| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
பஸ்ஸத்³தா⁴தி³யுக³லவண்ணனா
Passaddhādiyugalavaṇṇanā
காயஸ்ஸ பஸ்ஸம்ப⁴னங் காயபஸ்ஸத்³தி⁴. சித்தஸ்ஸ பஸ்ஸம்ப⁴னங் சித்தபஸ்ஸத்³தி⁴. காயோதி செத்த² வேத³னாத³யோ தயோ க²ந்தா⁴. உபோ⁴பி பனேதா ஏகதோ கத்வா காயசித்தத³ரத²வூபஸமலக்க²ணா காயசித்தபஸ்ஸத்³தி⁴யோ, காயசித்தத³ரத²னிம்மத்³த³னரஸா, காயசித்தானங் அபரிப்ப²ந்த³ஸீதிபா⁴வபச்சுபட்டா²னா, காயசித்தபத³ட்டா²னா. காயசித்தானங் அவூபஸமகரஉத்³த⁴ச்சாதி³கிலேஸபடிபக்க²பூ⁴தாதி த³ட்ட²ப்³பா³.
Kāyassa passambhanaṃ kāyapassaddhi. Cittassa passambhanaṃ cittapassaddhi. Kāyoti cettha vedanādayo tayo khandhā. Ubhopi panetā ekato katvā kāyacittadarathavūpasamalakkhaṇā kāyacittapassaddhiyo, kāyacittadarathanimmaddanarasā, kāyacittānaṃ aparipphandasītibhāvapaccupaṭṭhānā, kāyacittapadaṭṭhānā. Kāyacittānaṃ avūpasamakarauddhaccādikilesapaṭipakkhabhūtāti daṭṭhabbā.
காயஸ்ஸ லஹுபா⁴வோ காயலஹுதா. சித்தஸ்ஸ லஹுபா⁴வோ சித்தலஹுதா. தா காயசித்தக³ருபா⁴வவூபஸமலக்க²ணா, காயசித்தக³ருபா⁴வனிம்மத்³த³னரஸா, காயசித்தானங் அத³ந்த⁴தாபச்சுபட்டா²னா, காயசித்தபத³ட்டா²னா. காயசித்தானங் க³ருபா⁴வகரதி²னமித்³தா⁴தி³கிலேஸபடிபக்க²பூ⁴தாதி த³ட்ட²ப்³பா³.
Kāyassa lahubhāvo kāyalahutā. Cittassa lahubhāvo cittalahutā. Tā kāyacittagarubhāvavūpasamalakkhaṇā, kāyacittagarubhāvanimmaddanarasā, kāyacittānaṃ adandhatāpaccupaṭṭhānā, kāyacittapadaṭṭhānā. Kāyacittānaṃ garubhāvakarathinamiddhādikilesapaṭipakkhabhūtāti daṭṭhabbā.
காயஸ்ஸ முது³பா⁴வோ காயமுது³தா. சித்தஸ்ஸ முது³பா⁴வோ சித்தமுது³தா. தா காயசித்தத²த்³த⁴பா⁴வவூபஸமலக்க²ணா, காயசித்தத²த்³த⁴பா⁴வனிம்மத்³த³னரஸா, அப்படிகா⁴தபச்சுபட்டா²னா, காயசித்தபத³ட்டா²னா. காயசித்தானங் த²த்³த⁴பா⁴வகரதி³ட்டி²மானாதி³கிலேஸபடிபக்க²பூ⁴தாதி த³ட்ட²ப்³பா³.
Kāyassa mudubhāvo kāyamudutā. Cittassa mudubhāvo cittamudutā. Tā kāyacittathaddhabhāvavūpasamalakkhaṇā, kāyacittathaddhabhāvanimmaddanarasā, appaṭighātapaccupaṭṭhānā, kāyacittapadaṭṭhānā. Kāyacittānaṃ thaddhabhāvakaradiṭṭhimānādikilesapaṭipakkhabhūtāti daṭṭhabbā.
காயஸ்ஸ கம்மஞ்ஞபா⁴வோ காயகம்மஞ்ஞதா. சித்தஸ்ஸ கம்மஞ்ஞபா⁴வோ சித்தகம்மஞ்ஞதா. தா காயசித்தஅகம்மஞ்ஞபா⁴வவூபஸமலக்க²ணா, காயசித்தானங் அகம்மஞ்ஞபா⁴வனிம்மத்³த³னரஸா, காயசித்தானங் ஆரம்மணகரணஸம்பத்திபச்சுபட்டா²னா, காயசித்தபத³ட்டா²னா. காயசித்தானங் அகம்மஞ்ஞபா⁴வகராவஸேஸனீவரணபடிபக்க²பூ⁴தாதி த³ட்ட²ப்³பா³. தா பஸாத³னீயவத்தூ²ஸு பஸாதா³வஹா, ஹிதகிரியாஸு வினியோக³க்கே²மபா⁴வாவஹா ஸுவண்ணவிஸுத்³தி⁴ வியாதி த³ட்ட²ப்³பா³.
Kāyassa kammaññabhāvo kāyakammaññatā. Cittassa kammaññabhāvo cittakammaññatā. Tā kāyacittaakammaññabhāvavūpasamalakkhaṇā, kāyacittānaṃ akammaññabhāvanimmaddanarasā, kāyacittānaṃ ārammaṇakaraṇasampattipaccupaṭṭhānā, kāyacittapadaṭṭhānā. Kāyacittānaṃ akammaññabhāvakarāvasesanīvaraṇapaṭipakkhabhūtāti daṭṭhabbā. Tā pasādanīyavatthūsu pasādāvahā, hitakiriyāsu viniyogakkhemabhāvāvahā suvaṇṇavisuddhi viyāti daṭṭhabbā.
காயஸ்ஸ பாகு³ஞ்ஞபா⁴வோ காயபாகு³ஞ்ஞதா. சித்தஸ்ஸ பாகு³ஞ்ஞபா⁴வோ சித்தபாகு³ஞ்ஞதா. தா காயசித்தானங் அகே³லஞ்ஞபா⁴வலக்க²ணா, காயசித்தகே³லஞ்ஞனிம்மத்³த³னரஸா, நிராதீ³னவபச்சுபட்டா²னா, காயசித்தபத³ட்டா²னா. காயசித்தகே³லஞ்ஞகரஅஸ்ஸத்³தி⁴யாதி³கிலேஸபடிபக்க²பூ⁴தாதி த³ட்ட²ப்³பா³.
Kāyassa pāguññabhāvo kāyapāguññatā. Cittassa pāguññabhāvo cittapāguññatā. Tā kāyacittānaṃ agelaññabhāvalakkhaṇā, kāyacittagelaññanimmaddanarasā, nirādīnavapaccupaṭṭhānā, kāyacittapadaṭṭhānā. Kāyacittagelaññakaraassaddhiyādikilesapaṭipakkhabhūtāti daṭṭhabbā.
காயஸ்ஸ உஜுகபா⁴வோ காயுஜுகதா. சித்தஸ்ஸ உஜுகபா⁴வோ சித்துஜுகதா. தா காயசித்தானங் அஜ்ஜவலக்க²ணா, காயசித்தகுடிலபா⁴வனிம்மத்³த³னரஸா, அஜிம்ஹதாபச்சுபட்டா²னா, காயசித்தபத³ட்டா²னா. காயசித்தானங் குடிலபா⁴வகரமாயாஸாடெ²ய்யாதி³கிலேஸபடிபக்க²பூ⁴தாதி த³ட்ட²ப்³பா³.
Kāyassa ujukabhāvo kāyujukatā. Cittassa ujukabhāvo cittujukatā. Tā kāyacittānaṃ ajjavalakkhaṇā, kāyacittakuṭilabhāvanimmaddanarasā, ajimhatāpaccupaṭṭhānā, kāyacittapadaṭṭhānā. Kāyacittānaṃ kuṭilabhāvakaramāyāsāṭheyyādikilesapaṭipakkhabhūtāti daṭṭhabbā.
ஸரதீதி ஸதி. ஸம்பஜானாதீதி ஸம்பஜஞ்ஞங்; ஸமந்ததோ பகாரேஹி ஜானாதீதி அத்தோ². ஸாத்த²கஸம்பஜஞ்ஞங் ஸப்பாயஸம்பஜஞ்ஞங் கோ³சரஸம்பஜஞ்ஞங் அஸம்மோஹஸம்பஜஞ்ஞந்தி இமேஸங் சதுன்னங் பனஸ்ஸ வஸேன பே⁴தோ³ வேதி³தப்³போ³. லக்க²ணாதீ³னி ச தேஸங் ஸதிந்த்³ரியபஞ்ஞிந்த்³ரியேஸு வுத்தனயேனேவ வேதி³தப்³பா³னி. இதி ஹெட்டா² வுத்தமேவேதங் த⁴ம்மத்³வயங் புன இமஸ்மிங் டா²னே உபகாரவஸேன க³ஹிதங்.
Saratīti sati. Sampajānātīti sampajaññaṃ; samantato pakārehi jānātīti attho. Sātthakasampajaññaṃ sappāyasampajaññaṃ gocarasampajaññaṃ asammohasampajaññanti imesaṃ catunnaṃ panassa vasena bhedo veditabbo. Lakkhaṇādīni ca tesaṃ satindriyapaññindriyesu vuttanayeneva veditabbāni. Iti heṭṭhā vuttamevetaṃ dhammadvayaṃ puna imasmiṃ ṭhāne upakāravasena gahitaṃ.
காமச்ச²ந்தா³த³யோ பச்சனீகத⁴ம்மே ஸமேதீதி ஸமதோ². அனிச்சாதி³வஸேன விவிதே⁴ஹி ஆகாரேஹி த⁴ம்மே பஸ்ஸதீதி விபஸ்ஸனா. பஞ்ஞாவேஸா அத்த²தோ. இமேஸம்பி த்³வின்னங் லக்க²ணாதீ³னி ஹெட்டா² வுத்தானேவ. இத⁴ பனேதே யுக³னத்³த⁴வஸேன க³ஹிதா.
Kāmacchandādayo paccanīkadhamme sametīti samatho. Aniccādivasena vividhehi ākārehi dhamme passatīti vipassanā. Paññāvesā atthato. Imesampi dvinnaṃ lakkhaṇādīni heṭṭhā vuttāneva. Idha panete yuganaddhavasena gahitā.
ஸஹஜாதத⁴ம்மே பக்³க³ண்ஹாதீதி பக்³கா³ஹோ. உத்³த⁴ச்சஸங்கா²தஸ்ஸ விக்கே²பஸ்ஸ படிபக்க²பா⁴வதோ ந விக்கே²போதி அவிக்கே²போ. ஏதேஸம்பி லக்க²ணாதீ³னி ஹெட்டா² வுத்தானேவ. இத⁴ பனேதங் த்³வயங் வீரியஸமாதி⁴யோஜனத்தா²ய க³ஹிதந்தி வேதி³தப்³ப³ங்.
Sahajātadhamme paggaṇhātīti paggāho. Uddhaccasaṅkhātassa vikkhepassa paṭipakkhabhāvato na vikkhepoti avikkhepo. Etesampi lakkhaṇādīni heṭṭhā vuttāneva. Idha panetaṃ dvayaṃ vīriyasamādhiyojanatthāya gahitanti veditabbaṃ.
