡཀཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརེཡྻཱ’ཏི། སོ ཁོ ཨཧཾ, བྷིཀྑཝེ, ནཙིརསྶེཝ ཁིཔྤམེཝ ཏཾ དྷམྨཾ པརིཡཱཔུཎིཾ། སོ ཁོ ཨཧཾ, བྷིཀྑཝེ, ཏཱཝཏཀེནེཝ ཨོཊྛཔཧཏམཏྟེན ལཔིཏལཱཔནམཏྟེན ཉཱཎཝཱདཉྩ ཝདཱམི ཐེརཝཱདཉྩ, ‘ཛཱནཱམི པསྶཱམཱི’ཏི ཙ པཊིཛཱནཱམི ཨཧཉྩེཝ ཨཉྙེ ཙ། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ན ཁོ ཨཱལཱ༹རོ ཀཱལཱམོ ཨིམཾ དྷམྨཾ ཀེཝལཾ སདྡྷཱམཏྟཀེན སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཱམཱིཏི པཝེདེཏི; ཨདྡྷཱ ཨཱལཱ༹རོ ཀཱལཱམོ ཨིམཾ དྷམྨཾ ཛཱནཾ པསྶཾ ཝིཧརཏཱི’ཏི།
277. ‘‘So kho ahaṃ, bhikkhave, aparena samayena daharova samāno susukāḷakeso , bhadrena yobbanena samannāgato paṭhamena vayasā akāmakānaṃ mātāpitūnaṃ assumukhānaṃ rudantānaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajiṃ. So evaṃ pabbajito samāno kiṃ kusalagavesī 4 anuttaraṃ santivarapadaṃ pariyesamāno yena āḷāro kālāmo tenupasaṅkamiṃ. Upasaṅkamitvā āḷāraṃ kālāmaṃ etadavocaṃ – ‘icchāmahaṃ, āvuso kālāma, imasmiṃ dhammavinaye brahmacariyaṃ caritu’nti. Evaṃ vutte, bhikkhave, āḷāro kālāmo maṃ etadavoca – ‘viharatāyasmā; tādiso ayaṃ dhammo yattha viññū puriso nacirasseva sakaṃ ācariyakaṃ sayaṃ abhiññā sacchikatvā upasampajja vihareyyā’ti. So kho ahaṃ, bhikkhave, nacirasseva khippameva taṃ dhammaṃ pariyāpuṇiṃ. So kho ahaṃ, bhikkhave, tāvatakeneva oṭṭhapahatamattena lapitalāpanamattena ñāṇavādañca vadāmi theravādañca, ‘jānāmi passāmī’ti ca paṭijānāmi ahañceva aññe ca. Tassa mayhaṃ, bhikkhave, etadahosi – ‘na kho āḷāro kālāmo imaṃ dhammaṃ kevalaṃ saddhāmattakena sayaṃ abhiññā sacchikatvā upasampajja viharāmīti pavedeti; addhā āḷāro kālāmo imaṃ dhammaṃ jānaṃ passaṃ viharatī’ti.
‘‘ཨཐ ཁྭཱཧཾ, བྷིཀྑཝེ, ཡེན ཨཱལཱ༹རོ ཀཱལཱམོ ཏེནུཔསངྐམིཾ; ཨུཔསངྐམིཏྭཱ ཨཱལཱ༹རཾ ཀཱལཱམཾ ཨེཏདཝོཙཾ – ‘ཀིཏྟཱཝཏཱ ནོ, ཨཱཝུསོ ཀཱལཱམ, ཨིམཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཱམཱིཏི པཝེདེསཱི’ཏི 5? ཨེཝཾ ཝུཏྟེ, བྷིཀྑཝེ, ཨཱལཱ༹རོ ཀཱལཱམོ ཨཱཀིཉྩཉྙཱཡཏནཾ པཝེདེསི། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ན ཁོ ཨཱལཱ༹རསྶེཝ ཀཱལཱམསྶ ཨཏྠི སདྡྷཱ, མཡ྄ཧཾཔཏྠི སདྡྷཱ; ན ཁོ ཨཱལཱ༹རསྶེཝ ཀཱལཱམསྶ ཨཏྠི ཝཱིརིཡཾ, མཡ྄ཧཾཔཏྠི ཝཱིརིཡཾ; ན ཁོ ཨཱལཱ༹རསྶེཝ ཀཱལཱམསྶ ཨཏྠི སཏི, མཡ྄ཧཾཔཏྠི སཏི; ན ཁོ ཨཱལཱ༹རསྶེཝ ཀཱལཱམསྶ ཨཏྠི སམཱདྷི, མཡ྄ཧཾཔཏྠི སམཱདྷི; ན ཁོ ཨཱལཱ༹རསྶེཝ ཀཱལཱམསྶ ཨཏྠི པཉྙཱ, མཡ྄ཧཾཔཏྠི པཉྙཱ། ཡཾནཱུནཱཧཾ ཡཾ དྷམྨཾ ཨཱལཱ༹རོ ཀཱལཱམོ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཱམཱིཏི པཝེདེཏི, ཏསྶ དྷམྨསྶ སཙྪིཀིརིཡཱཡ པདཧེཡྻ’ནྟི། སོ ཁོ ཨཧཾ, བྷིཀྑཝེ, ནཙིརསྶེཝ ཁིཔྤམེཝ ཏཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧཱསིཾ།
‘‘Atha khvāhaṃ, bhikkhave, yena āḷāro kālāmo tenupasaṅkamiṃ; upasaṅkamitvā āḷāraṃ kālāmaṃ etadavocaṃ – ‘kittāvatā no, āvuso kālāma, imaṃ dhammaṃ sayaṃ abhiññā sacchikatvā upasampajja viharāmīti pavedesī’ti 6? Evaṃ vutte, bhikkhave, āḷāro kālāmo ākiñcaññāyatanaṃ pavedesi. Tassa mayhaṃ, bhikkhave, etadahosi – ‘na kho āḷārasseva kālāmassa atthi saddhā, mayhaṃpatthi saddhā; na kho āḷārasseva kālāmassa atthi vīriyaṃ, mayhaṃpatthi vīriyaṃ; na kho āḷārasseva kālāmassa atthi sati, mayhaṃpatthi sati; na kho āḷārasseva kālāmassa atthi samādhi, mayhaṃpatthi samādhi; na kho āḷārasseva kālāmassa atthi paññā, mayhaṃpatthi paññā. Yaṃnūnāhaṃ yaṃ dhammaṃ āḷāro kālāmo sayaṃ abhiññā sacchikatvā upasampajja viharāmīti pavedeti, tassa dhammassa sacchikiriyāya padaheyya’nti. So kho ahaṃ, bhikkhave, nacirasseva khippameva taṃ dhammaṃ sayaṃ abhiññā sacchikatvā upasampajja vihāsiṃ.
‘‘ཨཐ ཁྭཱཧཾ, བྷིཀྑཝེ, ཡེན ཨཱལཱ༹རོ ཀཱལཱམོ ཏེནུཔསངྐམིཾ; ཨུཔསངྐམིཏྭཱ ཨཱལཱ༹རཾ ཀཱལཱམཾ ཨེཏདཝོཙཾ –
‘‘Atha khvāhaṃ, bhikkhave, yena āḷāro kālāmo tenupasaṅkamiṃ; upasaṅkamitvā āḷāraṃ kālāmaṃ etadavocaṃ –
‘ཨེཏྟཱཝཏཱ ནོ, ཨཱཝུསོ ཀཱལཱམ, ཨིམཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ པཝེདེསཱི’ཏི?
‘Ettāvatā no, āvuso kālāma, imaṃ dhammaṃ sayaṃ abhiññā sacchikatvā upasampajja pavedesī’ti?
‘ཨེཏྟཱཝཏཱ ཁོ ཨཧཾ, ཨཱཝུསོ, ཨིམཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ པཝེདེམཱི’ཏི།
‘Ettāvatā kho ahaṃ, āvuso, imaṃ dhammaṃ sayaṃ abhiññā sacchikatvā upasampajja pavedemī’ti.
‘ཨཧམྤི ཁོ, ཨཱཝུསོ, ཨེཏྟཱཝཏཱ ཨིམཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཱམཱི’ཏི།
‘Ahampi kho, āvuso, ettāvatā imaṃ dhammaṃ sayaṃ abhiññā sacchikatvā upasampajja viharāmī’ti.
‘ལཱབྷཱ ནོ, ཨཱཝུསོ, སུལདྡྷཾ ནོ, ཨཱཝུསོ, ཡེ མཡཾ ཨཱཡསྨནྟཾ ཏཱདིསཾ སབྲཧྨཙཱརིཾ པསྶཱམ། ཨིཏི ཡཱཧཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ པཝེདེམི ཏཾ ཏྭཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརསི། ཡཾ ཏྭཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརསི ཏམཧཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ པཝེདེམི། ཨིཏི ཡཱཧཾ དྷམྨཾ ཛཱནཱམི ཏཾ ཏྭཾ དྷམྨཾ ཛཱནཱསི, ཡཾ ཏྭཾ དྷམྨཾ ཛཱནཱསི ཏམཧཾ དྷམྨཾ ཛཱནཱམི། ཨིཏི ཡཱདིསོ ཨཧཾ ཏཱདིསོ ཏུཝཾ, ཡཱདིསོ ཏུཝཾ ཏཱདིསོ ཨཧཾ། ཨེཧི དཱནི, ཨཱཝུསོ, ཨུབྷོཝ སནྟཱ ཨིམཾ གཎཾ པརིཧརཱམཱ’ཏི། ཨིཏི ཁོ, བྷིཀྑཝེ, ཨཱལཱ༹རོ ཀཱལཱམོ ཨཱཙརིཡོ མེ སམཱནོ (ཨཏྟནོ) 7 ཨནྟེཝཱསིཾ མཾ སམཱནཾ ཨཏྟནཱ 8 སམསམཾ ཋཔེསི, ཨུལཱ༹རཱཡ ཙ མཾ པཱུཛཱཡ པཱུཛེསི། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ནཱཡཾ དྷམྨོ ནིབྦིདཱཡ ན ཝིརཱགཱཡ ན ནིརོདྷཱཡ ན ཨུཔསམཱཡ ན ཨབྷིཉྙཱཡ ན སམྦོདྷཱཡ ན ནིབྦཱནཱཡ སཾཝཏྟཏི, ཡཱཝདེཝ ཨཱཀིཉྩཉྙཱཡཏནཱུཔཔཏྟིཡཱ’ཏི། སོ ཁོ ཨཧཾ, བྷིཀྑཝེ, ཏཾ དྷམྨཾ ཨནལངྐརིཏྭཱ ཏསྨཱ དྷམྨཱ ནིབྦིཛྫ ཨཔཀྐམིཾ།
‘Lābhā no, āvuso, suladdhaṃ no, āvuso, ye mayaṃ āyasmantaṃ tādisaṃ sabrahmacāriṃ passāma. Iti yāhaṃ dhammaṃ sayaṃ abhiññā sacchikatvā upasampajja pavedemi taṃ tvaṃ dhammaṃ sayaṃ abhiññā sacchikatvā upasampajja viharasi. Yaṃ tvaṃ dhammaṃ sayaṃ abhiññā sacchikatvā upasampajja viharasi tamahaṃ dhammaṃ sayaṃ abhiññā sacchikatvā upasampajja pavedemi. Iti yāhaṃ dhammaṃ jānāmi taṃ tvaṃ dhammaṃ jānāsi, yaṃ tvaṃ dhammaṃ jānāsi tamahaṃ dhammaṃ jānāmi. Iti yādiso ahaṃ tādiso tuvaṃ, yādiso tuvaṃ tādiso ahaṃ. Ehi dāni, āvuso, ubhova santā imaṃ gaṇaṃ pariharāmā’ti. Iti kho, bhikkhave, āḷāro kālāmo ācariyo me samāno (attano) 9 antevāsiṃ maṃ samānaṃ attanā 10 samasamaṃ ṭhapesi, uḷārāya ca maṃ pūjāya pūjesi. Tassa mayhaṃ, bhikkhave, etadahosi – ‘nāyaṃ dhammo nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati, yāvadeva ākiñcaññāyatanūpapattiyā’ti. So kho ahaṃ, bhikkhave, taṃ dhammaṃ analaṅkaritvā tasmā dhammā nibbijja apakkamiṃ.
༢༧༨. ‘‘སོ ཁོ ཨཧཾ, བྷིཀྑཝེ, ཀིཾ ཀུསལགཝེསཱི ཨནུཏྟརཾ སནྟིཝརཔདཾ པརིཡེསམཱནོ ཡེན ཨུདཀོ 11 རཱམཔུཏྟོ ཏེནུཔསངྐམིཾ; ཨུཔསངྐམིཏྭཱ ཨུདཀཾ རཱམཔུཏྟཾ ཨེཏདཝོཙཾ – ‘ཨིཙྪཱམཧཾ, ཨཱཝུསོ 12, ཨིམསྨིཾ དྷམྨཝིནཡེ བྲཧྨཙརིཡཾ ཙརིཏུ’ནྟི། ཨེཝཾ ཝུཏྟེ, བྷིཀྑཝེ, ཨུདཀོ རཱམཔུཏྟོ མཾ ཨེཏདཝོཙ – ‘ཝིཧརཏཱཡསྨཱ; ཏཱདིསོ ཨཡཾ དྷམྨོ ཡཏྠ ཝིཉྙཱུ པུརིསོ ནཙིརསྶེཝ སཀཾ ཨཱཙརིཡཀཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརེཡྻཱ’ཏི། སོ ཁོ ཨཧཾ, བྷིཀྑཝེ, ནཙིརསྶེཝ ཁིཔྤམེཝ ཏཾ དྷམྨཾ པརིཡཱཔུཎིཾ། སོ ཁོ ཨཧཾ, བྷིཀྑཝེ, ཏཱཝཏཀེནེཝ ཨོཊྛཔཧཏམཏྟེན ལཔིཏལཱཔནམཏྟེན ཉཱཎཝཱདཉྩ ཝདཱམི ཐེརཝཱདཉྩ, ‘ཛཱནཱམི པསྶཱམཱི’ཏི ཙ པཊིཛཱནཱམི ཨཧཉྩེཝ ཨཉྙེ ཙ། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ན ཁོ རཱམོ ཨིམཾ དྷམྨཾ ཀེཝལཾ སདྡྷཱམཏྟཀེན སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཱམཱིཏི པཝེདེསི; ཨདྡྷཱ རཱམོ ཨིམཾ དྷམྨཾ ཛཱནཾ པསྶཾ ཝིཧཱསཱི’ཏི།
278. ‘‘So kho ahaṃ, bhikkhave, kiṃ kusalagavesī anuttaraṃ santivarapadaṃ pariyesamāno yena udako 13 rāmaputto tenupasaṅkamiṃ; upasaṅkamitvā udakaṃ rāmaputtaṃ etadavocaṃ – ‘icchāmahaṃ, āvuso 14, imasmiṃ dhammavinaye brahmacariyaṃ caritu’nti. Evaṃ vutte, bhikkhave, udako rāmaputto maṃ etadavoca – ‘viharatāyasmā; tādiso ayaṃ dhammo yattha viññū puriso nacirasseva sakaṃ ācariyakaṃ sayaṃ abhiññā sacchikatvā upasampajja vihareyyā’ti. So kho ahaṃ, bhikkhave, nacirasseva khippameva taṃ dhammaṃ pariyāpuṇiṃ. So kho ahaṃ, bhikkhave, tāvatakeneva oṭṭhapahatamattena lapitalāpanamattena ñāṇavādañca vadāmi theravādañca, ‘jānāmi passāmī’ti ca paṭijānāmi ahañceva aññe ca. Tassa mayhaṃ, bhikkhave, etadahosi – ‘na kho rāmo imaṃ dhammaṃ kevalaṃ saddhāmattakena sayaṃ abhiññā sacchikatvā upasampajja viharāmīti pavedesi; addhā rāmo imaṃ dhammaṃ jānaṃ passaṃ vihāsī’ti.
‘‘ཨཐ ཁྭཱཧཾ, བྷིཀྑཝེ, ཡེན ཨུདཀོ རཱམཔུཏྟོ ཏེནུཔསངྐམིཾ; ཨུཔསངྐམིཏྭཱ ཨུདཀཾ རཱམཔུཏྟཾ ཨེཏདཝོཙཾ – ‘ཀིཏྟཱཝཏཱ ནོ, ཨཱཝུསོ, རཱམོ ཨིམཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཱམཱིཏི པཝེདེསཱི’ཏི? ཨེཝཾ ཝུཏྟེ, བྷིཀྑཝེ, ཨུདཀོ རཱམཔུཏྟོ ནེཝསཉྙཱནཱསཉྙཱཡཏནཾ པཝེདེསི། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ན ཁོ རཱམསྶེཝ ཨཧོསི སདྡྷཱ, མཡ྄ཧཾཔཏྠི སདྡྷཱ; ན ཁོ རཱམསྶེཝ ཨཧོསི ཝཱིརིཡཾ , མཡ྄ཧཾཔཏྠི ཝཱིརིཡཾ; ན ཁོ རཱམསྶེཝ ཨཧོསི སཏི, མཡ྄ཧཾཔཏྠི སཏི; ན ཁོ རཱམསྶེཝ ཨཧོསི སམཱདྷི, མཡ྄ཧཾཔཏྠི སམཱདྷི, ན ཁོ རཱམསྶེཝ ཨཧོསི པཉྙཱ, མཡ྄ཧཾཔཏྠི པཉྙཱ། ཡཾནཱུནཱཧཾ ཡཾ དྷམྨཾ རཱམོ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཱམཱིཏི པཝེདེསི, ཏསྶ དྷམྨསྶ སཙྪིཀིརིཡཱཡ པདཧེཡྻ’ནྟི། སོ ཁོ ཨཧཾ, བྷིཀྑཝེ, ནཙིརསྶེཝ ཁིཔྤམེཝ ཏཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧཱསིཾ།
‘‘Atha khvāhaṃ, bhikkhave, yena udako rāmaputto tenupasaṅkamiṃ; upasaṅkamitvā udakaṃ rāmaputtaṃ etadavocaṃ – ‘kittāvatā no, āvuso, rāmo imaṃ dhammaṃ sayaṃ abhiññā sacchikatvā upasampajja viharāmīti pavedesī’ti? Evaṃ vutte, bhikkhave, udako rāmaputto nevasaññānāsaññāyatanaṃ pavedesi. Tassa mayhaṃ, bhikkhave, etadahosi – ‘na kho rāmasseva ahosi saddhā, mayhaṃpatthi saddhā; na kho rāmasseva ahosi vīriyaṃ , mayhaṃpatthi vīriyaṃ; na kho rāmasseva ahosi sati, mayhaṃpatthi sati; na kho rāmasseva ahosi samādhi, mayhaṃpatthi samādhi, na kho rāmasseva ahosi paññā, mayhaṃpatthi paññā. Yaṃnūnāhaṃ yaṃ dhammaṃ rāmo sayaṃ abhiññā sacchikatvā upasampajja viharāmīti pavedesi, tassa dhammassa sacchikiriyāya padaheyya’nti. So kho ahaṃ, bhikkhave, nacirasseva khippameva taṃ dhammaṃ sayaṃ abhiññā sacchikatvā upasampajja vihāsiṃ.
‘‘ཨཐ ཁྭཱཧཾ, བྷིཀྑཝེ, ཡེན ཨུདཀོ རཱམཔུཏྟོ ཏེནུཔསངྐམིཾ; ཨུཔསངྐམིཏྭཱ ཨུདཀཾ རཱམཔུཏྟཾ ཨེཏདཝོཙཾ –
‘‘Atha khvāhaṃ, bhikkhave, yena udako rāmaputto tenupasaṅkamiṃ; upasaṅkamitvā udakaṃ rāmaputtaṃ etadavocaṃ –
‘ཨེཏྟཱཝཏཱ ནོ, ཨཱཝུསོ, རཱམོ ཨིམཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ པཝེདེསཱི’ཏི?
‘Ettāvatā no, āvuso, rāmo imaṃ dhammaṃ sayaṃ abhiññā sacchikatvā upasampajja pavedesī’ti?
‘ཨེཏྟཱཝཏཱ ཁོ, ཨཱཝུསོ, རཱམོ ཨིམཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ པཝེདེསཱི’ཏི།
‘Ettāvatā kho, āvuso, rāmo imaṃ dhammaṃ sayaṃ abhiññā sacchikatvā upasampajja pavedesī’ti.
‘ཨཧམྤི ཁོ, ཨཱཝུསོ, ཨེཏྟཱཝཏཱ ཨིམཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཱམཱི’ཏི།
‘Ahampi kho, āvuso, ettāvatā imaṃ dhammaṃ sayaṃ abhiññā sacchikatvā upasampajja viharāmī’ti.
‘ལཱབྷཱ ནོ, ཨཱཝུསོ, སུལདྡྷཾ ནོ, ཨཱཝུསོ, ཡེ མཡཾ ཨཱཡསྨནྟཾ ཏཱདིསཾ སབྲཧྨཙཱརིཾ པསྶཱམ། ཨིཏི ཡཾ དྷམྨཾ རཱམོ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ པཝེདེསི, ཏཾ ཏྭཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརསི། ཡཾ ཏྭཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརསི, ཏཾ དྷམྨཾ རཱམོ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ པཝེདེསི། ཨིཏི ཡཾ དྷམྨཾ རཱམོ ཨབྷིཉྙཱསི ཏཾ ཏྭཾ དྷམྨཾ ཛཱནཱསི, ཡཾ ཏྭཾ དྷམྨཾ ཛཱནཱསི, ཏཾ དྷམྨཾ རཱམོ ཨབྷིཉྙཱསི། ཨིཏི ཡཱདིསོ རཱམོ ཨཧོསི ཏཱདིསོ ཏུཝཾ, ཡཱདིསོ ཏུཝཾ ཏཱདིསོ རཱམོ ཨཧོསི། ཨེཧི དཱནི, ཨཱཝུསོ, ཏུཝཾ ཨིམཾ གཎཾ པརིཧརཱ’ཏི ། ཨིཏི ཁོ, བྷིཀྑཝེ , ཨུདཀོ རཱམཔུཏྟོ སབྲཧྨཙཱརཱི མེ སམཱནོ ཨཱཙརིཡཊྛཱནེ མཾ ཋཔེསི, ཨུལཱ༹རཱཡ ཙ མཾ པཱུཛཱཡ པཱུཛེསི། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ནཱཡཾ དྷམྨོ ནིབྦིདཱཡ ན ཝིརཱགཱཡ ན ནིརོདྷཱཡ ན ཨུཔསམཱཡ ན ཨབྷིཉྙཱཡ ན སམྦོདྷཱཡ ན ནིབྦཱནཱཡ སཾཝཏྟཏི, ཡཱཝདེཝ ནེཝསཉྙཱནཱསཉྙཱཡཏནཱུཔཔཏྟིཡཱ’ཏི། སོ ཁོ ཨཧཾ, བྷིཀྑཝེ, ཏཾ དྷམྨཾ ཨནལངྐརིཏྭཱ ཏསྨཱ དྷམྨཱ ནིབྦིཛྫ ཨཔཀྐམིཾ།
‘Lābhā no, āvuso, suladdhaṃ no, āvuso, ye mayaṃ āyasmantaṃ tādisaṃ sabrahmacāriṃ passāma. Iti yaṃ dhammaṃ rāmo sayaṃ abhiññā sacchikatvā upasampajja pavedesi, taṃ tvaṃ dhammaṃ sayaṃ abhiññā sacchikatvā upasampajja viharasi. Yaṃ tvaṃ dhammaṃ sayaṃ abhiññā sacchikatvā upasampajja viharasi, taṃ dhammaṃ rāmo sayaṃ abhiññā sacchikatvā upasampajja pavedesi. Iti yaṃ dhammaṃ rāmo abhiññāsi taṃ tvaṃ dhammaṃ jānāsi, yaṃ tvaṃ dhammaṃ jānāsi, taṃ dhammaṃ rāmo abhiññāsi. Iti yādiso rāmo ahosi tādiso tuvaṃ, yādiso tuvaṃ tādiso rāmo ahosi. Ehi dāni, āvuso, tuvaṃ imaṃ gaṇaṃ pariharā’ti . Iti kho, bhikkhave , udako rāmaputto sabrahmacārī me samāno ācariyaṭṭhāne maṃ ṭhapesi, uḷārāya ca maṃ pūjāya pūjesi. Tassa mayhaṃ, bhikkhave, etadahosi – ‘nāyaṃ dhammo nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati, yāvadeva nevasaññānāsaññāyatanūpapattiyā’ti. So kho ahaṃ, bhikkhave, taṃ dhammaṃ analaṅkaritvā tasmā dhammā nibbijja apakkamiṃ.
༢༧༩. ‘‘སོ ཁོ ཨཧཾ, བྷིཀྑཝེ, ཀིཾ ཀུསལགཝེསཱི ཨནུཏྟརཾ སནྟིཝརཔདཾ པརིཡེསམཱནོ མགདྷེསུ ཨནུཔུབྦེན ཙཱརིཀཾ ཙརམཱནོ ཡེན ཨུརུཝེལཱ སེནཱནིགམོ ཏདཝསརིཾ། ཏཏྠདྡསཾ རམཎཱིཡཾ བྷཱུམིབྷཱགཾ, པཱསཱདིཀཉྩ ཝནསཎྜཾ, ནདིཉྩ སནྡནྟིཾ སེཏཀཾ སུཔཏིཏྠཾ རམཎཱིཡཾ, སམནྟཱ 15 ཙ གོཙརགཱམཾ ། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘རམཎཱིཡོ ཝཏ, བྷོ, བྷཱུམིབྷཱགོ, པཱསཱདིཀོ ཙ ཝནསཎྜོ, ནདཱི ཙ སནྡཏི སེཏཀཱ སུཔཏིཏྠཱ རམཎཱིཡཱ, སམནྟཱ ཙ གོཙརགཱམོ། ཨལཾ ཝཏིདཾ ཀུལཔུཏྟསྶ པདྷཱནཏྠིཀསྶ པདྷཱནཱཡཱ’ཏི། སོ ཁོ ཨཧཾ, བྷིཀྑཝེ, ཏཏྠེཝ ནིསཱིདིཾ – ཨལམིདཾ པདྷཱནཱཡཱཏི།
279. ‘‘So kho ahaṃ, bhikkhave, kiṃ kusalagavesī anuttaraṃ santivarapadaṃ pariyesamāno magadhesu anupubbena cārikaṃ caramāno yena uruvelā senānigamo tadavasariṃ. Tatthaddasaṃ ramaṇīyaṃ bhūmibhāgaṃ, pāsādikañca vanasaṇḍaṃ, nadiñca sandantiṃ setakaṃ supatitthaṃ ramaṇīyaṃ, samantā 16 ca gocaragāmaṃ . Tassa mayhaṃ, bhikkhave, etadahosi – ‘ramaṇīyo vata, bho, bhūmibhāgo, pāsādiko ca vanasaṇḍo, nadī ca sandati setakā supatitthā ramaṇīyā, samantā ca gocaragāmo. Alaṃ vatidaṃ kulaputtassa padhānatthikassa padhānāyā’ti. So kho ahaṃ, bhikkhave, tattheva nisīdiṃ – alamidaṃ padhānāyāti.
༢༨༠. ‘‘སོ ཁོ ཨཧཾ, བྷིཀྑཝེ, ཨཏྟནཱ ཛཱཏིདྷམྨོ སམཱནོ ཛཱཏིདྷམྨེ ཨཱདཱིནཝཾ ཝིདིཏྭཱ ཨཛཱཏཾ ཨནུཏྟརཾ ཡོགཀྑེམཾ ནིབྦཱནཾ པརིཡེསམཱནོ ཨཛཱཏཾ ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾ, ཨཏྟནཱ ཛརཱདྷམྨོ སམཱནོ ཛརཱདྷམྨེ ཨཱདཱིནཝཾ ཝིདིཏྭཱ ཨཛརཾ ཨནུཏྟརཾ ཡོགཀྑེམཾ ནིབྦཱནཾ པརིཡེསམཱནོ ཨཛརཾ ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾ, ཨཏྟནཱ བྱཱདྷིདྷམྨོ སམཱནོ བྱཱདྷིདྷམྨེ ཨཱདཱིནཝཾ ཝིདིཏྭཱ ཨབྱཱདྷིཾ ཨནུཏྟརཾ ཡོགཀྑེམཾ ནིབྦཱནཾ པརིཡེསམཱནོ ཨབྱཱདྷིཾ ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾ, ཨཏྟནཱ མརཎདྷམྨོ སམཱནོ མརཎདྷམྨེ ཨཱདཱིནཝཾ ཝིདིཏྭཱ ཨམཏཾ ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾ, ཨཏྟནཱ སོཀདྷམྨོ སམཱནོ སོཀདྷམྨེ ཨཱདཱིནཝཾ ཝིདིཏྭཱ ཨསོཀཾ ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾ, ཨཏྟནཱ སཾཀིལེསདྷམྨོ སམཱནོ སཾཀིལེསདྷམྨེ ཨཱདཱིནཝཾ ཝིདིཏྭཱ ཨསཾཀིལིཊྛཾ ཨནུཏྟརཾ ཡོགཀྑེམཾ ནིབྦཱནཾ པརིཡེསམཱནོ ཨསཾཀིལིཊྛཾ ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾ། ཉཱཎཉྩ པན མེ དསྶནཾ ཨུདཔཱདི – ‘ཨཀུཔྤཱ མེ ཝིམུཏྟི, ཨཡམནྟིམཱ ཛཱཏི, ནཏྠི དཱནི པུནབྦྷཝོ’ཏི།
280. ‘‘So kho ahaṃ, bhikkhave, attanā jātidhammo samāno jātidhamme ādīnavaṃ viditvā ajātaṃ anuttaraṃ yogakkhemaṃ nibbānaṃ pariyesamāno ajātaṃ anuttaraṃ yogakkhemaṃ nibbānaṃ ajjhagamaṃ, attanā jarādhammo samāno jarādhamme ādīnavaṃ viditvā ajaraṃ anuttaraṃ yogakkhemaṃ nibbānaṃ pariyesamāno ajaraṃ anuttaraṃ yogakkhemaṃ nibbānaṃ ajjhagamaṃ, attanā byādhidhammo samāno byādhidhamme ādīnavaṃ viditvā abyādhiṃ anuttaraṃ yogakkhemaṃ nibbānaṃ pariyesamāno abyādhiṃ anuttaraṃ yogakkhemaṃ nibbānaṃ ajjhagamaṃ, attanā maraṇadhammo samāno maraṇadhamme ādīnavaṃ viditvā amataṃ anuttaraṃ yogakkhemaṃ nibbānaṃ ajjhagamaṃ, attanā sokadhammo samāno sokadhamme ādīnavaṃ viditvā asokaṃ anuttaraṃ yogakkhemaṃ nibbānaṃ ajjhagamaṃ, attanā saṃkilesadhammo samāno saṃkilesadhamme ādīnavaṃ viditvā asaṃkiliṭṭhaṃ anuttaraṃ yogakkhemaṃ nibbānaṃ pariyesamāno asaṃkiliṭṭhaṃ anuttaraṃ yogakkhemaṃ nibbānaṃ ajjhagamaṃ. Ñāṇañca pana me dassanaṃ udapādi – ‘akuppā me vimutti, ayamantimā jāti, natthi dāni punabbhavo’ti.
༢༨༡. ‘‘ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ཨདྷིགཏོ ཁོ མྱཱཡཾ དྷམྨོ གམྦྷཱིརོ དུདྡསོ དུརནུབོདྷོ སནྟོ པཎཱིཏོ ཨཏཀྐཱཝཙརོ ནིཔུཎོ པཎྜིཏཝེདནཱིཡོ། ཨཱལཡརཱམཱ ཁོ པནཱཡཾ པཛཱ ཨཱལཡརཏཱ ཨཱལཡསམྨུདིཏཱ། ཨཱལཡརཱམཱ ཁོ པནཱཡཾ པཛཱ ཨཱལཡརཏཱཡ ཨཱལཡསམྨུདིཏཱཡ དུདྡསཾ ཨིདཾ ཋཱནཾ ཡདིདཾ – ཨིདཔྤཙྩཡཏཱ པཊིཙྩསམུཔྤཱདོ། ཨིདམྤི ཁོ ཋཱནཾ དུདྡསཾ ཡདིདཾ – སབྦསངྑཱརསམཐོ སབྦཱུཔདྷིཔཊིནིསྶགྒོ ཏཎྷཱཀྑཡོ ཝིརཱགོ ནིརོདྷོ ནིབྦཱནཾ། ཨཧཉྩེཝ ཁོ པན དྷམྨཾ དེསེཡྻཾ, པརེ ཙ མེ ན ཨཱཛཱནེཡྻུཾ, སོ མམསྶ ཀིལམཐོ, སཱ མམསྶ ཝིཧེསཱ’ཏི། ཨཔིསྶུ མཾ, བྷིཀྑཝེ, ཨིམཱ ཨནཙྪརིཡཱ གཱཐཱཡོ པཊིབྷཾསུ པུབྦེ ཨསྶུཏཔུབྦཱ –
281. ‘‘Tassa mayhaṃ, bhikkhave, etadahosi – ‘adhigato kho myāyaṃ dhammo gambhīro duddaso duranubodho santo paṇīto atakkāvacaro nipuṇo paṇḍitavedanīyo. Ālayarāmā kho panāyaṃ pajā ālayaratā ālayasammuditā. Ālayarāmā kho panāyaṃ pajā ālayaratāya ālayasammuditāya duddasaṃ idaṃ ṭhānaṃ yadidaṃ – idappaccayatā paṭiccasamuppādo. Idampi kho ṭhānaṃ duddasaṃ yadidaṃ – sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānaṃ. Ahañceva kho pana dhammaṃ deseyyaṃ, pare ca me na ājāneyyuṃ, so mamassa kilamatho, sā mamassa vihesā’ti. Apissu maṃ, bhikkhave, imā anacchariyā gāthāyo paṭibhaṃsu pubbe assutapubbā –
‘ཀིཙྪེན མེ ཨདྷིགཏཾ, ཧལཾ དཱནི པཀཱསིཏུཾ།
‘Kicchena me adhigataṃ, halaṃ dāni pakāsituṃ;
རཱགདོསཔརེཏེཧི, ནཱཡཾ དྷམྨོ སུསམྦུདྷོ༎
Rāgadosaparetehi, nāyaṃ dhammo susambudho.
‘པཊིསོཏགཱམིཾ ནིཔུཎཾ, གམྦྷཱིརཾ དུདྡསཾ ཨཎུཾ།
‘Paṭisotagāmiṃ nipuṇaṃ, gambhīraṃ duddasaṃ aṇuṃ;
༢༨༢. ‘‘ཨིཏིཧ མེ, བྷིཀྑཝེ, པཊིསཉྩིཀྑཏོ ཨཔྤོསྶུཀྐཏཱཡ ཙིཏྟཾ ནམཏི, ནོ དྷམྨདེསནཱཡ། ཨཐ ཁོ, བྷིཀྑཝེ, བྲཧྨུནོ སཧམྤཏིསྶ མམ ཙེཏསཱ ཙེཏོཔརིཝིཏཀྐམཉྙཱཡ ཨེཏདཧོསི – ‘ནསྶཏི ཝཏ བྷོ ལོཀོ, ཝིནསྶཏི ཝཏ བྷོ ལོཀོ, ཡཏྲ ཧི ནཱམ ཏཐཱགཏསྶ ཨརཧཏོ སམྨཱསམྦུདྡྷསྶ ཨཔྤོསྶུཀྐཏཱཡ ཙིཏྟཾ ནམཏི 19, ནོ དྷམྨདེསནཱཡཱ’ཏི། ཨཐ ཁོ, བྷིཀྑཝེ, བྲཧྨཱ སཧམྤཏི – སེཡྻཐཱཔི ནཱམ བལཝཱ པུརིསོ སམིཉྫིཏཾ ཝཱ བཱཧཾ པསཱརེཡྻ, པསཱརིཏཾ ཝཱ བཱཧཾ སམིཉྫེཡྻ, ཨེཝམེཝ – བྲཧྨལོཀེ ཨནྟརཧིཏོ མམ པུརཏོ པཱཏུརཧོསི། ཨཐ ཁོ, བྷིཀྑཝེ, བྲཧྨཱ སཧམྤཏི ཨེཀཾསཾ ཨུཏྟརཱསངྒཾ ཀརིཏྭཱ ཡེནཱཧཾ ཏེནཉྫལིཾ པཎཱམེཏྭཱ མཾ ཨེཏདཝོཙ – ‘དེསེཏུ, བྷནྟེ, བྷགཝཱ དྷམྨཾ, དེསེཏུ སུགཏོ དྷམྨཾ། སནྟི སཏྟཱ ཨཔྤརཛཀྑཛཱཏིཀཱ, ཨསྶཝནཏཱ དྷམྨསྶ པརིཧཱཡནྟི། བྷཝིསྶནྟི དྷམྨསྶ ཨཉྙཱཏཱརོ’ཏི། ཨིདམཝོཙ, བྷིཀྑཝེ, བྲཧྨཱ སཧམྤཏི། ཨིདཾ ཝཏྭཱ ཨཐཱཔརཾ ཨེཏདཝོཙ –
282. ‘‘Itiha me, bhikkhave, paṭisañcikkhato appossukkatāya cittaṃ namati, no dhammadesanāya. Atha kho, bhikkhave, brahmuno sahampatissa mama cetasā cetoparivitakkamaññāya etadahosi – ‘nassati vata bho loko, vinassati vata bho loko, yatra hi nāma tathāgatassa arahato sammāsambuddhassa appossukkatāya cittaṃ namati 20, no dhammadesanāyā’ti. Atha kho, bhikkhave, brahmā sahampati – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evameva – brahmaloke antarahito mama purato pāturahosi. Atha kho, bhikkhave, brahmā sahampati ekaṃsaṃ uttarāsaṅgaṃ karitvā yenāhaṃ tenañjaliṃ paṇāmetvā maṃ etadavoca – ‘desetu, bhante, bhagavā dhammaṃ, desetu sugato dhammaṃ. Santi sattā apparajakkhajātikā, assavanatā dhammassa parihāyanti. Bhavissanti dhammassa aññātāro’ti. Idamavoca, bhikkhave, brahmā sahampati. Idaṃ vatvā athāparaṃ etadavoca –
‘པཱཏུརཧོསི མགདྷེསུ པུབྦེ,
‘Pāturahosi magadhesu pubbe,
དྷམྨོ ཨསུདྡྷོ སམལེཧི ཙིནྟིཏོ།
Dhammo asuddho samalehi cintito;
སུཎནྟུ དྷམྨཾ ཝིམལེནཱནུབུདྡྷཾ༎
Suṇantu dhammaṃ vimalenānubuddhaṃ.
‘སེལེ ཡཐཱ པབྦཏམུདྡྷནིཊྛིཏོ,
‘Sele yathā pabbatamuddhaniṭṭhito,
ཡཐཱཔི པསྶེ ཛནཏཾ སམནྟཏོ།
Yathāpi passe janataṃ samantato;
ཏཐཱུཔམཾ དྷམྨམཡཾ སུམེདྷ,
Tathūpamaṃ dhammamayaṃ sumedha,
པཱསཱདམཱརུཡ྄ཧ སམནྟཙཀྑུ།
Pāsādamāruyha samantacakkhu;
ཨཝེཀྑསྶུ ཛཱཏིཛརཱབྷིབྷཱུཏཾ༎
Avekkhassu jātijarābhibhūtaṃ.
‘ཨུཊྛེཧི ཝཱིར ཝིཛིཏསངྒཱམ,
‘Uṭṭhehi vīra vijitasaṅgāma,
སཏྠཝཱཧ ཨཎཎ ཝིཙར ལོཀེ།
Satthavāha aṇaṇa vicara loke;
ཨཉྙཱཏཱརོ བྷཝིསྶནྟཱི’’’ཏི༎
Aññātāro bhavissantī’’’ti.
༢༨༣. ‘‘ཨཐ ཁོ ཨཧཾ, བྷིཀྑཝེ, བྲཧྨུནོ ཙ ཨཛ྄ཛྷེསནཾ ཝིདིཏྭཱ སཏྟེསུ ཙ ཀཱརུཉྙཏཾ པཊིཙྩ བུདྡྷཙཀྑུནཱ ལོཀཾ ཝོལོཀེསིཾ། ཨདྡསཾ ཁོ ཨཧཾ, བྷིཀྑཝེ, བུདྡྷཙཀྑུནཱ ལོཀཾ ཝོལོཀེནྟོ སཏྟེ ཨཔྤརཛཀྑེ མཧཱརཛཀྑེ, ཏིཀྑིནྡྲིཡེ མུདིནྡྲིཡེ, སྭཱཀཱརེ དྭཱཀཱརེ, སུཝིཉྙཱཔཡེ དུཝིཉྙཱཔཡེ, ཨཔྤེཀཙྩེ པརལོཀཝཛྫབྷཡདསྶཱཝིནེ 27 ཝིཧརནྟེ, ཨཔྤེཀཙྩེ ན པརལོཀཝཛྫབྷཡདསྶཱཝིནེ 28 ཝིཧརནྟེ། སེཡྻཐཱཔི ནཱམ ཨུཔྤལིནིཡཾ ཝཱ པདུམིནིཡཾ ཝཱ པུཎྜརཱིཀིནིཡཾ ཝཱ ཨཔྤེཀཙྩཱནི ཨུཔྤལཱནི ཝཱ པདུམཱནི ཝཱ པུཎྜརཱིཀཱནི ཝཱ ཨུདཀེ ཛཱཏཱནི ཨུདཀེ སཾཝཌྜྷཱནི ཨུདཀཱནུགྒཏཱནི ཨནྟོནིམུགྒཔོསཱིནི, ཨཔྤེཀཙྩཱནི ཨུཔྤལཱནི ཝཱ པདུམཱནི ཝཱ པུཎྜརཱིཀཱནི ཝཱ ཨུདཀེ ཛཱཏཱནི ཨུདཀེ སཾཝཌྜྷཱནི ཨུདཀཱནུགྒཏཱནི སམོདཀཾ ཋིཏཱནི, ཨཔྤེཀཙྩཱནི ཨུཔྤལཱནི ཝཱ པདུམཱནི ཝཱ པུཎྜརཱིཀཱནི ཝཱ ཨུདཀེ ཛཱཏཱནི ཨུདཀེ སཾཝཌྜྷཱནི ཨུདཀཾ ཨཙྩུགྒམྨ ཋིཏཱནི 29 ཨནུཔལིཏྟཱནི ཨུདཀེན; ཨེཝམེཝ ཁོ ཨཧཾ, བྷིཀྑཝེ, བུདྡྷཙཀྑུནཱ ལོཀཾ ཝོལོཀེནྟོ ཨདྡསཾ སཏྟེ ཨཔྤརཛཀྑེ མཧཱརཛཀྑེ, ཏིཀྑིནྡྲིཡེ མུདིནྡྲིཡེ, སྭཱཀཱརེ དྭཱཀཱརེ, སུཝིཉྙཱཔཡེ དུཝིཉྙཱཔཡེ, ཨཔྤེཀཙྩེ པརལོཀཝཛྫབྷཡདསྶཱཝིནེ ཝིཧརནྟེ, ཨཔྤེཀཙྩེ ན པརལོཀཝཛྫབྷཡདསྶཱཝིནེ ཝིཧརནྟེ། ཨཐ ཁྭཱཧཾ, བྷིཀྑཝེ, བྲཧྨཱནཾ སཧམྤཏིཾ གཱཐཱཡ པཙྩབྷཱསིཾ –
283. ‘‘Atha kho ahaṃ, bhikkhave, brahmuno ca ajjhesanaṃ viditvā sattesu ca kāruññataṃ paṭicca buddhacakkhunā lokaṃ volokesiṃ. Addasaṃ kho ahaṃ, bhikkhave, buddhacakkhunā lokaṃ volokento satte apparajakkhe mahārajakkhe, tikkhindriye mudindriye, svākāre dvākāre, suviññāpaye duviññāpaye, appekacce paralokavajjabhayadassāvine 30 viharante, appekacce na paralokavajjabhayadassāvine 31 viharante. Seyyathāpi nāma uppaliniyaṃ vā paduminiyaṃ vā puṇḍarīkiniyaṃ vā appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakānuggatāni antonimuggaposīni, appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakānuggatāni samodakaṃ ṭhitāni, appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakaṃ accuggamma ṭhitāni 32 anupalittāni udakena; evameva kho ahaṃ, bhikkhave, buddhacakkhunā lokaṃ volokento addasaṃ satte apparajakkhe mahārajakkhe, tikkhindriye mudindriye, svākāre dvākāre, suviññāpaye duviññāpaye, appekacce paralokavajjabhayadassāvine viharante, appekacce na paralokavajjabhayadassāvine viharante. Atha khvāhaṃ, bhikkhave, brahmānaṃ sahampatiṃ gāthāya paccabhāsiṃ –
‘ཨཔཱརུཏཱ ཏེསཾ ཨམཏསྶ དྭཱརཱ,
‘Apārutā tesaṃ amatassa dvārā,
ཡེ སོཏཝནྟོ པམུཉྩནྟུ སདྡྷཾ།
Ye sotavanto pamuñcantu saddhaṃ;
ཝིཧིཾསསཉྙཱི པགུཎཾ ན བྷཱསིཾ,
Vihiṃsasaññī paguṇaṃ na bhāsiṃ,
དྷམྨཾ པཎཱིཏཾ མནུཛེསུ བྲཧྨེ’’’ཏི༎
Dhammaṃ paṇītaṃ manujesu brahme’’’ti.
‘‘ཨཐ ཁོ, བྷིཀྑཝེ, བྲཧྨཱ སཧམྤཏི ‘ཀཏཱཝཀཱསོ ཁོམྷི བྷགཝཏཱ དྷམྨདེསནཱཡཱ’ཏི མཾ ཨབྷིཝཱདེཏྭཱ པདཀྑིཎཾ ཀཏྭཱ ཏཏྠེཝནྟརདྷཱཡི།
‘‘Atha kho, bhikkhave, brahmā sahampati ‘katāvakāso khomhi bhagavatā dhammadesanāyā’ti maṃ abhivādetvā padakkhiṇaṃ katvā tatthevantaradhāyi.
༢༨༤. ‘‘ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ཀསྶ ནུ ཁོ ཨཧཾ པཋམཾ དྷམྨཾ དེསེཡྻཾ; ཀོ ཨིམཾ དྷམྨཾ ཁིཔྤམེཝ ཨཱཛཱནིསྶཏཱི’ཏི? ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ཨཡཾ ཁོ ཨཱལཱ༹རོ ཀཱལཱམོ པཎྜིཏོ ཝིཡཏྟོ མེདྷཱཝཱི དཱིགྷརཏྟཾ ཨཔྤརཛཀྑཛཱཏིཀོ། ཡཾནཱུནཱཧཾ ཨཱལཱ༹རསྶ ཀཱལཱམསྶ པཋམཾ དྷམྨཾ དེསེཡྻཾ། སོ ཨིམཾ དྷམྨཾ ཁིཔྤམེཝ ཨཱཛཱནིསྶཏཱི’ཏི། ཨཐ ཁོ མཾ, བྷིཀྑཝེ, དེཝཏཱ ཨུཔསངྐམིཏྭཱ ཨེཏདཝོཙ – ‘སཏྟཱཧཀཱལངྐཏོ, བྷནྟེ, ཨཱལཱ༹རོ ཀཱལཱམོ’ཏི། ཉཱཎཉྩ པན མེ དསྶནཾ ཨུདཔཱདི – ‘སཏྟཱཧཀཱལངྐཏོ ཨཱལཱ༹རོ ཀཱལཱམོ’ཏི། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘མཧཱཛཱནིཡོ ཁོ ཨཱལཱ༹རོ ཀཱལཱམོ། སཙེ ཧི སོ ཨིམཾ དྷམྨཾ སུཎེཡྻ, ཁིཔྤམེཝ ཨཱཛཱནེཡྻཱ’ཏི།
284. ‘‘Tassa mayhaṃ, bhikkhave, etadahosi – ‘kassa nu kho ahaṃ paṭhamaṃ dhammaṃ deseyyaṃ; ko imaṃ dhammaṃ khippameva ājānissatī’ti? Tassa mayhaṃ, bhikkhave, etadahosi – ‘ayaṃ kho āḷāro kālāmo paṇḍito viyatto medhāvī dīgharattaṃ apparajakkhajātiko. Yaṃnūnāhaṃ āḷārassa kālāmassa paṭhamaṃ dhammaṃ deseyyaṃ. So imaṃ dhammaṃ khippameva ājānissatī’ti. Atha kho maṃ, bhikkhave, devatā upasaṅkamitvā etadavoca – ‘sattāhakālaṅkato, bhante, āḷāro kālāmo’ti. Ñāṇañca pana me dassanaṃ udapādi – ‘sattāhakālaṅkato āḷāro kālāmo’ti. Tassa mayhaṃ, bhikkhave, etadahosi – ‘mahājāniyo kho āḷāro kālāmo. Sace hi so imaṃ dhammaṃ suṇeyya, khippameva ājāneyyā’ti.
‘‘ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ཀསྶ ནུ ཁོ ཨཧཾ པཋམཾ དྷམྨཾ དེསེཡྻཾ; ཀོ ཨིམཾ དྷམྨཾ ཁིཔྤམེཝ ཨཱཛཱནིསྶཏཱི’ཏི? ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ཨཡཾ ཁོ ཨུདཀོ རཱམཔུཏྟོ པཎྜིཏོ ཝིཡཏྟོ མེདྷཱཝཱི དཱིགྷརཏྟཾ ཨཔྤརཛཀྑཛཱཏིཀོ། ཡཾནཱུནཱཧཾ ཨུདཀསྶ རཱམཔུཏྟསྶ པཋམཾ དྷམྨཾ དེསེཡྻཾ། སོ ཨིམཾ དྷམྨཾ ཁིཔྤམེཝ ཨཱཛཱནིསྶཏཱི’ཏི། ཨཐ ཁོ མཾ, བྷིཀྑཝེ, དེཝཏཱ ཨུཔསངྐམིཏྭཱ ཨེཏདཝོཙ – ‘ཨབྷིདོསཀཱལངྐཏོ, བྷནྟེ, ཨུདཀོ རཱམཔུཏྟོ’ཏི། ཉཱཎཉྩ པན མེ དསྶནཾ ཨུདཔཱདི – ‘ཨབྷིདོསཀཱལངྐཏོ ཨུདཀོ རཱམཔུཏྟོ’ཏི། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘མཧཱཛཱནིཡོ ཁོ ཨུདཀོ རཱམཔུཏྟོ། སཙེ ཧི སོ ཨིམཾ དྷམྨཾ སུཎེཡྻ , ཁིཔྤམེཝ ཨཱཛཱནེཡྻཱ’ཏི།
‘‘Tassa mayhaṃ, bhikkhave, etadahosi – ‘kassa nu kho ahaṃ paṭhamaṃ dhammaṃ deseyyaṃ; ko imaṃ dhammaṃ khippameva ājānissatī’ti? Tassa mayhaṃ, bhikkhave, etadahosi – ‘ayaṃ kho udako rāmaputto paṇḍito viyatto medhāvī dīgharattaṃ apparajakkhajātiko. Yaṃnūnāhaṃ udakassa rāmaputtassa paṭhamaṃ dhammaṃ deseyyaṃ. So imaṃ dhammaṃ khippameva ājānissatī’ti. Atha kho maṃ, bhikkhave, devatā upasaṅkamitvā etadavoca – ‘abhidosakālaṅkato, bhante, udako rāmaputto’ti. Ñāṇañca pana me dassanaṃ udapādi – ‘abhidosakālaṅkato udako rāmaputto’ti. Tassa mayhaṃ, bhikkhave, etadahosi – ‘mahājāniyo kho udako rāmaputto. Sace hi so imaṃ dhammaṃ suṇeyya , khippameva ājāneyyā’ti.
‘‘ཏསྶ མཡ྄ཧཾ , བྷིཀྑཝེ, ཨེཏདཧོསི – ‘ཀསྶ ནུ ཁོ ཨཧཾ པཋམཾ དྷམྨཾ དེསེཡྻཾ; ཀོ ཨིམཾ དྷམྨཾ ཁིཔྤམེཝ ཨཱཛཱནིསྶཏཱི’ཏི? ཏསྶ མཡ྄ཧཾ, བྷིཀྑཝེ, ཨེཏདཧོསི – ‘བཧུཀཱརཱ ཁོ མེ པཉྩཝགྒིཡཱ བྷིཀྑཱུ, ཡེ མཾ པདྷཱནཔཧིཏཏྟཾ ཨུཔཊྛཧིཾསུ། ཡཾནཱུནཱཧཾ པཉྩཝགྒིཡཱནཾ བྷིཀྑཱུནཾ པཋམཾ དྷམྨཾ དེསེཡྻ’ནྟི། ཏསྶ མཡ྄ཧཾ, བྷིཀྑཝེ, ཨེཏདཧོསི – ‘ཀཧཾ ནུ ཁོ ཨེཏརཧི པཉྩཝགྒིཡཱ བྷིཀྑཱུ ཝིཧརནྟཱི’ཏི? ཨདྡསཾ ཁོ ཨཧཾ, བྷིཀྑཝེ, དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན པཉྩཝགྒིཡེ བྷིཀྑཱུ བཱརཱཎསིཡཾ ཝིཧརནྟེ ཨིསིཔཏནེ མིགདཱཡེ། ཨཐ ཁྭཱཧཾ, བྷིཀྑཝེ, ཨུརུཝེལཱཡཾ ཡཐཱབྷིརནྟཾ ཝིཧརིཏྭཱ ཡེན བཱརཱཎསཱི ཏེན ཙཱརིཀཾ པཀྐམིཾ 33།
‘‘Tassa mayhaṃ , bhikkhave, etadahosi – ‘kassa nu kho ahaṃ paṭhamaṃ dhammaṃ deseyyaṃ; ko imaṃ dhammaṃ khippameva ājānissatī’ti? Tassa mayhaṃ, bhikkhave, etadahosi – ‘bahukārā kho me pañcavaggiyā bhikkhū, ye maṃ padhānapahitattaṃ upaṭṭhahiṃsu. Yaṃnūnāhaṃ pañcavaggiyānaṃ bhikkhūnaṃ paṭhamaṃ dhammaṃ deseyya’nti. Tassa mayhaṃ, bhikkhave, etadahosi – ‘kahaṃ nu kho etarahi pañcavaggiyā bhikkhū viharantī’ti? Addasaṃ kho ahaṃ, bhikkhave, dibbena cakkhunā visuddhena atikkantamānusakena pañcavaggiye bhikkhū bārāṇasiyaṃ viharante isipatane migadāye. Atha khvāhaṃ, bhikkhave, uruvelāyaṃ yathābhirantaṃ viharitvā yena bārāṇasī tena cārikaṃ pakkamiṃ 34.
༢༨༥. ‘‘ཨདྡསཱ ཁོ མཾ, བྷིཀྑཝེ, ཨུཔཀོ ཨཱཛཱིཝཀོ ཨནྟརཱ 35 ཙ གཡཾ ཨནྟརཱ ཙ བོདྷིཾ ཨདྡྷཱནམགྒཔྤཊིཔནྣཾ། དིསྭཱན མཾ ཨེཏདཝོཙ – ‘ཝིཔྤསནྣཱནི ཁོ ཏེ, ཨཱཝུསོ, ཨིནྡྲིཡཱནི, པརིསུདྡྷོ ཚཝིཝཎྞོ པརིཡོདཱཏོ! ཀཾསི ཏྭཾ, ཨཱཝུསོ, ཨུདྡིསྶ པབྦཛིཏོ, ཀོ ཝཱ ཏེ སཏྠཱ, ཀསྶ ཝཱ ཏྭཾ དྷམྨཾ རོཙེསཱི’ཏི ? ཨེཝཾ ཝུཏྟེ, ཨཧཾ, བྷིཀྑཝེ, ཨུཔཀཾ ཨཱཛཱིཝཀཾ གཱཐཱཧི ཨཛ྄ཛྷབྷཱསིཾ –
285. ‘‘Addasā kho maṃ, bhikkhave, upako ājīvako antarā 36 ca gayaṃ antarā ca bodhiṃ addhānamaggappaṭipannaṃ. Disvāna maṃ etadavoca – ‘vippasannāni kho te, āvuso, indriyāni, parisuddho chavivaṇṇo pariyodāto! Kaṃsi tvaṃ, āvuso, uddissa pabbajito, ko vā te satthā, kassa vā tvaṃ dhammaṃ rocesī’ti ? Evaṃ vutte, ahaṃ, bhikkhave, upakaṃ ājīvakaṃ gāthāhi ajjhabhāsiṃ –
‘སབྦཱབྷིབྷཱུ སབྦཝིདཱུཧམསྨི, སབྦེསུ དྷམྨེསུ ཨནཱུཔལིཏྟོ།
‘Sabbābhibhū sabbavidūhamasmi, sabbesu dhammesu anūpalitto;
སབྦཉྫཧོ ཏཎྷཱཀྑཡེ ཝིམུཏྟོ, སཡཾ ཨབྷིཉྙཱཡ ཀམུདྡིསེཡྻཾ༎
Sabbañjaho taṇhākkhaye vimutto, sayaṃ abhiññāya kamuddiseyyaṃ.
‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏི།
‘Na me ācariyo atthi, sadiso me na vijjati;
སདེཝཀསྨིཾ ལོཀསྨིཾ, ནཏྠི མེ པཊིཔུགྒལོ༎
Sadevakasmiṃ lokasmiṃ, natthi me paṭipuggalo.
‘ཨཧཉྷི ཨརཧཱ ལོཀེ, ཨཧཾ སཏྠཱ ཨནུཏྟརོ།
‘Ahañhi arahā loke, ahaṃ satthā anuttaro;
ཨེཀོམྷི སམྨཱསམྦུདྡྷོ, སཱིཏིབྷཱུཏོསྨི ནིབྦུཏོ༎
Ekomhi sammāsambuddho, sītibhūtosmi nibbuto.
‘དྷམྨཙཀྐཾ པཝཏྟེཏུཾ, གཙྪཱམི ཀཱསིནཾ པུརཾ།
‘Dhammacakkaṃ pavattetuṃ, gacchāmi kāsinaṃ puraṃ;
ཨནྡྷཱིབྷཱུཏསྨིཾ 37 ལོཀསྨིཾ, ཨཱཧཉྪཾ ཨམཏདུནྡུབྷི’ནྟི༎
Andhībhūtasmiṃ 38 lokasmiṃ, āhañchaṃ amatadundubhi’nti.
‘ཡཐཱ ཁོ ཏྭཾ, ཨཱཝུསོ, པཊིཛཱནཱསི, ཨརཧསི ཨནནྟཛིནོ’ཏི!
‘Yathā kho tvaṃ, āvuso, paṭijānāsi, arahasi anantajino’ti!
‘མཱདིསཱ ཝེ ཛིནཱ ཧོནྟི, ཡེ པཏྟཱ ཨཱསཝཀྑཡཾ།
‘Mādisā ve jinā honti, ye pattā āsavakkhayaṃ;
ཛིཏཱ མེ པཱཔཀཱ དྷམྨཱ, ཏསྨཱཧམུཔཀ ཛིནོ’ཏི༎
Jitā me pāpakā dhammā, tasmāhamupaka jino’ti.
‘‘ཨེཝཾ ཝུཏྟེ, བྷིཀྑཝེ, ཨུཔཀོ ཨཱཛཱིཝཀོ ‘ཧུཔེཡྻཔཱཝུསོ’ཏི 39 ཝཏྭཱ སཱིསཾ ཨོཀམྤེཏྭཱ ཨུམྨགྒཾ གཧེཏྭཱ པཀྐཱམི།
‘‘Evaṃ vutte, bhikkhave, upako ājīvako ‘hupeyyapāvuso’ti 40 vatvā sīsaṃ okampetvā ummaggaṃ gahetvā pakkāmi.
༢༨༦. ‘‘ཨཐ ཁྭཱཧཾ, བྷིཀྑཝེ, ཨནུཔུབྦེན ཙཱརིཀཾ ཙརམཱནོ ཡེན བཱརཱཎསཱི ཨིསིཔཏནཾ མིགདཱཡོ ཡེན པཉྩཝགྒིཡཱ བྷིཀྑཱུ ཏེནུཔསངྐམིཾ། ཨདྡསཾསུ ཁོ མཾ, བྷིཀྑཝེ, པཉྩཝགྒིཡཱ བྷིཀྑཱུ དཱུརཏོ ཨཱགཙྪནྟཾ། དིསྭཱན ཨཉྙམཉྙཾ སཎྛཔེསུཾ 41 – ‘ཨཡཾ ཁོ, ཨཱཝུསོ, སམཎོ གོཏམོ ཨཱགཙྪཏི བཱཧུལླིཀོ 42 པདྷཱནཝིབྦྷནྟོ ཨཱཝཏྟོ བཱཧུལླཱཡ། སོ ནེཝ ཨབྷིཝཱདེཏབྦོ, ན པཙྩུཊྛཱཏབྦོ; ནཱསྶ པཏྟཙཱིཝརཾ པཊིགྒཧེཏབྦཾ། ཨཔི ཙ ཁོ ཨཱསནཾ ཋཔེཏབྦཾ, སཙེ ཨཱཀངྑིསྶཏི ནིསཱིདིསྶཏཱི’ཏི། ཡཐཱ ཡཐཱ ཁོ ཨཧཾ, བྷིཀྑཝེ, ཨུཔསངྐམིཾ ཏཐཱ ཏཐཱ པཉྩཝགྒིཡཱ བྷིཀྑཱུ ནཱསཀྑིཾསུ སཀཱཡ ཀཏིཀཱཡ སཎྛཱཏུཾ། ཨཔྤེཀཙྩེ མཾ པཙྩུགྒནྟྭཱ པཏྟཙཱིཝརཾ པཊིགྒཧེསུཾ, ཨཔྤེཀཙྩེ ཨཱསནཾ པཉྙཔེསུཾ, ཨཔྤེཀཙྩེ པཱདོདཀཾ ཨུཔཊྛཔེསུཾ། ཨཔི ཙ ཁོ མཾ ནཱམེན ཙ ཨཱཝུསོཝཱདེན ཙ སམུདཱཙརནྟི།
286. ‘‘Atha khvāhaṃ, bhikkhave, anupubbena cārikaṃ caramāno yena bārāṇasī isipatanaṃ migadāyo yena pañcavaggiyā bhikkhū tenupasaṅkamiṃ. Addasaṃsu kho maṃ, bhikkhave, pañcavaggiyā bhikkhū dūrato āgacchantaṃ. Disvāna aññamaññaṃ saṇṭhapesuṃ 43 – ‘ayaṃ kho, āvuso, samaṇo gotamo āgacchati bāhulliko 44 padhānavibbhanto āvatto bāhullāya. So neva abhivādetabbo, na paccuṭṭhātabbo; nāssa pattacīvaraṃ paṭiggahetabbaṃ. Api ca kho āsanaṃ ṭhapetabbaṃ, sace ākaṅkhissati nisīdissatī’ti. Yathā yathā kho ahaṃ, bhikkhave, upasaṅkamiṃ tathā tathā pañcavaggiyā bhikkhū nāsakkhiṃsu sakāya katikāya saṇṭhātuṃ. Appekacce maṃ paccuggantvā pattacīvaraṃ paṭiggahesuṃ, appekacce āsanaṃ paññapesuṃ, appekacce pādodakaṃ upaṭṭhapesuṃ. Api ca kho maṃ nāmena ca āvusovādena ca samudācaranti.
‘‘ཨེཝཾ ཝུཏྟེ, ཨཧཾ, བྷིཀྑཝེ, པཉྩཝགྒིཡེ བྷིཀྑཱུ ཨེཏདཝོཙཾ – ‘མཱ, བྷིཀྑཝེ, ཏཐཱགཏཾ ནཱམེན ཙ ཨཱཝུསོཝཱདེན ཙ སམུདཱཙརཐ 45། ཨརཧཾ, བྷིཀྑཝེ, ཏཐཱགཏོ སམྨཱསམྦུདྡྷོ ། ཨོདཧཐ, བྷིཀྑཝེ, སོཏཾ, ཨམཏམདྷིགཏཾ, ཨཧམནུསཱསཱམི, ཨཧཾ དྷམྨཾ དེསེམི། ཡཐཱནུསིཊྛཾ ཏཐཱ པཊིཔཛྫམཱནཱ ནཙིརསྶེཝ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརིསྶཐཱ’ཏི། ཨེཝཾ ཝུཏྟེ, བྷིཀྑཝེ, པཉྩཝགྒིཡཱ བྷིཀྑཱུ མཾ ཨེཏདཝོཙུཾ – ‘ཏཱཡཔི ཁོ ཏྭཾ, ཨཱཝུསོ གོཏམ, ཨིརིཡཱཡ ཏཱཡ པཊིཔདཱཡ ཏཱཡ དུཀྐརཀཱརིཀཱཡ ནཱཛ྄ཛྷགམཱ ཨུཏྟརིམནུསྶདྷམྨཱ ཨལམརིཡཉཱཎདསྶནཝིསེསཾ, ཀིཾ པན ཏྭཾ ཨེཏརཧི བཱཧུལླིཀོ པདྷཱནཝིབྦྷནྟོ ཨཱཝཏྟོ བཱཧུལླཱཡ ཨདྷིགམིསྶསི ཨུཏྟརིམནུསྶདྷམྨཱ ཨལམརིཡཉཱཎདསྶནཝིསེས’ནྟི? ཨེཝཾ ཝུཏྟེ, ཨཧཾ, བྷིཀྑཝེ, པཉྩཝགྒིཡེ བྷིཀྑཱུ ཨེཏདཝོཙཾ – ‘ན, བྷིཀྑཝེ, ཏཐཱགཏོ བཱཧུལླིཀོ, ན པདྷཱནཝིབྦྷནྟོ, ན ཨཱཝཏྟོ བཱཧུལླཱཡ ། ཨརཧཾ, བྷིཀྑཝེ, ཏཐཱགཏོ སམྨཱསམྦུདྡྷོ། ཨོདཧཐ, བྷིཀྑཝེ, སོཏཾ, ཨམཏམདྷིགཏཾ, ཨཧམནུསཱསཱམི, ཨཧཾ དྷམྨཾ དེསེམི། ཡཐཱནུསིཊྛཾ ཏཐཱ པཊིཔཛྫམཱནཱ ནཙིརསྶེཝ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརིསྶཐཱ’ཏི། དུཏིཡམྤི ཁོ, བྷིཀྑཝེ, པཉྩཝགྒིཡཱ བྷིཀྑཱུ མཾ ཨེཏདཝོཙུཾ – ‘ཏཱཡཔི ཁོ ཏྭཾ, ཨཱཝུསོ གོཏམ, ཨིརིཡཱཡ ཏཱཡ པཊིཔདཱཡ ཏཱཡ དུཀྐརཀཱརིཀཱཡ ནཱཛ྄ཛྷགམཱ ཨུཏྟརིམནུསྶདྷམྨཱ ཨལམརིཡཉཱཎདསྶནཝིསེསཾ, ཀིཾ པན ཏྭཾ ཨེཏརཧི བཱཧུལླིཀོ པདྷཱནཝིབྦྷནྟོ ཨཱཝཏྟོ བཱཧུལླཱཡ ཨདྷིགམིསྶསི ཨུཏྟརིམནུསྶདྷམྨཱ ཨལམརིཡཉཱཎདསྶནཝིསེས’ནྟི? དུཏིཡམྤི ཁོ ཨཧཾ, བྷིཀྑཝེ, པཉྩཝགྒིཡེ བྷིཀྑཱུ ཨེཏདཝོཙཾ – ‘ན, བྷིཀྑཝེ, ཏཐཱགཏོ བཱཧུལླིཀོ…པེ॰… ཨུཔསམྤཛྫ ཝིཧརིསྶཐཱ’ཏི། ཏཏིཡམྤི ཁོ, བྷིཀྑཝེ, པཉྩཝགྒིཡཱ བྷིཀྑཱུ མཾ ཨེཏདཝོཙུཾ – ‘ཏཱཡཔི ཁོ ཏྭཾ, ཨཱཝུསོ གོཏམ, ཨིརིཡཱཡ ཏཱཡ པཊིཔདཱཡ ཏཱཡ དུཀྐརཀཱརིཀཱཡ ནཱཛ྄ཛྷགམཱ ཨུཏྟརིམནུསྶདྷམྨཱ ཨལམརིཡཉཱཎདསྶནཝིསེསཾ, ཀིཾ པན ཏྭཾ ཨེཏརཧི བཱཧུལླིཀོ པདྷཱནཝིབྦྷནྟོ ཨཱཝཏྟོ བཱཧུལླཱཡ ཨདྷིགམིསྶསི ཨུཏྟརིམནུསྶདྷམྨཱ ཨལམརིཡཉཱཎདསྶནཝིསེས’ནྟི?
‘‘Evaṃ vutte, ahaṃ, bhikkhave, pañcavaggiye bhikkhū etadavocaṃ – ‘mā, bhikkhave, tathāgataṃ nāmena ca āvusovādena ca samudācaratha 46. Arahaṃ, bhikkhave, tathāgato sammāsambuddho . Odahatha, bhikkhave, sotaṃ, amatamadhigataṃ, ahamanusāsāmi, ahaṃ dhammaṃ desemi. Yathānusiṭṭhaṃ tathā paṭipajjamānā nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharissathā’ti. Evaṃ vutte, bhikkhave, pañcavaggiyā bhikkhū maṃ etadavocuṃ – ‘tāyapi kho tvaṃ, āvuso gotama, iriyāya tāya paṭipadāya tāya dukkarakārikāya nājjhagamā uttarimanussadhammā alamariyañāṇadassanavisesaṃ, kiṃ pana tvaṃ etarahi bāhulliko padhānavibbhanto āvatto bāhullāya adhigamissasi uttarimanussadhammā alamariyañāṇadassanavisesa’nti? Evaṃ vutte, ahaṃ, bhikkhave, pañcavaggiye bhikkhū etadavocaṃ – ‘na, bhikkhave, tathāgato bāhulliko, na padhānavibbhanto, na āvatto bāhullāya . Arahaṃ, bhikkhave, tathāgato sammāsambuddho. Odahatha, bhikkhave, sotaṃ, amatamadhigataṃ, ahamanusāsāmi, ahaṃ dhammaṃ desemi. Yathānusiṭṭhaṃ tathā paṭipajjamānā nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharissathā’ti. Dutiyampi kho, bhikkhave, pañcavaggiyā bhikkhū maṃ etadavocuṃ – ‘tāyapi kho tvaṃ, āvuso gotama, iriyāya tāya paṭipadāya tāya dukkarakārikāya nājjhagamā uttarimanussadhammā alamariyañāṇadassanavisesaṃ, kiṃ pana tvaṃ etarahi bāhulliko padhānavibbhanto āvatto bāhullāya adhigamissasi uttarimanussadhammā alamariyañāṇadassanavisesa’nti? Dutiyampi kho ahaṃ, bhikkhave, pañcavaggiye bhikkhū etadavocaṃ – ‘na, bhikkhave, tathāgato bāhulliko…pe… upasampajja viharissathā’ti. Tatiyampi kho, bhikkhave, pañcavaggiyā bhikkhū maṃ etadavocuṃ – ‘tāyapi kho tvaṃ, āvuso gotama, iriyāya tāya paṭipadāya tāya dukkarakārikāya nājjhagamā uttarimanussadhammā alamariyañāṇadassanavisesaṃ, kiṃ pana tvaṃ etarahi bāhulliko padhānavibbhanto āvatto bāhullāya adhigamissasi uttarimanussadhammā alamariyañāṇadassanavisesa’nti?
‘‘ཨེཝཾ ཝུཏྟེ, ཨཧཾ, བྷིཀྑཝེ, པཉྩཝགྒིཡེ བྷིཀྑཱུ ཨེཏདཝོཙཾ – ‘ཨབྷིཛཱནཱཐ མེ ནོ ཏུམྷེ, བྷིཀྑཝེ, ཨིཏོ པུབྦེ ཨེཝརཱུཔཾ པབྷཱཝིཏམེཏ’ནྟི 47? ‘ནོ ཧེཏཾ, བྷནྟེ’། ‘ཨརཧཾ, བྷིཀྑཝེ, ཏཐཱགཏོ སམྨཱསམྦུདྡྷོ། ཨོདཧཐ, བྷིཀྑཝེ, སོཏཾ, ཨམཏམདྷིགཏཾ, ཨཧམནུསཱསཱམི, ཨཧཾ དྷམྨཾ དེསེམི། ཡཐཱནུསིཊྛཾ ཏཐཱ པཊིཔཛྫམཱནཱ ནཙིརསྶེཝ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརིསྶཐཱ’ཏི།
‘‘Evaṃ vutte, ahaṃ, bhikkhave, pañcavaggiye bhikkhū etadavocaṃ – ‘abhijānātha me no tumhe, bhikkhave, ito pubbe evarūpaṃ pabhāvitameta’nti 48? ‘No hetaṃ, bhante’. ‘Arahaṃ, bhikkhave, tathāgato sammāsambuddho. Odahatha, bhikkhave, sotaṃ, amatamadhigataṃ, ahamanusāsāmi, ahaṃ dhammaṃ desemi. Yathānusiṭṭhaṃ tathā paṭipajjamānā nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharissathā’ti.
‘‘ཨསཀྑིཾ ཁོ ཨཧཾ, བྷིཀྑཝེ, པཉྩཝགྒིཡེ བྷིཀྑཱུ སཉྙཱཔེཏུཾ། དྭེཔི སུདཾ, བྷིཀྑཝེ, བྷིཀྑཱུ ཨོཝདཱམི, ཏཡོ བྷིཀྑཱུ པིཎྜཱཡ ཙརནྟི། ཡཾ ཏཡོ བྷིཀྑཱུ པིཎྜཱཡ ཙརིཏྭཱ ཨཱཧརནྟི ཏེན ཚབྦགྒིཡཱ 49 ཡཱཔེམ། ཏཡོཔི སུདཾ, བྷིཀྑཝེ, བྷིཀྑཱུ ཨོཝདཱམི, དྭེ བྷིཀྑཱུ པིཎྜཱཡ ཙརནྟི། ཡཾ དྭེ བྷིཀྑཱུ པིཎྜཱཡ ཙརིཏྭཱ ཨཱཧརནྟི ཏེན ཚབྦགྒིཡཱ ཡཱཔེམ། ཨཐ ཁོ, བྷིཀྑཝེ, པཉྩཝགྒིཡཱ བྷིཀྑཱུ མཡཱ ཨེཝཾ ཨོཝདིཡམཱནཱ ཨེཝཾ ཨནུསཱསིཡམཱནཱ ཨཏྟནཱ ཛཱཏིདྷམྨཱ སམཱནཱ ཛཱཏིདྷམྨེ ཨཱདཱིནཝཾ ཝིདིཏྭཱ ཨཛཱཏཾ ཨནུཏྟརཾ ཡོགཀྑེམཾ ནིབྦཱནཾ པརིཡེསམཱནཱ ཨཛཱཏཾ ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾསུ, ཨཏྟནཱ ཛརཱདྷམྨཱ སམཱནཱ ཛརཱདྷམྨེ ཨཱདཱིནཝཾ ཝིདིཏྭཱ ཨཛརཾ ཨནུཏྟརཾ ཡོགཀྑེམཾ ནིབྦཱནཾ པརིཡེསམཱནཱ ཨཛརཾ ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾསུ, ཨཏྟནཱ བྱཱདྷིདྷམྨཱ སམཱནཱ…པེ॰… ཨཏྟནཱ མརཎདྷམྨཱ སམཱནཱ… ཨཏྟནཱ སོཀདྷམྨཱ སམཱནཱ… ཨཏྟནཱ སཾཀིལེསདྷམྨཱ སམཱནཱ སཾཀིལེསདྷམྨེ ཨཱདཱིནཝཾ ཝིདིཏྭཱ ཨསཾཀིལིཊྛཾ ཨནུཏྟརཾ ཡོགཀྑེམཾ ནིབྦཱནཾ པརིཡེསམཱནཱ ཨསཾཀིལིཊྛཾ ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾསུ། ཉཱཎཉྩ པན ནེསཾ དསྶནཾ ཨུདཔཱདི – ‘ཨཀུཔྤཱ ནོ ཝིམུཏྟི 50, ཨཡམནྟིམཱ ཛཱཏི, ནཏྠི དཱནི པུནབྦྷཝོ’ཏི།
‘‘Asakkhiṃ kho ahaṃ, bhikkhave, pañcavaggiye bhikkhū saññāpetuṃ. Dvepi sudaṃ, bhikkhave, bhikkhū ovadāmi, tayo bhikkhū piṇḍāya caranti. Yaṃ tayo bhikkhū piṇḍāya caritvā āharanti tena chabbaggiyā 51 yāpema. Tayopi sudaṃ, bhikkhave, bhikkhū ovadāmi, dve bhikkhū piṇḍāya caranti. Yaṃ dve bhikkhū piṇḍāya caritvā āharanti tena chabbaggiyā yāpema. Atha kho, bhikkhave, pañcavaggiyā bhikkhū mayā evaṃ ovadiyamānā evaṃ anusāsiyamānā attanā jātidhammā samānā jātidhamme ādīnavaṃ viditvā ajātaṃ anuttaraṃ yogakkhemaṃ nibbānaṃ pariyesamānā ajātaṃ anuttaraṃ yogakkhemaṃ nibbānaṃ ajjhagamaṃsu, attanā jarādhammā samānā jarādhamme ādīnavaṃ viditvā ajaraṃ anuttaraṃ yogakkhemaṃ nibbānaṃ pariyesamānā ajaraṃ anuttaraṃ yogakkhemaṃ nibbānaṃ ajjhagamaṃsu, attanā byādhidhammā samānā…pe… attanā maraṇadhammā samānā… attanā sokadhammā samānā… attanā saṃkilesadhammā samānā saṃkilesadhamme ādīnavaṃ viditvā asaṃkiliṭṭhaṃ anuttaraṃ yogakkhemaṃ nibbānaṃ pariyesamānā asaṃkiliṭṭhaṃ anuttaraṃ yogakkhemaṃ nibbānaṃ ajjhagamaṃsu. Ñāṇañca pana nesaṃ dassanaṃ udapādi – ‘akuppā no vimutti 52, ayamantimā jāti, natthi dāni punabbhavo’ti.
༢༨༧. ‘‘པཉྩིམེ, བྷིཀྑཝེ, ཀཱམགུཎཱ། ཀཏམེ པཉྩ? ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ, སོཏཝིཉྙེཡྻཱ སདྡཱ…པེ॰… གྷཱནཝིཉྙེཡྻཱ གནྡྷཱ… ཛིཝ྄ཧཱཝིཉྙེཡྻཱ རསཱ… ཀཱཡཝིཉྙེཡྻཱ ཕོཊྛབྦཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཨིམེ ཁོ, བྷིཀྑཝེ, པཉྩ ཀཱམགུཎཱ། ཡེ ཧི ཀེཙི, བྷིཀྑཝེ, སམཎཱ ཝཱ བྲཱཧྨཎཱ ཝཱ ཨིམེ པཉྩ ཀཱམགུཎེ གཐིཏཱ མུཙྪིཏཱ ཨཛ྄ཛྷོཔནྣཱ ཨནཱདཱིནཝདསྶཱཝིནོ ཨནིསྶརཎཔཉྙཱ པརིབྷུཉྫནྟི, ཏེ ཨེཝམསྶུ ཝེདིཏབྦཱ – ‘ཨནཡམཱཔནྣཱ བྱསནམཱཔནྣཱ ཡཐཱཀཱམཀརཎཱིཡཱ པཱཔིམཏོ’ 53། ‘སེཡྻཐཱཔི, བྷིཀྑཝེ, ཨཱརཉྙཀོ མགོ བདྡྷོ པཱསརཱསིཾ ཨདྷིསཡེཡྻ། སོ ཨེཝམསྶ ཝེདིཏབྦོ – ཨནཡམཱཔནྣོ བྱསནམཱཔནྣོ ཡཐཱཀཱམཀརཎཱིཡོ ལུདྡསྶ། ཨཱགཙྪནྟེ ཙ པན ལུདྡེ ཡེན ཀཱམཾ ན པཀྐམིསྶཏཱི’ཏི། ཨེཝམེཝ ཁོ, བྷིཀྑཝེ, ཡེ ཧི ཀེཙི སམཎཱ ཝཱ བྲཱཧྨཎཱ ཝཱ ཨིམེ པཉྩ ཀཱམགུཎེ གཐིཏཱ མུཙྪིཏཱ ཨཛ྄ཛྷོཔནྣཱ ཨནཱདཱིནཝདསྶཱཝིནོ ཨནིསྶརཎཔཉྙཱ པརིབྷུཉྫནྟི, ཏེ ཨེཝམསྶུ ཝེདིཏབྦཱ – ‘ཨནཡམཱཔནྣཱ བྱསནམཱཔནྣཱ ཡཐཱཀཱམཀརཎཱིཡཱ པཱཔིམཏོ’། ཡེ ཙ ཁོ ཀེཙི, བྷིཀྑཝེ, སམཎཱ ཝཱ བྲཱཧྨཎཱ ཝཱ ཨིམེ པཉྩ ཀཱམགུཎེ ཨགཐིཏཱ ཨམུཙྪིཏཱ ཨནཛ྄ཛྷོཔནྣཱ ཨཱདཱིནཝདསྶཱཝིནོ ནིསྶརཎཔཉྙཱ པརིབྷུཉྫནྟི, ཏེ ཨེཝམསྶུ ཝེདིཏབྦཱ – ‘ན ཨནཡམཱཔནྣཱ ན བྱསནམཱཔནྣཱ ན ཡཐཱཀཱམཀརཎཱིཡཱ པཱཔིམཏོ’།
287. ‘‘Pañcime, bhikkhave, kāmaguṇā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Ime kho, bhikkhave, pañca kāmaguṇā. Ye hi keci, bhikkhave, samaṇā vā brāhmaṇā vā ime pañca kāmaguṇe gathitā mucchitā ajjhopannā anādīnavadassāvino anissaraṇapaññā paribhuñjanti, te evamassu veditabbā – ‘anayamāpannā byasanamāpannā yathākāmakaraṇīyā pāpimato’ 54. ‘Seyyathāpi, bhikkhave, āraññako mago baddho pāsarāsiṃ adhisayeyya. So evamassa veditabbo – anayamāpanno byasanamāpanno yathākāmakaraṇīyo luddassa. Āgacchante ca pana ludde yena kāmaṃ na pakkamissatī’ti. Evameva kho, bhikkhave, ye hi keci samaṇā vā brāhmaṇā vā ime pañca kāmaguṇe gathitā mucchitā ajjhopannā anādīnavadassāvino anissaraṇapaññā paribhuñjanti, te evamassu veditabbā – ‘anayamāpannā byasanamāpannā yathākāmakaraṇīyā pāpimato’. Ye ca kho keci, bhikkhave, samaṇā vā brāhmaṇā vā ime pañca kāmaguṇe agathitā amucchitā anajjhopannā ādīnavadassāvino nissaraṇapaññā paribhuñjanti, te evamassu veditabbā – ‘na anayamāpannā na byasanamāpannā na yathākāmakaraṇīyā pāpimato’.
‘‘སེཡྻཐཱཔི , བྷིཀྑཝེ, ཨཱརཉྙཀོ མགོ ཨབདྡྷོ པཱསརཱསིཾ ཨདྷིསཡེཡྻ། སོ ཨེཝམསྶ ཝེདིཏབྦོ – ‘ན ཨནཡམཱཔནྣོ ན བྱསནམཱཔནྣོ ན ཡཐཱཀཱམཀརཎཱིཡོ ལུདྡསྶ། ཨཱགཙྪནྟེ ཙ པན ལུདྡེ ཡེན ཀཱམཾ པཀྐམིསྶཏཱི’ཏི། ཨེཝམེཝ ཁོ, བྷིཀྑཝེ, ཡེ ཧི ཀེཙི སམཎཱ ཝཱ བྲཱཧྨཎཱ ཝཱ ཨིམེ པཉྩ ཀཱམགུཎེ ཨགཐིཏཱ ཨམུཙྪིཏཱ ཨནཛ྄ཛྷོཔནྣཱ ཨཱདཱིནཝདསྶཱཝིནོ ནིསྶརཎཔཉྙཱ པརིབྷུཉྫནྟི, ཏེ ཨེཝམསྶུ ཝེདིཏབྦཱ – ‘ན ཨནཡམཱཔནྣཱ ན བྱསནམཱཔནྣཱ ན ཡཐཱཀཱམཀརཎཱིཡཱ པཱཔིམཏོ’།
‘‘Seyyathāpi , bhikkhave, āraññako mago abaddho pāsarāsiṃ adhisayeyya. So evamassa veditabbo – ‘na anayamāpanno na byasanamāpanno na yathākāmakaraṇīyo luddassa. Āgacchante ca pana ludde yena kāmaṃ pakkamissatī’ti. Evameva kho, bhikkhave, ye hi keci samaṇā vā brāhmaṇā vā ime pañca kāmaguṇe agathitā amucchitā anajjhopannā ādīnavadassāvino nissaraṇapaññā paribhuñjanti, te evamassu veditabbā – ‘na anayamāpannā na byasanamāpannā na yathākāmakaraṇīyā pāpimato’.
‘‘སེཡྻཐཱཔི, བྷིཀྑཝེ, ཨཱརཉྙཀོ མགོ ཨརཉྙེ པཝནེ ཙརམཱནོ ཝིསྶཏྠོ གཙྪཏི, ཝིསྶཏྠོ ཏིཊྛཏི, ཝིསྶཏྠོ ནིསཱིདཏི, ཝིསྶཏྠོ སེཡྻཾ ཀཔྤེཏི། ཏཾ ཀིསྶ ཧེཏུ? ཨནཱཔཱཐགཏོ, བྷིཀྑཝེ, ལུདྡསྶ། ཨེཝམེཝ ཁོ, བྷིཀྑཝེ, བྷིཀྑུ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྷིཀྑཝེ, བྷིཀྑུ ཨནྡྷམཀཱསི མཱརཾ ཨཔདཾ, ཝདྷིཏྭཱ མཱརཙཀྑུཾ ཨདསྶནཾ གཏོ པཱཔིམཏོ།
‘‘Seyyathāpi, bhikkhave, āraññako mago araññe pavane caramāno vissattho gacchati, vissattho tiṭṭhati, vissattho nisīdati, vissattho seyyaṃ kappeti. Taṃ kissa hetu? Anāpāthagato, bhikkhave, luddassa. Evameva kho, bhikkhave, bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. Ayaṃ vuccati, bhikkhave, bhikkhu andhamakāsi māraṃ apadaṃ, vadhitvā māracakkhuṃ adassanaṃ gato pāpimato.
‘‘པུན ཙཔརཾ, བྷིཀྑཝེ, བྷིཀྑུ ཝིཏཀྐཝིཙཱརཱནཾ ཝཱུཔསམཱ ཨཛ྄ཛྷཏྟཾ སམྤསཱདནཾ ཙེཏསོ ཨེཀོདིབྷཱཝཾ ཨཝིཏཀྐཾ ཨཝིཙཱརཾ སམཱདྷིཛཾ པཱིཏིསུཁཾ དུཏིཡཾ ཛྷཱནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྷིཀྑཝེ…པེ॰… པཱཔིམཏོ།
‘‘Puna caparaṃ, bhikkhave, bhikkhu vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati. Ayaṃ vuccati, bhikkhave…pe… pāpimato.
‘‘པུན ཙཔརཾ, བྷིཀྑཝེ, བྷིཀྑུ པཱིཏིཡཱ ཙ ཝིརཱགཱ ཨུཔེཀྑཀོ ཙ ཝིཧརཏི, སཏོ ཙ སམྤཛཱནོ, སུཁཉྩ ཀཱཡེན པཊིསཾཝེདེཏི ཡཾ ཏཾ ཨརིཡཱ ཨཱཙིཀྑནྟི ‘ཨུཔེཀྑཀོ སཏིམཱ སུཁཝིཧཱརཱི’ཏི ཏཏིཡཾ ཛྷཱནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྷིཀྑཝེ…པེ॰… པཱཔིམཏོ།
‘‘Puna caparaṃ, bhikkhave, bhikkhu pītiyā ca virāgā upekkhako ca viharati, sato ca sampajāno, sukhañca kāyena paṭisaṃvedeti yaṃ taṃ ariyā ācikkhanti ‘upekkhako satimā sukhavihārī’ti tatiyaṃ jhānaṃ upasampajja viharati. Ayaṃ vuccati, bhikkhave…pe… pāpimato.
‘‘པུན ཙཔརཾ, བྷིཀྑཝེ, བྷིཀྑུ སུཁསྶ ཙ པཧཱནཱ དུཀྑསྶ ཙ པཧཱནཱ པུབྦེཝ སོམནསྶདོམནསྶཱནཾ ཨཏྠངྒམཱ ཨདུཀྑམསུཁཾ ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྷིཀྑཝེ…པེ॰… པཱཔིམཏོ།
‘‘Puna caparaṃ, bhikkhave, bhikkhu sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharati. Ayaṃ vuccati, bhikkhave…pe… pāpimato.
‘‘པུན ཙཔརཾ, བྷིཀྑཝེ, བྷིཀྑུ སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྷིཀྑཝེ…པེ॰… པཱཔིམཏོ།
‘‘Puna caparaṃ, bhikkhave, bhikkhu sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ananto ākāso’ti ākāsānañcāyatanaṃ upasampajja viharati. Ayaṃ vuccati, bhikkhave…pe… pāpimato.
‘‘པུན ཙཔརཾ, བྷིཀྑཝེ, བྷིཀྑུ སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྷིཀྑཝེ…པེ॰… པཱཔིམཏོ།
‘‘Puna caparaṃ, bhikkhave, bhikkhu sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja viharati. Ayaṃ vuccati, bhikkhave…pe… pāpimato.
‘‘པུན ཙཔརཾ, བྷིཀྑཝེ, བྷིཀྑུ སབྦསོ ཝིཉྙཱཎཉྩཱཡཏནཾ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྷིཀྑཝེ…པེ॰… པཱཔིམཏོ།
‘‘Puna caparaṃ, bhikkhave, bhikkhu sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja viharati. Ayaṃ vuccati, bhikkhave…pe… pāpimato.
‘‘པུན ཙཔརཾ, བྷིཀྑཝེ, བྷིཀྑུ སབྦསོ ཨཱཀིཉྩཉྙཱཡཏནཾ སམཏིཀྐམྨ ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྷིཀྑཝེ…པེ॰… པཱཔིམཏོ།
‘‘Puna caparaṃ, bhikkhave, bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati. Ayaṃ vuccati, bhikkhave…pe… pāpimato.
‘‘པུན ཙཔརཾ, བྷིཀྑཝེ, བྷིཀྑུ སབྦསོ ནེཝསཉྙཱནཱསཉྙཱཡཏནཾ སམཏིཀྐམྨ སཉྙཱཝེདཡིཏནིརོདྷཾ ཨུཔསམྤཛྫ ཝིཧརཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟི། ཨཡཾ ཝུཙྩཏི, བྷིཀྑཝེ, བྷིཀྑུ ཨནྡྷམཀཱསི མཱརཾ ཨཔདཾ, ཝདྷིཏྭཱ མཱརཙཀྑུཾ ཨདསྶནཾ གཏོ པཱཔིམཏོ། ཏིཎྞོ ལོཀེ ཝིསཏྟིཀཾ ཝིསྶཏྠོ གཙྪཏི, ཝིསྶཏྠོ ཏིཊྛཏི, ཝིསྶཏྠོ ནིསཱིདཏི, ཝིསྶཏྠོ སེཡྻཾ ཀཔྤེཏི། ཏཾ ཀིསྶ ཧེཏུ? ཨནཱཔཱཐགཏོ, བྷིཀྑཝེ, པཱཔིམཏོ’’ཏི།
‘‘Puna caparaṃ, bhikkhave, bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati, paññāya cassa disvā āsavā parikkhīṇā honti. Ayaṃ vuccati, bhikkhave, bhikkhu andhamakāsi māraṃ apadaṃ, vadhitvā māracakkhuṃ adassanaṃ gato pāpimato. Tiṇṇo loke visattikaṃ vissattho gacchati, vissattho tiṭṭhati, vissattho nisīdati, vissattho seyyaṃ kappeti. Taṃ kissa hetu? Anāpāthagato, bhikkhave, pāpimato’’ti.
ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི།
Idamavoca bhagavā. Attamanā te bhikkhū bhagavato bhāsitaṃ abhinandunti.
པཱསརཱསིསུཏྟཾ ནིཊྛིཏཾ ཚཊྛཾ།
Pāsarāsisuttaṃ niṭṭhitaṃ chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༦. པཱསརཱསིསུཏྟཝཎྞནཱ • 6. Pāsarāsisuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༦. པཱསརཱསིསུཏྟཝཎྞནཱ • 6. Pāsarāsisuttavaṇṇanā
