Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā)

    ༦. པཱསརཱསིསུཏྟཝཎྞནཱ

    6. Pāsarāsisuttavaṇṇanā

    ༢༧༢. ཨེཝཾ མེ སུཏནྟི པཱསརཱསིསུཏྟཾ། ཏཏྠ སཱདྷུ མཡཾ, ཨཱཝུསོཏི ཨཱཡཱཙནྟཱ བྷཎནྟི། ཨེཏེ ཀིར པཉྩསཏཱ བྷིཀྑཱུ ཛནཔདཝཱསིནོ ‘‘དསབལཾ པསྶིསྶཱམཱ’’ཏི སཱཝཏྠིཾ ཨནུཔྤཏྟཱ། སཏྠུདསྶནཾ པན ཨེཏེཧི ལདྡྷཾ, དྷམྨིཾ ཀཐཾ ན ཏཱཝ སུཎནྟི། ཏེ སཏྠུགཱརཝེན ‘‘ཨམྷཱཀཾ, བྷནྟེ , དྷམྨཀཐཾ ཀཐེཐཱ’’ཏི ཝཏྟུཾ ན སཀྐོནྟི། བུདྡྷཱ ཧི གརཱུ ཧོནྟི, ཨེཀཙཱརིཀོ སཱིཧོ མིགརཱཛཱ ཝིཡ, པབྷིནྣཀུཉྫརོ ཝིཡ, ཕཎཀཏཨཱསཱིཝིསོ ཝིཡ, མཧཱཨགྒིཀྑནྡྷོ ཝིཡ ཙ དུརཱསདཱ ཝུཏྟམྤི ཙེཏཾ –

    272.Evaṃme sutanti pāsarāsisuttaṃ. Tattha sādhu mayaṃ, āvusoti āyācantā bhaṇanti. Ete kira pañcasatā bhikkhū janapadavāsino ‘‘dasabalaṃ passissāmā’’ti sāvatthiṃ anuppattā. Satthudassanaṃ pana etehi laddhaṃ, dhammiṃ kathaṃ na tāva suṇanti. Te satthugāravena ‘‘amhākaṃ, bhante , dhammakathaṃ kathethā’’ti vattuṃ na sakkonti. Buddhā hi garū honti, ekacāriko sīho migarājā viya, pabhinnakuñjaro viya, phaṇakataāsīviso viya, mahāaggikkhandho viya ca durāsadā vuttampi cetaṃ –

    ‘‘ཨཱསཱིཝིསོ ཡཐཱ གྷོརོ, མིགརཱཛཱཝ ཀེསརཱི།

    ‘‘Āsīviso yathā ghoro, migarājāva kesarī;

    ནཱགོཝ ཀུཉྫརོ དནྟཱི, ཨེཝཾ བུདྡྷཱ དུརཱསདཱ’’ཏི༎

    Nāgova kuñjaro dantī, evaṃ buddhā durāsadā’’ti.

    ཨེཝཾ དུརཱསདཾ སཏྠཱརཾ ཏེ བྷིཀྑཱུ སཡཾ ཡཱཙིཏུཾ ཨསཀྐོནྟཱ ཨཱཡསྨནྟཾ ཨཱནནྡཾ ཡཱཙམཱནཱ ‘‘སཱདྷུ མཡཾ, ཨཱཝུསོ’’ཏི ཨཱཧཾསུ།

    Evaṃ durāsadaṃ satthāraṃ te bhikkhū sayaṃ yācituṃ asakkontā āyasmantaṃ ānandaṃ yācamānā ‘‘sādhu mayaṃ, āvuso’’ti āhaṃsu.

    ཨཔྤེཝ ནཱམཱཏི ཨཔི ནཱམ ལབྷེཡྻཱཐ། ཀསྨཱ པན ཐེརོ ཏེ བྷིཀྑཱུ ‘‘རམྨཀསྶ བྲཱཧྨཎསྶ ཨསྶམཾ ཨུཔསངྐམེཡྻཱཐཱ’’ཏི ཨཱཧ? པཱཀཊཀིརིཡཏཱཡ། དསབལསྶ ཧི ཀིརིཡཱ ཐེརསྶ པཱཀཊཱ ཧོཏི; ཛཱནཱཏི ཐེརོ, ‘‘ཨཛྫ སཏྠཱ ཛེཏཝནེ ཝསིཏྭཱ པུབྦཱརཱམེ དིཝཱཝིཧཱརཾ ཀརིསྶཏི; ཨཛྫ པུབྦཱརཱམེ ཝསིཏྭཱ ཛེཏཝནེ དིཝཱཝིཧཱརཾ ཀརིསྶཏི; ཨཛྫ ཨེཀཀོཝ པིཎྜཱཡ པཝིསིསྶཏི; ཨཛྫ བྷིཀྑུསངྒྷཔརིཝུཏོ ཨིམསྨིཾ ཀཱལེ ཛནཔདཙཱརིཀཾ ནིཀྑམིསྶཏཱི’’ཏི། ཀིཾ པནསྶ ཨེཝཾ ཛཱནནཏྠཾ ཙེཏོཔརིཡཉཱཎཾ ཨཏྠཱིཏི? ནཏྠི། ཨནུམཱནབུདྡྷིཡཱ པན ཀཏཀིརིཡཱཡ ནཡགྒཱཧེན ཛཱནཱཏི། ཡཉྷི དིཝསཾ བྷགཝཱ ཛེཏཝནེ ཝསིཏྭཱ པུབྦཱརཱམེ དིཝཱཝིཧཱརཾ ཀཱཏུཀཱམོ ཧོཏི, ཏདཱ སེནཱསནཔརིཀྑཱརབྷཎྜཱནཾ པཊིསཱམནཱཀཱརཾ དསྶེཏི, ཐེརོ སམྨཛྫནིསངྐཱརཚཌྜནཀཱདཱིནི པཊིསཱམེཏི། པུབྦཱརཱམེ ཝསིཏྭཱ ཛེཏཝནཾ དིཝཱཝིཧཱརཱཡ ཨཱགམནཀཱལེཔི ཨེསེཝ ནཡོ།

    Appeva nāmāti api nāma labheyyātha. Kasmā pana thero te bhikkhū ‘‘rammakassa brāhmaṇassa assamaṃ upasaṅkameyyāthā’’ti āha? Pākaṭakiriyatāya. Dasabalassa hi kiriyā therassa pākaṭā hoti; jānāti thero, ‘‘ajja satthā jetavane vasitvā pubbārāme divāvihāraṃ karissati; ajja pubbārāme vasitvā jetavane divāvihāraṃ karissati; ajja ekakova piṇḍāya pavisissati; ajja bhikkhusaṅghaparivuto imasmiṃ kāle janapadacārikaṃ nikkhamissatī’’ti. Kiṃ panassa evaṃ jānanatthaṃ cetopariyañāṇaṃ atthīti? Natthi. Anumānabuddhiyā pana katakiriyāya nayaggāhena jānāti. Yañhi divasaṃ bhagavā jetavane vasitvā pubbārāme divāvihāraṃ kātukāmo hoti, tadā senāsanaparikkhārabhaṇḍānaṃ paṭisāmanākāraṃ dasseti, thero sammajjanisaṅkārachaḍḍanakādīni paṭisāmeti. Pubbārāme vasitvā jetavanaṃ divāvihārāya āgamanakālepi eseva nayo.

    ཡདཱ པན ཨེཀཀོ པིཎྜཱཡ པཝིསིཏུཀཱམོ ཧོཏི, ཏདཱ པཱཏོཝ སརཱིརཔཊིཛགྒནཾ ཀཏྭཱ གནྡྷཀུཊིཾ པཝིསིཏྭཱ དྭཱརཾ པིདྷཱཡ ཕལསམཱཔཏྟིཾ ཨཔྤེཏྭཱ ནིསཱིདཏི། ཐེརོ ‘‘ཨཛྫ བྷགཝཱ བོདྷནེཡྻབནྡྷཝཾ དིསྭཱ ནིསིནྣོ’’ཏི ཏཱཡ སཉྙཱཡ ཉཏྭཱ ‘‘ཨཛྫ, ཨཱཝུསོ, བྷགཝཱ ཨེཀཀོ པཝིསིཏུཀཱམོ, ཏུམྷེ བྷིཀྑཱཙཱརསཛྫཱ ཧོཐཱ’’ཏི བྷིཀྑཱུནཾ སཉྙཾ དེཏི། ཡདཱ པན བྷིཀྑུསངྒྷཔརིཝཱརོ པཝིསིཏུཀཱམོ ཧོཏི, ཏདཱ གནྡྷཀུཊིདྭཱརཾ ཨུཔཌྜྷཔིདཧིཏཾ ཀཏྭཱ ཕལསམཱཔཏྟིཾ ཨཔྤེཏྭཱ ནིསཱིདཏི, ཐེརོ ཏཱཡ སཉྙཱཡ ཉཏྭཱ པཏྟཙཱིཝརགྒཧཎཏྠཱཡ བྷིཀྑཱུནཾ སཉྙཾ དེཏི། ཡདཱ ཛནཔདཙཱརིཀཾ ནིཀྑམིཏུཀཱམོ ཧོཏི, ཏདཱ ཨེཀཾ དྭེ ཨཱལོཔེ ཨཏིརེཀཾ བྷུཉྫཏི, སབྦཀཱལཾ ཙངྐམནཉྩཱརུཡ྄ཧ ཨཔརཱཔརཾ ཙངྐམཏི, ཐེརོ ཏཱཡ སཉྙཱཡ ཉཏྭཱ ‘‘བྷགཝཱ, ཨཱཝུསོ, ཛནཔདཙཱརིཀཾ ཙརིཏུཀཱམོ, ཏུམྷཱཀཾ ཀཏྟབྦཾ ཀརོཐཱ’’ཏི བྷིཀྑཱུནཾ སཉྙཾ དེཏི།

    Yadā pana ekako piṇḍāya pavisitukāmo hoti, tadā pātova sarīrapaṭijagganaṃ katvā gandhakuṭiṃ pavisitvā dvāraṃ pidhāya phalasamāpattiṃ appetvā nisīdati. Thero ‘‘ajja bhagavā bodhaneyyabandhavaṃ disvā nisinno’’ti tāya saññāya ñatvā ‘‘ajja, āvuso, bhagavā ekako pavisitukāmo, tumhe bhikkhācārasajjā hothā’’ti bhikkhūnaṃ saññaṃ deti. Yadā pana bhikkhusaṅghaparivāro pavisitukāmo hoti, tadā gandhakuṭidvāraṃ upaḍḍhapidahitaṃ katvā phalasamāpattiṃ appetvā nisīdati, thero tāya saññāya ñatvā pattacīvaraggahaṇatthāya bhikkhūnaṃ saññaṃ deti. Yadā janapadacārikaṃ nikkhamitukāmo hoti, tadā ekaṃ dve ālope atirekaṃ bhuñjati, sabbakālaṃ caṅkamanañcāruyha aparāparaṃ caṅkamati, thero tāya saññāya ñatvā ‘‘bhagavā, āvuso, janapadacārikaṃ caritukāmo, tumhākaṃ kattabbaṃ karothā’’ti bhikkhūnaṃ saññaṃ deti.

    བྷགཝཱ པཋམབོདྷིཡཾ ཝཱིསཏི ཝསྶཱནི ཨནིབདྡྷཝཱསོ ཨཧོསི, པཙྪཱ པཉྩཝཱིསཏི ཝསྶཱནི ཨབྦོཀིཎྞཾ སཱཝཏྠིཾཡེཝ ཨུཔནིསྶཱཡ ཝསནྟོ ཨེཀདིཝསེ དྭེ ཋཱནཱནི པརིབྷུཉྫཏི། ཛེཏཝནེ རཏྟིཾ ཝསིཏྭཱ པུནདིཝསེ བྷིཀྑུསངྒྷཔརིཝུཏོ དཀྑིཎདྭཱརེན སཱཝཏྠིཾ པིཎྜཱཡ པཝིསིཏྭཱ པཱཙཱིནདྭཱརེན ནིཀྑམིཏྭཱ པུབྦཱརཱམེ དིཝཱཝིཧཱརཾ ཀརོཏི། པུབྦཱརཱམེ རཏྟིཾ ཝསིཏྭཱ པུནདིཝསེ པཱཙཱིནདྭཱརེན སཱཝཏྠིཾ པིཎྜཱཡ པཝིསིཏྭཱ དཀྑིཎདྭཱརེན ནིཀྑམིཏྭཱ ཛེཏཝནེ དིཝཱཝིཧཱརཾ ཀརོཏི། ཀསྨཱ? དྭིནྣཾ ཀུལཱནཾ ཨནུཀམྤཱཡ། མནུསྶཏྟབྷཱཝེ ཋིཏེན ཧི ཨནཱཐཔིཎྜིཀེན ཝིཡ ཨཉྙེན ཀེནཙི, མཱཏུགཱམཏྟབྷཱཝེ ཋིཏཱཡ ཙ ཝིསཱཁཱཡ ཝིཡ ཨཉྙཱཡ ཨིཏྠིཡཱ ཏཐཱགཏཾ ཨུདྡིསྶ དྷནཔརིཙྩཱགོ ཀཏོ ནཱམ ནཏྠི, ཏསྨཱ བྷགཝཱ ཏེསཾ ཨནུཀམྤཱཡ ཨེཀདིཝསེ ཨིམཱནི དྭེ ཋཱནཱནི པརིབྷུཉྫཏི། ཏསྨིཾ པན དིཝསེ ཛེཏཝནེ ཝསི, ཏསྨཱ ཐེརོ – ‘‘ཨཛྫ བྷགཝཱ སཱཝཏྠིཡཾ པིཎྜཱཡ ཙརིཏྭཱ སཱཡནྷཀཱལེ གཏྟཱནི པརིསིཉྩནཏྠཱཡ པུབྦཀོཊྛཀཾ གམིསྶཏི; ཨཐཱཧཾ གཏྟཱནི པརིསིཉྩིཏྭཱ ཋིཏཾ བྷགཝནྟཾ ཡཱཙིཏྭཱ རམྨཀསྶ བྲཱཧྨཎསྶ ཨསྶམཾ གཧེཏྭཱ གམིསྶཱམི། ཨེཝམིམེ བྷིཀྑཱུ བྷགཝཏོ སམྨུཁཱ ལབྷིསྶནྟི དྷམྨཀཐཾ སཝནཱཡཱ’’ཏི ཙིནྟེཏྭཱ ཏེ བྷིཀྑཱུ ཨེཝམཱཧ།

    Bhagavā paṭhamabodhiyaṃ vīsati vassāni anibaddhavāso ahosi, pacchā pañcavīsati vassāni abbokiṇṇaṃ sāvatthiṃyeva upanissāya vasanto ekadivase dve ṭhānāni paribhuñjati. Jetavane rattiṃ vasitvā punadivase bhikkhusaṅghaparivuto dakkhiṇadvārena sāvatthiṃ piṇḍāya pavisitvā pācīnadvārena nikkhamitvā pubbārāme divāvihāraṃ karoti. Pubbārāme rattiṃ vasitvā punadivase pācīnadvārena sāvatthiṃ piṇḍāya pavisitvā dakkhiṇadvārena nikkhamitvā jetavane divāvihāraṃ karoti. Kasmā? Dvinnaṃ kulānaṃ anukampāya. Manussattabhāve ṭhitena hi anāthapiṇḍikena viya aññena kenaci, mātugāmattabhāve ṭhitāya ca visākhāya viya aññāya itthiyā tathāgataṃ uddissa dhanapariccāgo kato nāma natthi, tasmā bhagavā tesaṃ anukampāya ekadivase imāni dve ṭhānāni paribhuñjati. Tasmiṃ pana divase jetavane vasi, tasmā thero – ‘‘ajja bhagavā sāvatthiyaṃ piṇḍāya caritvā sāyanhakāle gattāni parisiñcanatthāya pubbakoṭṭhakaṃ gamissati; athāhaṃ gattāni parisiñcitvā ṭhitaṃ bhagavantaṃ yācitvā rammakassa brāhmaṇassa assamaṃ gahetvā gamissāmi. Evamime bhikkhū bhagavato sammukhā labhissanti dhammakathaṃ savanāyā’’ti cintetvā te bhikkhū evamāha.

    མིགཱརམཱཏུཔཱསཱདོཏི ཝིསཱཁཱཡ པཱསཱདོ། སཱ ཧི མིགཱརེན སེཊྛིནཱ མཱཏུཊྛཱནེ ཋཔིཏཏྟཱ མིགཱརམཱཏཱཏི ཝུཙྩཏི། པཊིསལླཱནཱ ཝུཊྛིཏོཏི ཏསྨིཾ ཀིར པཱསཱདེ དྭིནྣཾ མཧཱསཱཝཀཱནཾ སིརིགབྦྷཱནཾ མཛ྄ཛྷེ བྷགཝཏོ སིརིགབྦྷོ ཨཧོསི། ཐེརོ དྭཱརཾ ཝིཝརིཏྭཱ ཨནྟོགབྦྷཾ སམྨཛྫིཏྭཱ མཱལཱཀཙཝརཾ ནཱིཧརིཏྭཱ མཉྩཔཱིཋཾ པཉྙཔེཏྭཱ སཏྠུ སཉྙཾ ཨདཱསི། སཏྠཱ སིརིགབྦྷཾ པཝིསིཏྭཱ དཀྑིཎེན པསྶེན སཏོ སམྤཛཱནོ སཱིཧསེཡྻཾ ཨུཔགམྨ དརཐཾ པཊིཔྤསྶམྦྷེཏྭཱ ཨུཊྛཱཡ ཕལསམཱཔཏྟིཾ ཨཔྤེཏྭཱ ནིསཱིདིཏྭཱ སཱཡནྷསམཡེ ཏཏོ ཝུཊྛཱསི། ཏཾ སནྡྷཱཡ ཝུཏྟཾ ‘‘པཊིསལླཱནཱ ཝུཊྛིཏོ’’ཏི།

    Migāramātupāsādoti visākhāya pāsādo. Sā hi migārena seṭṭhinā mātuṭṭhāne ṭhapitattā migāramātāti vuccati. Paṭisallānā vuṭṭhitoti tasmiṃ kira pāsāde dvinnaṃ mahāsāvakānaṃ sirigabbhānaṃ majjhe bhagavato sirigabbho ahosi. Thero dvāraṃ vivaritvā antogabbhaṃ sammajjitvā mālākacavaraṃ nīharitvā mañcapīṭhaṃ paññapetvā satthu saññaṃ adāsi. Satthā sirigabbhaṃ pavisitvā dakkhiṇena passena sato sampajāno sīhaseyyaṃ upagamma darathaṃ paṭippassambhetvā uṭṭhāya phalasamāpattiṃ appetvā nisīditvā sāyanhasamaye tato vuṭṭhāsi. Taṃ sandhāya vuttaṃ ‘‘paṭisallānā vuṭṭhito’’ti.

    པརིསིཉྩིཏུནྟི ཡོ ཧི ཙུཎྞམཏྟིཀཱདཱིཧི གཏྟཱནི ཨུབྦཊྚེནྟོ མལླཀམུཊྛཱདཱིཧི ཝཱ གྷཾསནྟོ ནྷཱཡཏི, སོ ནྷཱཡཏཱིཏི ཝུཙྩཏི། ཡོ ཏཐཱ ཨཀཏྭཱ པཀཏིཡཱཝ ནྷཱཡཏི, སོ པརིསིཉྩཏཱིཏི ཝུཙྩཏི། བྷགཝཏོཔི སརཱིརེ ཏཐཱ ཧརིཏབྦཾ རཛོཛལླཾ ནཱམ ན ཨུཔལིམྤཏི, ཨུཏུགྒཧཎཏྠཾ པན བྷགཝཱ ཀེཝལཾ ཨུདཀཾ ཨོཏརཏི། ཏེནཱཧ – ‘‘གཏྟཱནི པརིསིཉྩིཏུ’’ནྟི། པུབྦཀོཊྛཀོཏི པཱཙཱིནཀོཊྛཀོ།

    Parisiñcitunti yo hi cuṇṇamattikādīhi gattāni ubbaṭṭento mallakamuṭṭhādīhi vā ghaṃsanto nhāyati, so nhāyatīti vuccati. Yo tathā akatvā pakatiyāva nhāyati, so parisiñcatīti vuccati. Bhagavatopi sarīre tathā haritabbaṃ rajojallaṃ nāma na upalimpati, utuggahaṇatthaṃ pana bhagavā kevalaṃ udakaṃ otarati. Tenāha – ‘‘gattāni parisiñcitu’’nti. Pubbakoṭṭhakoti pācīnakoṭṭhako.

    སཱཝཏྠིཡཾ ཀིར ཝིཧཱརོ ཀདཱཙི མཧཱ ཧོཏི ཀདཱཙི ཁུདྡཀོ། ཏཐཱ ཧི སོ ཝིཔསྶིསྶ བྷགཝཏོ ཀཱལེ ཡོཛནིཀོ ཨཧོསི, སིཁིསྶ ཏིགཱཝུཏོ, ཝེསྶབྷུསྶ ཨཌྜྷཡོཛནིཀོ, ཀཀུསནྡྷསྶ གཱཝུཏཔྤམཱཎོ, ཀོཎཱགམནསྶ ཨཌྜྷགཱཝུཏཔྤམཱཎོ, ཀསྶཔསྶ ཝཱིསཏིཨུསབྷཔྤམཱཎོ, ཨམྷཱཀཾ བྷགཝཏོ ཀཱལེ ཨཊྛཀརཱིསཔྤམཱཎོ ཛཱཏོ། ཏམྤི ནགརཾ ཏསྶ ཝིཧཱརསྶ ཀདཱཙི པཱཙཱིནཏོ ཧོཏི, ཀདཱཙི དཀྑིཎཏོ, ཀདཱཙི པཙྪིམཏོ, ཀདཱཙི ཨུཏྟརཏོ། ཛེཏཝནེ གནྡྷཀུཊིཡཾ པན ཙཏུནྣཾ མཉྩཔཱདཱནཾ པཏིཊྛིཏཊྛཱནཾ ཨཙལམེཝ།

    Sāvatthiyaṃ kira vihāro kadāci mahā hoti kadāci khuddako. Tathā hi so vipassissa bhagavato kāle yojaniko ahosi, sikhissa tigāvuto, vessabhussa aḍḍhayojaniko, kakusandhassa gāvutappamāṇo, koṇāgamanassa aḍḍhagāvutappamāṇo, kassapassa vīsatiusabhappamāṇo, amhākaṃ bhagavato kāle aṭṭhakarīsappamāṇo jāto. Tampi nagaraṃ tassa vihārassa kadāci pācīnato hoti, kadāci dakkhiṇato, kadāci pacchimato, kadāci uttarato. Jetavane gandhakuṭiyaṃ pana catunnaṃ mañcapādānaṃ patiṭṭhitaṭṭhānaṃ acalameva.

    ཙཏྟཱརི ཧི ཨཙལཙེཏིཡཊྛཱནཱནི ནཱམ མཧཱབོདྷིཔལླངྐཊྛཱནཾ ཨིསིཔཏནེ དྷམྨཙཀྐཔྤཝཏྟནཊྛཱནཾ སངྐསྶནགརདྭཱརེ དེཝོརོཧཎཀཱལེ སོཔཱནསྶ པཏིཊྛཊྛཱནཾ མཉྩཔཱདཊྛཱནནྟི། ཨཡཾ པན པུབྦཀོཊྛཀོ ཀསྶཔདསབལསྶ ཝཱིསཏིཨུསབྷཝིཧཱརཀཱལེ པཱཙཱིནདྭཱརེ ཀོཊྛཀོ ཨཧོསི། སོ ཨིདཱནིཔི པུབྦཀོཊྛཀོཏྭེཝ པཉྙཱཡཏི། ཀསྶཔདསབལསྶ ཀཱལེ ཨཙིརཝཏཱི ནགརཾ པརིཀྑིཔིཏྭཱ སནྡམཱནཱ པུབྦཀོཊྛཀཾ པཏྭཱ ཨུདཀེན བྷིནྡིཏྭཱ མཧནྟཾ ཨུདཀརཧདཾ མཱཔེསི སམཏིཏྠཾ ཨནུཔུབྦགམྦྷཱིརཾ། ཏཏྠ ཨེཀཾ རཉྙོ ནྷཱནཏིཏྠཾ, ཨེཀཾ ནཱགརཱནཾ, ཨེཀཾ བྷིཀྑུསངྒྷསྶ, ཨེཀཾ བུདྡྷཱནནྟི ཨེཝཾ པཱཊིཡེཀྐཱནི ནྷཱནཏིཏྠཱནི ཧོནྟི རམཎཱིཡཱནི ཝིཔྤཀིཎྞརཛཏཔཊྚསདིསཝཱལིཀཱནི། ཨིཏི བྷགཝཱ ཨཱཡསྨཏཱ ཨཱནནྡེན སདྡྷིཾ ཡེན ཨཡཾ ཨེཝརཱུཔོ པུབྦཀོཊྛཀོ ཏེནུཔསངྐམི གཏྟཱནི པརིསིཉྩིཏུཾ ། ཨཐཱཡསྨཱ ཨཱནནྡོ ཨུདཀསཱཊིཀཾ ཨུཔནེསི། བྷགཝཱ རཏྟདུཔཊྚཾ ཨཔནེཏྭཱ ཨུདཀསཱཊིཀཾ ནིཝཱསེསི། ཐེརོ དུཔཊྚེན སདྡྷིཾ མཧཱཙཱིཝརཾ ཨཏྟནོ ཧཏྠགཏམཀཱསི། བྷགཝཱ ཨུདཀཾ ཨོཏརི། སཧོཏརཎེནེཝསྶ ཨུདཀེ མཙྪཀཙྪཔཱ སབྦེ སུཝཎྞཝཎྞཱ ཨཧེསུཾ། ཡནྟནཱལིཀཱཧི སུཝཎྞརསདྷཱརཱནིསིཉྩམཱནཀཱལོ ཝིཡ སུཝཎྞཔཊཔསཱརཎཀཱལོ ཝིཡ ཙ ཨཧོསི། ཨཐ བྷགཝཏོ ནྷཱནཝཏྟཾ དསྶེཏྭཱ ནྷཏྭཱ པཙྩུཏྟིཎྞསྶ ཐེརོ རཏྟདུཔཊྚཾ ཨུཔནེསི། བྷགཝཱ ཏཾ ནིཝཱསེཏྭཱ ཝིཛྫུལཏཱསདིསཾ ཀཱཡབནྡྷནཾ བནྡྷིཏྭཱ མཧཱཙཱིཝརཾ ཨནྟནྟེན སཾཧརིཏྭཱ པདུམགབྦྷསདིསཾ ཀཏྭཱ ཨུཔནཱིཏཾ དྭཱིསུ ཀཎྞེསུ གཧེཏྭཱ ཨཊྛཱསི། ཏེན ཝུཏྟཾ – ‘‘པུབྦཀོཊྛཀེ གཏྟཱནི པརིསིཉྩིཏྭཱ པཙྩུཏྟརིཏྭཱ ཨེཀཙཱིཝརོ ཨཊྛཱསཱི’’ཏི།

    Cattāri hi acalacetiyaṭṭhānāni nāma mahābodhipallaṅkaṭṭhānaṃ isipatane dhammacakkappavattanaṭṭhānaṃ saṅkassanagaradvāre devorohaṇakāle sopānassa patiṭṭhaṭṭhānaṃ mañcapādaṭṭhānanti. Ayaṃ pana pubbakoṭṭhako kassapadasabalassa vīsatiusabhavihārakāle pācīnadvāre koṭṭhako ahosi. So idānipi pubbakoṭṭhakotveva paññāyati. Kassapadasabalassa kāle aciravatī nagaraṃ parikkhipitvā sandamānā pubbakoṭṭhakaṃ patvā udakena bhinditvā mahantaṃ udakarahadaṃ māpesi samatitthaṃ anupubbagambhīraṃ. Tattha ekaṃ rañño nhānatitthaṃ, ekaṃ nāgarānaṃ, ekaṃ bhikkhusaṅghassa, ekaṃ buddhānanti evaṃ pāṭiyekkāni nhānatitthāni honti ramaṇīyāni vippakiṇṇarajatapaṭṭasadisavālikāni. Iti bhagavā āyasmatā ānandena saddhiṃ yena ayaṃ evarūpo pubbakoṭṭhako tenupasaṅkami gattāni parisiñcituṃ . Athāyasmā ānando udakasāṭikaṃ upanesi. Bhagavā rattadupaṭṭaṃ apanetvā udakasāṭikaṃ nivāsesi. Thero dupaṭṭena saddhiṃ mahācīvaraṃ attano hatthagatamakāsi. Bhagavā udakaṃ otari. Sahotaraṇenevassa udake macchakacchapā sabbe suvaṇṇavaṇṇā ahesuṃ. Yantanālikāhi suvaṇṇarasadhārānisiñcamānakālo viya suvaṇṇapaṭapasāraṇakālo viya ca ahosi. Atha bhagavato nhānavattaṃ dassetvā nhatvā paccuttiṇṇassa thero rattadupaṭṭaṃ upanesi. Bhagavā taṃ nivāsetvā vijjulatāsadisaṃ kāyabandhanaṃ bandhitvā mahācīvaraṃ antantena saṃharitvā padumagabbhasadisaṃ katvā upanītaṃ dvīsu kaṇṇesu gahetvā aṭṭhāsi. Tena vuttaṃ – ‘‘pubbakoṭṭhake gattāni parisiñcitvā paccuttaritvā ekacīvaro aṭṭhāsī’’ti.

    ཨེཝཾ ཋིཏསྶ པན བྷགཝཏོ སརཱིརཾ ཝིཀསིཏཀམལུཔྤལསརཾ སབྦཔཱལིཕུལླཾ པཱརིཙྪཏྟཀཾ ཏཱརཱམརཱིཙིཝིཀསིཏཾ ཙ གགནཏལཾ སིརིཡཱ ཨཝཧསམཱནཾ ཝིཡ ཝིརོཙིཏྠ། བྱཱམཔྤབྷཱཔརིཀྑེཔཝིལཱསིནཱི ཙསྶ དྭཏྟིཾསཝརལཀྑཎམཱལཱ གནྠེཏྭཱ ཋཔིཏཱ དྭཏྟིཾསཙནྡམཱལཱ ཝིཡ, དྭཏྟིཾསསཱུརིཡམཱལཱ ཝིཡ, པཊིཔཱཊིཡཱ ཋཔིཏཱ དྭཏྟིཾསཙཀྐཝཏྟི དྭཏྟིཾསདེཝརཱཛཱ དྭཏྟིཾསམཧཱབྲཧྨཱནོ ཝིཡ ཙ ཨཏིཝིཡ ཝིརོཙིཏྠ, ཝཎྞབྷཱུམིནཱམེསཱ། ཨེཝརཱུཔེསུ ཋཱནེསུ བུདྡྷཱནཾ སརཱིརཝཎྞཾ ཝཱ གུཎཝཎྞཾ ཝཱ ཙུཎྞིཡཔདེཧི ཝཱ གཱཐཱཧི ཝཱ ཨཏྠཉྩ ཨུཔམཱཡོ ཙ ཀཱརཎཱནི ཙ ཨཱཧརིཏྭཱ པཊིབལེན དྷམྨཀཐིཀེན པཱུརེཏྭཱ ཀཐེཏུཾ ཝཊྚཏཱིཏི ཨེཝརཱུཔེསུ ཋཱནེསུ དྷམྨཀཐིཀསྶ ཐཱམོ ཝེདིཏབྦོ།

    Evaṃ ṭhitassa pana bhagavato sarīraṃ vikasitakamaluppalasaraṃ sabbapāliphullaṃ pāricchattakaṃ tārāmarīcivikasitaṃ ca gaganatalaṃ siriyā avahasamānaṃ viya virocittha. Byāmappabhāparikkhepavilāsinī cassa dvattiṃsavaralakkhaṇamālā ganthetvā ṭhapitā dvattiṃsacandamālā viya, dvattiṃsasūriyamālā viya, paṭipāṭiyā ṭhapitā dvattiṃsacakkavatti dvattiṃsadevarājā dvattiṃsamahābrahmāno viya ca ativiya virocittha, vaṇṇabhūmināmesā. Evarūpesu ṭhānesu buddhānaṃ sarīravaṇṇaṃ vā guṇavaṇṇaṃ vā cuṇṇiyapadehi vā gāthāhi vā atthañca upamāyo ca kāraṇāni ca āharitvā paṭibalena dhammakathikena pūretvā kathetuṃ vaṭṭatīti evarūpesu ṭhānesu dhammakathikassa thāmo veditabbo.

    ༢༧༣. གཏྟཱནི པུབྦཱཔཡམཱནོཏི པཀཏིབྷཱཝཾ གམཡམཱནོ ནིརུདཀཱནི ཀུརུམཱནོ, སུཀྑཱཔཡམཱནོཏི ཨཏྠོ། སོདཀེན གཏྟེན ཙཱིཝརཾ པཱརུཔནྟསྶ ཧི ཙཱིཝརེ ཀཎྞིཀཱ ཨུཊྛཧནྟི, པརིཀྑཱརབྷཎྜཾ དུསྶཏི། བུདྡྷཱནཾ པན སརཱིརེ རཛོཛལླཾ ན ཨུཔལིམྤཏི; པདུམཔཏྟེ པཀྑིཏྟཨུདཀབིནྡུ ཝིཡ ཨུདཀཾ ཝིནིཝཏྟེཏྭཱ གཙྪཏི, ཨེཝཾ སནྟེཔི སིཀྑཱགཱརཝཏཱཡ བྷགཝཱ, ‘‘པབྦཛིཏཝཏྟཾ ནཱམེཏ’’ནྟི མཧཱཙཱིཝརཾ ཨུབྷོསུ ཀཎྞེསུ གཧེཏྭཱ པུརཏོ ཀཱཡཾ པཊིཙྪཱདེཏྭཱ ཨཊྛཱསི། ཏསྨིཾ ཁཎེ ཐེརོ ཙིནྟེསི – ‘‘བྷགཝཱ མཧཱཙཱིཝརཾ པཱརུཔིཏྭཱ མིགཱརམཱཏུཔཱསཱདཾ ཨཱརབྦྷ གམནཱབྷིཧཱརཏོ པཊྛཱཡ དུནྣིཝཏྟིཡོ བྷཝིསྶཏི; བུདྡྷཱནཉྷི ཨདྷིཔྤཱཡཀོཔནཾ ནཱམ ཨེཀཙཱརིཀསཱིཧསྶ གཧཎཏྠཾ ཧཏྠཔྤསཱརཎཾ ཝིཡ; པབྷིནྣཝརཝཱརཎསྶ སོཎྜཱཡ པརཱམསནཾ ཝིཡ; ཨུགྒཏེཛསྶ ཨཱསཱིཝིསསྶ གཱིཝཱཡ གཧཎཾ ཝིཡ ཙ བྷཱརིཡཾ ཧོཏི། ཨིདྷེཝ རམྨཀསྶ བྲཱཧྨཎསྶ ཨསྶམསྶ ཝཎྞཾ ཀཐེཏྭཱ ཏཏྠ གམནཏྠཱཡ བྷགཝནྟཾ ཡཱཙིསྶཱམཱི’’ཏི། སོ ཏཐཱ ཨཀཱསི། ཏེན ཝུཏྟཾ – ‘‘ཨཐ ཁོ ཨཱཡསྨཱ ཨཱནནྡོ…པེ॰… ཨནུཀམྤཾ ཨུཔཱདཱཡཱ’’ཏི།

    273.Gattāni pubbāpayamānoti pakatibhāvaṃ gamayamāno nirudakāni kurumāno, sukkhāpayamānoti attho. Sodakena gattena cīvaraṃ pārupantassa hi cīvare kaṇṇikā uṭṭhahanti, parikkhārabhaṇḍaṃ dussati. Buddhānaṃ pana sarīre rajojallaṃ na upalimpati; padumapatte pakkhittaudakabindu viya udakaṃ vinivattetvā gacchati, evaṃ santepi sikkhāgāravatāya bhagavā, ‘‘pabbajitavattaṃ nāmeta’’nti mahācīvaraṃ ubhosu kaṇṇesu gahetvā purato kāyaṃ paṭicchādetvā aṭṭhāsi. Tasmiṃ khaṇe thero cintesi – ‘‘bhagavā mahācīvaraṃ pārupitvā migāramātupāsādaṃ ārabbha gamanābhihārato paṭṭhāya dunnivattiyo bhavissati; buddhānañhi adhippāyakopanaṃ nāma ekacārikasīhassa gahaṇatthaṃ hatthappasāraṇaṃ viya; pabhinnavaravāraṇassa soṇḍāya parāmasanaṃ viya; uggatejassa āsīvisassa gīvāya gahaṇaṃ viya ca bhāriyaṃ hoti. Idheva rammakassa brāhmaṇassa assamassa vaṇṇaṃ kathetvā tattha gamanatthāya bhagavantaṃ yācissāmī’’ti. So tathā akāsi. Tena vuttaṃ – ‘‘atha kho āyasmā ānando…pe… anukampaṃ upādāyā’’ti.

    ཏཏྠ ཨནུཀམྤཾ ཨུཔཱདཱཡཱཏི བྷགཝཏོ སམྨུཁཱ དྷམྨིཾ ཀཐཾ སོསྶཱམཱཏི ཏཾ ཨསྶམཾ གཏཱནཾ པཉྩནྣཾ བྷིཀྑུསཏཱནཾ ཨནུཀམྤཾ པཊིཙྩ, ཏེསུ ཀཱརུཉྙཾ ཀཏྭཱཏི ཨཏྠོ། དྷམྨིཡཱ ཀཐཱཡཱཏི དསསུ པཱརམིཏཱསུ ཨཉྙཏརཱཡ པཱརམིཡཱ ཙེཝ མཧཱབྷིནིཀྑམནསྶ ཙ ཝཎྞཾ ཀཐཡམཱནཱ སནྣིསིནྣཱ ཧོནྟི། ཨཱགམཡམཱནོཏི ཨོལོཀཡམཱནོ། ཨཧཾ བུདྡྷོཏི སཧསཱ ཨཔྤཝིསིཏྭཱ ཡཱཝ སཱ ཀཐཱ ནིཊྛཱཏི, ཏཱཝ ཨཊྛཱསཱིཏི ཨཏྠོ། ཨགྒལ༹ཾ ཨཱཀོཊེསཱིཏི ཨགྒནཁེན ཀཝཱཊེ སཉྙཾ ཨདཱསི། ཝིཝརིཾསཱུཏི སོཏཾ ཨོདཧིཏྭཱཝ ནིསིནྣཏྟཱ ཏངྑཎཾཡེཝ ཨཱགནྟྭཱ ཝིཝརིཾསུ།

    Tattha anukampaṃ upādāyāti bhagavato sammukhā dhammiṃ kathaṃ sossāmāti taṃ assamaṃ gatānaṃ pañcannaṃ bhikkhusatānaṃ anukampaṃ paṭicca, tesu kāruññaṃ katvāti attho. Dhammiyā kathāyāti dasasu pāramitāsu aññatarāya pāramiyā ceva mahābhinikkhamanassa ca vaṇṇaṃ kathayamānā sannisinnā honti. Āgamayamānoti olokayamāno. Ahaṃ buddhoti sahasā appavisitvā yāva sā kathā niṭṭhāti, tāva aṭṭhāsīti attho. Aggaḷaṃ ākoṭesīti agganakhena kavāṭe saññaṃ adāsi. Vivariṃsūti sotaṃ odahitvāva nisinnattā taṅkhaṇaṃyeva āgantvā vivariṃsu.

    པཉྙཏྟེ ཨཱསནེཏི བུདྡྷཀཱལེ ཀིར ཡཏྠ ཡཏྠ ཨེཀོཔི བྷིཀྑུ ཝིཧརཏི, སབྦཏྠ བུདྡྷཱསནཾ པཉྙཏྟམེཝ ཧོཏི། ཀསྨཱ? བྷགཝཱ ཀིར ཨཏྟནོ སནྟིཀེ ཀམྨཊྛཱནཾ གཧེཏྭཱ ཕཱསུཀཊྛཱནེ ཝིཧརནྟེ མནསི ཀརོཏི ‘‘ཨསུཀོ མཡ྄ཧཾ སནྟིཀེ ཀམྨཊྛཱནཾ གཧེཏྭཱ གཏོ, སཀྑིསྶཏི ནུ ཁོ ཝིསེསཾ ནིབྦཏྟེཏུཾ ནོ ཝཱ’’ཏི། ཨཐ ནཾ པསྶཏི ཀམྨཊྛཱནཾ ཝིསྶཛྫེཏྭཱ ཨཀུསལཝིཏཀྐེ ཝིཏཀྐཡམཱནཾ, ཏཏོ ‘‘ཀཐཉྷི ནཱམ མཱདིསསྶ སཏྠུ སནྟིཀེ ཀམྨཊྛཱནཾ གཧེཏྭཱ ཝིཧརནྟཾ ཨིམཾ ཀུལཔུཏྟཾ ཨཀུསལཝིཏཀྐཱ ཨབྷིབྷཝིཏྭཱ ཨནམཏགྒེ ཝཊྚདུཀྑེ སཾསཱརེསྶནྟཱི’’ཏི ཏསྶ ཨནུགྒཧཏྠཾ ཏཏྠེཝ ཨཏྟཱནཾ དསྶེཏྭཱ ཏཾ ཀུལཔུཏྟཾ ཨོཝདིཏྭཱ ཨཱཀཱསཾ ཨུཔྤཏིཏྭཱ པུན ཨཏྟནོ ཝསནཊྛཱནམེཝ གཙྪཏི། ཨཐེཝཾ ཨོཝདིཡམཱནཱ ཏེ བྷིཀྑཱུ ཙིནྟཡིཾསུ – ‘‘སཏྠཱ ཨམྷཱཀཾ མནཾ ཛཱནིཏྭཱ ཨཱགནྟྭཱ ཨམྷཱཀཾ སམཱིཔེ ཋིཏཾཡེཝ ཨཏྟཱནཾ དསྶེཏི; ཏསྨིཾ ཁཎེ, ‘བྷནྟེ, ཨིདྷ ནིསཱིདཐ, ཨིདྷ ནིསཱིདཐཱ’ཏི ཨཱསནཔརིཡེསནཾ ནཱམ བྷཱརོ’’ཏི། ཏེ ཨཱསནཾ པཉྙཔེཏྭཱཝ ཝིཧརནྟི། ཡསྶ པཱིཋཾ ཨཏྠི, སོ ཏཾ པཉྙཔེཏི། ཡསྶ ནཏྠི, སོ མཉྩཾ ཝཱ ཕལཀཾ ཝཱ ཀཊྛཾ ཝཱ པཱསཱཎཾ ཝཱ ཝཱལིཀཔུཉྫཾ ཝཱ པཉྙཔེཏི། ཏཾ ཨལབྷམཱནཱ པུརཱཎཔཎྞཱནིཔི སངྐཌྜྷིཏྭཱ ཏཏྠ པཾསུཀཱུལཾ པཏྠརིཏྭཱ ཋཔེནྟི། ཨིདྷ པན པཀཏིཔཉྙཏྟམེཝ ཨཱསནཾ ཨཧོསི, ཏཾ སནྡྷཱཡ ཝུཏྟཾ – ‘‘པཉྙཏྟེ ཨཱསནེ ནིསཱིདཱི’’ཏི།

    Paññatte āsaneti buddhakāle kira yattha yattha ekopi bhikkhu viharati, sabbattha buddhāsanaṃ paññattameva hoti. Kasmā? Bhagavā kira attano santike kammaṭṭhānaṃ gahetvā phāsukaṭṭhāne viharante manasi karoti ‘‘asuko mayhaṃ santike kammaṭṭhānaṃ gahetvā gato, sakkhissati nu kho visesaṃ nibbattetuṃ no vā’’ti. Atha naṃ passati kammaṭṭhānaṃ vissajjetvā akusalavitakke vitakkayamānaṃ, tato ‘‘kathañhi nāma mādisassa satthu santike kammaṭṭhānaṃ gahetvā viharantaṃ imaṃ kulaputtaṃ akusalavitakkā abhibhavitvā anamatagge vaṭṭadukkhe saṃsāressantī’’ti tassa anuggahatthaṃ tattheva attānaṃ dassetvā taṃ kulaputtaṃ ovaditvā ākāsaṃ uppatitvā puna attano vasanaṭṭhānameva gacchati. Athevaṃ ovadiyamānā te bhikkhū cintayiṃsu – ‘‘satthā amhākaṃ manaṃ jānitvā āgantvā amhākaṃ samīpe ṭhitaṃyeva attānaṃ dasseti; tasmiṃ khaṇe, ‘bhante, idha nisīdatha, idha nisīdathā’ti āsanapariyesanaṃ nāma bhāro’’ti. Te āsanaṃ paññapetvāva viharanti. Yassa pīṭhaṃ atthi, so taṃ paññapeti. Yassa natthi, so mañcaṃ vā phalakaṃ vā kaṭṭhaṃ vā pāsāṇaṃ vā vālikapuñjaṃ vā paññapeti. Taṃ alabhamānā purāṇapaṇṇānipi saṅkaḍḍhitvā tattha paṃsukūlaṃ pattharitvā ṭhapenti. Idha pana pakatipaññattameva āsanaṃ ahosi, taṃ sandhāya vuttaṃ – ‘‘paññatte āsane nisīdī’’ti.

    ཀཱཡ ནུཏྠཱཏི ཀཏམཱཡ ནུ ཀཐཱཡ སནྣིསིནྣཱ བྷཝཐཱཏི ཨཏྠོ། ‘‘ཀཱཡ ནེཏྠཱ’’ཏིཔི པཱལི༹, ཏསྶཱ ཀཏམཱཡ ནུ ཨེཏྠཱཏི ཨཏྠོ། ‘‘ཀཱཡ ནོཏྠཱ’’ཏིཔི པཱལི༹, ཏསྶཱཔི པུརིམོཡེཝ ཨཏྠོ། ཨནྟརཱ ཀཐཱཏི ཀམྨཊྛཱནམནསིཀཱརཨུདྡེསཔརིཔུཙྪཱདཱིནཾ ཨནྟརཱ ཨཉྙཱ ཨེཀཱ ཀཐཱ། ཝིཔྤཀཏཱཏི མམ ཨཱགམནཔཙྩཡཱ ཨཔརིནིཊྛིཏཱ སིཁཾ ཨཔྤཏྟཱ། ཨཐ བྷགཝཱ ཨནུཔྤཏྟོཏི ཨཐ ཨེཏསྨིཾ ཀཱལེ བྷགཝཱ ཨཱགཏོ། དྷམྨཱི ཝཱ ཀཐཱཏི དསཀཐཱཝཏྠུནིསྶིཏཱ ཝཱ དྷམྨཱི ཀཐཱ། ཨརིཡོ ཝཱ ཏུཎྷཱིབྷཱཝོཏི ཨེཏྠ པན དུཏིཡཛ྄ཛྷཱནམྤི ཨརིཡོ ཏུཎྷཱིབྷཱཝོ མཱུལཀམྨཊྛཱནམྤི། ཏསྨཱ ཏཾ ཛྷཱནཾ ཨཔྤེཏྭཱ ནིསིནྣོཔི, མཱུལཀམྨཊྛཱནཾ གཧེཏྭཱ ནིསིནྣོཔི བྷིཀྑུ ཨརིཡེན ཏུཎྷཱིབྷཱཝེན ནིསིནྣོཏི ཝེདིཏབྦོ།

    Kāyanutthāti katamāya nu kathāya sannisinnā bhavathāti attho. ‘‘Kāya netthā’’tipi pāḷi, tassā katamāya nu etthāti attho. ‘‘Kāya notthā’’tipi pāḷi, tassāpi purimoyeva attho. Antarā kathāti kammaṭṭhānamanasikārauddesaparipucchādīnaṃ antarā aññā ekā kathā. Vippakatāti mama āgamanapaccayā apariniṭṭhitā sikhaṃ appattā. Atha bhagavā anuppattoti atha etasmiṃ kāle bhagavā āgato. Dhammī vā kathāti dasakathāvatthunissitā vā dhammī kathā. Ariyo vā tuṇhībhāvoti ettha pana dutiyajjhānampi ariyo tuṇhībhāvo mūlakammaṭṭhānampi. Tasmā taṃ jhānaṃ appetvā nisinnopi, mūlakammaṭṭhānaṃ gahetvā nisinnopi bhikkhu ariyena tuṇhībhāvena nisinnoti veditabbo.

    ༢༧༤. དྭེམཱ, བྷིཀྑཝེ, པརིཡེསནཱཏི ཀོ ཨནུསནྡྷི? ཏེ བྷིཀྑཱུ སམྨུཁཱ དྷམྨིཾ ཀཐཾ སོསྶཱམཱཏི ཐེརསྶ བྷཱརཾ ཨཀཾསུ, ཐེརོ ཏེསཾ ཨསྶམགམནམཀཱསི། ཏེ ཏཏྠ ནིསཱིདིཏྭཱ ཨཏིརཙྪཱནཀཐིཀཱ ཧུཏྭཱ དྷམྨིཡཱ ཀཐཱཡ ནིསཱིདིཾསུ། ཨཐ བྷགཝཱ ‘‘ཨཡཾ ཏུམྷཱཀཾ པརིཡེསནཱ ཨརིཡཔརིཡེསནཱ ནཱམཱ’’ཏི དསྶེཏུཾ ཨིམཾ དེསནཾ ཨཱརབྷི། ཏཏྠ ཀཏམཱ ཙ, བྷིཀྑཝེ, ཨནརིཡཔརིཡེསནཱཏི ཨེཏྠ ཡཐཱ མགྒཀུསལོ པུརིསོ པཋམཾ ཝཛྫེཏབྦཾ ཨཔཱཡམགྒཾ དསྶེནྟོ ‘‘ཝཱམཾ མུཉྩིཏྭཱ དཀྑིཎཾ གཎྷཱ’’ཏི ཝདཏི། ཨེཝཾ བྷགཝཱ དེསནཱཀུསལཏཱཡ པཋམཾ ཝཛྫེཏབྦཾ ཨནརིཡཔརིཡེསནཾ ཨཱཙིཀྑིཏྭཱ པཙྪཱ ཨིཏརཾ ཨཱཙིཀྑིསྶཱམཱིཏི ཨུདྡེསཱནུཀྐམཾ བྷིནྡིཏྭཱ ཨེཝམཱཧ། ཛཱཏིདྷམྨོཏི ཛཱཡནསབྷཱཝོ། ཛརཱདྷམྨོཏི ཛཱིརཎསབྷཱཝོ། བྱཱདྷིདྷམྨོཏི བྱཱདྷིསབྷཱཝོ། མརཎདྷམྨོཏི མརཎསབྷཱཝོ། སོཀདྷམྨོཏི སོཙནཀསབྷཱཝོ། སཾཀིལེསདྷམྨོཏི སཾཀིལིསྶནསབྷཱཝོ།

    274.Dvemā, bhikkhave, pariyesanāti ko anusandhi? Te bhikkhū sammukhā dhammiṃ kathaṃ sossāmāti therassa bhāraṃ akaṃsu, thero tesaṃ assamagamanamakāsi. Te tattha nisīditvā atiracchānakathikā hutvā dhammiyā kathāya nisīdiṃsu. Atha bhagavā ‘‘ayaṃ tumhākaṃ pariyesanā ariyapariyesanā nāmā’’ti dassetuṃ imaṃ desanaṃ ārabhi. Tattha katamā ca, bhikkhave, anariyapariyesanāti ettha yathā maggakusalo puriso paṭhamaṃ vajjetabbaṃ apāyamaggaṃ dassento ‘‘vāmaṃ muñcitvā dakkhiṇaṃ gaṇhā’’ti vadati. Evaṃ bhagavā desanākusalatāya paṭhamaṃ vajjetabbaṃ anariyapariyesanaṃ ācikkhitvā pacchā itaraṃ ācikkhissāmīti uddesānukkamaṃ bhinditvā evamāha. Jātidhammoti jāyanasabhāvo. Jarādhammoti jīraṇasabhāvo. Byādhidhammoti byādhisabhāvo. Maraṇadhammoti maraṇasabhāvo. Sokadhammoti socanakasabhāvo. Saṃkilesadhammoti saṃkilissanasabhāvo.

    པུཏྟབྷརིཡནྟི པུཏྟཱ ཙ བྷརིཡཱ ཙ། ཨེས ནཡོ སབྦཏྠ། ཛཱཏརཱུཔརཛཏནྟི ཨེཏྠ པན ཛཱཏརཱུཔནྟི སུཝཎྞཾ། རཛཏནྟི ཡཾཀིཉྩི ཝོཧཱརཱུཔགཾ ལོཧམཱསཀཱདི། ཛཱཏིདྷམྨཱ ཧེཏེ, བྷིཀྑཝེ, ཨུཔདྷཡོཏི ཨེཏེ པཉྩཀཱམགུཎཱུཔདྷཡོ ནཱམ ཧོནྟི, ཏེ སབྦེཔི ཛཱཏིདྷམྨཱཏི དསྶེཏི། བྱཱདྷིདྷམྨཝཱརཱདཱིསུ ཛཱཏརཱུཔརཛཏཾ ན གཧིཏཾ, ན ཧེཏསྶ སཱིསརོགཱདཡོ བྱཱདྷཡོ ནཱམ ཧོནྟི, ན སཏྟཱནཾ ཝིཡ ཙུཏིསངྑཱཏཾ མརཎཾ, ན སོཀོ ཨུཔྤཛྫཏི། ཨཡཱདཱིཧི པན སཾཀིལེསེཧི སཾཀིལིསྶཏཱིཏི སཾཀིལེསདྷམྨཝཱརེ གཧིཏཾ། ཏཐཱ ཨུཏུསམུཊྛཱནཏྟཱ ཛཱཏིདྷམྨཝཱརེ། མལཾ གཧེཏྭཱ ཛཱིརཎཏོ ཛརཱདྷམྨཝཱརེ ཙ།

    Puttabhariyanti puttā ca bhariyā ca. Esa nayo sabbattha. Jātarūparajatanti ettha pana jātarūpanti suvaṇṇaṃ. Rajatanti yaṃkiñci vohārūpagaṃ lohamāsakādi. Jātidhammā hete, bhikkhave, upadhayoti ete pañcakāmaguṇūpadhayo nāma honti, te sabbepi jātidhammāti dasseti. Byādhidhammavārādīsu jātarūparajataṃ na gahitaṃ, na hetassa sīsarogādayo byādhayo nāma honti, na sattānaṃ viya cutisaṅkhātaṃ maraṇaṃ, na soko uppajjati. Ayādīhi pana saṃkilesehi saṃkilissatīti saṃkilesadhammavāre gahitaṃ. Tathā utusamuṭṭhānattā jātidhammavāre. Malaṃ gahetvā jīraṇato jarādhammavāre ca.

    ༢༧༥. ཨཡཾ , བྷིཀྑཝེ, ཨརིཡཱ པརིཡེསནཱཏི, བྷིཀྑཝེ, ཨཡཾ ནིདྡོསཏཱཡཔི ཨརིཡེཧི པརིཡེསིཏབྦཏཱཡཔི ཨརིཡཔརིཡེསནཱཏི ཝེདིཏབྦཱ།

    275.Ayaṃ, bhikkhave, ariyā pariyesanāti, bhikkhave, ayaṃ niddosatāyapi ariyehi pariyesitabbatāyapi ariyapariyesanāti veditabbā.

    ༢༧༦. ཨཧམྤི སུདཾ, བྷིཀྑཝེཏི ཀསྨཱ ཨཱརབྷི? མཱུལཏོ པཊྛཱཡ མཧཱབྷིནིཀྑམནཾ དསྶེཏུཾ། ཨེཝཾ ཀིརསྶ ཨཧོསི – ‘‘བྷིཀྑཝེ, ཨཧམྤི པུབྦེ ཨནརིཡཔརིཡེསནཾ པརིཡེསིཾ། སྭཱཧཾ ཏཾ པཧཱཡ ཨརིཡཔརིཡེསནཾ པརིཡེསིཏྭཱ སབྦཉྙུཏཾ པཏྟོ། པཉྩཝགྒིཡཱཔི ཨནརིཡཔརིཡེསནཾ པརིཡེསིཾསུ། ཏེ ཏཾ པཧཱཡ ཨརིཡཔརིཡེསནཾ པརིཡེསིཏྭཱ ཁཱིཎཱསཝབྷཱུམིཾ པཏྟཱ། ཏུམྷེཔི མམ ཙེཝ པཉྩཝགྒིཡཱནཉྩ མགྒཾ ཨཱརུལ༹ྷཱ། ཨརིཡཔརིཡེསནཱ ཏུམྷཱཀཾ པརིཡེསནཱ’’ཏི མཱུལཏོ པཊྛཱཡ ཨཏྟནོ མཧཱབྷིནིཀྑམནཾ དསྶེཏུཾ ཨིམཾ དེསནཾ ཨཱརབྷི།

    276.Ahampi sudaṃ, bhikkhaveti kasmā ārabhi? Mūlato paṭṭhāya mahābhinikkhamanaṃ dassetuṃ. Evaṃ kirassa ahosi – ‘‘bhikkhave, ahampi pubbe anariyapariyesanaṃ pariyesiṃ. Svāhaṃ taṃ pahāya ariyapariyesanaṃ pariyesitvā sabbaññutaṃ patto. Pañcavaggiyāpi anariyapariyesanaṃ pariyesiṃsu. Te taṃ pahāya ariyapariyesanaṃ pariyesitvā khīṇāsavabhūmiṃ pattā. Tumhepi mama ceva pañcavaggiyānañca maggaṃ āruḷhā. Ariyapariyesanā tumhākaṃ pariyesanā’’ti mūlato paṭṭhāya attano mahābhinikkhamanaṃ dassetuṃ imaṃ desanaṃ ārabhi.

    ༢༧༧. ཏཏྠ དཧརོཝ སམཱནོཏི ཏརུཎོཝ སམཱནོ། སུསུཀཱལ༹ཀེསོཏི སུཊྛུ ཀཱལ༹ཀེསོ, ཨཉྫནཝཎྞཀེསོཝ ཧུཏྭཱཏི ཨཏྠོ། བྷདྲེནཱཏི བྷདྡཀེན། པཋམེན ཝཡསཱཏི ཏིཎྞཾ ཝཡཱནཾ པཋམཝཡེན། ཨཀཱམཀཱནནྟི ཨནིཙྪམཱནཱནཾ, ཨནཱདརཏྠེ སཱམིཝཙནཾ། ཨསྶཱུནི མུཁེ ཨེཏེསནྟི ཨསྶུམུཁཱ; ཏེསཾ ཨསྶུམུཁཱནཾ, ཨསྶུཀིལིནྣམུཁཱནནྟི ཨཏྠོ། རུདནྟཱནནྟི ཀནྡིཏྭཱ རོདམཱནཱནཾ། ཀིཾ ཀུསལགཝེསཱིཏི ཀིཾ ཀུསལནྟི གཝེསམཱནོ། ཨནུཏྟརཾ སནྟིཝརཔདནྟི ཨུཏྟམཾ སནྟིསངྑཱཏཾ ཝརཔདཾ, ནིབྦཱནཾ པརིཡེསམཱནོཏི ཨཏྠོ། ཡེན ཨཱལཱ༹རོ ཀཱལཱམོཏི ཨེཏྠ ཨཱལཱ༹རོཏི ཏསྶ ནཱམཾ, དཱིགྷཔིངྒལོ ཀིརེསོ། ཏེནསྶ ཨཱལཱ༹རོཏི ནཱམཾ ཨཧོསི། ཀཱལཱམོཏི གོཏྟཾ། ཝིཧརཏཱཡསྨཱཏི ཝིཧརཏུ ཨཱཡསྨཱ། ཡཏྠ ཝིཉྙཱུ པུརིསོཏི ཡསྨིཾ དྷམྨེ པཎྜིཏོ པུརིསོ། སཀཾ ཨཱཙརིཡཀནྟི ཨཏྟནོ ཨཱཙརིཡསམཡཾ། ཨུཔསམྤཛྫ ཝིཧརེཡྻཱཏི པཊིལབྷིཏྭཱ ཝིཧརེཡྻ། ཨེཏྟཱཝཏཱ ཏེན ཨོཀཱསོ ཀཏོ ཧོཏི། ཏཾ དྷམྨནྟི ཏཾ ཏེསཾ སམཡཾ ཏནྟིཾ། པརིཡཱཔུཎིནྟི སུཏྭཱཝ ཨུགྒཎྷིཾ།

    277. Tattha daharova samānoti taruṇova samāno. Susukāḷakesoti suṭṭhu kāḷakeso, añjanavaṇṇakesova hutvāti attho. Bhadrenāti bhaddakena. Paṭhamena vayasāti tiṇṇaṃ vayānaṃ paṭhamavayena. Akāmakānanti anicchamānānaṃ, anādaratthe sāmivacanaṃ. Assūni mukhe etesanti assumukhā; tesaṃ assumukhānaṃ, assukilinnamukhānanti attho. Rudantānanti kanditvā rodamānānaṃ. Kiṃkusalagavesīti kiṃ kusalanti gavesamāno. Anuttaraṃ santivarapadanti uttamaṃ santisaṅkhātaṃ varapadaṃ, nibbānaṃ pariyesamānoti attho. Yena āḷāro kālāmoti ettha āḷāroti tassa nāmaṃ, dīghapiṅgalo kireso. Tenassa āḷāroti nāmaṃ ahosi. Kālāmoti gottaṃ. Viharatāyasmāti viharatu āyasmā. Yattha viññū purisoti yasmiṃ dhamme paṇḍito puriso. Sakaṃ ācariyakanti attano ācariyasamayaṃ. Upasampajja vihareyyāti paṭilabhitvā vihareyya. Ettāvatā tena okāso kato hoti. Taṃ dhammanti taṃ tesaṃ samayaṃ tantiṃ. Pariyāpuṇinti sutvāva uggaṇhiṃ.

    ཨོཊྛཔཧཏམཏྟེནཱཏི ཏེན ཝུཏྟསྶ པཊིགྒཧཎཏྠཾ ཨོཊྛཔཧརཎམཏྟེན; ཨཔརཱཔརཾ ཀཏྭཱ ཨོཊྛསཉྩརཎམཏྟཀེནཱཏི ཨཏྠོ། ལཔིཏལཱཔནམཏྟེནཱཏི ཏེན ལཔིཏསྶ པཊིལཱཔནམཏྟཀེན། ཉཱཎཝཱདནྟི ཛཱནཱམཱིཏི ཝཱདཾ ། ཐེརཝཱདནྟི ཐིརབྷཱཝཝཱདཾ, ཐེརོ ཨཧམེཏྠཱཏི ཨེཏཾ ཝཙནཾ། ཨཧཉྩེཝ ཨཉྙེ ཙཱཏི ན ཀེཝལཾ ཨཧཾ, ཨཉྙེཔི བཧཱུ ཨེཝཾ ཝདནྟི། ཀེཝལཾ སདྡྷཱམཏྟཀེནཱཏི པཉྙཱཡ ཨསཙྪིཀཏྭཱ སུདྡྷེན སདྡྷཱམཏྟཀེནེཝ། བོདྷིསཏྟོ ཀིར ཝཱཙཱཡ དྷམྨཾ ཨུགྒཎྷནྟོཡེཝ, ‘‘ན ཀཱལཱམསྶ ཝཱཙཱཡ པརིཡཏྟིམཏྟམེཝ ཨསྨིཾ དྷམྨེ, ཨདྡྷཱ ཨེས སཏྟནྣཾ སམཱཔཏྟཱིནཾ ལཱབྷཱི’’ཏི ཨཉྙཱསི, ཏེནསྶ ཨེཏདཧོསི།

    Oṭṭhapahatamattenāti tena vuttassa paṭiggahaṇatthaṃ oṭṭhapaharaṇamattena; aparāparaṃ katvā oṭṭhasañcaraṇamattakenāti attho. Lapitalāpanamattenāti tena lapitassa paṭilāpanamattakena. Ñāṇavādanti jānāmīti vādaṃ . Theravādanti thirabhāvavādaṃ, thero ahametthāti etaṃ vacanaṃ. Ahañceva aññe cāti na kevalaṃ ahaṃ, aññepi bahū evaṃ vadanti. Kevalaṃ saddhāmattakenāti paññāya asacchikatvā suddhena saddhāmattakeneva. Bodhisatto kira vācāya dhammaṃ uggaṇhantoyeva, ‘‘na kālāmassa vācāya pariyattimattameva asmiṃ dhamme, addhā esa sattannaṃ samāpattīnaṃ lābhī’’ti aññāsi, tenassa etadahosi.

    ཨཱཀིཉྩཉྙཱཡཏནཾ པཝེདེསཱིཏི ཨཱཀིཉྩཉྙཱཡཏནཔརིཡོསཱནཱ སཏྟ སམཱཔཏྟིཡོ མཾ ཛཱནཱཔེསི། སདྡྷཱཏི ཨིམཱསཾ སཏྟནྣཾ སམཱཔཏྟཱིནཾ ནིབྦཏྟནཏྠཱཡ སདྡྷཱ། ཝཱིརིཡཱདཱིསུཔི ཨེསེཝ ནཡོ། པདཧེཡྻནྟི པཡོགཾ ཀརེཡྻཾ། ནཙིརསྶེཝ ཏཾ དྷམྨཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧཱསིནྟི བོདྷིསཏྟོ ཀིར ཝཱིརིཡཾ པགྒཧེཏྭཱ ཀཏིཔཱཧཉྙེཝ སཏྟ སུཝཎྞནིསྶེཎིཡོ པསཱརེནྟོ ཝིཡ སཏྟ སམཱཔཏྟིཡོ ནིབྦཏྟེསི; ཏསྨཱ ཨེཝམཱཧ།

    Ākiñcaññāyatanaṃ pavedesīti ākiñcaññāyatanapariyosānā satta samāpattiyo maṃ jānāpesi. Saddhāti imāsaṃ sattannaṃ samāpattīnaṃ nibbattanatthāya saddhā. Vīriyādīsupi eseva nayo. Padaheyyanti payogaṃ kareyyaṃ. Nacirasseva taṃ dhammaṃ sayaṃ abhiññā sacchikatvā upasampajja vihāsinti bodhisatto kira vīriyaṃ paggahetvā katipāhaññeva satta suvaṇṇanisseṇiyo pasārento viya satta samāpattiyo nibbattesi; tasmā evamāha.

    ལཱབྷཱ ནོ, ཨཱཝུསོཏི ཨནུསཱུཡཀོ ཀིརེས ཀཱལཱམོ། ཏསྨཱ ‘‘ཨཡཾ ཨདྷུནཱགཏོ, ཀིནྟི ཀཏྭཱ ཨིམཾ དྷམྨཾ ནིབྦཏྟེསཱི’’ཏི ཨུསཱུཡཾ ཨཀཏྭཱ པསནྣོ པསཱདཾ པཝེདེནྟོ ཨེཝམཱཧ། ཨུབྷོཝ སནྟཱ ཨིམཾ གཎཾ པརིཧརཱམཱཏི ‘‘མཧཱ ཨཡཾ གཎོ, དྭེཔི ཛནཱ པརིཧརཱམཱ’’ཏི ཝཏྭཱ གཎསྶ སཉྙཾ ཨདཱསི, ‘‘ཨཧམྤི སཏྟནྣཾ སམཱཔཏྟཱིནཾ ལཱབྷཱི, མཧཱཔུརིསོཔི སཏྟནྣམེཝ , ཨེཏྟཀཱ ཛནཱ མཧཱཔུརིསསྶ སནྟིཀེ པརིཀམྨཾ ཨུགྒཎྷཐ, ཨེཏྟཀཱ མཡ྄ཧ’’ནྟི མཛ྄ཛྷེ བྷིནྡིཏྭཱ ཨདཱསི། ཨུལཱ༹རཱཡཱཏི ཨུཏྟམཱཡ། པཱུཛཱཡཱཏི ཀཱལཱམསྶ ཀིར ཨུཔཊྛཱཀཱ ཨིཏྠིཡོཔི པུརིསཱཔི གནྡྷམཱལཱདཱིནི གཧེཏྭཱ ཨཱགཙྪནྟི། ཀཱལཱམོ – ‘‘གཙྪཐ, མཧཱཔུརིསཾ པཱུཛེཐཱ’’ཏི ཝདཏི། ཏེ ཏཾ པཱུཛེཏྭཱ ཡཾ ཨཝསིཊྛཾ ཧོཏི, ཏེན ཀཱལཱམཾ པཱུཛེནྟི། མཧགྒྷཱནི མཉྩཔཱིཋཱནི ཨཱཧརནྟི; ཏཱནིཔི མཧཱཔུརིསསྶ དཱཔེཏྭཱ ཡདི ཨཝསིཊྛཾ ཧོཏི, ཨཏྟནཱ གཎྷཱཏི། གཏགཏཊྛཱནེ ཝརསེནཱསནཾ བོདྷིསཏྟསྶ ཛགྒཱཔེཏྭཱ སེསཀཾ ཨཏྟནཱ གཎྷཱཏི། ཨེཝཾ ཨུལཱ༹རཱཡ པཱུཛཱཡ པཱུཛེསི། ནཱཡཾ དྷམྨོ ནིབྦིདཱཡཱཏིཨཱདཱིསུ ཨཡཾ སཏྟསམཱཔཏྟིདྷམྨོ ནེཝ ཝཊྚེ ནིབྦིནྡནཏྠཱཡ, ན ཝིརཛྫནཏྠཱཡ, ན རཱགཱདིནིརོདྷཏྠཱཡ, ན ཨུཔསམཏྠཱཡ, ན ཨབྷིཉྙེཡྻདྷམྨཾ ཨབྷིཛཱནནཏྠཱཡ, ན ཙཏུམགྒསམྦོདྷཱཡ, ན ནིབྦཱནསཙྪིཀིརིཡཱཡ སཾཝཏྟཏཱིཏི ཨཏྠོ།

    Lābhā no, āvusoti anusūyako kiresa kālāmo. Tasmā ‘‘ayaṃ adhunāgato, kinti katvā imaṃ dhammaṃ nibbattesī’’ti usūyaṃ akatvā pasanno pasādaṃ pavedento evamāha. Ubhova santā imaṃ gaṇaṃ pariharāmāti ‘‘mahā ayaṃ gaṇo, dvepi janā pariharāmā’’ti vatvā gaṇassa saññaṃ adāsi, ‘‘ahampi sattannaṃ samāpattīnaṃ lābhī, mahāpurisopi sattannameva , ettakā janā mahāpurisassa santike parikammaṃ uggaṇhatha, ettakā mayha’’nti majjhe bhinditvā adāsi. Uḷārāyāti uttamāya. Pūjāyāti kālāmassa kira upaṭṭhākā itthiyopi purisāpi gandhamālādīni gahetvā āgacchanti. Kālāmo – ‘‘gacchatha, mahāpurisaṃ pūjethā’’ti vadati. Te taṃ pūjetvā yaṃ avasiṭṭhaṃ hoti, tena kālāmaṃ pūjenti. Mahagghāni mañcapīṭhāni āharanti; tānipi mahāpurisassa dāpetvā yadi avasiṭṭhaṃ hoti, attanā gaṇhāti. Gatagataṭṭhāne varasenāsanaṃ bodhisattassa jaggāpetvā sesakaṃ attanā gaṇhāti. Evaṃ uḷārāya pūjāya pūjesi. Nāyaṃ dhammo nibbidāyātiādīsu ayaṃ sattasamāpattidhammo neva vaṭṭe nibbindanatthāya, na virajjanatthāya, na rāgādinirodhatthāya, na upasamatthāya, na abhiññeyyadhammaṃ abhijānanatthāya, na catumaggasambodhāya, na nibbānasacchikiriyāya saṃvattatīti attho.

    ཡཱཝདེཝ ཨཱཀིཉྩཉྙཱཡཏནཱུཔཔཏྟིཡཱཏི ཡཱཝ སཊྛིཀཔྤསཧསྶཱཡུཔརིམཱཎེ ཨཱཀིཉྩཉྙཱཡཏནབྷཝེ ཨུཔཔཏྟི, ཏཱཝདེཝ སཾཝཏྟཏི, ན ཏཏོ ཨུདྡྷཾ། ཨེཝམཡཾ པུནརཱཝཏྟནདྷམྨོཡེཝ; ཡཉྩ ཋཱནཾ པཱཔེཏི, ཏཾ ཛཱཏིཛརཱམརཎེཧི ཨཔརིམུཏྟམེཝ མཙྩུཔཱསཔརིཀྑིཏྟམེཝཱཏི། ཏཏོ པཊྛཱཡ ཙ པན མཧཱསཏྟོ ཡཐཱ ནཱམ ཚཱཏཛ྄ཛྷཏྟཔུརིསོ མནུཉྙབྷོཛནཾ ལབྷིཏྭཱ སམྤིཡཱཡམཱནོཔི བྷུཉྫིཏྭཱ པིཏྟཝསེན ཝཱ སེམྷཝསེན ཝཱ མཀྑིཀཱཝསེན ཝཱ ཚཌྜེཏྭཱ པུན ཨེཀཾ པིཎྜམྤི བྷུཉྫིསྶཱམཱིཏི མནཾ ན ཨུཔྤཱདེཏི; ཨེཝམེཝ ཨིམཱ སཏྟ སམཱཔཏྟིཡོ མཧནྟེན ཨུསྶཱཧེན ནིབྦཏྟེཏྭཱཔི, ཏཱསུ ཨིམཾ པུནརཱཝཏྟིཀཱདིབྷེདཾ ཨཱདཱིནཝཾ དིསྭཱ, པུན ཨིམཾ དྷམྨཾ ཨཱཝཛྫིསྶཱམི ཝཱ སམཱཔཛྫིསྶཱམི ཝཱ ཨདྷིཊྛཧིསྶཱམི ཝཱ ཝུཊྛཧིསྶཱམི ཝཱ པཙྩཝེཀྑིསྶཱམི ཝཱཏི ཙིཏྟམེཝ ན ཨུཔྤཱདེསི། ཨནལངྐརིཏྭཱཏི ཨལཾ ཨིམིནཱ, ཨལཾ ཨིམིནཱཏི པུནཔྤུནཾ ཨལངྐརིཏྭཱ། ནིབྦིཛྫཱཏི ནིབྦིནྡིཏྭཱ། ཨཔཀྐམིནྟི ཨགམཱསིཾ།

    Yāvadeva ākiñcaññāyatanūpapattiyāti yāva saṭṭhikappasahassāyuparimāṇe ākiñcaññāyatanabhave upapatti, tāvadeva saṃvattati, na tato uddhaṃ. Evamayaṃ punarāvattanadhammoyeva; yañca ṭhānaṃ pāpeti, taṃ jātijarāmaraṇehi aparimuttameva maccupāsaparikkhittamevāti. Tato paṭṭhāya ca pana mahāsatto yathā nāma chātajjhattapuriso manuññabhojanaṃ labhitvā sampiyāyamānopi bhuñjitvā pittavasena vā semhavasena vā makkhikāvasena vā chaḍḍetvā puna ekaṃ piṇḍampi bhuñjissāmīti manaṃ na uppādeti; evameva imā satta samāpattiyo mahantena ussāhena nibbattetvāpi, tāsu imaṃ punarāvattikādibhedaṃ ādīnavaṃ disvā, puna imaṃ dhammaṃ āvajjissāmi vā samāpajjissāmi vā adhiṭṭhahissāmi vā vuṭṭhahissāmi vā paccavekkhissāmi vāti cittameva na uppādesi. Analaṅkaritvāti alaṃ iminā, alaṃ imināti punappunaṃ alaṅkaritvā. Nibbijjāti nibbinditvā. Apakkaminti agamāsiṃ.

    ༢༧༨. ན ཁོ རཱམོ ཨིམཾ དྷམྨནྟི ཨིདྷཱཔི བོདྷིསཏྟོ ཏཾ དྷམྨཾ ཨུགྒཎྷནྟོཡེཝ ཨཉྙཱསི – ‘‘ནཱཡཾ ཨཊྛསམཱཔཏྟིདྷམྨོ ཨུདཀསྶ ཝཱཙཱཡ ཨུགྒཧིཏམཏྟོཝ, ཨདྡྷཱ པནེས ཨཊྛསམཱཔཏྟིལཱབྷཱི’’ཏི། ཏེནསྶ ཨེཏདཧོསི – ‘‘ན ཁོ རཱམོ…པེ॰… ཛཱནཾ པསྶཾ ཝིཧཱསཱི’’ཏི། སེསམེཏྠ པུརིམཝཱརེ ཝུཏྟནཡེནེཝ ཝེདིཏབྦཾ།

    278.Na kho rāmo imaṃ dhammanti idhāpi bodhisatto taṃ dhammaṃ uggaṇhantoyeva aññāsi – ‘‘nāyaṃ aṭṭhasamāpattidhammo udakassa vācāya uggahitamattova, addhā panesa aṭṭhasamāpattilābhī’’ti. Tenassa etadahosi – ‘‘na kho rāmo…pe… jānaṃ passaṃ vihāsī’’ti. Sesamettha purimavāre vuttanayeneva veditabbaṃ.

    ༢༧༩. ཡེན ཨུརུཝེལཱ སེནཱནིགམོཏི ཨེཏྠ ཨུརུཝེལཱཏི མཧཱཝེལཱ, མཧཱཝཱལིཀརཱསཱིཏི ཨཏྠོ། ཨཐ ཝཱ ཨུརཱུཏི ཝཱལིཀཱ ཝུཙྩཏི; ཝེལཱཏི མརིཡཱདཱ, ཝེལཱཏིཀྐམནཧེཏུ ཨཱཧཊཱ ཨུརུ ཨུརུཝེལཱཏི ཨེཝམེཏྠ ཨཏྠོ དཊྛབྦོ། ཨཏཱིཏེ ཀིར ཨནུཔྤནྣེ བུདྡྷེ དསསཧསྶཱ ཀུལཔུཏྟཱ ཏཱཔསཔབྦཛྫཾ པབྦཛིཏྭཱ ཏསྨིཾ པདེསེ ཝིཧརནྟཱ ཨེཀདིཝསཾ སནྣིཔཏིཏྭཱ ཀཏིཀཝཏྟཾ ཨཀཾསུ – ‘‘ཀཱཡཀམྨཝཙཱིཀམྨཱནི ནཱམ པརེསམྤི པཱཀཊཱནི ཧོནྟི, མནོཀམྨཾ པན ཨཔཱཀཊཾ། ཏསྨཱ ཡོ ཀཱམཝིཏཀྐཾ ཝཱ བྱཱཔཱདཝིཏཀྐཾ ཝཱ ཝིཧིཾསཱཝིཏཀྐཾ ཝཱ ཝིཏཀྐེཏི, ཏསྶ ཨཉྙོ ཙོདཀོ ནཱམ ནཏྠི; སོ ཨཏྟནཱཝ ཨཏྟཱནཾ ཙོདེཏྭཱ པཏྟཔུཊེན ཝཱལིཀཾ ཨཱཧརིཏྭཱ ཨིམསྨིཾ ཋཱནེ ཨཱཀིརཏུ, ཨིདམསྶ དཎྜཀམྨ’’ནྟི། ཏཏོ པཊྛཱཡ ཡོ ཏཱདིསཾ ཝིཏཀྐཾ ཝིཏཀྐེཏི, སོ ཏཏྠ པཏྟཔུཊེན ཝཱལིཀཾ ཨཱཀིརཏི, ཨེཝཾ ཏཏྠ ཨནུཀྐམེན མཧཱཝཱལིཀརཱསི ཛཱཏོ། ཏཏོ ཏཾ པཙྪིམཱ ཛནཏཱ པརིཀྑིཔིཏྭཱ ཙེཏིཡཊྛཱནམཀཱསི; ཏཾ སནྡྷཱཡ ཝུཏྟཾ – ‘‘ཨུརུཝེལཱཏི མཧཱཝེལཱ, མཧཱཝཱལིཀརཱསཱིཏི ཨཏྠོ’’ཏི། ཏམེཝ སནྡྷཱཡ ཝུཏྟཾ – ‘‘ཨཐ ཝཱ ཨུརཱུཏི ཝཱལིཀཱ ཝུཙྩཏི, ཝེལཱཏི མརིཡཱདཱ། ཝེལཱཏིཀྐམནཧེཏུ ཨཱཧཊཱ ཨུརུ ཨུརུཝེལཱཏི ཨེཝམེཏྠ ཨཏྠོ དཊྛབྦོ’’ཏི།

    279.Yena uruvelā senānigamoti ettha uruvelāti mahāvelā, mahāvālikarāsīti attho. Atha vā urūti vālikā vuccati; velāti mariyādā, velātikkamanahetu āhaṭā uru uruvelāti evamettha attho daṭṭhabbo. Atīte kira anuppanne buddhe dasasahassā kulaputtā tāpasapabbajjaṃ pabbajitvā tasmiṃ padese viharantā ekadivasaṃ sannipatitvā katikavattaṃ akaṃsu – ‘‘kāyakammavacīkammāni nāma paresampi pākaṭāni honti, manokammaṃ pana apākaṭaṃ. Tasmā yo kāmavitakkaṃ vā byāpādavitakkaṃ vā vihiṃsāvitakkaṃ vā vitakketi, tassa añño codako nāma natthi; so attanāva attānaṃ codetvā pattapuṭena vālikaṃ āharitvā imasmiṃ ṭhāne ākiratu, idamassa daṇḍakamma’’nti. Tato paṭṭhāya yo tādisaṃ vitakkaṃ vitakketi, so tattha pattapuṭena vālikaṃ ākirati, evaṃ tattha anukkamena mahāvālikarāsi jāto. Tato taṃ pacchimā janatā parikkhipitvā cetiyaṭṭhānamakāsi; taṃ sandhāya vuttaṃ – ‘‘uruvelāti mahāvelā, mahāvālikarāsīti attho’’ti. Tameva sandhāya vuttaṃ – ‘‘atha vā urūti vālikā vuccati, velāti mariyādā. Velātikkamanahetu āhaṭā uru uruvelāti evamettha attho daṭṭhabbo’’ti.

    སེནཱནིགམོཏི སེནཱཡ ནིགམོ། པཋམཀཔྤིཀཱནཾ ཀིར ཏསྨིཾ ཋཱནེ སེནཱནིཝེསོ ཨཧོསི; ཏསྨཱ སོ པདེསོ སེནཱནིགམོཏི ཝུཙྩཏི། ‘‘སེནཱནི-གཱམོ’’ཏིཔི པཱཋོ། སེནཱནཱི ནཱམ སུཛཱཏཱཡ པིཏཱ, ཏསྶ གཱམོཏི ཨཏྠོ། ཏདཝསརིནྟི ཏཏྠ ཨོསརིཾ། རམཎཱིཡཾ བྷཱུམིབྷཱགནྟི སུཔུཔྥིཏནཱནཔྤཀཱརཛལཛཐལཛཔུཔྥཝིཙིཏྟཾ མནོརམྨཾ བྷཱུམིབྷཱགཾ། པཱསཱདིཀཉྩ ཝནསཎྜནྟི མོརཔིཉྪཀལཱཔསདིསཾ པསཱདཛནནཝནསཎྜཉྩ ཨདྡསཾ། ནདིཉྩ སནྡནྟིནྟི སནྡམཱནཉྩ མཎིཀྑནྡྷསདིསཾ ཝིམལནཱིལསཱིཏལསལིལཾ ནེརཉྫརཾ ནདིཾ ཨདྡསཾ། སེཏཀནྟི པརིསུདྡྷཾ ནིཀྐདྡམཾ། སུཔཏིཏྠནྟི ཨནུཔུབྦགམྦྷཱིརེཧི སུནྡརེཧི ཏིཏྠེཧི ཨུཔེཏཾ། རམཎཱིཡནྟི རཛཏཔཊྚསདིསཾ ཝིཔྤཀིཎྞཝཱལིཀཾ པཧཱུཏམཙྪཀཙྪཔཾ ཨབྷིརཱམདསྶནཾ། སམནྟཱ ཙ གོཙརགཱམནྟི ཏསྶ པདེསསྶ སམནྟཱ ཨཝིདཱུརེ གམནཱགམནསམྤནྣཾ སམྤཏྟཔབྦཛིཏཱནཾ སུལབྷཔིཎྜཾ གོཙརགཱམཉྩ ཨདྡསཾ། ཨལཾ ཝཏཱཏི སམཏྠཾ ཝཏ། ཏཏྠེཝ ནིསཱིདིནྟི བོདྷིཔལླངྐེ ནིསཛྫཾ སནྡྷཱཡཱཧ། ཨུཔརིསུཏྟསྨིཉྷི ཏཏྠེཝཱཏི དུཀྐརཀཱརིཀཊྛཱནཾ ཨདྷིཔྤེཏཾ, ཨིདྷ པན བོདྷིཔལླངྐོ། ཏེནཱཧ – ‘‘ཏཏྠེཝ ནིསཱིདི’’ནྟི། ཨལམིདཾ པདྷཱནཱཡཱཏི ཨིདཾ ཋཱནཾ པདྷཱནཏྠཱཡ སམཏྠནྟི ཨེཝཾ ཙིནྟེཏྭཱ ནིསཱིདིནྟི ཨཏྠོ།

    Senānigamoti senāya nigamo. Paṭhamakappikānaṃ kira tasmiṃ ṭhāne senāniveso ahosi; tasmā so padeso senānigamoti vuccati. ‘‘Senāni-gāmo’’tipi pāṭho. Senānī nāma sujātāya pitā, tassa gāmoti attho. Tadavasarinti tattha osariṃ. Ramaṇīyaṃ bhūmibhāganti supupphitanānappakārajalajathalajapupphavicittaṃ manorammaṃ bhūmibhāgaṃ. Pāsādikañca vanasaṇḍanti morapiñchakalāpasadisaṃ pasādajananavanasaṇḍañca addasaṃ. Nadiñca sandantinti sandamānañca maṇikkhandhasadisaṃ vimalanīlasītalasalilaṃ nerañjaraṃ nadiṃ addasaṃ. Setakanti parisuddhaṃ nikkaddamaṃ. Supatitthanti anupubbagambhīrehi sundarehi titthehi upetaṃ. Ramaṇīyanti rajatapaṭṭasadisaṃ vippakiṇṇavālikaṃ pahūtamacchakacchapaṃ abhirāmadassanaṃ. Samantā ca gocaragāmanti tassa padesassa samantā avidūre gamanāgamanasampannaṃ sampattapabbajitānaṃ sulabhapiṇḍaṃ gocaragāmañca addasaṃ. Alaṃ vatāti samatthaṃ vata. Tattheva nisīdinti bodhipallaṅke nisajjaṃ sandhāyāha. Uparisuttasmiñhi tatthevāti dukkarakārikaṭṭhānaṃ adhippetaṃ, idha pana bodhipallaṅko. Tenāha – ‘‘tattheva nisīdi’’nti. Alamidaṃ padhānāyāti idaṃ ṭhānaṃ padhānatthāya samatthanti evaṃ cintetvā nisīdinti attho.

    ༢༨༠. ཨཛ྄ཛྷགམནྟི ཨདྷིགཙྪིཾ པཊིལབྷིཾ། ཉཱཎཉྩ པན མེ དསྶནནྟི སབྦདྷམྨདསྶནསམཏྠཉྩ མེ སབྦཉྙུཏཉྙཱཎཾ ཨུདཔཱདི། ཨཀུཔྤཱ མེ ཝིམུཏྟཱིཏི མཡ྄ཧཾ ཨརཧཏྟཕལཝིམུཏྟི ཨཀུཔྤཏཱཡ ཙ ཨཀུཔྤཱརམྨཎཏཱཡ ཙ ཨཀུཔྤཱ, སཱ ཧི རཱགཱདཱིཧི ན ཀུཔྤཏཱིཏི ཨཀུཔྤཏཱཡཔི ཨཀུཔྤཱ, ཨཀུཔྤཾ ནིབྦཱནམསྶཱརམྨཎནྟིཔི ཨཀུཔྤཱ། ཨཡམནྟིམཱ ཛཱཏཱིཏི ཨཡཾ སབྦཔཙྪིམཱ ཛཱཏི། ནཏྠི དཱནི པུནབྦྷཝོཏི ཨིདཱནི མེ པུན པཊིསནྡྷི ནཱམ ནཏྠཱིཏི ཨེཝཾ པཙྩཝེཀྑཎཉཱཎམྤི མེ ཨུཔྤནྣནྟི དསྶེཏི།

    280.Ajjhagamanti adhigacchiṃ paṭilabhiṃ. Ñāṇañca pana me dassananti sabbadhammadassanasamatthañca me sabbaññutaññāṇaṃ udapādi. Akuppā me vimuttīti mayhaṃ arahattaphalavimutti akuppatāya ca akuppārammaṇatāya ca akuppā, sā hi rāgādīhi na kuppatīti akuppatāyapi akuppā, akuppaṃ nibbānamassārammaṇantipi akuppā. Ayamantimā jātīti ayaṃ sabbapacchimā jāti. Natthidāni punabbhavoti idāni me puna paṭisandhi nāma natthīti evaṃ paccavekkhaṇañāṇampi me uppannanti dasseti.

    ༢༨༡. ཨདྷིགཏོཏི པཊིཝིདྡྷོ། དྷམྨོཏི ཙཏུསཙྩདྷམྨོ། གམྦྷཱིརོཏི ཨུཏྟཱནབྷཱཝཔཊིཀྑེཔཝཙནམེཏཾ། དུདྡསོཏི གམྦྷཱིརཏྟཱཝ དུདྡསོ དུཀྑེན དཊྛབྦོ, ན སཀྐཱ སུཁེན དཊྛུཾ། དུདྡསཏྟཱཝ དུརནུབོདྷོ, དུཀྑེན ཨཝབུཛ྄ཛྷིཏབྦོ, ན སཀྐཱ སུཁེན ཨཝབུཛ྄ཛྷིཏུཾ། སནྟོཏི ནིབྦུཏོ། པཎཱིཏོཏི ཨཏཔྤཀོ། ཨིདཾ དྭཡཾ ལོཀུཏྟརམེཝ སནྡྷཱཡ ཝུཏྟཾ། ཨཏཀྐཱཝཙརོཏི ཏཀྐེན ཨཝཙརིཏབྦོ ཨོགཱཧིཏབྦོ ན ཧོཏི, ཉཱཎེནེཝ ཨཝཙརིཏབྦོ། ནིཔུཎོཏི སཎྷོ། པཎྜིཏཝེདནཱིཡོཏི སམྨཱཔཊིཔདཾ པཊིཔནྣེཧི པཎྜིཏེཧི ཝེདིཏབྦོ། ཨཱལཡརཱམཱཏི སཏྟཱ པཉྩསུ ཀཱམགུཎེསུ ཨལླཱིཡནྟི། ཏསྨཱ ཏེ ཨཱལཡཱཏི ཝུཙྩནྟི། ཨཊྛསཏཏཎྷཱཝིཙརིཏཱནི ཨཱལཡནྟི, ཏསྨཱ ཨཱལཡཱཏི ཝུཙྩནྟི། ཏེཧི ཨཱལཡེཧི རམནྟཱིཏི ཨཱལཡརཱམཱ། ཨཱལཡེསུ རཏཱཏི ཨཱལཡརཏཱ། ཨཱལཡེསུ སུཊྛུ མུདིཏཱཏི ཨཱལཡསམྨུདིཏཱ། ཡཐེཝ ཧི སུསཛྫིཏཾ པུཔྥཕལབྷརིཏརུཀྑཱདིསམྤནྣཾ ཨུཡྻཱནཾ པཝིཊྛོ རཱཛཱ ཏཱཡ ཏཱཡ སམྤཏྟིཡཱ རམཏི, སམྨུདིཏོ ཨཱམོདིཏཔམོདིཏོ ཧོཏི, ན ཨུཀྐཎྛཏི, སཱཡམྤི ནིཀྑམིཏུཾ ན ཨིཙྪཏི; ཨེཝམིམེཧིཔི ཀཱམཱལཡཏཎྷཱལཡེཧི སཏྟཱ རམནྟི, སཾསཱརཝཊྚེ སམྨུདིཏཱ ཨནུཀྐཎྛིཏཱ ཝསནྟི། ཏེན ནེསཾ བྷགཝཱ དུཝིདྷམྤི ཨཱལཡཾ ཨུཡྻཱནབྷཱུམིཾ ཝིཡ དསྶེནྟོ ‘‘ཨཱལཡརཱམཱ’’ཏིཨཱདིམཱཧ།

    281.Adhigatoti paṭividdho. Dhammoti catusaccadhammo. Gambhīroti uttānabhāvapaṭikkhepavacanametaṃ. Duddasoti gambhīrattāva duddaso dukkhena daṭṭhabbo, na sakkā sukhena daṭṭhuṃ. Duddasattāva duranubodho, dukkhena avabujjhitabbo, na sakkā sukhena avabujjhituṃ. Santoti nibbuto. Paṇītoti atappako. Idaṃ dvayaṃ lokuttarameva sandhāya vuttaṃ. Atakkāvacaroti takkena avacaritabbo ogāhitabbo na hoti, ñāṇeneva avacaritabbo. Nipuṇoti saṇho. Paṇḍitavedanīyoti sammāpaṭipadaṃ paṭipannehi paṇḍitehi veditabbo. Ālayarāmāti sattā pañcasu kāmaguṇesu allīyanti. Tasmā te ālayāti vuccanti. Aṭṭhasatataṇhāvicaritāni ālayanti, tasmā ālayāti vuccanti. Tehi ālayehi ramantīti ālayarāmā. Ālayesu ratāti ālayaratā. Ālayesu suṭṭhu muditāti ālayasammuditā. Yatheva hi susajjitaṃ pupphaphalabharitarukkhādisampannaṃ uyyānaṃ paviṭṭho rājā tāya tāya sampattiyā ramati, sammudito āmoditapamodito hoti, na ukkaṇṭhati, sāyampi nikkhamituṃ na icchati; evamimehipi kāmālayataṇhālayehi sattā ramanti, saṃsāravaṭṭe sammuditā anukkaṇṭhitā vasanti. Tena nesaṃ bhagavā duvidhampi ālayaṃ uyyānabhūmiṃ viya dassento ‘‘ālayarāmā’’tiādimāha.

    ཡདིདནྟི ནིཔཱཏོ, ཏསྶ ཋཱནཾ སནྡྷཱཡ ‘‘ཡཾ ཨིད’’ནྟི, པཊིཙྩསམུཔྤཱདཾ སནྡྷཱཡ ‘‘ཡོ ཨཡ’’ནྟི ཨེཝམཏྠོ དཊྛབྦོ། ཨིདཔྤཙྩཡཏཱཔཊིཙྩསམུཔྤཱདོཏི ཨིམེསཾ པཙྩཡཱ ཨིདཔྤཙྩཡཱ; ཨིདཔྤཙྩཡཱ ཨེཝ ཨིདཔྤཙྩཡཏཱ; ཨིདཔྤཙྩཡཏཱ ཙ སཱ པཊིཙྩསམུཔྤཱདོ ཙཱཏི ཨིདཔྤཙྩཡཏཱཔཊིཙྩསམུཔྤཱདོ། སངྑཱརཱདིཔཙྩཡཱནམེཏཾ ཨདྷིཝཙནཾ། སབྦསངྑཱརསམཐོཏིཨཱདི སབྦཾ ནིབྦཱནམེཝ། ཡསྨཱ ཧི ཏཾ ཨཱགམྨ སབྦསངྑཱརཝིཔྥནྡིཏཱནི སམྨནྟི ཝཱུཔསམྨནྟི, ཏསྨཱ སབྦསངྑཱརསམཐོཏི ཝུཙྩཏི། ཡསྨཱ ཙ ཏཾ ཨཱགམྨ སབྦེ ཨུཔདྷཡོ པཊིནིསྶཊྛཱ ཧོནྟི, སབྦཱ ཏཎྷཱ ཁཱིཡནྟི, སབྦེ ཀིལེསརཱགཱ ཝིརཛྫནྟི, སབྦཾ དུཀྑཾ ནིརུཛ྄ཛྷཏི; ཏསྨཱ སབྦཱུཔདྷིཔཊིནིསྶགྒོ ཏཎྷཱཀྑཡོ ཝིརཱགོ ནིརོདྷོཏི ཝུཙྩཏི། སཱ པནེསཱ ཏཎྷཱ བྷཝེན བྷཝཾ, ཕལེན ཝཱ སདྡྷིཾ ཀམྨཾ ཝིནཏི སཾསིབྦཏཱིཏི ཀཏྭཱ ཝཱནནྟི ཝུཙྩཏི, ཏཏོ ནིཀྑནྟཾ ཝཱནཏོཏི ནིབྦཱནཾ། སོ མམསྶ ཀིལམཐོཏི ཡཱ ཨཛཱནནྟཱནཾ དེསནཱ ནཱམ, སོ མམ ཀིལམཐོ ཨསྶ, སཱ མམ ཝིཧེསཱ ཨསྶཱཏི ཨཏྠོ། ཀཱཡཀིལམཐོ ཙེཝ ཀཱཡཝིཧེསཱ ཙ ཨསྶཱཏི ཝུཏྟཾ ཧོཏི། ཙིཏྟེ པན ཨུབྷཡམྤེཏཾ བུདྡྷཱནཾ ནཏྠི། ཨཔིསྶཱུཏི ཨནུབྲཱུཧནཏྠེ ནིཔཱཏོ, སོ ‘‘ན ཀེཝལཾ ཨེཏདཧོསི, ཨིམཱཔི གཱཐཱ པཊིབྷཾསཱུ’’ཏི དཱིཔེཏི། མནྟི མམ། ཨནཙྪརིཡཱཏི ཨནུཨཙྪརིཡཱ། པཊིབྷཾསཱུཏི པཊིབྷཱནསངྑཱཏསྶ ཉཱཎསྶ གོཙརཱ ཨཧེསུཾ; པརིཝིཏཀྐཡིཏབྦཏཾ པཱཔུཎིཾསུ།

    Yadidanti nipāto, tassa ṭhānaṃ sandhāya ‘‘yaṃ ida’’nti, paṭiccasamuppādaṃ sandhāya ‘‘yo aya’’nti evamattho daṭṭhabbo. Idappaccayatāpaṭiccasamuppādoti imesaṃ paccayā idappaccayā; idappaccayā eva idappaccayatā; idappaccayatā ca sā paṭiccasamuppādo cāti idappaccayatāpaṭiccasamuppādo. Saṅkhārādipaccayānametaṃ adhivacanaṃ. Sabbasaṅkhārasamathotiādi sabbaṃ nibbānameva. Yasmā hi taṃ āgamma sabbasaṅkhāravipphanditāni sammanti vūpasammanti, tasmā sabbasaṅkhārasamathoti vuccati. Yasmā ca taṃ āgamma sabbe upadhayo paṭinissaṭṭhā honti, sabbā taṇhā khīyanti, sabbe kilesarāgā virajjanti, sabbaṃ dukkhaṃ nirujjhati; tasmā sabbūpadhipaṭinissaggo taṇhākkhayo virāgo nirodhoti vuccati. Sā panesā taṇhā bhavena bhavaṃ, phalena vā saddhiṃ kammaṃ vinati saṃsibbatīti katvā vānanti vuccati, tato nikkhantaṃ vānatoti nibbānaṃ. So mamassa kilamathoti yā ajānantānaṃ desanā nāma, so mama kilamatho assa, sā mama vihesā assāti attho. Kāyakilamatho ceva kāyavihesā ca assāti vuttaṃ hoti. Citte pana ubhayampetaṃ buddhānaṃ natthi. Apissūti anubrūhanatthe nipāto, so ‘‘na kevalaṃ etadahosi, imāpi gāthā paṭibhaṃsū’’ti dīpeti. Manti mama. Anacchariyāti anuacchariyā. Paṭibhaṃsūti paṭibhānasaṅkhātassa ñāṇassa gocarā ahesuṃ; parivitakkayitabbataṃ pāpuṇiṃsu.

    ཀིཙྪེནཱཏི དུཀྑེན, ན དུཀྑཱཡ པཊིཔདཱཡ། བུདྡྷཱནཉྷི ཙཏྟཱརོཔི མགྒཱ སུཁཔྤཊིཔདཱཝ ཧོནྟི། པཱརམཱིཔཱུརཎཀཱལེ པན སརཱགསདོསསམོཧསྶེཝ སཏོ ཨཱགཏཱགཏཱནཾ ཡཱཙཀཱནཾ , ཨལངྐཏཔྤཊིཡཏྟཾ སཱིསཾ ཀནྟིཏྭཱ, གལལོཧིཏཾ ནཱིཧརིཏྭཱ, སུཨཉྫིཏཱནི ཨཀྑཱིནི ཨུཔྤཱཊེཏྭཱ, ཀུལཝཾསཔྤདཱིཔཾ པུཏྟཾ མནཱཔཙཱརིནིཾ བྷརིཡནྟི ཨེཝམཱདཱིནི དེནྟསྶ, ཨཉྙཱནི ཙ ཁནྟིཝཱདིསདིསེསུ ཨཏྟབྷཱཝེསུ ཚེཛྫབྷེཛྫཱདཱིནི པཱཔུཎནྟསྶ ཨཱགམནིཡཔཊིཔདཾ སནྡྷཱཡེཏཾ ཝུཏྟཾ ། ཧལནྟི ཨེཏྠ ཧ-ཀཱརོ ནིཔཱཏམཏྟོ, ཨལནྟི ཨཏྠོ། པཀཱསིཏུནྟི དེསིཏུཾ, ཨེཝཾ ཀིཙྪེན ཨདྷིགཏསྶ དྷམྨསྶ ཨལཾ དེསིཏུཾ, པརིཡཏྟཾ དེསིཏུཾ, ཀོ ཨཏྠོ དེསིཏེནཱཏི ཝུཏྟཾ ཧོཏི། རཱགདོསཔརེཏེཧཱིཏི རཱགདོསཔརིཕུཊྛེཧི རཱགདོསཱནུགཏེཧི ཝཱ།

    Kicchenāti dukkhena, na dukkhāya paṭipadāya. Buddhānañhi cattāropi maggā sukhappaṭipadāva honti. Pāramīpūraṇakāle pana sarāgasadosasamohasseva sato āgatāgatānaṃ yācakānaṃ , alaṅkatappaṭiyattaṃ sīsaṃ kantitvā, galalohitaṃ nīharitvā, suañjitāni akkhīni uppāṭetvā, kulavaṃsappadīpaṃ puttaṃ manāpacāriniṃ bhariyanti evamādīni dentassa, aññāni ca khantivādisadisesu attabhāvesu chejjabhejjādīni pāpuṇantassa āgamaniyapaṭipadaṃ sandhāyetaṃ vuttaṃ . Halanti ettha ha-kāro nipātamatto, alanti attho. Pakāsitunti desituṃ, evaṃ kicchena adhigatassa dhammassa alaṃ desituṃ, pariyattaṃ desituṃ, ko attho desitenāti vuttaṃ hoti. Rāgadosaparetehīti rāgadosapariphuṭṭhehi rāgadosānugatehi vā.

    པཊིསོཏགཱམིནྟི ནིཙྩཱདཱིནཾ པཊིསོཏཾ ཨནིཙྩཾ དུཀྑམནཏྟཱ ཨསུབྷནྟི ཨེཝཾ གཏཾ ཙཏུསཙྩདྷམྨཾ། རཱགརཏྟཱཏི ཀཱམརཱགེན བྷཝརཱགེན དིཊྛིརཱགེན ཙ རཏྟཱ། ན དཀྑནྟཱིཏི ཨནིཙྩཾ དུཀྑམནཏྟཱ ཨསུབྷནྟི ཨིམིནཱ སབྷཱཝེན ན པསྶིསྶནྟི, ཏེ ཨཔསྶནྟེ ཀོ སཀྑིསྶཏི ཨེཝཾ གཱཧཱཔེཏུཾ། ཏམོཁནྡྷེན ཨཱཝུཊཱཏི ཨཝིཛྫཱརཱསིནཱ ཨཛ྄ཛྷོཏྠཏཱ།

    Paṭisotagāminti niccādīnaṃ paṭisotaṃ aniccaṃ dukkhamanattā asubhanti evaṃ gataṃ catusaccadhammaṃ. Rāgarattāti kāmarāgena bhavarāgena diṭṭhirāgena ca rattā. Na dakkhantīti aniccaṃ dukkhamanattā asubhanti iminā sabhāvena na passissanti, te apassante ko sakkhissati evaṃ gāhāpetuṃ. Tamokhandhena āvuṭāti avijjārāsinā ajjhotthatā.

    ༢༨༢. ཨཔྤོསྶུཀྐཏཱཡཱཏི ནིརུསྶུཀྐབྷཱཝེན, ཨདེསེཏུཀཱམཏཱཡཱཏི ཨཏྠོ། ཀསྨཱ པནསྶ ཨེཝཾ ཙིཏྟཾ ནམི, ནནུ ཨེས མུཏྟོ མོཙེསྶཱམི, ཏིཎྞོ ཏཱརེསྶཱམི།

    282.Appossukkatāyāti nirussukkabhāvena, adesetukāmatāyāti attho. Kasmā panassa evaṃ cittaṃ nami, nanu esa mutto mocessāmi, tiṇṇo tāressāmi.

    ‘‘ཀིཾ མེ ཨཉྙཱཏཝེསེན, དྷམྨཾ སཙྪིཀཏེནིདྷ།

    ‘‘Kiṃ me aññātavesena, dhammaṃ sacchikatenidha;

    སབྦཉྙུཏཾ པཱཔུཎིཏྭཱ, ཏཱརཡིསྶཾ སདེཝཀ’’ནྟི༎ (བུ॰ ཝཾ॰ ༢.༥༦) –

    Sabbaññutaṃ pāpuṇitvā, tārayissaṃ sadevaka’’nti. (bu. vaṃ. 2.56) –

    པཏྠནཾ ཀཏྭཱ པཱརམིཡོ པཱུརེཏྭཱ སབྦཉྙུཏཾ པཏྟོཏི། སཙྩམེཏཾ, ཏདེཝཾ པཙྩཝེཀྑཎཱནུབྷཱཝེན པནསྶ ཨེཝཾ ཙིཏྟཾ ནམི། ཏསྶ ཧི སབྦཉྙུཏཾ པཏྭཱ སཏྟཱནཾ ཀིལེསགཧནཏཾ, དྷམྨསྶ ཙ གམྦྷཱིརཏཾ པཙྩཝེཀྑནྟསྶ སཏྟཱནཾ ཀིལེསགཧནཏཱ ཙ དྷམྨགམྦྷཱིརཏཱ ཙ སབྦཱཀཱརེན པཱཀཊཱ ཛཱཏཱ། ཨཐསྶ ‘‘ཨིམེ སཏྟཱ ཀཉྫིཀཔུཎྞཱ ལཱབུ ཝིཡ, ཏཀྐབྷརིཏཱ ཙཱཊི ཝིཡ, ཝསཱཏེལཔཱིཏཔིལོཏིཀཱ ཝིཡ, ཨཉྫནམཀྑིཏཧཏྠོ ཝིཡ ཙ ཀིལེསབྷརིཏཱ ཨཏིསཾཀིལིཊྛཱ རཱགརཏྟཱ དོསདུཊྛཱ མོཧམཱུལ༹ྷཱ, ཏེ ཀིཾ ནཱམ པཊིཝིཛ྄ཛྷིསྶནྟཱི’’ཏི ཙིནྟཡཏོ ཀིལེསགཧནཔཙྩཝེཀྑཎཱནུབྷཱཝེནཱཔི ཨེཝཾ ཙིཏྟཾ ནམི།

    Patthanaṃ katvā pāramiyo pūretvā sabbaññutaṃ pattoti. Saccametaṃ, tadevaṃ paccavekkhaṇānubhāvena panassa evaṃ cittaṃ nami. Tassa hi sabbaññutaṃ patvā sattānaṃ kilesagahanataṃ, dhammassa ca gambhīrataṃ paccavekkhantassa sattānaṃ kilesagahanatā ca dhammagambhīratā ca sabbākārena pākaṭā jātā. Athassa ‘‘ime sattā kañjikapuṇṇā lābu viya, takkabharitā cāṭi viya, vasātelapītapilotikā viya, añjanamakkhitahattho viya ca kilesabharitā atisaṃkiliṭṭhā rāgarattā dosaduṭṭhā mohamūḷhā, te kiṃ nāma paṭivijjhissantī’’ti cintayato kilesagahanapaccavekkhaṇānubhāvenāpi evaṃ cittaṃ nami.

    ‘‘ཨཡཉྩ དྷམྨོ པཐཝཱིསནྡྷཱརཀཨུདཀཀྑནྡྷོ ཝིཡ གམྦྷཱིརོ, པབྦཏེན པཊིཙྪཱདེཏྭཱ ཋཔིཏོ སཱསཔོ ཝིཡ དུདྡསོ, སཏདྷཱ བྷིནྣསྶ ཝཱལསྶ ཀོཊིཡཱ ཀོཊིཔཊིཔཱདནཾ ཝིཡ དུརནུབོདྷོ། ནནུ མཡཱ ཧི ཨིམཾ དྷམྨཾ པཊིཝིཛ྄ཛྷིཏུཾ ཝཱཡམནྟེན ཨདིནྣཾ དཱནཾ ནཱམ ནཏྠི, ཨརཀྑིཏཾ སཱིལཾ ནཱམ ནཏྠི, ཨཔརིཔཱུརིཏཱ ཀཱཙི པཱརམཱི ནཱམ ནཏྠི? ཏསྶ མེ ནིརུསྶཱཧཾ ཝིཡ མཱརབལཾ ཝིདྷམནྟསྶཱཔི པཐཝཱི ན ཀམྤིཏྠ, པཋམཡཱམེ པུབྦེནིཝཱསཾ ཨནུསྶརནྟསྶཱཔི ན ཀམྤིཏྠ, མཛ྄ཛྷིམཡཱམེ དིབྦཙཀྑུཾ སོདྷེནྟསྶཱཔི ན ཀམྤིཏྠ, པཙྪིམཡཱམེ པན པཊིཙྩསམུཔྤཱདཾ པཊིཝིཛ྄ཛྷནྟསྶེཝ མེ དསསཧསྶིལོཀདྷཱཏུ ཀམྤིཏྠ། ཨིཏི མཱདིསེནཱཔི ཏིཀྑཉཱཎེན ཀིཙྪེནེཝཱཡཾ དྷམྨོ པཊིཝིདྡྷོ, ཏཾ ལོཀིཡམཧཱཛནཱ ཀཐཾ པཊིཝིཛ྄ཛྷིསྶནྟཱི’’ཏི དྷམྨགམྦྷཱིརཏཱཔཙྩཝེཀྑཎཱནུབྷཱཝེནཱཔི ཨེཝཾ ཙིཏྟཾ ནམཱིཏི ཝེདིཏབྦཾ།

    ‘‘Ayañca dhammo pathavīsandhārakaudakakkhandho viya gambhīro, pabbatena paṭicchādetvā ṭhapito sāsapo viya duddaso, satadhā bhinnassa vālassa koṭiyā koṭipaṭipādanaṃ viya duranubodho. Nanu mayā hi imaṃ dhammaṃ paṭivijjhituṃ vāyamantena adinnaṃ dānaṃ nāma natthi, arakkhitaṃ sīlaṃ nāma natthi, aparipūritā kāci pāramī nāma natthi? Tassa me nirussāhaṃ viya mārabalaṃ vidhamantassāpi pathavī na kampittha, paṭhamayāme pubbenivāsaṃ anussarantassāpi na kampittha, majjhimayāme dibbacakkhuṃ sodhentassāpi na kampittha, pacchimayāme pana paṭiccasamuppādaṃ paṭivijjhantasseva me dasasahassilokadhātu kampittha. Iti mādisenāpi tikkhañāṇena kicchenevāyaṃ dhammo paṭividdho, taṃ lokiyamahājanā kathaṃ paṭivijjhissantī’’ti dhammagambhīratāpaccavekkhaṇānubhāvenāpi evaṃ cittaṃ namīti veditabbaṃ.

    ཨཔིཙ བྲཧྨུནཱ ཡཱཙིཏེ དེསེཏུཀཱམཏཱཡཔིསྶ ཨེཝཾ ཙིཏྟཾ ནམི། ཛཱནཱཏི ཧི བྷགཝཱ – ‘‘མམ ཨཔྤོསྶུཀྐཏཱཡ ཙིཏྟེ ནམམཱནེ མཾ མཧཱབྲཧྨཱ དྷམྨདེསནཾ ཡཱཙིསྶཏི, ཨིམེ ཙ སཏྟཱ བྲཧྨགརུཀཱ, ཏེ ‘སཏྠཱ ཀིར དྷམྨཾ ན དེསེཏུཀཱམོ ཨཧོསི, ཨཐ ནཾ མཧཱབྲཧྨཱ ཡཱཙིཏྭཱ དེསཱཔེསི, སནྟོ ཝཏ, བྷོ, དྷམྨོ པཎཱིཏོ ཝཏ, བྷོ, དྷམྨོ’ཏི མཉྙམཱནཱ སུསྶཱུསིསྶནྟཱི’’ཏི། ཨིདམྤིསྶ ཀཱརཎཾ པཊིཙྩ ཨཔྤོསྶུཀྐཏཱཡ ཙིཏྟཾ ནམི, ནོ དྷམྨདེསནཱཡཱཏི ཝེདིཏབྦཾ།

    Apica brahmunā yācite desetukāmatāyapissa evaṃ cittaṃ nami. Jānāti hi bhagavā – ‘‘mama appossukkatāya citte namamāne maṃ mahābrahmā dhammadesanaṃ yācissati, ime ca sattā brahmagarukā, te ‘satthā kira dhammaṃ na desetukāmo ahosi, atha naṃ mahābrahmā yācitvā desāpesi, santo vata, bho, dhammo paṇīto vata, bho, dhammo’ti maññamānā sussūsissantī’’ti. Idampissa kāraṇaṃ paṭicca appossukkatāya cittaṃ nami, no dhammadesanāyāti veditabbaṃ.

    སཧམྤཏིསྶཱཏི སོ ཀིར ཀསྶཔསྶ བྷགཝཏོ སཱསནེ སཧཀོ ནཱམ ཐེརོ པཋམཛ྄ཛྷཱནཾ ནིབྦཏྟེཏྭཱ པཋམཛ྄ཛྷཱནབྷཱུམིཡཾ ཀཔྤཱཡུཀབྲཧྨཱ ཧུཏྭཱ ནིབྦཏྟོ། ཏཏྲ ནཾ སཧམྤཏིབྲཧྨཱཏི པཊིསཉྫཱནནྟི, ཏཾ སནྡྷཱཡཱཧ – ‘‘བྲཧྨུནོ སཧམྤཏིསྶཱ’’ཏི། ནསྶཏི ཝཏ, བྷོཏི སོ ཀིར ཨིམཾ སདྡཾ ཏཐཱ ནིཙྪཱརེསི, ཡཐཱ དསསཧསྶིལོཀདྷཱཏུབྲཧྨཱནོ སུཏྭཱ སབྦེ སནྣིཔཏིཾསུ། ཡཏྲ ཧི ནཱམཱཏི ཡསྨིཾ ནཱམ ལོཀེ། པུརཏོ པཱཏུརཧོསཱིཏི ཏེཧི དསཧི བྲཧྨསཧསྶེཧི སདྡྷིཾ པཱཏུརཧོསི། ཨཔྤརཛཀྑཛཱཏིཀཱཏི པཉྙཱམཡེ ཨཀྑིམྷི ཨཔྤཾ པརིཏྟཾ རཱགདོསམོཧརཛཾ ཨེཏེསཾ, ཨེཝཾསབྷཱཝཱཏི ཨཔྤརཛཀྑཛཱཏིཀཱ། ཨསྶཝནཏཱཏི ཨསྶཝནཏཱཡ། བྷཝིསྶནྟཱིཏི པུརིམབུདྡྷེསུ དསཔུཉྙཀིརིཡཝསེན ཀཏཱདྷིཀཱརཱ པརིཔཱཀགཏཔདུམཱནི ཝིཡ སཱུརིཡརསྨིསམྥསྶཾ, དྷམྨདེསནཾཡེཝ ཨཱཀངྑམཱནཱ ཙཏུཔྤདིཀགཱཐཱཝསཱནེ ཨརིཡབྷཱུམིཾ ཨོཀྐམནཱརཧཱ ན ཨེཀོ, ན དྭེ, ཨནེཀསཏསཧསྶཱ དྷམྨསྶ ཨཉྙཱཏཱརོ བྷཝིསྶནྟཱིཏི དསྶེཏི།

    Sahampatissāti so kira kassapassa bhagavato sāsane sahako nāma thero paṭhamajjhānaṃ nibbattetvā paṭhamajjhānabhūmiyaṃ kappāyukabrahmā hutvā nibbatto. Tatra naṃ sahampatibrahmāti paṭisañjānanti, taṃ sandhāyāha – ‘‘brahmuno sahampatissā’’ti. Nassati vata, bhoti so kira imaṃ saddaṃ tathā nicchāresi, yathā dasasahassilokadhātubrahmāno sutvā sabbe sannipatiṃsu. Yatra hi nāmāti yasmiṃ nāma loke. Purato pāturahosīti tehi dasahi brahmasahassehi saddhiṃ pāturahosi. Apparajakkhajātikāti paññāmaye akkhimhi appaṃ parittaṃ rāgadosamoharajaṃ etesaṃ, evaṃsabhāvāti apparajakkhajātikā. Assavanatāti assavanatāya. Bhavissantīti purimabuddhesu dasapuññakiriyavasena katādhikārā paripākagatapadumāni viya sūriyarasmisamphassaṃ, dhammadesanaṃyeva ākaṅkhamānā catuppadikagāthāvasāne ariyabhūmiṃ okkamanārahā na eko, na dve, anekasatasahassā dhammassa aññātāro bhavissantīti dasseti.

    པཱཏུརཧོསཱིཏི པཱཏུབྷཝི། སམལེཧི ཙིནྟིཏོཏི སམལེཧི ཚཧི སཏྠཱརེཧི ཙིནྟིཏོ། ཏེ ཧི པུརེཏརཾ ཨུཔྤཛྫིཏྭཱ སཀལཛམྦུདཱིཔེ ཀཎྚཀེ པཏྠརམཱནཱ ཝིཡ, ཝིསཾ སིཉྩམཱནཱ ཝིཡ ཙ སམལཾ མིཙྪཱདིཊྛིདྷམྨཾ དེསཡིཾསུ། ཨཔཱཔུརེཏནྟི ཝིཝར ཨེཏཾ། ཨམཏསྶ དྭཱརནྟི ཨམཏསྶ ནིབྦཱནསྶ དྭཱརབྷཱུཏཾ ཨརིཡམགྒཾ། སུཎནྟུ དྷམྨཾ ཝིམལེནཱནུབུདྡྷནྟི ཨིམེ སཏྟཱ རཱགཱདིམལཱནཾ ཨབྷཱཝཏོ ཝིམལེན སམྨཱསམྦུདྡྷེན ཨནུབུདྡྷཾ ཙཏུསཙྩདྷམྨཾ སུཎནྟུ ཏཱཝ བྷགཝཱཏི ཡཱཙཏི།

    Pāturahosīti pātubhavi. Samalehi cintitoti samalehi chahi satthārehi cintito. Te hi puretaraṃ uppajjitvā sakalajambudīpe kaṇṭake pattharamānā viya, visaṃ siñcamānā viya ca samalaṃ micchādiṭṭhidhammaṃ desayiṃsu. Apāpuretanti vivara etaṃ. Amatassa dvāranti amatassa nibbānassa dvārabhūtaṃ ariyamaggaṃ. Suṇantu dhammaṃ vimalenānubuddhanti ime sattā rāgādimalānaṃ abhāvato vimalena sammāsambuddhena anubuddhaṃ catusaccadhammaṃ suṇantu tāva bhagavāti yācati.

    སེལེ ཡཐཱ པབྦཏམུདྡྷནིཊྛིཏོཏི སེལམཡེ ཨེཀགྒྷནེ པབྦཏམུདྡྷནི ཡཐཱ ཋིཏོཝ། ན ཧི ཏསྶ ཋིཏསྶ དསྶནཏྠཾ གཱིཝུཀྑིཔནཔསཱརཎཱདིཀིཙྩཾ ཨཏྠི། ཏཐཱུཔམནྟི ཏཔྤཊིབྷཱགཾ སེལཔབྦཏཱུཔམཾ། ཨཡཾ པནེཏྠ སངྑེཔཏྠོ – ཡཐཱ སེལཔབྦཏམུདྡྷནི ཋིཏོཝ ཙཀྑུམཱ པུརིསོ སམནྟཏོ ཛནཏཾ པསྶེཡྻ, ཏཐཱ ཏྭམྤི, སུམེདྷ, སུནྡརཔཉྙ-སབྦཉྙུཏཉྙཱཎེན སམནྟཙཀྑུ བྷགཝཱ དྷམྨམཡཾ པཱསཱདམཱརུཡ྄ཧ སཡཾ ཨཔེཏསོཀོ སོཀཱཝཏིཎྞཾ ཛཱཏིཛརཱབྷིབྷཱུཏཾ ཛནཏཾ ཨཝེཀྑསྶུ ཨུཔདྷཱརཡ ཨུཔཔརིཀྑ། ཨཡཾ པནེཏྠ ཨདྷིཔྤཱཡོ – ཡཐཱ ཧི པབྦཏཔཱདེ སམནྟཱ མཧནྟཾ ཁེཏྟཾ ཀཏྭཱ ཏཏྠ ཀེདཱརཔཱལཱི༹སུ ཀུཊིཀཱཡོ ཀཏྭཱ རཏྟིཾ ཨགྒིཾ ཛཱལེཡྻུཾ། ཙཏུརངྒསམནྣཱགཏཉྩ ཨནྡྷཀཱརཾ ཨསྶ, ཨཐ ཏསྶ པབྦཏསྶ མཏྠཀེ ཋཏྭཱ ཙཀྑུམཏོ པུརིསསྶ བྷཱུམིཾ ཨོལོཀཡཏོ ནེཝ ཁེཏྟཾ, ན ཀེདཱརཔཱལི༹ཡོ, ན ཀུཊིཡོ, ན ཏཏྠ སཡིཏམནུསྶཱ པཉྙཱཡེཡྻུཾ། ཀུཊིཀཱསུ པན ཨགྒིཛཱལཱམཏྟཀམེཝ པཉྙཱཡེཡྻ། ཨེཝཾ དྷམྨཔཱསཱདཾ ཨཱརུཡ྄ཧ སཏྟནིཀཱཡཾ ཨོལོཀཡཏོ ཏཐཱགཏསྶ, ཡེ ཏེ ཨཀཏཀལྱཱཎཱ སཏྟཱ, ཏེ ཨེཀཝིཧཱརེ དཀྑིཎཛཱཎུཔསྶེ ནིསིནྣཱཔི བུདྡྷཙཀྑུསྶ ཨཱཔཱཐཾ ནཱགཙྪནྟི, རཏྟིཾ ཁིཏྟཱ སརཱ ཝིཡ ཧོནྟི། ཡེ པན ཀཏཀལྱཱཎཱ ཝེནེཡྻཔུགྒལཱ, ཏེ ཨེཝསྶ དཱུརེཔི ཋིཏཱ ཨཱཔཱཐཾ ཨཱགཙྪནྟི, སོ ཨགྒི ཝིཡ ཧིམཝནྟཔབྦཏོ ཝིཡ ཙ། ཝུཏྟམྤི ཙེཏཾ –

    Sele yathā pabbatamuddhaniṭṭhitoti selamaye ekagghane pabbatamuddhani yathā ṭhitova. Na hi tassa ṭhitassa dassanatthaṃ gīvukkhipanapasāraṇādikiccaṃ atthi. Tathūpamanti tappaṭibhāgaṃ selapabbatūpamaṃ. Ayaṃ panettha saṅkhepattho – yathā selapabbatamuddhani ṭhitova cakkhumā puriso samantato janataṃ passeyya, tathā tvampi, sumedha, sundarapañña-sabbaññutaññāṇena samantacakkhu bhagavā dhammamayaṃ pāsādamāruyha sayaṃ apetasoko sokāvatiṇṇaṃ jātijarābhibhūtaṃ janataṃ avekkhassu upadhāraya upaparikkha. Ayaṃ panettha adhippāyo – yathā hi pabbatapāde samantā mahantaṃ khettaṃ katvā tattha kedārapāḷīsu kuṭikāyo katvā rattiṃ aggiṃ jāleyyuṃ. Caturaṅgasamannāgatañca andhakāraṃ assa, atha tassa pabbatassa matthake ṭhatvā cakkhumato purisassa bhūmiṃ olokayato neva khettaṃ, na kedārapāḷiyo, na kuṭiyo, na tattha sayitamanussā paññāyeyyuṃ. Kuṭikāsu pana aggijālāmattakameva paññāyeyya. Evaṃ dhammapāsādaṃ āruyha sattanikāyaṃ olokayato tathāgatassa, ye te akatakalyāṇā sattā, te ekavihāre dakkhiṇajāṇupasse nisinnāpi buddhacakkhussa āpāthaṃ nāgacchanti, rattiṃ khittā sarā viya honti. Ye pana katakalyāṇā veneyyapuggalā, te evassa dūrepi ṭhitā āpāthaṃ āgacchanti, so aggi viya himavantapabbato viya ca. Vuttampi cetaṃ –

    ‘‘དཱུརེ སནྟོ པཀཱསེནྟི, ཧིམཝནྟོཝ པབྦཏོ།

    ‘‘Dūre santo pakāsenti, himavantova pabbato;

    ཨསནྟེཏྠ ན དིསྶནྟི, རཏྟིཾ ཁིཏྟཱ ཡཐཱ སརཱ’’ཏི༎ (དྷ॰ པ॰ ༣༠༤)།

    Asantettha na dissanti, rattiṃ khittā yathā sarā’’ti. (dha. pa. 304);

    ཨུཊྛེཧཱིཏི བྷགཝཏོ དྷམྨདེསནཏྠཾ ཙཱརིཀཙརཎཾ ཡཱཙནྟོ བྷཎཏི། ཝཱིརཱཏིཨཱདཱིསུ བྷགཝཱ ཝཱིརིཡཝནྟཏཱཡ ཝཱིརོ། དེཝཔུཏྟམཙྩུཀིལེསམཱརཱནཾ ཝིཛིཏཏྟཱ ཝིཛིཏསངྒཱམོ། ཛཱཏིཀནྟཱརཱདིནིཏྠརཎཏྠཱཡ ཝེནེཡྻསཏྠཝཱཧནསམཏྠཏཱཡ སཏྠཝཱཧོ། ཀཱམཙྪནྡཨིཎསྶ ཨབྷཱཝཏོ ཨཎཎོཏི ཝེདིཏབྦོ།

    Uṭṭhehīti bhagavato dhammadesanatthaṃ cārikacaraṇaṃ yācanto bhaṇati. Vīrātiādīsu bhagavā vīriyavantatāya vīro. Devaputtamaccukilesamārānaṃ vijitattā vijitasaṅgāmo. Jātikantārādinittharaṇatthāya veneyyasatthavāhanasamatthatāya satthavāho. Kāmacchandaiṇassa abhāvato aṇaṇoti veditabbo.

    ༢༨༣. ཨཛ྄ཛྷེསནནྟི ཡཱཙནཾ། བུདྡྷཙཀྑུནཱཏི ཨིནྡྲིཡཔརོཔརིཡཏྟཉཱཎེན ཙ ཨཱསཡཱནུསཡཉཱཎེན ཙ། ཨིམེསཉྷི དྭིནྣཾ ཉཱཎཱནཾ བུདྡྷཙཀྑཱུཏི ནཱམཾ, སབྦཉྙུཏཉྙཱཎསྶ སམནྟཙཀྑཱུཏི, ཏིཎྞཾ མགྒཉཱཎཱནཾ དྷམྨཙཀྑཱུཏི། ཨཔྤརཛཀྑེཏིཨཱདཱིསུ ཡེསཾ ཝུཏྟནཡེནེཝ པཉྙཱཙཀྑུམྷི རཱགཱདིརཛཾ ཨཔྤཾ, ཏེ ཨཔྤརཛཀྑཱ། ཡེསཾ ཏཾ མཧནྟཾ, ཏེ མཧཱརཛཀྑཱ། ཡེསཾ སདྡྷཱདཱིནི ཨིནྡྲིཡཱནི ཏིཀྑཱནི, ཏེ ཏིཀྑིནྡྲིཡཱ། ཡེསཾ ཏཱནི མུདཱུནི, ཏེ མུདིནྡྲིཡཱ། ཡེསཾ ཏེཡེཝ སདྡྷཱདཡོ ཨཱཀཱརཱ སུནྡརཱ, ཏེ སྭཱཀཱརཱ། ཡེ ཀཐིཏཀཱརཎཾ སལླཀྑེནྟི, སུཁེན སཀྐཱ ཧོནྟི ཝིཉྙཱཔེཏུཾ, ཏེ སུཝིཉྙཱཔཡཱ། ཡེ པརལོཀཉྩེཝ ཝཛྫཉྩ བྷཡཏོ པསྶནྟི, ཏེ པརལོཀཝཛྫབྷཡདསྶཱཝིནོ ནཱམ།

    283.Ajjhesananti yācanaṃ. Buddhacakkhunāti indriyaparopariyattañāṇena ca āsayānusayañāṇena ca. Imesañhi dvinnaṃ ñāṇānaṃ buddhacakkhūti nāmaṃ, sabbaññutaññāṇassa samantacakkhūti, tiṇṇaṃ maggañāṇānaṃ dhammacakkhūti. Apparajakkhetiādīsu yesaṃ vuttanayeneva paññācakkhumhi rāgādirajaṃ appaṃ, te apparajakkhā. Yesaṃ taṃ mahantaṃ, te mahārajakkhā. Yesaṃ saddhādīni indriyāni tikkhāni, te tikkhindriyā. Yesaṃ tāni mudūni, te mudindriyā. Yesaṃ teyeva saddhādayo ākārā sundarā, te svākārā. Ye kathitakāraṇaṃ sallakkhenti, sukhena sakkā honti viññāpetuṃ, te suviññāpayā. Ye paralokañceva vajjañca bhayato passanti, te paralokavajjabhayadassāvino nāma.

    ཨཡཾ པནེཏྠ པཱལི༹ – ‘‘སདྡྷོ པུགྒལོ ཨཔྤརཛཀྑོ, ཨསྶདྡྷོ པུགྒལོ མཧཱརཛཀྑོ། ཨཱརདྡྷཝཱིརིཡོ…, ཀུསིཏོ…, ཨུཔཊྛིཏསྶཏི…, མུཊྛསྶཏི…, སམཱཧིཏོ…, ཨསམཱཧིཏོ…, པཉྙཝཱ…, དུཔྤཉྙོ པུགྒལོ མཧཱརཛཀྑོ། ཏཐཱ སདྡྷོ པུགྒལོ ཏིཀྑིནྡྲིཡོ…པེ॰… པཉྙཝཱ པུགྒལོ པརལོཀཝཛྫབྷཡདསྶཱཝཱི, དུཔྤཉྙོ པུགྒལོ ན པརལོཀཝཛྫབྷཡདསྶཱཝཱི། ལོཀོཏི ཁནྡྷལོཀོ, ཨཱཡཏནལོཀོ, དྷཱཏུལོཀོ, སམྤཏྟིབྷཝལོཀོ, སམྤཏྟིསམྦྷཝལོཀོ, ཝིཔཏྟིབྷཝལོཀོ, ཝིཔཏྟིསམྦྷཝལོཀོ, ཨེཀོ ལོཀོ སབྦེ སཏྟཱ ཨཱཧཱརཊྛིཏིཀཱ། དྭེ ལོཀཱ – ནཱམཉྩ རཱུཔཉྩ། ཏཡོ ལོཀཱ – ཏིསྶོ ཝེདནཱ། ཙཏྟཱརོ ལོཀཱ – ཙཏྟཱརོ ཨཱཧཱརཱ། པཉྩ ལོཀཱ – པཉྩུཔཱདཱནཀྑནྡྷཱ། ཚ ལོཀཱ – ཚ ཨཛ྄ཛྷཏྟིཀཱནི ཨཱཡཏནཱནི། སཏྟ ལོཀཱ – སཏྟ ཝིཉྙཱཎཊྛིཏིཡོ། ཨཊྛ ལོཀཱ – ཨཊྛ ལོཀདྷམྨཱ། ནཝ ལོཀཱ – ནཝ སཏྟཱཝཱསཱ། དས ལོཀཱ – དསཱཡཏནཱནི། དྭཱདས ལོཀཱ – དྭཱདསཱཡཏནཱནི། ཨཊྛཱརས ལོཀཱ – ཨཊྛཱརསྶ དྷཱཏུཡོ། ཝཛྫནྟི སབྦེ ཀིལེསཱ ཝཛྫཱ, སབྦེ དུཙྩརིཏཱ ཝཛྫཱ, སབྦེ ཨབྷིསངྑཱརཱ ཝཛྫཱ, སབྦེ བྷཝགཱམིཀམྨཱ ཝཛྫཱ། ཨིཏི ཨིམསྨིཉྩ ལོཀེ ཨིམསྨིཉྩ ཝཛྫེ ཏིབྦཱ བྷཡསཉྙཱ པཙྩུཔཊྛིཏཱ ཧོཏི, སེཡྻཐཱཔི ཨུཀྑིཏྟཱསིཀེ ཝདྷཀེ། ཨིམེཧི པཉྙཱསཱཡ ཨཱཀཱརེཧི ཨིམཱནི པཉྩིནྡྲིཡཱནི ཛཱནཱཏི པསྶཏི ཨཉྙཱསི པཊིཝིཛ྄ཛྷི། ཨིདཾ ཏཐཱགཏསྶ ཨིནྡྲིཡཔརོཔརིཡཏྟེ ཉཱཎ’’ནྟི (པཊི॰ མ॰ ༡.༡༡༢)།

    Ayaṃ panettha pāḷi – ‘‘saddho puggalo apparajakkho, assaddho puggalo mahārajakkho. Āraddhavīriyo…, kusito…, upaṭṭhitassati…, muṭṭhassati…, samāhito…, asamāhito…, paññavā…, duppañño puggalo mahārajakkho. Tathā saddho puggalo tikkhindriyo…pe… paññavā puggalo paralokavajjabhayadassāvī, duppañño puggalo na paralokavajjabhayadassāvī. Lokoti khandhaloko, āyatanaloko, dhātuloko, sampattibhavaloko, sampattisambhavaloko, vipattibhavaloko, vipattisambhavaloko, eko loko sabbe sattā āhāraṭṭhitikā. Dve lokā – nāmañca rūpañca. Tayo lokā – tisso vedanā. Cattāro lokā – cattāro āhārā. Pañca lokā – pañcupādānakkhandhā. Cha lokā – cha ajjhattikāni āyatanāni. Satta lokā – satta viññāṇaṭṭhitiyo. Aṭṭha lokā – aṭṭha lokadhammā. Nava lokā – nava sattāvāsā. Dasa lokā – dasāyatanāni. Dvādasa lokā – dvādasāyatanāni. Aṭṭhārasa lokā – aṭṭhārassa dhātuyo. Vajjanti sabbe kilesā vajjā, sabbe duccaritā vajjā, sabbe abhisaṅkhārā vajjā, sabbe bhavagāmikammā vajjā. Iti imasmiñca loke imasmiñca vajje tibbā bhayasaññā paccupaṭṭhitā hoti, seyyathāpi ukkhittāsike vadhake. Imehi paññāsāya ākārehi imāni pañcindriyāni jānāti passati aññāsi paṭivijjhi. Idaṃ tathāgatassa indriyaparopariyatte ñāṇa’’nti (paṭi. ma. 1.112).

    ཨུཔྤལིནིཡནྟི ཨུཔྤལཝནེ། ཨིཏརེསུཔི ཨེསེཝ ནཡོ། ཨནྟོནིམུགྒཔོསཱིནཱིཏི ཡཱནི ཨནྟོ ནིམུགྒཱནེཝ པོསིཡནྟི། ཨུདཀཾ ཨཙྩུགྒམྨ ཋིཏཱནཱིཏི ཨུདཀཾ ཨཏིཀྐམིཏྭཱ ཋིཏཱནི། ཏཏྠ ཡཱནི ཨཙྩུགྒམྨ ཋིཏཱནི, ཏཱནི སཱུརིཡརསྨིསམྥསྶཾ ཨཱགམཡམཱནཱནི ཋིཏཱནི ཨཛྫ པུཔྥནཀཱནི། ཡཱནི སམོདཀཾ ཋིཏཱནི, ཏཱནི སྭེ པུཔྥནཀཱནི། ཡཱནི ཨུདཀཱནུགྒཏཱནི ཨནྟོནིམུགྒཔོསཱིནི, ཏཱནི ཏཏིཡདིཝསེ པུཔྥནཀཱནི། ཨུདཀཱ པན ཨནུགྒཏཱནི ཨཉྙཱནིཔི སརོགཨུཔྤལཱདཱིནི ནཱམ ཨཏྠི, ཡཱནི ནེཝ པུཔྥིསྶནྟི, མཙྪཀཙྪཔབྷཀྑཱནེཝ བྷཝིསྶནྟི། ཏཱནི པཱལི༹ཾ ནཱརུལ༹ྷཱནི། ཨཱཧརིཏྭཱ པན དཱིཔེཏབྦཱནཱིཏི དཱིཔིཏཱནི།

    Uppaliniyanti uppalavane. Itaresupi eseva nayo. Antonimuggaposīnīti yāni anto nimuggāneva posiyanti. Udakaṃ accuggamma ṭhitānīti udakaṃ atikkamitvā ṭhitāni. Tattha yāni accuggamma ṭhitāni, tāni sūriyarasmisamphassaṃ āgamayamānāni ṭhitāni ajja pupphanakāni. Yāni samodakaṃ ṭhitāni, tāni sve pupphanakāni. Yāni udakānuggatāni antonimuggaposīni, tāni tatiyadivase pupphanakāni. Udakā pana anuggatāni aññānipi sarogauppalādīni nāma atthi, yāni neva pupphissanti, macchakacchapabhakkhāneva bhavissanti. Tāni pāḷiṃ nāruḷhāni. Āharitvā pana dīpetabbānīti dīpitāni.

    ཡཐེཝ ཧི ཏཱནི ཙཏུབྦིདྷཱནི པུཔྥཱནི, ཨེཝམེཝ ཨུགྒྷཊིཏཉྙཱུ ཝིཔཉྩིཏཉྙཱུ ནེཡྻོ པདཔརམོཏི ཙཏྟཱརོ པུགྒལཱ། ཏཏྠ ‘‘ཡསྶ པུགྒལསྶ སཧ ཨུདཱཧཊཝེལཱཡ དྷམྨཱབྷིསམཡོ ཧོཏི, ཨཡཾ ཝུཙྩཏི པུགྒལོ ཨུགྒྷཊིཏཉྙཱུ། ཡསྶ པུགྒལསྶ སཾཁིཏྟེན བྷཱསིཏསྶ ཝིཏྠཱརེན ཨཏྠེ ཝིབྷཛིཡམཱནེ དྷམྨཱབྷིསམཡོ ཧོཏི, ཨཡཾ ཝུཙྩཏི པུགྒལོ ཝིཔཉྩིཏཉྙཱུ། ཡསྶ པུགྒལསྶ ཨུདྡེསཏོ པརིཔུཙྪཏོ ཡོནིསོ མནསིཀརོཏོ ཀལྱཱཎམིཏྟེ སེཝཏོ བྷཛཏོ པཡིརུཔཱསཏོ ཨནུཔུབྦེན དྷམྨཱབྷིསམཡོ ཧོཏི, ཨཡཾ ཝུཙྩཏི པུགྒལོ ནེཡྻོ། ཡསྶ པུགྒལསྶ བཧུམྤི སུཎཏོ བཧུམྤི བྷཎཏོ བཧུམྤི དྷཱརཡཏོ བཧུམྤི ཝཱཙཡཏོ ན ཏཱཡ ཛཱཏིཡཱ དྷམྨཱབྷིསམཡོ ཧོཏི, ཨཡཾ ཝུཙྩཏི པུགྒལོ པདཔརམོ’’ (པུ॰ པ॰ ༡༥༡)། ཏཏྠ བྷགཝཱ ཨུཔྤལཝནཱདིསདིསཾ དསསཧསྶིལོཀདྷཱཏུཾ ཨོལོཀེནྟོ ‘‘ཨཛྫ པུཔྥནཀཱནི ཝིཡ ཨུགྒྷཊིཏཉྙཱུ, སྭེ པུཔྥནཀཱནི ཝིཡ ཝིཔཉྩིཏཉྙཱུ, ཏཏིཡདིཝསེ པུཔྥནཀཱནི ཝིཡ ནེཡྻོ, མཙྪཀཙྪཔབྷཀྑཱནི པུཔྥཱནི ཝིཡ པདཔརམོ’’ཏི ཨདྡས། པསྶནྟོ ཙ ‘‘ཨེཏྟཀཱ ཨཔྤརཛཀྑཱ, ཨེཏྟཀཱ མཧཱརཛཀྑཱ, ཏཏྲཱཔི ཨེཏྟཀཱ ཨུགྒྷཊིཏཉྙཱུ’’ཏི ཨེཝཾ སབྦཱཀཱརཏོཝ ཨདྡས།

    Yatheva hi tāni catubbidhāni pupphāni, evameva ugghaṭitaññū vipañcitaññū neyyo padaparamoti cattāro puggalā. Tattha ‘‘yassa puggalassa saha udāhaṭavelāya dhammābhisamayo hoti, ayaṃ vuccati puggalo ugghaṭitaññū. Yassa puggalassa saṃkhittena bhāsitassa vitthārena atthe vibhajiyamāne dhammābhisamayo hoti, ayaṃ vuccati puggalo vipañcitaññū. Yassa puggalassa uddesato paripucchato yoniso manasikaroto kalyāṇamitte sevato bhajato payirupāsato anupubbena dhammābhisamayo hoti, ayaṃ vuccati puggalo neyyo. Yassa puggalassa bahumpi suṇato bahumpi bhaṇato bahumpi dhārayato bahumpi vācayato na tāya jātiyā dhammābhisamayo hoti, ayaṃ vuccati puggalo padaparamo’’ (pu. pa. 151). Tattha bhagavā uppalavanādisadisaṃ dasasahassilokadhātuṃ olokento ‘‘ajja pupphanakāni viya ugghaṭitaññū, sve pupphanakāni viya vipañcitaññū, tatiyadivase pupphanakāni viya neyyo, macchakacchapabhakkhāni pupphāni viya padaparamo’’ti addasa. Passanto ca ‘‘ettakā apparajakkhā, ettakā mahārajakkhā, tatrāpi ettakā ugghaṭitaññū’’ti evaṃ sabbākāratova addasa.

    ཏཏྠ ཏིཎྞཾ པུགྒལཱནཾ ཨིམསྨིཾཡེཝ ཨཏྟབྷཱཝེ བྷགཝཏོ དྷམྨདེསནཱ ཨཏྠཾ སཱདྷེཏི། པདཔརམཱནཾ ཨནཱགཏེ ཝཱསནཏྠཱཡ ཧོཏི། ཨཐ བྷགཝཱ ཨིམེསཾ ཙཏུནྣཾ པུགྒལཱནཾ ཨཏྠཱཝཧཾ དྷམྨདེསནཾ ཝིདིཏྭཱ དེསེཏུཀམྱཏཾ ཨུཔྤཱདེཏྭཱ པུན སབྦེཔི ཏཱིསུ བྷཝེསུ སཏྟེ བྷབྦཱབྷབྦཝསེན དྭེ ཀོཊྛཱསེ ཨཀཱསི། ཡེ སནྡྷཱཡ ཝུཏྟཾ – ‘‘ཀཏམེ ཏེ སཏྟཱ ཨབྷབྦཱ, ཡེ ཏེ སཏྟཱ ཀམྨཱཝརཎེན སམནྣཱགཏཱ ཀིལེསཱཝརཎེན སམནྣཱགཏཱ ཝིཔཱཀཱཝརཎེན སམནྣཱགཏཱ ཨསྶདྡྷཱ ཨཙྪནྡིཀཱ དུཔྤཉྙཱ ཨབྷབྦཱ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟཾ, ཨིམེ ཏེ སཏྟཱ ཨབྷབྦཱ། ཀཏམེ ཏེ སཏྟཱ བྷབྦཱ? ཡེ ཏེ སཏྟཱ ན ཀམྨཱཝརཎེན…པེ॰… ཨིམེ ཏེ སཏྟཱ བྷབྦཱ’’ཏི (ཝིབྷ॰ ༨༢༧; པཊི॰ མ॰ ༡.༡༡༥)། ཏཏྠ སབྦེཔི ཨབྷབྦཔུགྒལེ པཧཱཡ བྷབྦཔུགྒལེཡེཝ ཉཱཎེན པརིགྒཧེཏྭཱ ‘‘ཨེཏྟཀཱ རཱགཙརིཏཱ, ཨེཏྟཀཱ དོསམོཧཙརིཏཱ ཝིཏཀྐསདྡྷཱབུདྡྷིཙརིཏཱ’’ཏི ཚ ཀོཊྛཱསེ ཨཀཱསི; ཨེཝཾ ཀཏྭཱ དྷམྨཾ དེསིསྶཱམཱིཏི ཙིནྟེསི།

    Tattha tiṇṇaṃ puggalānaṃ imasmiṃyeva attabhāve bhagavato dhammadesanā atthaṃ sādheti. Padaparamānaṃ anāgate vāsanatthāya hoti. Atha bhagavā imesaṃ catunnaṃ puggalānaṃ atthāvahaṃ dhammadesanaṃ viditvā desetukamyataṃ uppādetvā puna sabbepi tīsu bhavesu satte bhabbābhabbavasena dve koṭṭhāse akāsi. Ye sandhāya vuttaṃ – ‘‘katame te sattā abhabbā, ye te sattā kammāvaraṇena samannāgatā kilesāvaraṇena samannāgatā vipākāvaraṇena samannāgatā assaddhā acchandikā duppaññā abhabbā niyāmaṃ okkamituṃ kusalesu dhammesu sammattaṃ, ime te sattā abhabbā. Katame te sattā bhabbā? Ye te sattā na kammāvaraṇena…pe… ime te sattā bhabbā’’ti (vibha. 827; paṭi. ma. 1.115). Tattha sabbepi abhabbapuggale pahāya bhabbapuggaleyeva ñāṇena pariggahetvā ‘‘ettakā rāgacaritā, ettakā dosamohacaritā vitakkasaddhābuddhicaritā’’ti cha koṭṭhāse akāsi; evaṃ katvā dhammaṃ desissāmīti cintesi.

    པཙྩབྷཱསིནྟི པཏིཨབྷཱསིཾ། ཨཔཱརུཏཱཏི ཝིཝཊཱ། ཨམཏསྶ དྭཱརཱཏི ཨརིཡམགྒོ། སོ ཧི ཨམཏསངྑཱཏསྶ ནིབྦཱནསྶ དྭཱརཾ, སོ མཡཱ ཝིཝརིཏྭཱ ཋཔིཏོཏི དསྶེཏི། པམུཉྩནྟུ སདྡྷནྟི སབྦེ ཨཏྟནོ སདྡྷཾ པམུཉྩནྟུ, ཝིསྶཛྫེནྟུ། པཙྪིམཔདདྭཡེ ཨཡམཏྠོ, ཨཧཉྷི ཨཏྟནོ པགུཎཾ སུཔྤཝཏྟིཏམྤི ཨིམཾ པཎཱིཏཾ ཨུཏྟམཾ དྷམྨཾ ཀཱཡཝཱཙཱཀིལམཐསཉྙཱི ཧུཏྭཱ ན བྷཱསིཾ ། ཨིདཱནི པན སབྦོ ཛནོ སདྡྷཱབྷཱཛནཾ ཨུཔནེཏུ, པཱུརེསྶཱམི ནེསཾ སངྐཔྤནྟི།

    Paccabhāsinti patiabhāsiṃ. Apārutāti vivaṭā. Amatassa dvārāti ariyamaggo. So hi amatasaṅkhātassa nibbānassa dvāraṃ, so mayā vivaritvā ṭhapitoti dasseti. Pamuñcantu saddhanti sabbe attano saddhaṃ pamuñcantu, vissajjentu. Pacchimapadadvaye ayamattho, ahañhi attano paguṇaṃ suppavattitampi imaṃ paṇītaṃ uttamaṃ dhammaṃ kāyavācākilamathasaññī hutvā na bhāsiṃ . Idāni pana sabbo jano saddhābhājanaṃ upanetu, pūressāmi nesaṃ saṅkappanti.

    ༢༨༤. ཏསྶ མཡ྄ཧཾ, བྷིཀྑཝེ, ཨེཏདཧོསཱིཏི ཨེཏཾ ཨཧོསི – ཀསྶ ནུ ཁོ ཨཧཾ པཋམཾ དྷམྨཾ དེསེཡྻནྟི ཨཡཾ དྷམྨདེསནཱཔཊིསཾཡུཏྟོ ཝིཏཀྐོ ཨུདཔཱདཱིཏི ཨཏྠོ། ཀདཱ པནེས ཨུདཔཱདཱིཏི? བུདྡྷབྷཱུཏསྶ ཨཊྛམེ སཏྟཱཧེ།

    284.Tassa mayhaṃ, bhikkhave, etadahosīti etaṃ ahosi – kassa nu kho ahaṃ paṭhamaṃ dhammaṃ deseyyanti ayaṃ dhammadesanāpaṭisaṃyutto vitakko udapādīti attho. Kadā panesa udapādīti? Buddhabhūtassa aṭṭhame sattāhe.

    ཏཏྲཱཡཾ ཨནུཔུབྦིཀཐཱ – བོདྷིསཏྟོ ཀིར མཧཱབྷིནིཀྑམནདིཝསེ ཝིཝཊཾ ཨིཏྠཱགཱརཾ དིསྭཱ སཾཝིགྒཧདཡོ, ‘‘ཀཎྜཀཾ ཨཱཧརཱ’’ཏི ཚནྣཾ ཨཱམནྟེཏྭཱ ཚནྣསཧཱཡོ ཨསྶརཱཛཔིཊྛིགཏོ ནགརཏོ ནིཀྑམིཏྭཱ ཀཎྜཀནིཝཏྟནཙེཏིཡཊྛཱནཾ ནཱམ དསྶེཏྭཱ ཏཱིཎི རཛྫཱནི ཨཏིཀྐམྨ ཨནོམཱནདཱིཏཱིརེ པབྦཛིཏྭཱ ཨནུཔུབྦེན ཙཱརིཀཾ ཙརམཱནོ རཱཛགཧེ པིཎྜཱཡ ཙརིཏྭཱ པཎྜཝཔབྦཏེ ནིསིནྣོ མགདྷིསྶརེན རཉྙཱ ནཱམགོཏྟཾ པུཙྪིཏྭཱ, ‘‘ཨིམཾ རཛྫཾ སམྤཊིཙྪཱཧཱི’’ཏི ཝུཏྟོ, ‘‘ཨལཾ མཧཱརཱཛ, ན མཡ྄ཧཾ རཛྫེན ཨཏྠོ, ཨཧཾ རཛྫཾ པཧཱཡ ལོཀཧིཏཏྠཱཡ པདྷཱནཾ ཨནུཡུཉྫིཏྭཱ ལོཀེ ཝིཝཊཙྪདོ བྷཝིསྶཱམཱིཏི ནིཀྑནྟོ’’ཏི ཝཏྭཱ, ‘‘ཏེན ཧི བུདྡྷོ ཧུཏྭཱ པཋམཾ མཡ྄ཧཾ ཝིཛིཏཾ ཨོསརེཡྻཱསཱི’’ཏི པཊིཉྙཾ གཧིཏོ ཀཱལཱམཉྩ ཨུདཀཉྩ ཨུཔསངྐམིཏྭཱ ཏེསཾ དྷམྨདེསནཱཡ སཱརཾ ཨཝིནྡནྟོ ཏཏོ པཀྐམིཏྭཱ ཨུརུཝེལཱ༹ཡ ཚབྦསྶཱནི དུཀྐརཀཱརིཀཾ ཀརོནྟོཔི ཨམཏཾ པཊིཝིཛ྄ཛྷིཏུཾ ཨསཀྐོནྟོ ཨོལཱ༹རིཀཱཧཱརཔཊིསེཝནེན ཀཱཡཾ སནྟཔྤེསི།

    Tatrāyaṃ anupubbikathā – bodhisatto kira mahābhinikkhamanadivase vivaṭaṃ itthāgāraṃ disvā saṃviggahadayo, ‘‘kaṇḍakaṃ āharā’’ti channaṃ āmantetvā channasahāyo assarājapiṭṭhigato nagarato nikkhamitvā kaṇḍakanivattanacetiyaṭṭhānaṃ nāma dassetvā tīṇi rajjāni atikkamma anomānadītīre pabbajitvā anupubbena cārikaṃ caramāno rājagahe piṇḍāya caritvā paṇḍavapabbate nisinno magadhissarena raññā nāmagottaṃ pucchitvā, ‘‘imaṃ rajjaṃ sampaṭicchāhī’’ti vutto, ‘‘alaṃ mahārāja, na mayhaṃ rajjena attho, ahaṃ rajjaṃ pahāya lokahitatthāya padhānaṃ anuyuñjitvā loke vivaṭacchado bhavissāmīti nikkhanto’’ti vatvā, ‘‘tena hi buddho hutvā paṭhamaṃ mayhaṃ vijitaṃ osareyyāsī’’ti paṭiññaṃ gahito kālāmañca udakañca upasaṅkamitvā tesaṃ dhammadesanāya sāraṃ avindanto tato pakkamitvā uruveḷāya chabbassāni dukkarakārikaṃ karontopi amataṃ paṭivijjhituṃ asakkonto oḷārikāhārapaṭisevanena kāyaṃ santappesi.

    ཏདཱ ཙ ཨུརུཝེལགཱམེ སུཛཱཏཱ ནཱམ ཀུཊུམྦིཡདྷཱིཏཱ ཨེཀསྨིཾ ནིགྲོདྷརུཀྑེ པཏྠནམཀཱསི – ‘‘སཙཱཧཾ སམཱནཛཱཏིཀཾ ཀུལགྷརཾ གནྟྭཱ པཋམགབྦྷེ པུཏྟཾ ལབྷིསྶཱམི, བལིཀམྨཾ ཀརིསྶཱམཱི’’ཏི། ཏསྶཱ སཱ པཏྠནཱ སམིཛ྄ཛྷི། སཱ ཝིསཱཁཔུཎྞམདིཝསེ པཱཏོཝ བལིཀམྨཾ ཀརིསྶཱམཱིཏི རཏྟིཡཱ པཙྩཱུསསམཡེ ཨེཝ པཱཡསཾ པཊིཡཱདེསི། ཏསྨིཾ པཱཡསེ པཙྩམཱནེ མཧནྟམཧནྟཱ པུཔྥུལཱ༹ ཨུཊྛཧིཏྭཱ དཀྑིཎཱཝཊྚཱ ཧུཏྭཱ སཉྩརནྟི། ཨེཀཕུསིཏམྤི བཧི ན གཙྪཏི། མཧཱབྲཧྨཱ ཚཏྟཾ དྷཱརེསི། ཙཏྟཱརོ ལོཀཔཱལཱ ཁགྒཧཏྠཱ ཨཱརཀྑཾ གཎྷིཾསུ། སཀྐོ ཨལཱཏཱནི སམཱནེནྟོ ཨགྒིཾ ཛཱལེསི། དེཝཏཱ ཙཏཱུསུ དཱིཔེསུ ཨོཛཾ སཾཧརིཏྭཱ ཏཏྠ པཀྑིཔིཾསུ། བོདྷིསཏྟོ བྷིཀྑཱཙཱརཀཱལཾ ཨཱགམཡམཱནོ པཱཏོཝ གནྟྭཱ རུཀྑམཱུལེ ནིསཱིདི། རུཀྑམཱུལེ སོདྷནཏྠཱཡ གཏཱ དྷཱཏཱི ཨཱགནྟྭཱ སུཛཱཏཱཡ ཨཱརོཙེསི – ‘‘དེཝཏཱ རུཀྑམཱུལེ ནིསིནྣཱ’’ཏི། སུཛཱཏཱ, སབྦཾ པསཱདྷནཾ པསཱདྷེཏྭཱ སཏསཧསྶགྒྷནིཀེ སུཝཎྞཐཱལེ པཱཡསཾ ཝཌྜྷེཏྭཱ ཨཔརཱཡ སུཝཎྞཔཱཏིཡཱ པིདཧིཏྭཱ ཨུཀྑིཔིཏྭཱ གཏཱ མཧཱཔུརིསཾ དིསྭཱ སཧེཝ པཱཏིཡཱ ཧཏྠེ ཋཔེཏྭཱ ཝནྡིཏྭཱ ‘‘ཡཐཱ མཡ྄ཧཾ མནོརཐོ ནིཔྥནྣོ, ཨེཝཾ ཏུམྷཱཀམྤི ནིཔྥཛྫཏཱུ’’ཏི ཝཏྭཱ པཀྐཱམི།

    Tadā ca uruvelagāme sujātā nāma kuṭumbiyadhītā ekasmiṃ nigrodharukkhe patthanamakāsi – ‘‘sacāhaṃ samānajātikaṃ kulagharaṃ gantvā paṭhamagabbhe puttaṃ labhissāmi, balikammaṃ karissāmī’’ti. Tassā sā patthanā samijjhi. Sā visākhapuṇṇamadivase pātova balikammaṃ karissāmīti rattiyā paccūsasamaye eva pāyasaṃ paṭiyādesi. Tasmiṃ pāyase paccamāne mahantamahantā pupphuḷā uṭṭhahitvā dakkhiṇāvaṭṭā hutvā sañcaranti. Ekaphusitampi bahi na gacchati. Mahābrahmā chattaṃ dhāresi. Cattāro lokapālā khaggahatthā ārakkhaṃ gaṇhiṃsu. Sakko alātāni samānento aggiṃ jālesi. Devatā catūsu dīpesu ojaṃ saṃharitvā tattha pakkhipiṃsu. Bodhisatto bhikkhācārakālaṃ āgamayamāno pātova gantvā rukkhamūle nisīdi. Rukkhamūle sodhanatthāya gatā dhātī āgantvā sujātāya ārocesi – ‘‘devatā rukkhamūle nisinnā’’ti. Sujātā, sabbaṃ pasādhanaṃ pasādhetvā satasahassagghanike suvaṇṇathāle pāyasaṃ vaḍḍhetvā aparāya suvaṇṇapātiyā pidahitvā ukkhipitvā gatā mahāpurisaṃ disvā saheva pātiyā hatthe ṭhapetvā vanditvā ‘‘yathā mayhaṃ manoratho nipphanno, evaṃ tumhākampi nipphajjatū’’ti vatvā pakkāmi.

    བོདྷིསཏྟོ ནེརཉྫརཱཡ ཏཱིརཾ གནྟྭཱ སུཝཎྞཐཱལཾ ཏཱིརེ ཋཔེཏྭཱ ནྷཏྭཱ པཙྩུཏྟརིཏྭཱ ཨེཀཱུནཔཎྞཱསཔིཎྜེ ཀརོནྟོ པཱཡསཾ པརིབྷུཉྫིཏྭཱ ‘‘སཙཱཧཾ ཨཛྫ བུདྡྷོ བྷཝཱམི, ཐཱལཾ པཊིསོཏཾ གཙྪཏཱུ’’ཏི ཁིཔི། ཐཱལཾ པཊིསོཏཾ གནྟྭཱ ཐོཀཾ ཋཏྭཱ ཀཱལནཱགརཱཛསྶ བྷཝནཾ པཝིསིཏྭཱ ཏིཎྞཾ བུདྡྷཱནཾ ཐཱལཱནི ཨུཀྑིཔིཏྭཱ ཨཊྛཱསི།

    Bodhisatto nerañjarāya tīraṃ gantvā suvaṇṇathālaṃ tīre ṭhapetvā nhatvā paccuttaritvā ekūnapaṇṇāsapiṇḍe karonto pāyasaṃ paribhuñjitvā ‘‘sacāhaṃ ajja buddho bhavāmi, thālaṃ paṭisotaṃ gacchatū’’ti khipi. Thālaṃ paṭisotaṃ gantvā thokaṃ ṭhatvā kālanāgarājassa bhavanaṃ pavisitvā tiṇṇaṃ buddhānaṃ thālāni ukkhipitvā aṭṭhāsi.

    མཧཱསཏྟོ ཝནསཎྜེ དིཝཱཝིཧཱརཾ ཀཏྭཱ སཱཡནྷསམཡེ སོཏྟིཡེན དིནྣཱ ཨཊྛ ཏིཎམུཊྛིཡོ གཧེཏྭཱ བོདྷིམཎྜཾ ཨཱརུཡ྄ཧ དཀྑིཎདིསཱབྷཱགེ ཨཊྛཱསི། སོ པདེསོ པདུམིནིཔཏྟེ ཨུདཀབིནྡུ ཝིཡ ཨཀམྤིཏྠ། མཧཱསཏྟོ, ‘‘ཨཡཾ མམ གུཎཾ དྷཱརེཏུཾ ན སཀྐོཏཱི’’ཏི པཙྪིམདིསཱབྷཱགཾ ཨགམཱསི, སོཔི ཏཐེཝ ཨཀམྤིཏྠ། ཨུཏྟརདིསཱབྷཱགཾ ཨགམཱསི, སོཔི ཏཐེཝ ཨཀམྤིཏྠ། པུརཏྠིམདིསཱབྷཱགཾ ཨགམཱསི, ཏཏྠ པལླངྐཔྤམཱཎཾ ཋཱནཾ སུནིཁཱཏཨིནྡཁིལོ ཝིཡ ནིཙྩལམཧོསི། མཧཱསཏྟོ ‘‘ཨིདཾ ཋཱནཾ སབྦབུདྡྷཱནཾ ཀིལེསབྷཉྫནཝིདྡྷཾསནཊྛཱན’’ནྟི ཏཱནི ཏིཎཱནི ཨགྒེ གཧེཏྭཱ ཙཱལེསི། ཏཱནི ཙིཏྟཀཱརེན ཏཱུལིཀགྒེན པརིཙྪིནྣཱནི ཝིཡ ཨཧེསུཾ། བོདྷིསཏྟོ , ‘‘བོདྷིཾ ཨཔྤཏྭཱ ཨིམཾ པལླངྐཾ ན བྷིནྡིསྶཱམཱི’’ཏི ཙཏུརངྒཝཱིརིཡཾ ཨདྷིཊྛཧིཏྭཱ པལླངྐཾ ཨཱབྷུཛིཏྭཱ ནིསཱིདི།

    Mahāsatto vanasaṇḍe divāvihāraṃ katvā sāyanhasamaye sottiyena dinnā aṭṭha tiṇamuṭṭhiyo gahetvā bodhimaṇḍaṃ āruyha dakkhiṇadisābhāge aṭṭhāsi. So padeso paduminipatte udakabindu viya akampittha. Mahāsatto, ‘‘ayaṃ mama guṇaṃ dhāretuṃ na sakkotī’’ti pacchimadisābhāgaṃ agamāsi, sopi tatheva akampittha. Uttaradisābhāgaṃ agamāsi, sopi tatheva akampittha. Puratthimadisābhāgaṃ agamāsi, tattha pallaṅkappamāṇaṃ ṭhānaṃ sunikhātaindakhilo viya niccalamahosi. Mahāsatto ‘‘idaṃ ṭhānaṃ sabbabuddhānaṃ kilesabhañjanaviddhaṃsanaṭṭhāna’’nti tāni tiṇāni agge gahetvā cālesi. Tāni cittakārena tūlikaggena paricchinnāni viya ahesuṃ. Bodhisatto , ‘‘bodhiṃ appatvā imaṃ pallaṅkaṃ na bhindissāmī’’ti caturaṅgavīriyaṃ adhiṭṭhahitvā pallaṅkaṃ ābhujitvā nisīdi.

    ཏངྑཎཉྙེཝ མཱརོ བཱཧུསཧསྶཾ མཱཔེཏྭཱ དིཡཌྜྷཡོཛནསཏིཀཾ གིརིམེཁལཾ ནཱམ ཧཏྠིཾ ཨཱརུཡ྄ཧ ནཝཡོཛནཾ མཱརབལཾ གཧེཏྭཱ ཨདྡྷཀྑིཀེན ཨོལོཀཡམཱནོ པབྦཏོ ཝིཡ ཨཛ྄ཛྷོཏྠརནྟོ ཨུཔསངྐམི། མཧཱསཏྟོ, ‘‘མཡ྄ཧཾ དས པཱརམིཡོ པཱུརེནྟསྶ ཨཉྙོ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ སཀྑི ནཏྠི, ཝེསྶནྟརཏྟབྷཱཝེ པན མཡ྄ཧཾ སཏྟསུ ཝཱརེསུ མཧཱཔཐཝཱི སཀྑི ཨཧོསི; ཨིདཱནིཔི མེ ཨཡམེཝ ཨཙེཏནཱ ཀཊྛཀལིངྒརཱུཔམཱ མཧཱཔཐཝཱི སཀྑཱི’’ཏི ཧཏྠཾ པསཱརེཏི། མཧཱཔཐཝཱི ཏཱཝདེཝ ཨཡདཎྜེན པཧཏཾ ཀཾསཐཱལཾ ཝིཡ རཝསཏཾ རཝསཧསྶཾ མུཉྩམཱནཱ ཝིརཝིཏྭཱ པརིཝཏྟམཱནཱ མཱརབལཾ ཙཀྐཝཱལ༹མུཁཝཊྚིཡཾ མུཉྩནམཀཱསི། མཧཱསཏྟོ སཱུརིཡེ དྷརམཱནེཡེཝ མཱརབལཾ ཝིདྷམིཏྭཱ པཋམཡཱམེ པུབྦེནིཝཱསཉཱཎཾ, མཛ྄ཛྷིམཡཱམེ དིབྦཙཀྑུཾ ཝིསོདྷེཏྭཱ པཙྪིམཡཱམེ པཊིཙྩསམུཔྤཱདེ ཉཱཎཾ ཨོཏཱརེཏྭཱ ཝཊྚཝིཝཊྚཾ སམྨསིཏྭཱ ཨརུཎོདཡེ བུདྡྷོ ཧུཏྭཱ , ‘‘མཡཱ ཨནེཀཀཔྤཀོཊིསཏསཧསྶཾ ཨདྡྷཱནཾ ཨིམསྶ པལླངྐསྶ ཨཏྠཱཡ ཝཱཡཱམོ ཀཏོ’’ཏི སཏྟཱཧཾ ཨེཀཔལླངྐེན ནིསཱིདི། ཨཐེཀཙྩཱནཾ དེཝཏཱནཾ, ‘‘ཀིཾ ནུ ཁོ ཨཉྙེཔི བུདྡྷཏྟཀརཱ དྷམྨཱ ཨཏྠཱི’’ཏི ཀངྑཱ ཨུདཔཱདི།

    Taṅkhaṇaññeva māro bāhusahassaṃ māpetvā diyaḍḍhayojanasatikaṃ girimekhalaṃ nāma hatthiṃ āruyha navayojanaṃ mārabalaṃ gahetvā addhakkhikena olokayamāno pabbato viya ajjhottharanto upasaṅkami. Mahāsatto, ‘‘mayhaṃ dasa pāramiyo pūrentassa añño samaṇo vā brāhmaṇo vā devo vā māro vā brahmā vā sakkhi natthi, vessantarattabhāve pana mayhaṃ sattasu vāresu mahāpathavī sakkhi ahosi; idānipi me ayameva acetanā kaṭṭhakaliṅgarūpamā mahāpathavī sakkhī’’ti hatthaṃ pasāreti. Mahāpathavī tāvadeva ayadaṇḍena pahataṃ kaṃsathālaṃ viya ravasataṃ ravasahassaṃ muñcamānā viravitvā parivattamānā mārabalaṃ cakkavāḷamukhavaṭṭiyaṃ muñcanamakāsi. Mahāsatto sūriye dharamāneyeva mārabalaṃ vidhamitvā paṭhamayāme pubbenivāsañāṇaṃ, majjhimayāme dibbacakkhuṃ visodhetvā pacchimayāme paṭiccasamuppāde ñāṇaṃ otāretvā vaṭṭavivaṭṭaṃ sammasitvā aruṇodaye buddho hutvā , ‘‘mayā anekakappakoṭisatasahassaṃ addhānaṃ imassa pallaṅkassa atthāya vāyāmo kato’’ti sattāhaṃ ekapallaṅkena nisīdi. Athekaccānaṃ devatānaṃ, ‘‘kiṃ nu kho aññepi buddhattakarā dhammā atthī’’ti kaṅkhā udapādi.

    ཨཐ བྷགཝཱ ཨཊྛམེ དིཝསེ སམཱཔཏྟིཏོ ཝུཊྛཱཡ དེཝཏཱནཾ ཀངྑཾ ཉཏྭཱ ཀངྑཱཝིདྷམནཏྠཾ ཨཱཀཱསེ ཨུཔྤཏིཏྭཱ ཡམཀཔཱཊིཧཱརིཡཾ དསྶེཏྭཱ ཏཱསཾ ཀངྑཾ ཝིདྷམིཏྭཱ པལླངྐཏོ ཨཱིསཀཾ པཱཙཱིནནིསྶིཏེ ཨུཏྟརདིསཱབྷཱགེ ཋཏྭཱ ཙཏྟཱརི ཨསངྑྱེཡྻཱནི ཀཔྤསཏསཧསྶཉྩ པཱུརིཏཱནཾ པཱརམཱིནཾ ཕལཱདྷིགམཊྛཱནཾ པལླངྐཉྩེཝ བོདྷིརུཀྑཉྩ ཨནིམིསེཧི ཨཀྑཱིཧི ཨོལོཀཡམཱནོ སཏྟཱཧཾ ཝཱིཏིནཱམེསི, ཏཾ ཋཱནཾ ཨནིམིསཙེཏིཡཾ ནཱམ ཛཱཏཾ།

    Atha bhagavā aṭṭhame divase samāpattito vuṭṭhāya devatānaṃ kaṅkhaṃ ñatvā kaṅkhāvidhamanatthaṃ ākāse uppatitvā yamakapāṭihāriyaṃ dassetvā tāsaṃ kaṅkhaṃ vidhamitvā pallaṅkato īsakaṃ pācīnanissite uttaradisābhāge ṭhatvā cattāri asaṅkhyeyyāni kappasatasahassañca pūritānaṃ pāramīnaṃ phalādhigamaṭṭhānaṃ pallaṅkañceva bodhirukkhañca animisehi akkhīhi olokayamāno sattāhaṃ vītināmesi, taṃ ṭhānaṃ animisacetiyaṃ nāma jātaṃ.

    ཨཐ པལླངྐསྶ ཙ ཋིཏཊྛཱནསྶ ཙ ཨནྟརཱ པུརཏྠིམཔཙྪིམཏོ ཨཱཡཏེ རཏནཙངྐམེ ཙངྐམནྟོ སཏྟཱཧཾ ཝཱིཏིནཱམེསི, ཏཾ ཋཱནཾ རཏནཙངྐམཙེཏིཡཾ ནཱམ ཛཱཏཾ། ཏཏོ པཙྪིམདིསཱབྷཱགེ དེཝཏཱ རཏནགྷརཾ མཱཔཡིཾསུ, ཏཏྠ པལླངྐེན ནིསཱིདིཏྭཱ ཨབྷིདྷམྨཔིཊཀཾ ཝིསེསཏོ ཙེཏྠ ཨནནྟནཡསམནྟཔཊྛཱནཾ ཝིཙིནནྟོ སཏྟཱཧཾ ཝཱིཏིནཱམེསི, ཏཾ ཋཱནཾ རཏནགྷརཙེཏིཡཾ ནཱམ ཛཱཏཾ། ཨེཝཾ བོདྷིསམཱིཔེཡེཝ ཙཏྟཱརི སཏྟཱཧཱནི ཝཱིཏིནཱམེཏྭཱ པཉྩམེ སཏྟཱཧེ བོདྷིརུཀྑམཱུལཱ ཡེན ཨཛཔཱལནིགྲོདྷོ ཏེནུཔསངྐམི, ཏཏྲཱཔི དྷམྨཾ ཝིཙིནནྟོཡེཝ ཝིམུཏྟིསུཁཉྩ པཊིསཾཝེདེནྟོ ནིསཱིདི, དྷམྨཾ ཝིཙིནནྟོ ཙེཏྠ ཨེཝཾ ཨབྷིདྷམྨེ ནཡམགྒཾ སམྨསི – པཋམཾ དྷམྨསངྒཎཱིཔཀརཎཾ ནཱམ, ཏཏོ ཝིབྷངྒཔཀརཎཾ, དྷཱཏུཀཐཱཔཀརཎཾ, པུགྒལཔཉྙཏྟིཔཀརཎཾ, ཀཐཱཝཏྠུ ནཱམ པཀརཎཾ, ཡམཀཾ ནཱམ པཀརཎཾ, ཏཏོ མཧཱཔཀརཎཾ པཊྛཱནཾ ནཱམཱཏི།

    Atha pallaṅkassa ca ṭhitaṭṭhānassa ca antarā puratthimapacchimato āyate ratanacaṅkame caṅkamanto sattāhaṃ vītināmesi, taṃ ṭhānaṃ ratanacaṅkamacetiyaṃ nāma jātaṃ. Tato pacchimadisābhāge devatā ratanagharaṃ māpayiṃsu, tattha pallaṅkena nisīditvā abhidhammapiṭakaṃ visesato cettha anantanayasamantapaṭṭhānaṃ vicinanto sattāhaṃ vītināmesi, taṃ ṭhānaṃ ratanagharacetiyaṃ nāma jātaṃ. Evaṃ bodhisamīpeyeva cattāri sattāhāni vītināmetvā pañcame sattāhe bodhirukkhamūlā yena ajapālanigrodho tenupasaṅkami, tatrāpi dhammaṃ vicinantoyeva vimuttisukhañca paṭisaṃvedento nisīdi, dhammaṃ vicinanto cettha evaṃ abhidhamme nayamaggaṃ sammasi – paṭhamaṃ dhammasaṅgaṇīpakaraṇaṃ nāma, tato vibhaṅgapakaraṇaṃ, dhātukathāpakaraṇaṃ, puggalapaññattipakaraṇaṃ, kathāvatthu nāma pakaraṇaṃ, yamakaṃ nāma pakaraṇaṃ, tato mahāpakaraṇaṃ paṭṭhānaṃ nāmāti.

    ཏཏྠསྶ སཎྷསུཁུམཔཊྛཱནམྷི ཙིཏྟེ ཨོཏིཎྞེ པཱིཏི ཨུཔྤཛྫི; པཱིཏིཡཱ ཨུཔྤནྣཱཡ ལོཧིཏཾ པསཱིདི, ལོཧིཏེ པསནྣེ ཚཝི པསཱིདི། ཚཝིཡཱ པསནྣཱཡ པུརཏྠིམཀཱཡཏོ ཀཱུཊཱགཱརཱདིཔྤམཱཎཱ རསྨིཡོ ཨུཊྛཧིཏྭཱ ཨཱཀཱསེ པཀྑནྡཚདྡནྟནཱགཀུལཾ ཝིཡ པཱཙཱིནདིསཱཡ ཨནནྟཱནི ཙཀྐཝཱལཱ༹ནི པཀྑནྡཱ, པཙྪིམཀཱཡཏོ ཨུཊྛཧིཏྭཱ པཙྪིམདིསཱཡ, དཀྑིཎཾསཀཱུཊཏོ ཨུཊྛཧིཏྭཱ དཀྑིཎདིསཱཡ, ཝཱམཾསཀཱུཊཏོ ཨུཊྛཧིཏྭཱ ཨུཏྟརདིསཱཡ ཨནནྟཱནི ཙཀྐཝཱལཱ༹ནི པཀྑནྡཱ, པཱདཏལེཧི པཝཱལ༹ངྐུརཝཎྞཱ རསྨིཡོ ནིཀྑམིཏྭཱ མཧཱཔཐཝིཾ ཝིནིཝིཛ྄ཛྷིཏྭཱ ཨུདཀཾ དྭིདྷཱ བྷིནྡིཏྭཱ ཝཱཏཀྑནྡྷཾ པདཱལེཏྭཱ ཨཛཊཱཀཱསཾ པཀྑནྡཱ, སཱིསཏོ སམྤརིཝཏྟིཡམཱནཾ མཎིདཱམཾ ཝིཡ ནཱིལཝཎྞཱ རསྨིཝཊྚི ཨུཊྛཧིཏྭཱ ཚ དེཝལོཀེ ཝིནིཝིཛ྄ཛྷིཏྭཱ ནཝ བྲཧྨལོཀེ ཝེཧཔྥལེ པཉྩ སུདྡྷཱཝཱསེ ཙ ཝིནིཝིཛ྄ཛྷིཏྭཱ ཙཏྟཱརོ ཨཱརུཔྤེ ཨཏིཀྐམྨ ཨཛཊཱཀཱསཾ པཀྑནྡཱ། ཏསྨིཾ དིཝསེ ཨཔརིམཱཎེསུ ཙཀྐཝཱལེ༹སུ ཨཔརིམཱཎཱ སཏྟཱ སབྦེ སུཝཎྞཝཎྞཱཝ ཨཧེསུཾ། ཏཾ དིཝསཉྩ པན བྷགཝཏོ སརཱིརཱ ནིཀྑནྟཱ ཡཱཝཛྫདིཝསཱཔི ཏཱ རསྨིཡོ ཨནནྟཱ ལོཀདྷཱཏུཡོ གཙྪནྟིཡེཝ།

    Tatthassa saṇhasukhumapaṭṭhānamhi citte otiṇṇe pīti uppajji; pītiyā uppannāya lohitaṃ pasīdi, lohite pasanne chavi pasīdi. Chaviyā pasannāya puratthimakāyato kūṭāgārādippamāṇā rasmiyo uṭṭhahitvā ākāse pakkhandachaddantanāgakulaṃ viya pācīnadisāya anantāni cakkavāḷāni pakkhandā, pacchimakāyato uṭṭhahitvā pacchimadisāya, dakkhiṇaṃsakūṭato uṭṭhahitvā dakkhiṇadisāya, vāmaṃsakūṭato uṭṭhahitvā uttaradisāya anantāni cakkavāḷāni pakkhandā, pādatalehi pavāḷaṅkuravaṇṇā rasmiyo nikkhamitvā mahāpathaviṃ vinivijjhitvā udakaṃ dvidhā bhinditvā vātakkhandhaṃ padāletvā ajaṭākāsaṃ pakkhandā, sīsato samparivattiyamānaṃ maṇidāmaṃ viya nīlavaṇṇā rasmivaṭṭi uṭṭhahitvā cha devaloke vinivijjhitvā nava brahmaloke vehapphale pañca suddhāvāse ca vinivijjhitvā cattāro āruppe atikkamma ajaṭākāsaṃ pakkhandā. Tasmiṃ divase aparimāṇesu cakkavāḷesu aparimāṇā sattā sabbe suvaṇṇavaṇṇāva ahesuṃ. Taṃ divasañca pana bhagavato sarīrā nikkhantā yāvajjadivasāpi tā rasmiyo anantā lokadhātuyo gacchantiyeva.

    ཨེཝཾ བྷགཝཱ ཨཛཔཱལནིགྲོདྷེ སཏྟཱཧཾ ཝཱིཏིནཱམེཏྭཱ ཏཏོ ཨཔརཾ སཏྟཱཧཾ མུཙལིནྡེ ནིསཱིདི, ནིསིནྣམཏྟསྶེཝ ཙསྶ སཀལཾ ཙཀྐཝཱལ༹གབྦྷཾ པཱུརེནྟོ མཧཱཨཀཱལམེགྷོ ཨུདཔཱདི། ཨེཝརཱུཔོ ཀིར མཧཱམེགྷོ དྭཱིསུཡེཝ ཀཱལེསུ ཝསྶཏི ཙཀྐཝཏྟིམྷི ཝཱ ཨུཔྤནྣེ བུདྡྷེ ཝཱ། ཨིདྷ བུདྡྷཀཱལེ ཨུདཔཱདི། ཏསྨིཾ པན ཨུཔྤནྣེ མུཙལིནྡོ ནཱགརཱཛཱ ཙིནྟེསི – ‘‘ཨཡཾ མེགྷོ སཏྠརི མཡ྄ཧཾ བྷཝནཾ པཝིཊྛམཏྟེཝ ཨུཔྤནྣོ, ཝཱསཱགཱརམསྶ ལདྡྷུཾ ཝཊྚཏཱི’’ཏི། སོ སཏྟརཏནམཡཾ པཱསཱདཾ ནིམྨིནིཏུཾ སཀྐོནྟོཔི ཨེཝཾ ཀཏེ མཡ྄ཧཾ མཧཔྥལཾ ན བྷཝིསྶཏི, དསབལསྶ ཀཱཡཝེཡྻཱཝཙྩཾ ཀརིསྶཱམཱིཏི མཧནྟཾ ཨཏྟབྷཱཝཾ ཀཏྭཱ སཏྠཱརཾ སཏྟཀྑཏྟུཾ བྷོགེཧི པརིཀྑིཔིཏྭཱ ཨུཔརི ཕཎཾ དྷཱརེསི། པརིཀྑེཔསྶ ཨནྟོ ཨོཀཱསོ ཧེཊྛཱ ལོཧཔཱསཱདཔྤམཱཎོ ཨཧོསི། ཨིཙྪིཏིཙྪིཏེན ཨིརིཡཱཔཐེན སཏྠཱ ཝིཧརིསྶཏཱིཏི ནཱགརཱཛསྶ ཨཛ྄ཛྷཱསཡོ ཨཧོསི། ཏསྨཱ ཨེཝཾ མཧནྟཾ ཨོཀཱསཾ པརིཀྑིཔི། མཛ྄ཛྷེ རཏནཔལླངྐོ པཉྙཏྟོ ཧོཏི, ཨུཔརི སུཝཎྞཏཱརཀཝིཙིཏྟཾ སམོསརིཏགནྡྷདཱམཀུསུམདཱམཙེལཝིཏཱནཾ ཨཧོསི། ཙཏཱུསུ ཀོཎེསུ གནྡྷཏེལེན དཱིཔཱ ཛལིཏཱ, ཙཏཱུསུ དིསཱསུ ཝིཝརིཏྭཱ ཙནྡནཀརཎྜཀཱ ཋཔིཏཱ། ཨེཝཾ བྷགཝཱ ཏཾ སཏྟཱཧཾ ཏཏྠ ཝཱིཏིནཱམེཏྭཱ ཏཏོ ཨཔརཾ སཏྟཱཧཾ རཱཛཱཡཏནེ ནིསཱིདི།

    Evaṃ bhagavā ajapālanigrodhe sattāhaṃ vītināmetvā tato aparaṃ sattāhaṃ mucalinde nisīdi, nisinnamattasseva cassa sakalaṃ cakkavāḷagabbhaṃ pūrento mahāakālamegho udapādi. Evarūpo kira mahāmegho dvīsuyeva kālesu vassati cakkavattimhi vā uppanne buddhe vā. Idha buddhakāle udapādi. Tasmiṃ pana uppanne mucalindo nāgarājā cintesi – ‘‘ayaṃ megho satthari mayhaṃ bhavanaṃ paviṭṭhamatteva uppanno, vāsāgāramassa laddhuṃ vaṭṭatī’’ti. So sattaratanamayaṃ pāsādaṃ nimminituṃ sakkontopi evaṃ kate mayhaṃ mahapphalaṃ na bhavissati, dasabalassa kāyaveyyāvaccaṃ karissāmīti mahantaṃ attabhāvaṃ katvā satthāraṃ sattakkhattuṃ bhogehi parikkhipitvā upari phaṇaṃ dhāresi. Parikkhepassa anto okāso heṭṭhā lohapāsādappamāṇo ahosi. Icchiticchitena iriyāpathena satthā viharissatīti nāgarājassa ajjhāsayo ahosi. Tasmā evaṃ mahantaṃ okāsaṃ parikkhipi. Majjhe ratanapallaṅko paññatto hoti, upari suvaṇṇatārakavicittaṃ samosaritagandhadāmakusumadāmacelavitānaṃ ahosi. Catūsu koṇesu gandhatelena dīpā jalitā, catūsu disāsu vivaritvā candanakaraṇḍakā ṭhapitā. Evaṃ bhagavā taṃ sattāhaṃ tattha vītināmetvā tato aparaṃ sattāhaṃ rājāyatane nisīdi.

    ཨཊྛམེ སཏྟཱཧེ སཀྐེན དེཝཱནམིནྡེན ཨཱབྷཏཾ དནྟཀཊྛཉྩ ཨོསདྷཧརཱིཏཀཉྩ ཁཱདིཏྭཱ མུཁཾ དྷོཝིཏྭཱ ཙཏཱུཧི ལོཀཔཱལེཧི ཨུཔནཱིཏེ པཙྩགྒྷེ སེལམཡེ པཏྟེ ཏཔུསྶབྷལླིཀཱནཾ པིཎྜཔཱཏཾ པརིབྷུཉྫིཏྭཱ པུན པཙྩཱགནྟྭཱ ཨཛཔཱལནིགྲོདྷེ ནིསིནྣསྶ སབྦབུདྡྷཱནཾ ཨཱཙིཎྞོ ཨཡཾ ཝིཏཀྐོ ཨུདཔཱདི།

    Aṭṭhame sattāhe sakkena devānamindena ābhataṃ dantakaṭṭhañca osadhaharītakañca khāditvā mukhaṃ dhovitvā catūhi lokapālehi upanīte paccagghe selamaye patte tapussabhallikānaṃ piṇḍapātaṃ paribhuñjitvā puna paccāgantvā ajapālanigrodhe nisinnassa sabbabuddhānaṃ āciṇṇo ayaṃ vitakko udapādi.

    ཏཏྠ པཎྜིཏོཏི པཎྜིཙྩེན སམནྣཱགཏོ། ཝིཡཏྟོཏི ཝེཡྻཏྟིཡེན སམནྣཱགཏོ། མེདྷཱཝཱིཏི ཋཱནུཔྤཏྟིཡཱ པཉྙཱཡ སམནྣཱགཏོ། ཨཔྤརཛཀྑཛཱཏིཀོཏི སམཱཔཏྟིཡཱ ཝིཀྑམྦྷིཏཏྟཱ ནིཀྐིལེསཛཱཏིཀོ ཝིསུདྡྷསཏྟོ། ཨཱཛཱནིསྶཏཱིཏི སལླཀྑེསྶཏི པཊིཝིཛ྄ཛྷིསྶཏི། ཉཱཎཉྩ པན མེཏི མཡ྄ཧམྤི སབྦཉྙུཏཉྙཱཎཾ ཨུཔྤཛྫི། བྷགཝཱ ཀིར དེཝཏཱཡ ཀཐིཏེནེཝ ནིཊྛཾ ཨགནྟྭཱ སཡམྤི སབྦཉྙུཏཉྙཱཎེན ཨོལོཀེནྟོ ཨིཏོ སཏྟམདིཝསམཏྠཀེ ཀཱལཾ ཀཏྭཱ ཨཱཀིཉྩཉྙཱཡཏནེ ནིབྦཏྟོཏི ཨདྡས། ཏཾ སནྡྷཱཡཱཧ – ‘‘ཉཱཎཉྩ པན མེ དསྶནཾ ཨུདཔཱདཱི’’ཏི། མཧཱཛཱནིཡོཏི སཏྟདིཝསབྦྷནྟརེ པཏྟབྦམགྒཕལཏོ པརིཧཱིནཏྟཱ མཧཏཱི ཛཱནི ཨསྶཱཏི མཧཱཛཱནིཡོ། ཨཀྑཎེ ནིབྦཏྟཏྟཱ གནྟྭཱ དེསིཡམཱནཾ དྷམྨམྤིསྶ སོཏུཾ སོཏཔྤསཱདོ ནཏྠི, ཨིདྷ དྷམྨདེསནཊྛཱནཾ ཨཱགམནཔཱདཱཔི ནཏྠི, ཨེཝཾ མཧཱཛཱནིཡོ ཛཱཏོཏི དསྶེཏི། ཨབྷིདོསཀཱལངྐཏོཏི ཨཌྜྷརཏྟེ ཀཱལངྐཏོ། ཉཱཎཉྩ པན མེཏི མཡ྄ཧམྤི སབྦཉྙུཏཉྙཱཎཾ ཨུདཔཱདི། ཨིདྷཱཔི ཀིར བྷགཝཱ དེཝཏཱཡ ཝཙནེན སནྣིཊྛཱནཾ ཨཀཏྭཱ སབྦཉྙུཏཉྙཱཎེན ཨོལོཀེནྟོ ‘‘ཧིཡྻོ ཨཌྜྷརཏྟེ ཀཱལངྐཏྭཱ ཨུདཀོ རཱམཔུཏྟོ ནེཝསཉྙཱནཱསཉྙཱཡཏནེ ནིབྦཏྟོ’’ཏི ཨདྡས། ཏསྨཱ ཨེཝམཱཧ། སེསཾ པུརིམནཡསདིསམེཝ། བཧུཀཱརཱཏི བཧཱུཔཀཱརཱ། པདྷཱནཔཧིཏཏྟཾ ཨུཔཊྛཧིཾསཱུཏི པདྷཱནཏྠཱཡ པེསིཏཏྟབྷཱཝཾ ཝསནཊྛཱནེ པརིཝེཎསམྨཛྫནེན པཏྟཙཱིཝརཾ གཧེཏྭཱ ཨནུབནྡྷནེན མུཁོདཀདནྟཀཊྛདཱནཱདིནཱ ཙ ཨུཔཊྛཧིཾསུ། ཀེ པན ཏེ པཉྩཝགྒིཡཱ ནཱམ? ཡེཏེ –

    Tattha paṇḍitoti paṇḍiccena samannāgato. Viyattoti veyyattiyena samannāgato. Medhāvīti ṭhānuppattiyā paññāya samannāgato. Apparajakkhajātikoti samāpattiyā vikkhambhitattā nikkilesajātiko visuddhasatto. Ājānissatīti sallakkhessati paṭivijjhissati. Ñāṇañca pana meti mayhampi sabbaññutaññāṇaṃ uppajji. Bhagavā kira devatāya kathiteneva niṭṭhaṃ agantvā sayampi sabbaññutaññāṇena olokento ito sattamadivasamatthake kālaṃ katvā ākiñcaññāyatane nibbattoti addasa. Taṃ sandhāyāha – ‘‘ñāṇañca pana me dassanaṃ udapādī’’ti. Mahājāniyoti sattadivasabbhantare pattabbamaggaphalato parihīnattā mahatī jāni assāti mahājāniyo. Akkhaṇe nibbattattā gantvā desiyamānaṃ dhammampissa sotuṃ sotappasādo natthi, idha dhammadesanaṭṭhānaṃ āgamanapādāpi natthi, evaṃ mahājāniyo jātoti dasseti. Abhidosakālaṅkatoti aḍḍharatte kālaṅkato. Ñāṇañca pana meti mayhampi sabbaññutaññāṇaṃ udapādi. Idhāpi kira bhagavā devatāya vacanena sanniṭṭhānaṃ akatvā sabbaññutaññāṇena olokento ‘‘hiyyo aḍḍharatte kālaṅkatvā udako rāmaputto nevasaññānāsaññāyatane nibbatto’’ti addasa. Tasmā evamāha. Sesaṃ purimanayasadisameva. Bahukārāti bahūpakārā. Padhānapahitattaṃ upaṭṭhahiṃsūti padhānatthāya pesitattabhāvaṃ vasanaṭṭhāne pariveṇasammajjanena pattacīvaraṃ gahetvā anubandhanena mukhodakadantakaṭṭhadānādinā ca upaṭṭhahiṃsu. Ke pana te pañcavaggiyā nāma? Yete –

    རཱམོ དྷཛོ ལཀྑཎོ ཛོཏིམནྟི,

    Rāmo dhajo lakkhaṇo jotimanti,

    ཡཉྙོ སུབྷོཛོ སུཡཱམོ སུདཏྟོ།

    Yañño subhojo suyāmo sudatto;

    ཨེཏེ ཏདཱ ཨཊྛ ཨཧེསུཾ བྲཱཧྨཎཱ,

    Ete tadā aṭṭha ahesuṃ brāhmaṇā,

    ཚལ༹ངྒཝཱ མནྟཾ ཝིཡཱཀརིཾསཱུཏི༎

    Chaḷaṅgavā mantaṃ viyākariṃsūti.

    བོདྷིསཏྟསྶ ཛཱཏཀཱལེ སུཔིནཔཊིགྒཱཧཀཱ ཙེཝ ལཀྑཎཔཊིགྒཱཧཀཱ ཙ ཨཊྛ བྲཱཧྨཎཱ། ཏེསུ ཏཡོ དྭེདྷཱ བྱཱཀརིཾསུ – ‘‘ཨིམེཧི ལཀྑཎེཧི སམནྣཱགཏོ ཨགཱརཾ ཨཛ྄ཛྷཱཝསམཱནོ རཱཛཱ ཧོཏི ཙཀྐཝཏྟཱི, པབྦཛམཱནོ བུདྡྷོ’’ཏི། པཉྩ བྲཱཧྨཎཱ ཨེཀཾསབྱཱཀརཎཱ ཨཧེསུཾ – ‘‘ཨིམེཧི ལཀྑཎེཧི སམནྣཱགཏོ ཨགཱརེ ན ཏིཊྛཏི, བུདྡྷོཝ ཧོཏཱི’’ཏི། ཏེསུ པུརིམཱ ཏཡོ ཡཐཱམནྟཔདཾ གཏཱ, ཨིམེ པན པཉྩ མནྟཔདཾ ཨཏིཀྐནྟཱ། ཏེ ཨཏྟནཱ ལདྡྷཾ པུཎྞཔཏྟཾ ཉཱཏཀཱནཾ ཝིསྶཛྫེཏྭཱ ‘‘ཨཡཾ མཧཱཔུརིསོ ཨགཱརཾ ན ཨཛ྄ཛྷཱཝསིསྶཏི, ཨེཀནྟེན བུདྡྷོ བྷཝིསྶཏཱི’’ཏི ནིབྦིཏཀྐཱ བོདྷིསཏྟཾ ཨུདྡིསྶ སམཎཔབྦཛྫཾ པབྦཛིཏཱ། ཏེསཾ པུཏྟཱཏིཔི ཝདནྟི། ཏཾ ཨཊྛཀཐཱཡ པཊིཀྑིཏྟཾ།

    Bodhisattassa jātakāle supinapaṭiggāhakā ceva lakkhaṇapaṭiggāhakā ca aṭṭha brāhmaṇā. Tesu tayo dvedhā byākariṃsu – ‘‘imehi lakkhaṇehi samannāgato agāraṃ ajjhāvasamāno rājā hoti cakkavattī, pabbajamāno buddho’’ti. Pañca brāhmaṇā ekaṃsabyākaraṇā ahesuṃ – ‘‘imehi lakkhaṇehi samannāgato agāre na tiṭṭhati, buddhova hotī’’ti. Tesu purimā tayo yathāmantapadaṃ gatā, ime pana pañca mantapadaṃ atikkantā. Te attanā laddhaṃ puṇṇapattaṃ ñātakānaṃ vissajjetvā ‘‘ayaṃ mahāpuriso agāraṃ na ajjhāvasissati, ekantena buddho bhavissatī’’ti nibbitakkā bodhisattaṃ uddissa samaṇapabbajjaṃ pabbajitā. Tesaṃ puttātipi vadanti. Taṃ aṭṭhakathāya paṭikkhittaṃ.

    ཨེཏེ ཀིར དཧརཀཱལེཡེཝ བཧཱུ མནྟེ ཛཱནིཾསུ, ཏསྨཱ ཏེ བྲཱཧྨཎཱ ཨཱཙརིཡཊྛཱནེ ཋཔཡིཾསུ། ཏེ པཙྪཱ ཨམྷེཧི པུཏྟདཱརཛཊཾ ཚཌྜེཏྭཱ ན སཀྐཱ བྷཝིསྶཏི པབྦཛིཏུནྟི དཧརཀཱལེཡེཝ པབྦཛིཏྭཱ རམཎཱིཡཱནི སེནཱསནཱནི པརིབྷུཉྫནྟཱ ཝིཙརིཾསུ། ཀཱལེན ཀཱལཾ པན ‘‘ཀིཾ, བྷོ, མཧཱཔུརིསོ མཧཱབྷིནིཀྑམནཾ ནིཀྑནྟོ’’ཏི པུཙྪནྟི། མནུསྶཱ, ‘‘ཀུཧིཾ ཏུམྷེ མཧཱཔུརིསཾ པསྶིསྶཐ, ཏཱིསུ པཱསཱདེསུ ཏིཝིདྷནཱཊཀམཛ྄ཛྷེ དེཝོ ཝིཡ སམྤཏྟིཾ ཨནུབྷོཏཱི’’ཏི ཝདནྟི། ཏེ སུཏྭཱ, ‘‘ན ཏཱཝ མཧཱཔུརིསསྶ ཉཱཎཾ པརིཔཱཀཾ གཙྪཏཱི’’ཏི ཨཔྤོསྶུཀྐཱ ཝིཧརིཾསུཡེཝ། ཀསྨཱ པནེཏྠ བྷགཝཱ, ‘‘བཧུཀཱརཱ ཁོ ཨིམེ པཉྩཝགྒིཡཱ’’ཏི ཨཱཧ? ཀིཾ ཨུཔཀཱརཀཱནཾཡེཝ ཨེས དྷམྨཾ དེསེཏི, ཨནུཔཀཱརཀཱནཾ ན དེསེཏཱིཏི? ནོ ན དེསེཏི། པརིཙཡཝསེན ཧེས ཨཱལཱ༹རཉྩེཝ ཀཱལཱམཾ ཨུདཀཉྩ རཱམཔུཏྟཾ ཨོལོཀེསི། ཨེཏསྨིཾ པན བུདྡྷཀྑེཏྟེ ཋཔེཏྭཱ ཨཉྙཱསིཀོཎྜཉྙཾ པཋམཾ དྷམྨཾ སཙྪིཀཱཏུཾ སམཏྠོ ནཱམ ནཏྠི། ཀསྨཱ? ཏཐཱཝིདྷཨུཔནིསྶཡཏྟཱ།

    Ete kira daharakāleyeva bahū mante jāniṃsu, tasmā te brāhmaṇā ācariyaṭṭhāne ṭhapayiṃsu. Te pacchā amhehi puttadārajaṭaṃ chaḍḍetvā na sakkā bhavissati pabbajitunti daharakāleyeva pabbajitvā ramaṇīyāni senāsanāni paribhuñjantā vicariṃsu. Kālena kālaṃ pana ‘‘kiṃ, bho, mahāpuriso mahābhinikkhamanaṃ nikkhanto’’ti pucchanti. Manussā, ‘‘kuhiṃ tumhe mahāpurisaṃ passissatha, tīsu pāsādesu tividhanāṭakamajjhe devo viya sampattiṃ anubhotī’’ti vadanti. Te sutvā, ‘‘na tāva mahāpurisassa ñāṇaṃ paripākaṃ gacchatī’’ti appossukkā vihariṃsuyeva. Kasmā panettha bhagavā, ‘‘bahukārā kho ime pañcavaggiyā’’ti āha? Kiṃ upakārakānaṃyeva esa dhammaṃ deseti, anupakārakānaṃ na desetīti? No na deseti. Paricayavasena hesa āḷārañceva kālāmaṃ udakañca rāmaputtaṃ olokesi. Etasmiṃ pana buddhakkhette ṭhapetvā aññāsikoṇḍaññaṃ paṭhamaṃ dhammaṃ sacchikātuṃ samattho nāma natthi. Kasmā? Tathāvidhaupanissayattā.

    པུབྦེ ཀིར པུཉྙཀརཎཀཱལེ དྭེ བྷཱཏརོ ཨཧེསུཾ། ཏེ ཨེཀཏོཝ སསྶཾ ཨཀཾསུ། ཏཏྠ ཛེཊྛཀསྶ ‘‘ཨེཀསྨིཾ སསྶེ ནཝཝཱརེ ཨགྒསསྶདཱནཾ མཡཱ དཱཏབྦ’’ནྟི ཨཧོསི། སོ ཝཔྤཀཱལེ བཱིཛགྒཾ ནཱམ དཏྭཱ གབྦྷཀཱལེ ཀནིཊྛེན སདྡྷིཾ མནྟེསི – ‘‘གབྦྷཀཱལེ གབྦྷཾ ཕཱལེཏྭཱ དསྶཱམཱ’’ཏི། ཀནིཊྛོ ‘‘ཏརུཎསསྶཾ ནཱསེཏུཀཱམོསཱི’’ཏི ཨཱཧ། ཛེཊྛོ ཀནིཊྛསྶ ཨནནུཝཏྟནབྷཱཝཾ ཉཏྭཱ ཁེཏྟཾ ཝིབྷཛིཏྭཱ ཨཏྟནོ ཀོཊྛཱསཏོ གབྦྷཾ ཕཱལེཏྭཱ ཁཱིརཾ ནཱིཧརིཏྭཱ སཔྤིཕཱཎིཏེཧི ཡོཛེཏྭཱ ཨདཱསི, པུཐུཀཀཱལེ པུཐུཀཾ ཀཱརེཏྭཱ ཨདཱསི, ལཱཡནེ ལཱཡནགྒཾ ཝེཎིཀརཎེ ཝེཎགྒཾ ཀལཱཔཱདཱིསུ ཀལཱཔགྒཾ ཁལ༹གྒཾ བྷཎྜགྒཾ ཀོཊྛགྒནྟི ཨེཝཾ ཨེཀསསྶེ ནཝཝཱརེ ཨགྒདཱནཾ ཨདཱསི། ཀནིཊྛོ པནསྶ ཨུདྡྷརིཏྭཱ ཨདཱསི, ཏེསུ ཛེཊྛོ ཨཉྙཱསིཀོཎྜཉྙཏྠེརོ ཛཱཏོ, ཀནིཊྛོ སུབྷདྡཔརིབྦཱཛཀོ། ཨིཏི ཨེཀསྨིཾ སསྶེ ནཝནྣཾ ཨགྒདཱནཱནཾ དིནྣཏྟཱ ཋཔེཏྭཱ ཐེརཾ ཨཉྙོ པཋམཾ དྷམྨཾ སཙྪིཀཱཏུཾ སམཏྠོ ནཱམ ནཏྠི། ‘‘བཧུཀཱརཱ ཁོ ཨིམེ པཉྩཝགྒིཡཱ’’ཏི ཨིདཾ པན ཨུཔཀཱརཱནུསྶརཎམཏྟཀེནེཝ ཝུཏྟཾ།

    Pubbe kira puññakaraṇakāle dve bhātaro ahesuṃ. Te ekatova sassaṃ akaṃsu. Tattha jeṭṭhakassa ‘‘ekasmiṃ sasse navavāre aggasassadānaṃ mayā dātabba’’nti ahosi. So vappakāle bījaggaṃ nāma datvā gabbhakāle kaniṭṭhena saddhiṃ mantesi – ‘‘gabbhakāle gabbhaṃ phāletvā dassāmā’’ti. Kaniṭṭho ‘‘taruṇasassaṃ nāsetukāmosī’’ti āha. Jeṭṭho kaniṭṭhassa ananuvattanabhāvaṃ ñatvā khettaṃ vibhajitvā attano koṭṭhāsato gabbhaṃ phāletvā khīraṃ nīharitvā sappiphāṇitehi yojetvā adāsi, puthukakāle puthukaṃ kāretvā adāsi, lāyane lāyanaggaṃ veṇikaraṇe veṇaggaṃ kalāpādīsu kalāpaggaṃ khaḷaggaṃ bhaṇḍaggaṃ koṭṭhagganti evaṃ ekasasse navavāre aggadānaṃ adāsi. Kaniṭṭho panassa uddharitvā adāsi, tesu jeṭṭho aññāsikoṇḍaññatthero jāto, kaniṭṭho subhaddaparibbājako. Iti ekasmiṃ sasse navannaṃ aggadānānaṃ dinnattā ṭhapetvā theraṃ añño paṭhamaṃ dhammaṃ sacchikātuṃ samattho nāma natthi. ‘‘Bahukārā kho ime pañcavaggiyā’’ti idaṃ pana upakārānussaraṇamattakeneva vuttaṃ.

    ཨིསིཔཏནེ མིགདཱཡེཏི ཏསྨིཾ ཀིར པདེསེ ཨནུཔྤནྣེ བུདྡྷེ པཙྩེཀསམྦུདྡྷཱ གནྡྷམཱདནཔབྦཏེ སཏྟཱཧཾ ནིརོདྷསམཱཔཏྟིཡཱ ཝཱིཏིནཱམེཏྭཱ ནིརོདྷཱ ཝུཊྛཱཡ ནཱགལཏཱདནྟཀཊྛཾ ཁཱདིཏྭཱ ཨནོཏཏྟདཧེ མུཁཾ དྷོཝིཏྭཱ པཏྟཙཱིཝརམཱདཱཡ ཨཱཀཱསེན ཨཱགནྟྭཱ ནིཔཏནྟི། ཏཏྠ ཙཱིཝརཾ པཱརུཔིཏྭཱ ནགརེ པིཎྜཱཡ ཙརིཏྭཱ ཀཏབྷཏྟཀིཙྩཱ གམནཀཱལེཔི ཏཏོཡེཝ ཨུཔྤཏིཏྭཱ གཙྪནྟི། ཨིཏི ཨིསཡོ ཨེཏྠ ནིཔཏནྟི ཨུཔྤཏནྟི ཙཱཏི ཏཾ ཋཱནཾ ཨིསིཔཏནནྟི སངྑཾ གཏཾ། མིགཱནཾ པན ཨབྷཡཏྠཱཡ དིནྣཏྟཱ མིགདཱཡོཏི ཝུཙྩཏི། ཏེན ཝུཏྟཾ ‘‘ཨིསིཔཏནེ མིགདཱཡེ’’ཏི།

    Isipatane migadāyeti tasmiṃ kira padese anuppanne buddhe paccekasambuddhā gandhamādanapabbate sattāhaṃ nirodhasamāpattiyā vītināmetvā nirodhā vuṭṭhāya nāgalatādantakaṭṭhaṃ khāditvā anotattadahe mukhaṃ dhovitvā pattacīvaramādāya ākāsena āgantvā nipatanti. Tattha cīvaraṃ pārupitvā nagare piṇḍāya caritvā katabhattakiccā gamanakālepi tatoyeva uppatitvā gacchanti. Iti isayo ettha nipatanti uppatanti cāti taṃ ṭhānaṃ isipatananti saṅkhaṃ gataṃ. Migānaṃ pana abhayatthāya dinnattā migadāyoti vuccati. Tena vuttaṃ ‘‘isipatane migadāye’’ti.

    ༢༨༥. ཨནྟརཱ ཙ གཡཾ ཨནྟརཱ ཙ བོདྷིནྟི གཡཱཡ ཙ བོདྷིསྶ ཙ ཝིཝརེ ཏིགཱཝུཏནྟརེ ཋཱནེ། བོདྷིམཎྜཏོ ཧི གཡཱ ཏཱིཎི གཱཝུཏཱནི། བཱརཱཎསཱི ཨཊྛཱརས ཡོཛནཱནི། ཨུཔཀོ བོདྷིམཎྜསྶ ཙ གཡཱཡ ཙ ཨནྟརེ བྷགཝནྟཾ ཨདྡས། ཨནྟརཱསདྡེན པན ཡུཏྟཏྟཱ ཨུཔཡོགཝཙནཾ ཀཏཾ། ཨཱིདིསེསུ ཙ ཋཱནེསུ ཨཀྑརཙིནྟཀཱ ‘‘ཨནྟརཱ གཱམཉྩ ནདིཉྩ ཡཱཏཱི’’ཏི ཨེཝཾ ཨེཀམེཝ ཨནྟརཱསདྡཾ པཡུཛྫནྟི། སོ དུཏིཡཔདེནཔི ཡོཛེཏབྦོ ཧོཏི ། ཨཡོཛིཡམཱནེ ཨུཔཡོགཝཙནཾ ན པཱཔུཎཱཏི། ཨིདྷ པན ཡོཛེཏྭཱ ཨེཝ ཝུཏྟོཏི། ཨདྡྷཱནམགྒཔཊིཔནྣནྟི ཨདྡྷཱནསངྑཱཏཾ མགྒཾ པཊིཔནྣཾ, དཱིགྷམགྒཔཊིཔནྣནྟི ཨཏྠོ། ཨདྡྷཱནམགྒགམནསམཡསྶ ཧི ཝིབྷངྒེ ‘‘ཨདྡྷཡོཛནཾ གཙྪིསྶཱམཱིཏི བྷུཉྫིཏབྦ’’ནྟིཨཱདིཝཙནཏོ (པཱཙི॰ ༢༡༨) ཨདྡྷཡོཛནམྤི ཨདྡྷཱནམགྒོ ཧོཏི། བོདྷིམཎྜཏོ པན གཡཱ ཏིགཱཝུཏཾ།

    285.Antarā ca gayaṃ antarā ca bodhinti gayāya ca bodhissa ca vivare tigāvutantare ṭhāne. Bodhimaṇḍato hi gayā tīṇi gāvutāni. Bārāṇasī aṭṭhārasa yojanāni. Upako bodhimaṇḍassa ca gayāya ca antare bhagavantaṃ addasa. Antarāsaddena pana yuttattā upayogavacanaṃ kataṃ. Īdisesu ca ṭhānesu akkharacintakā ‘‘antarā gāmañca nadiñca yātī’’ti evaṃ ekameva antarāsaddaṃ payujjanti. So dutiyapadenapi yojetabbo hoti . Ayojiyamāne upayogavacanaṃ na pāpuṇāti. Idha pana yojetvā eva vuttoti. Addhānamaggapaṭipannanti addhānasaṅkhātaṃ maggaṃ paṭipannaṃ, dīghamaggapaṭipannanti attho. Addhānamaggagamanasamayassa hi vibhaṅge ‘‘addhayojanaṃ gacchissāmīti bhuñjitabba’’ntiādivacanato (pāci. 218) addhayojanampi addhānamaggo hoti. Bodhimaṇḍato pana gayā tigāvutaṃ.

    སབྦཱབྷིབྷཱུཏི སབྦཾ ཏེབྷཱུམཀདྷམྨཾ ཨབྷིབྷཝིཏྭཱ ཋིཏོ། སབྦཝིདཱུཏི སབྦཾ ཙཏུབྷཱུམཀདྷམྨཾ ཨཝེདིཾ ཨཉྙཱསིཾ། སབྦེསུ དྷམྨེསུ ཨནུཔལིཏྟོཏི སབྦེསུ ཏེབྷཱུམཀདྷམྨེསུ ཀིལེསལེཔནེན ཨནུཔལིཏྟོ། སབྦཾ ཛཧོཏི སབྦཾ ཏེབྷཱུམཀདྷམྨཾ ཛཧིཏྭཱ ཋིཏོ། ཏཎྷཱཀྑཡེ ཝིམུཏྟོཏི ཏཎྷཱཀྑཡེ ནིབྦཱནེ ཨཱརམྨཎཏོ ཝིམུཏྟོ། སཡཾ ཨབྷིཉྙཱཡཱཏི སབྦཾ ཙཏུབྷཱུམཀདྷམྨཾ ཨཏྟནཱཝ ཛཱནིཏྭཱ། ཀམུདྡིསེཡྻནྟི ཀཾ ཨཉྙཾ ‘‘ཨཡཾ མེ ཨཱཙརིཡོ’’ཏི ཨུདྡིསེཡྻཾ།

    Sabbābhibhūti sabbaṃ tebhūmakadhammaṃ abhibhavitvā ṭhito. Sabbavidūti sabbaṃ catubhūmakadhammaṃ avediṃ aññāsiṃ. Sabbesu dhammesu anupalittoti sabbesu tebhūmakadhammesu kilesalepanena anupalitto. Sabbaṃ jahoti sabbaṃ tebhūmakadhammaṃ jahitvā ṭhito. Taṇhākkhaye vimuttoti taṇhākkhaye nibbāne ārammaṇato vimutto. Sayaṃ abhiññāyāti sabbaṃ catubhūmakadhammaṃ attanāva jānitvā. Kamuddiseyyanti kaṃ aññaṃ ‘‘ayaṃ me ācariyo’’ti uddiseyyaṃ.

    ན མེ ཨཱཙརིཡོ ཨཏྠཱིཏི ལོཀུཏྟརདྷམྨེ མཡ྄ཧཾ ཨཱཙརིཡོ ནཱམ ནཏྠི། ནཏྠི མེ པཊིཔུགྒལོཏི མཡ྄ཧཾ པཊིབྷཱགཔུགྒལོ ནཱམ ནཏྠི། སམྨཱསམྦུདྡྷོཏི སཧེཏུནཱ ནཡེན ཙཏྟཱརི སཙྩཱནི སཡཾ བུདྡྷོ། སཱིཏིབྷཱུཏོཏི སབྦཀིལེསགྒིནིབྦཱཔནེན སཱིཏིབྷཱུཏོ། ཀིལེསཱནཾཡེཝ ནིབྦུཏཏྟཱ ནིབྦུཏོ། ཀཱསིནཾ པུརནྟི ཀཱསིརཊྛེ ནགརཾ། ཨཱཧཉྪཾ ཨམཏདུནྡུབྷིནྟི དྷམྨཙཀྐཔཊིལཱབྷཱཡ ཨམཏབྷེརིཾ པཧརིསྶཱམཱིཏི གཙྪཱམི། ཨརཧསི ཨནནྟཛིནོཏི ཨནནྟཛིནོཏི བྷཝིཏུཾ ཡུཏྟོ། ཧུཔེཡྻ པཱཝུསོཏི, ཨཱཝུསོ, ཨེཝམྤི ནཱམ བྷཝེཡྻ། པཀྐཱམཱིཏི ཝངྐཧཱརཛནཔདཾ ནཱམ ཨགམཱསི།

    Na me ācariyo atthīti lokuttaradhamme mayhaṃ ācariyo nāma natthi. Natthi me paṭipuggaloti mayhaṃ paṭibhāgapuggalo nāma natthi. Sammāsambuddhoti sahetunā nayena cattāri saccāni sayaṃ buddho. Sītibhūtoti sabbakilesagginibbāpanena sītibhūto. Kilesānaṃyeva nibbutattā nibbuto. Kāsinaṃ puranti kāsiraṭṭhe nagaraṃ. Āhañchaṃ amatadundubhinti dhammacakkapaṭilābhāya amatabheriṃ paharissāmīti gacchāmi. Arahasi anantajinoti anantajinoti bhavituṃ yutto. Hupeyya pāvusoti, āvuso, evampi nāma bhaveyya. Pakkāmīti vaṅkahārajanapadaṃ nāma agamāsi.

    ཏཏྠེཀཾ མིགལུདྡཀགཱམཀཾ ནིསྶཱཡ ཝཱསཾ ཀཔྤེསི། ཛེཊྛཀལུདྡཀོ ཏཾ ཨུཔཊྛཱསི། ཏསྨིཉྩ ཛནཔདེ ཙཎྜཱ མཀྑིཀཱ ཧོནྟི། ཨཐ ནཾ ཨེཀཱཡ ཙཱཊིཡཱ ཝསཱཔེསུཾ, མིགལུདྡཀོ དཱུརེ མིགཝཾ གཙྪནྟོ ‘‘ཨམྷཱཀཾ ཨརཧནྟེ མཱ པམཛྫཱི’’ཏི ཚཱཝཾ ནཱམ དྷཱིཏརཾ ཨཱཎཱཔེཏྭཱ ཨགམཱསི སདྡྷིཾ པུཏྟབྷཱཏུཀེཧི། སཱ ཙསྶ དྷཱིཏཱ དསྶནཱིཡཱ ཧོཏི ཀོཊྛཱསསམྤནྣཱ། དུཏིཡདིཝསེ ཨུཔཀོ གྷརཾ ཨཱགཏོ ཏཾ དཱརིཀཾ སབྦཾ ཨུཔཙཱརཾ ཀཏྭཱ པརིཝིསིཏུཾ ཨུཔགཏཾ དིསྭཱ རཱགེན ཨབྷིབྷཱུཏོ བྷུཉྫིཏུམྤི ཨསཀྐོནྟོ བྷཱཛནེན བྷཏྟཾ ཨཱདཱཡ ཝསནཊྛཱནཾ གནྟྭཱ བྷཏྟཾ ཨེཀམནྟེ ནིཀྑིཔིཏྭཱ སཙེ ཚཱཝཾ ལབྷཱམི, ཛཱིཝཱམི, ནོ ཙེ, མརཱམཱིཏི ནིརཱཧཱརོ སཡི། སཏྟམེ དིཝསེ མཱགཝིཀོ ཨཱགནྟྭཱ དྷཱིཏརཾ ཨུཔཀསྶ པཝཏྟིཾ པུཙྪི། སཱ ‘‘ཨེཀདིཝསམེཝ ཨཱགནྟྭཱ པུན ནཱགཏཔུབྦོ’’ཏི ཨཱཧ། མཱགཝིཀོ ཨཱགཏཝེསེནེཝ ནཾ ཨུཔསངྐམིཏྭཱ པུཙྪིསྶཱམཱིཏི ཏཾཁཎཾཡེཝ གནྟྭཱ ‘‘ཀིཾ, བྷནྟེ, ཨཔྥཱསུཀ’’ནྟི པཱདེ པརཱམསནྟོ པུཙྪི། ཨུཔཀོ ནིཏྠུནནྟོ པརིཝཏྟཏིཡེཝ། སོ ‘‘ཝདཐ བྷནྟེ, ཡཾ མཡཱ སཀྐཱ ཀཱཏུཾ, ཏཾ སབྦཾ ཀརིསྶཱམཱི’’ཏི ཨཱཧ། ཨུཔཀོ, ‘‘སཙེ ཚཱཝཾ ལབྷཱམི, ཛཱིཝཱམི, ནོ ཙེ, ཨིདྷེཝ མརཎཾ སེཡྻོ’’ཏི ཨཱཧ། ཛཱནཱསི པན, བྷནྟེ, ཀིཉྩི སིཔྤནྟི། ན ཛཱནཱམཱིཏི། ན, བྷནྟེ, ཀིཉྩི སིཔྤཾ ཨཛཱནནྟེན སཀྐཱ གྷརཱཝཱསཾ ཨདྷིཊྛཱཏུནྟི།

    Tatthekaṃ migaluddakagāmakaṃ nissāya vāsaṃ kappesi. Jeṭṭhakaluddako taṃ upaṭṭhāsi. Tasmiñca janapade caṇḍā makkhikā honti. Atha naṃ ekāya cāṭiyā vasāpesuṃ, migaluddako dūre migavaṃ gacchanto ‘‘amhākaṃ arahante mā pamajjī’’ti chāvaṃ nāma dhītaraṃ āṇāpetvā agamāsi saddhiṃ puttabhātukehi. Sā cassa dhītā dassanīyā hoti koṭṭhāsasampannā. Dutiyadivase upako gharaṃ āgato taṃ dārikaṃ sabbaṃ upacāraṃ katvā parivisituṃ upagataṃ disvā rāgena abhibhūto bhuñjitumpi asakkonto bhājanena bhattaṃ ādāya vasanaṭṭhānaṃ gantvā bhattaṃ ekamante nikkhipitvā sace chāvaṃ labhāmi, jīvāmi, no ce, marāmīti nirāhāro sayi. Sattame divase māgaviko āgantvā dhītaraṃ upakassa pavattiṃ pucchi. Sā ‘‘ekadivasameva āgantvā puna nāgatapubbo’’ti āha. Māgaviko āgataveseneva naṃ upasaṅkamitvā pucchissāmīti taṃkhaṇaṃyeva gantvā ‘‘kiṃ, bhante, apphāsuka’’nti pāde parāmasanto pucchi. Upako nitthunanto parivattatiyeva. So ‘‘vadatha bhante, yaṃ mayā sakkā kātuṃ, taṃ sabbaṃ karissāmī’’ti āha. Upako, ‘‘sace chāvaṃ labhāmi, jīvāmi, no ce, idheva maraṇaṃ seyyo’’ti āha. Jānāsi pana, bhante, kiñci sippanti. Na jānāmīti. Na, bhante, kiñci sippaṃ ajānantena sakkā gharāvāsaṃ adhiṭṭhātunti.

    སོ ཨཱཧ – ‘‘ནཱཧཾ ཀིཉྩི སིཔྤཾ ཛཱནཱམི, ཨཔིཙ ཏུམྷཱཀཾ མཾསཧཱརཀོ བྷཝིསྶཱམི, མཾསཉྩ ཝིཀྐཱིཎིསྶཱམཱི’’ཏི། མཱགཝིཀོ, ‘‘ཨམྷཱཀམྤི ཨེཏདེཝ རུཙྩཏཱི’’ཏི ཨུཏྟརསཱཊཀཾ དཏྭཱ གྷརཾ ཨཱནེཏྭཱ དྷཱིཏརཾ ཨདཱསི། ཏེསཾ སཾཝཱསམནྭཱཡ པུཏྟོ ཝིཛཱཡི། སུབྷདྡོཏིསྶ ནཱམཾ ཨཀཾསུ། ཚཱཝཱ ཏསྶ རོདནཀཱལེ ‘‘མཾསཧཱརཀསྶ པུཏྟ, མིགལུདྡཀསྶ པུཏྟ མཱ རོདཱི’’ཏིཨཱདཱིནི ཝདམཱནཱ པུཏྟཏོསནགཱིཏེན ཨུཔཀཾ ཨུཔྤཎྜེསི། བྷདྡེ ཏྭཾ མཾ ཨནཱཐོཏི མཉྙསི། ཨཏྠི མེ ཨནནྟཛིནོ ནཱམ སཧཱཡོ། ཏསྶཱཧཾ སནྟིཀེ གམིསྶཱམཱིཏི ཨཱཧ། ཚཱཝཱ ཨེཝམཡཾ ཨཊྚཱིཡཏཱིཏི ཉཏྭཱ པུནཔྤུནཾ ཀཐེཏི། སོ ཨེཀདིཝསཾ ཨནཱརོཙེཏྭཱཝ མཛ྄ཛྷིམདེསཱབྷིམུཁོ པཀྐཱམི།

    So āha – ‘‘nāhaṃ kiñci sippaṃ jānāmi, apica tumhākaṃ maṃsahārako bhavissāmi, maṃsañca vikkīṇissāmī’’ti. Māgaviko, ‘‘amhākampi etadeva ruccatī’’ti uttarasāṭakaṃ datvā gharaṃ ānetvā dhītaraṃ adāsi. Tesaṃ saṃvāsamanvāya putto vijāyi. Subhaddotissa nāmaṃ akaṃsu. Chāvā tassa rodanakāle ‘‘maṃsahārakassa putta, migaluddakassa putta mā rodī’’tiādīni vadamānā puttatosanagītena upakaṃ uppaṇḍesi. Bhadde tvaṃ maṃ anāthoti maññasi. Atthi me anantajino nāma sahāyo. Tassāhaṃ santike gamissāmīti āha. Chāvā evamayaṃ aṭṭīyatīti ñatvā punappunaṃ katheti. So ekadivasaṃ anārocetvāva majjhimadesābhimukho pakkāmi.

    བྷགཝཱ ཙ ཏེན སམཡེན སཱཝཏྠིཡཾ ཝིཧརཏི ཛེཏཝནེ མཧཱཝིཧཱརེ། ཨཐ ཁོ བྷགཝཱ པཊིཀཙྩེཝ བྷིཀྑཱུ ཨཱཎཱཔེསི – ‘‘ཡོ, བྷིཀྑཝེ, ‘ཨནནྟཛིནོ’ཏི པུཙྪམཱནོ ཨཱགཙྪཏི, ཏསྶ མཾ དསྶེཡྻཱཐཱ’’ཏི། ཨུཔཀོཔི ཁོ ‘‘ཀུཧིཾ ཨནནྟཛིནོ ཝསཏཱི’’ཏི པུཙྪནྟོ ཨནུཔུབྦེན སཱཝཏྠིཾ ཨཱགནྟྭཱ ཝིཧཱརམཛ྄ཛྷེ ཋཏྭཱ ཀུཧིཾ ཨནནྟཛིནོཏི པུཙྪི། ཏཾ བྷིཀྑཱུ བྷགཝཏོ སནྟིཀཾ ནཡིཾསུ། སོ བྷགཝནྟཾ དིསྭཱ – ‘‘སཉྫཱནཱཐ མཾ བྷགཝཱ’’ཏི ཨཱཧ། ཨཱམ, ཨུཔཀ, སཉྫཱནཱམི, ཀུཧིཾ པན ཏྭཾ ཝསིཏྠཱཏི། ཝངྐཧཱརཛནཔདེ, བྷནྟེཏི། ཨུཔཀ, མཧལླཀོསི ཛཱཏོ པབྦཛིཏུཾ སཀྑིསྶསཱིཏི། པབྦཛིསྶཱམི, བྷནྟེཏི། བྷགཝཱ པབྦཱཛེཏྭཱ ཏསྶ ཀམྨཊྛཱནཾ ཨདཱསི། སོ ཀམྨཊྛཱནེ ཀམྨཾ ཀརོནྟོ ཨནཱགཱམིཕལེ པཏིཊྛཱཡ ཀཱལཾ ཀཏྭཱ ཨཝིཧེསུ ནིབྦཏྟོ། ནིབྦཏྟཀྑཎེཡེཝ ཨརཧཏྟཾ པཱཔུཎཱིཏི། ཨཝིཧེསུ ནིབྦཏྟམཏྟཱ ཧི སཏྟ ཛནཱ ཨརཧཏྟཾ པཱཔུཎིཾསུ, ཏེསཾ སོ ཨཉྙཏརོ།

    Bhagavā ca tena samayena sāvatthiyaṃ viharati jetavane mahāvihāre. Atha kho bhagavā paṭikacceva bhikkhū āṇāpesi – ‘‘yo, bhikkhave, ‘anantajino’ti pucchamāno āgacchati, tassa maṃ dasseyyāthā’’ti. Upakopi kho ‘‘kuhiṃ anantajino vasatī’’ti pucchanto anupubbena sāvatthiṃ āgantvā vihāramajjhe ṭhatvā kuhiṃ anantajinoti pucchi. Taṃ bhikkhū bhagavato santikaṃ nayiṃsu. So bhagavantaṃ disvā – ‘‘sañjānātha maṃ bhagavā’’ti āha. Āma, upaka, sañjānāmi, kuhiṃ pana tvaṃ vasitthāti. Vaṅkahārajanapade, bhanteti. Upaka, mahallakosi jāto pabbajituṃ sakkhissasīti. Pabbajissāmi, bhanteti. Bhagavā pabbājetvā tassa kammaṭṭhānaṃ adāsi. So kammaṭṭhāne kammaṃ karonto anāgāmiphale patiṭṭhāya kālaṃ katvā avihesu nibbatto. Nibbattakkhaṇeyeva arahattaṃ pāpuṇīti. Avihesu nibbattamattā hi satta janā arahattaṃ pāpuṇiṃsu, tesaṃ so aññataro.

    ཝུཏྟཉྷེཏཾ –

    Vuttañhetaṃ –

    ‘‘ཨཝིཧཾ ཨུཔཔནྣཱསེ, ཝིམུཏྟཱ སཏྟ བྷིཀྑཝོ།

    ‘‘Avihaṃ upapannāse, vimuttā satta bhikkhavo;

    རཱགདོསཔརིཀྑཱིཎཱ, ཏིཎྞཱ ལོཀེ ཝིསཏྟིཀཾ༎

    Rāgadosaparikkhīṇā, tiṇṇā loke visattikaṃ.

    ཨུཔཀོ པལགཎྜོ ཙ, པུཀྐུསཱཏི ཙ ཏེ ཏཡོ།

    Upako palagaṇḍo ca, pukkusāti ca te tayo;

    བྷདྡིཡོ ཁཎྜདེཝོ ཙ, བཧུརགྒི ཙ སངྒིཡོ།

    Bhaddiyo khaṇḍadevo ca, bahuraggi ca saṅgiyo;

    ཏེ ཧིཏྭཱ མཱནུསཾ དེཧཾ, དིབྦཡོགཾ ཨུཔཛ྄ཛྷགུ’’ནྟི༎ (སཾ॰ ནི॰ ༡.༡༠༥)།

    Te hitvā mānusaṃ dehaṃ, dibbayogaṃ upajjhagu’’nti. (saṃ. ni. 1.105);

    ༢༨༦. སཎྛཔེསུནྟི ཀཏིཀཾ ཨཀཾསུ། བཱཧུལླིཀོཏི ཙཱིཝརབཱཧུལླཱདཱིནཾ ཨཏྠཱཡ པཊིཔནྣོ། པདྷཱནཝིབྦྷནྟོཏི པདྷཱནཏོ ཝིབྦྷནྟོ བྷཊྛོ པརིཧཱིནོ། ཨཱཝཏྟོ བཱཧུལླཱཡཱཏི ཙཱིཝརཱདཱིནཾ བཧུལབྷཱཝཏྠཱཡ ཨཱཝཏྟོ། ཨཔིཙ ཁོ ཨཱསནཾ ཋཔེཏབྦནྟི ཨཔིཙ ཁོ པནསྶ ཨུཙྩཀུལེ ནིབྦཏྟསྶ ཨཱསནམཏྟཾ ཋཔེཏབྦནྟི ཝདིཾསུ། ནཱསཀྑིཾསཱུཏི བུདྡྷཱནུབྷཱཝེན བུདྡྷཏེཛསཱ ཨབྷིབྷཱུཏཱ ཨཏྟནོ ཀཏིཀཱཡ ཋཱཏུཾ ནཱསཀྑིཾསུ། ནཱམེན ཙ ཨཱཝུསོཝཱདེན ཙ སམུདཱཙརནྟཱིཏི གོཏམཱཏི, ཨཱཝུསོཏི ཙ ཝདནྟི། ཨཱཝུསོ གོཏམ, མཡཾ ཨུརུཝེལཱཡཾ པདྷཱནཀཱལེ ཏུཡ྄ཧཾ པཏྟཙཱིཝརཾ གཧེཏྭཱ ཝིཙརིམྷཱ, མུཁོདཀཾ དནྟཀཊྛཾ ཨདམྷཱ, ཝུཏྠཔརིཝེཎཾ སམྨཛྫིམྷཱ, པཙྪཱ ཀོ ཏེ ཝཏྟཔྤཊིཔཏྟིམཀཱསི, ཀཙྩི ཨམྷེསུ པཀྐནྟེསུ ན ཙིནྟཡིཏྠཱཏི ཨེཝརཱུཔིཾ ཀཐཾ ཀཐེནྟཱིཏི ཨཏྠོ། ཨིརིཡཱཡཱཏི དུཀྐརཨིརིཡཱཡ། པཊིཔདཱཡཱཏི དུཀྐརཔཊིཔཏྟིཡཱ། དུཀྐརཀཱརིཀཱཡཱཏི པསཏཔསཏ-མུགྒཡཱུསཱདིཨཱཧརཀརཎཱདིནཱ དུཀྐརཀརཎེན། ཨབྷིཛཱནཱཐ མེ ནོཏི ཨབྷིཛཱནཱཐ ནུ མམ། ཨེཝརཱུཔཾ པབྷཱཝིཏམེཏནྟི ཨེཏཾ ཨེཝརཱུཔཾ ཝཱཀྱབྷེདནྟི ཨཏྠོ། ཨཔི ནུ ཨཧཾ ཨུརུཝེལཱཡ པདྷཱནེ ཏུམྷཱཀཾ སངྒཎྷནཏྠཾ ཨནུཀྐཎྛནཏྠཾ རཏྟིཾ ཝཱ དིཝཱ ཝཱ ཨཱགནྟྭཱ, – ‘‘ཨཱཝུསོ, མཱ ཝིཏཀྐཡིཏྠ, མཡ྄ཧཾ ཨོབྷཱསོ ཝཱ ནིམིཏྟཾ ཝཱ པཉྙཱཡཏཱི’’ཏི ཨེཝརཱུཔཾ ཀཉྩི ཝཙནབྷེདཾ ཨཀཱསིནྟི ཨདྷིཔྤཱཡོ། ཏེ ཨེཀཔདེནེཝ སཏིཾ ལབྷིཏྭཱ ཨུཔྤནྣགཱརཝཱ, ‘‘ཧནྡ ཨདྡྷཱ ཨེས བུདྡྷོ ཛཱཏོ’’ཏི སདྡཧིཏྭཱ ནོ ཧེཏཾ, བྷནྟེཏི ཨཱཧཾསུ། ཨསཀྑིཾ ཁོ ཨཧཾ, བྷིཀྑཝེ, པཉྩཝགྒིཡེ བྷིཀྑཱུ སཉྙཱཔེཏུནྟི ཨཧཾ , བྷིཀྑཝེ, པཉྩཝགྒིཡེ བྷིཀྑཱུ བུདྡྷོ ཨཧནྟི ཛཱནཱཔེཏུཾ ཨསཀྑིཾ། ཏདཱ པན བྷགཝཱ ཨུཔོསཐདིཝསེཡེཝ ཨཱགཙྪི། ཨཏྟནོ བུདྡྷབྷཱཝཾ ཛཱནཱཔེཏྭཱ ཀོཎྜཉྙཏྠེརཾ ཀཱཡསཀྑིཾ ཀཏྭཱ དྷམྨཙཀྐཔྤཝཏྟནསུཏྟཾ ཀཐེསི། སུཏྟཔརིཡོསཱནེ ཐེརོ ཨཊྛཱརསཧི བྲཧྨཀོཊཱིཧི སདྡྷིཾ སོཏཱཔཏྟིཕལེ པཏིཊྛཱསི། སཱུརིཡེ དྷརམཱནེཡེཝ དེསནཱ ནིཊྛཱསི། བྷགཝཱ ཏཏྠེཝ ཝསྶཾ ཨུཔགཙྪི།

    286.Saṇṭhapesunti katikaṃ akaṃsu. Bāhullikoti cīvarabāhullādīnaṃ atthāya paṭipanno. Padhānavibbhantoti padhānato vibbhanto bhaṭṭho parihīno. Āvatto bāhullāyāti cīvarādīnaṃ bahulabhāvatthāya āvatto. Apica kho āsanaṃ ṭhapetabbanti apica kho panassa uccakule nibbattassa āsanamattaṃ ṭhapetabbanti vadiṃsu. Nāsakkhiṃsūti buddhānubhāvena buddhatejasā abhibhūtā attano katikāya ṭhātuṃ nāsakkhiṃsu. Nāmena ca āvusovādena ca samudācarantīti gotamāti, āvusoti ca vadanti. Āvuso gotama, mayaṃ uruvelāyaṃ padhānakāle tuyhaṃ pattacīvaraṃ gahetvā vicarimhā, mukhodakaṃ dantakaṭṭhaṃ adamhā, vutthapariveṇaṃ sammajjimhā, pacchā ko te vattappaṭipattimakāsi, kacci amhesu pakkantesu na cintayitthāti evarūpiṃ kathaṃ kathentīti attho. Iriyāyāti dukkarairiyāya. Paṭipadāyāti dukkarapaṭipattiyā. Dukkarakārikāyāti pasatapasata-muggayūsādiāharakaraṇādinā dukkarakaraṇena. Abhijānātha me noti abhijānātha nu mama. Evarūpaṃ pabhāvitametanti etaṃ evarūpaṃ vākyabhedanti attho. Api nu ahaṃ uruvelāya padhāne tumhākaṃ saṅgaṇhanatthaṃ anukkaṇṭhanatthaṃ rattiṃ vā divā vā āgantvā, – ‘‘āvuso, mā vitakkayittha, mayhaṃ obhāso vā nimittaṃ vā paññāyatī’’ti evarūpaṃ kañci vacanabhedaṃ akāsinti adhippāyo. Te ekapadeneva satiṃ labhitvā uppannagāravā, ‘‘handa addhā esa buddho jāto’’ti saddahitvā no hetaṃ, bhanteti āhaṃsu. Asakkhiṃ kho ahaṃ, bhikkhave, pañcavaggiye bhikkhū saññāpetunti ahaṃ , bhikkhave, pañcavaggiye bhikkhū buddho ahanti jānāpetuṃ asakkhiṃ. Tadā pana bhagavā uposathadivaseyeva āgacchi. Attano buddhabhāvaṃ jānāpetvā koṇḍaññattheraṃ kāyasakkhiṃ katvā dhammacakkappavattanasuttaṃ kathesi. Suttapariyosāne thero aṭṭhārasahi brahmakoṭīhi saddhiṃ sotāpattiphale patiṭṭhāsi. Sūriye dharamāneyeva desanā niṭṭhāsi. Bhagavā tattheva vassaṃ upagacchi.

    དྭེཔི སུདཾ, བྷིཀྑཝེ, བྷིཀྑཱུ ཨོཝདཱམཱིཏིཨཱདི པཱཊིཔདདིཝསཏོ པཊྛཱཡ པིཎྜཔཱཏཏྠཱཡཔི གཱམཾ ཨཔྤཝིསནདཱིཔནཏྠཾ ཝུཏྟཾ། ཏེསཉྷི བྷིཀྑཱུནཾ ཀམྨཊྛཱནེསུ ཨུཔྤནྣམལཝིསོདྷནཏྠཾ བྷགཝཱ ཨནྟོཝིཧཱརེཡེཝ ཨཧོསི། ཨུཔྤནྣེ ཨུཔྤནྣེ ཀམྨཊྛཱནམལེ ཏེཔི བྷིཀྑཱུ བྷགཝཏོ སནྟིཀཾ གནྟྭཱ པུཙྪནྟི། བྷགཝཱཔི ཏེསཾ ནིསིནྣཊྛཱནཾ གནྟྭཱ མལཾ ཝིནོདེཏི། ཨཐ ནེསཾ བྷགཝཏཱ ཨེཝཾ ནཱིཧཊབྷཏྟེན ཨོཝདིཡམཱནཱནཾ ཝཔྤཏྠེརོ པཱཊིཔདདིཝསེ སོཏཱཔནྣོ ཨཧོསི། བྷདྡིཡཏྠེརོ དུཏིཡཱཡཾ, མཧཱནཱམཏྠེརོ ཏཏིཡཱཡཾ, ཨསྶཛིཏྠེརོ ཙཏུཏྠིཡཾ། པཀྑསྶ པན པཉྩམིཡཾ སབྦེཝ ཏེ ཨེཀཏོ སནྣིཔཱཏེཏྭཱ ཨནཏྟལཀྑཎསུཏྟཾ ཀཐེསི, སུཏྟཔརིཡོསཱནེ སབྦེཔི ཨརཧཏྟཕལེ པཏིཊྛཧིཾསུ། ཏེནཱཧ – ‘‘ཨཐ ཁོ, བྷིཀྑཝེ, པཉྩཝགྒིཡཱ བྷིཀྑཱུ མཡཱ ཨེཝཾ ཨོཝདིཡམཱནཱ…པེ॰… ཨནུཏྟརཾ ཡོགཀྑེམཾ ནིབྦཱནཾ ཨཛ྄ཛྷགམཾསུ…པེ॰… ནཏྠི དཱནི པུནབྦྷཝོ’’ཏི། ཨེཏྟཀཾ ཀཐཱམགྒཾ བྷགཝཱ ཡཾ པུབྦེ ཨཝཙ – ‘‘ཏུམྷེཔི མམཉྩེཝ པཉྩཝགྒིཡཱནཉྩ མགྒཾ ཨཱརུལ༹ྷཱ, ཨརིཡཔརིཡེསནཱ ཏུམྷཱཀཾ པརིཡེསནཱ’’ཏི ཨིམཾ ཨེཀམེཝ ཨནུསནྡྷིཾ དསྶེནྟོ ཨཱཧརི།

    Dvepi sudaṃ, bhikkhave, bhikkhū ovadāmītiādi pāṭipadadivasato paṭṭhāya piṇḍapātatthāyapi gāmaṃ appavisanadīpanatthaṃ vuttaṃ. Tesañhi bhikkhūnaṃ kammaṭṭhānesu uppannamalavisodhanatthaṃ bhagavā antovihāreyeva ahosi. Uppanne uppanne kammaṭṭhānamale tepi bhikkhū bhagavato santikaṃ gantvā pucchanti. Bhagavāpi tesaṃ nisinnaṭṭhānaṃ gantvā malaṃ vinodeti. Atha nesaṃ bhagavatā evaṃ nīhaṭabhattena ovadiyamānānaṃ vappatthero pāṭipadadivase sotāpanno ahosi. Bhaddiyatthero dutiyāyaṃ, mahānāmatthero tatiyāyaṃ, assajitthero catutthiyaṃ. Pakkhassa pana pañcamiyaṃ sabbeva te ekato sannipātetvā anattalakkhaṇasuttaṃ kathesi, suttapariyosāne sabbepi arahattaphale patiṭṭhahiṃsu. Tenāha – ‘‘atha kho, bhikkhave, pañcavaggiyā bhikkhū mayā evaṃ ovadiyamānā…pe… anuttaraṃ yogakkhemaṃ nibbānaṃ ajjhagamaṃsu…pe… natthi dāni punabbhavo’’ti. Ettakaṃ kathāmaggaṃ bhagavā yaṃ pubbe avaca – ‘‘tumhepi mamañceva pañcavaggiyānañca maggaṃ āruḷhā, ariyapariyesanā tumhākaṃ pariyesanā’’ti imaṃ ekameva anusandhiṃ dassento āhari.

    ༢༨༧. ཨིདཱནི ཡསྨཱ ན ཨགཱརིཡཱནཾཡེཝ པཉྩཀཱམགུཎཔརིཡེསནཱ ཧོཏི, ཨནགཱརིཡཱནམྤི ཙཏྟཱརོ པཙྩཡེ ཨཔྤཙྩཝེཀྑིཏྭཱ པརིབྷུཉྫནྟཱནཾ པཉྩཀཱམགུཎཝསེན ཨནརིཡཔརིཡེསནཱ ཧོཏི, ཏསྨཱ ཏཾ དསྶེཏུཾ པཉྩིམེ, བྷིཀྑཝེ, ཀཱམགུཎཱཏིཨཱདིམཱཧ། ཏཏྠ ནཝརཏྟེསུ པཏྟཙཱིཝརཱདཱིསུ ཙཀྑུཝིཉྙེཡྻཱ རཱུཔཱཏིཨཱདཡོ ཙཏྟཱརོ ཀཱམགུཎཱ ལབྦྷནྟི། རསོ པནེཏྠ པརིབྷོགརསོ ཧོཏི། མནུཉྙེ པིཎྜཔཱཏེ བྷེསཛྫེ ཙ པཉྩཔི ལབྦྷནྟི། སེནཱསནམྷི ཙཱིཝརེ ཝིཡ ཙཏྟཱརོ། རསོ པན ཨེཏྠཱཔི པརིབྷོགརསོཝ། ཡེ ཧི ཀེཙི, བྷིཀྑཝེཏི ཀསྨཱ ཨཱརབྷི? ཨེཝཾ པཉྩ ཀཱམགུཎེ དསྶེཏྭཱ ཨིདཱནི ཡེ ཨེཝཾ ཝདེཡྻུཾ, ‘‘པབྦཛིཏཀཱལཏོ པཊྛཱཡ ཨནརིཡཔརིཡེསནཱ ནཱམ ཀུཏོ, ཨརིཡཔརིཡེསནཱཝ པབྦཛིཏཱན’’ནྟི, ཏེསཾ པཊིསེདྷནཏྠཱཡ ‘‘པབྦཛིཏཱནམྤི ཙཏཱུསུ པཙྩཡེསུ ཨཔྤཙྩཝེཀྑཎཔརིབྷོགོ ཨནརིཡཔརིཡེསནཱ ཨེཝཱ’’ཏི དསྶེཏུཾ ཨིམཾ དེསནཾ ཨཱརབྷི། ཏཏྠ གདྷིཏཱཏི ཏཎྷཱགེདྷེན གདྷིཏཱ། མུཙྪིཏཱཏི ཏཎྷཱམུཙྪཱཡ མུཙྪིཏཱ ། ཨཛ྄ཛྷོཔནྣཱཏི ཏཎྷཱཡ ཨཛ྄ཛྷོགཱལ༹ྷཱ། ཨནཱདཱིནཝདསྶཱཝིནོཏི ཨཱདཱིནཝཾ ཨཔསྶནྟཱ། ཨནིསྶརཎཔཉྙཱཏི ནིསྶརཎཾ ཝུཙྩཏི པཙྩཝེཀྑཎཉཱཎཾ། ཏེ ཏེན ཝིརཧིཏཱ།

    287. Idāni yasmā na agāriyānaṃyeva pañcakāmaguṇapariyesanā hoti, anagāriyānampi cattāro paccaye appaccavekkhitvā paribhuñjantānaṃ pañcakāmaguṇavasena anariyapariyesanā hoti, tasmā taṃ dassetuṃ pañcime, bhikkhave, kāmaguṇātiādimāha. Tattha navarattesu pattacīvarādīsu cakkhuviññeyyā rūpātiādayo cattāro kāmaguṇā labbhanti. Raso panettha paribhogaraso hoti. Manuññe piṇḍapāte bhesajje ca pañcapi labbhanti. Senāsanamhi cīvare viya cattāro. Raso pana etthāpi paribhogarasova. Ye hi keci, bhikkhaveti kasmā ārabhi? Evaṃ pañca kāmaguṇe dassetvā idāni ye evaṃ vadeyyuṃ, ‘‘pabbajitakālato paṭṭhāya anariyapariyesanā nāma kuto, ariyapariyesanāva pabbajitāna’’nti, tesaṃ paṭisedhanatthāya ‘‘pabbajitānampi catūsu paccayesu appaccavekkhaṇaparibhogo anariyapariyesanā evā’’ti dassetuṃ imaṃ desanaṃ ārabhi. Tattha gadhitāti taṇhāgedhena gadhitā. Mucchitāti taṇhāmucchāya mucchitā . Ajjhopannāti taṇhāya ajjhogāḷhā. Anādīnavadassāvinoti ādīnavaṃ apassantā. Anissaraṇapaññāti nissaraṇaṃ vuccati paccavekkhaṇañāṇaṃ. Te tena virahitā.

    ཨིདཱནི ཏསྶཏྠསྶ སཱདྷཀཾ ཨུཔམཾ དསྶེནྟོ སེཡྻཐཱཔི, བྷིཀྑཝེཏིཨཱདིམཱཧ། ཏཏྲེཝཾ ཨོཔམྨསཾསནྡནཾ ཝེདིཏབྦཾ – ཨཱརཉྙཀམགོ ཝིཡ ཧི སམཎབྲཱཧྨཎཱ, ལུདྡཀེན ཨརཉྙེ ཋཔིཏཔཱསོ ཝིཡ ཙཏྟཱརོ པཙྩཡཱ, ཏསྶ ལུདྡསྶ པཱསརཱསིཾ ཨཛ྄ཛྷོཏྠརིཏྭཱ སཡནཀཱལོ ཝིཡ ཏེསཾ ཙཏྟཱརོ པཙྩཡེ ཨཔྤཙྩཝེཀྑིཏྭཱ པརིབྷོགཀཱལོ། ལུདྡཀེ ཨཱགཙྪནྟེ མགསྶ ཡེན ཀཱམཾ ཨགམནཀཱལོ ཝིཡ སམཎབྲཱཧྨཎཱནཾ མཱརསྶ ཡཐཱཀཱམཀརཎཱིཡཀཱལོ, མཱརཝསཾ ཨུཔགཏབྷཱཝོཏི ཨཏྠོ། མགསྶ པན ཨབདྡྷསྶ པཱསརཱསིཾ ཨདྷིསཡིཏཀཱལོ ཝིཡ སམཎབྲཱཧྨཎཱནཾ ཙཏཱུསུ པཙྩཡེསུ པཙྩཝེཀྑཎཔརིབྷོགོ, ལུདྡཀེ ཨཱགཙྪནྟེ མགསྶ ཡེན ཀཱམཾ གམནཾ ཝིཡ སམཎབྲཱཧྨཎཱནཾ མཱརཝསཾ ཨནུཔགམནཾ ཝེདིཏབྦཾ། ཝིསྶཏྠོཏི ནིབྦྷཡོ ནིརཱསངྐོ། སེསཾ སབྦཏྠ ཨུཏྟཱནཏྠམེཝཱཏི།

    Idāni tassatthassa sādhakaṃ upamaṃ dassento seyyathāpi, bhikkhavetiādimāha. Tatrevaṃ opammasaṃsandanaṃ veditabbaṃ – āraññakamago viya hi samaṇabrāhmaṇā, luddakena araññe ṭhapitapāso viya cattāro paccayā, tassa luddassa pāsarāsiṃ ajjhottharitvā sayanakālo viya tesaṃ cattāro paccaye appaccavekkhitvā paribhogakālo. Luddake āgacchante magassa yena kāmaṃ agamanakālo viya samaṇabrāhmaṇānaṃ mārassa yathākāmakaraṇīyakālo, māravasaṃ upagatabhāvoti attho. Magassa pana abaddhassa pāsarāsiṃ adhisayitakālo viya samaṇabrāhmaṇānaṃ catūsu paccayesu paccavekkhaṇaparibhogo, luddake āgacchante magassa yena kāmaṃ gamanaṃ viya samaṇabrāhmaṇānaṃ māravasaṃ anupagamanaṃ veditabbaṃ. Vissatthoti nibbhayo nirāsaṅko. Sesaṃ sabbattha uttānatthamevāti.

    པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ

    Papañcasūdaniyā majjhimanikāyaṭṭhakathāya

    པཱསརཱསིསུཏྟཝཎྞནཱ ནིཊྛིཏཱ།

    Pāsarāsisuttavaṇṇanā niṭṭhitā.

    ཨརིཡཔརིཡེསནཱཏིཔི ཨེཏསྶེཝ ནཱམཾ།

    Ariyapariyesanātipi etasseva nāmaṃ.




    Next: ༧. ཙཱུལ༹ཧཏྠིཔདོཔམསུཏྟཝཎྞནཱ • 7. Cūḷahatthipadopamasuttavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༦. པཱསརཱསིསུཏྟཾ • 6. Pāsarāsisuttaṃ

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༦. པཱསརཱསིསུཏྟཝཎྞནཱ • 6. Pāsarāsisuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact