| Library / Tipiṭaka / திபிடக • Tipiṭaka / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā |
பஸ்ஸத்³தா⁴தி³யுக³லவண்ணனா
Passaddhādiyugalavaṇṇanā
த³ரதோ² ஸாரம்போ⁴, து³க்க²தோ³மனஸ்ஸபச்சயானங் உத்³த⁴ச்சாதி³கானங் கிலேஸானங் சதுன்னங் வா க²ந்தா⁴னங் ஏதங் அதி⁴வசனங். உத்³த⁴ச்சப்பதா⁴னா கிலேஸா உத்³த⁴ச்சாதி³கிலேஸா, உத்³த⁴ச்சங் வா ஆதி³ங் கத்வா ஸப்³ப³கிலேஸே ஸங்க³ண்ஹாதி. ஸுவண்ணவிஸுத்³தி⁴ வியாதி யதா² ஸுவண்ணவிஸுத்³தி⁴ அலங்காரவிகதிவினியோக³க்க²மா, ஏவங் அயம்பி ஹிதகிரியாவினியோக³க்க²மா.
Daratho sārambho, dukkhadomanassapaccayānaṃ uddhaccādikānaṃ kilesānaṃ catunnaṃ vā khandhānaṃ etaṃ adhivacanaṃ. Uddhaccappadhānā kilesā uddhaccādikilesā, uddhaccaṃ vā ādiṃ katvā sabbakilese saṅgaṇhāti. Suvaṇṇavisuddhi viyāti yathā suvaṇṇavisuddhi alaṅkāravikativiniyogakkhamā, evaṃ ayampi hitakiriyāviniyogakkhamā.
ஸமங் , ஸமந்ததோ வா பகாரேஹி ஜானநங் ஸம்பஜஞ்ஞங். சேதியவந்த³னாதி³அத்த²ங் அபி⁴க்கமாதீ³ஸு அத்தா²னத்த²பரிக்³க³ண்ஹனங் ஸாத்த²கஸம்பஜஞ்ஞங். ஸதி ச அத்தே² ஸப்பாயாஸப்பாயரூபாதி³பரிக்³க³ண்ஹனங் ஸப்பாயஸம்பஜஞ்ஞங். கோ³சரகா³மாபி⁴க்கமனாதீ³ஸு கம்மட்டா²னாவிஜஹனங் கோ³சரஸம்பஜஞ்ஞங். அபி⁴க்கமனாதீ³னங் தா⁴துஆதி³வஸேன பவிசயோ அஸம்மோஹஸம்பஜஞ்ஞங். ஸப்³ப³கம்மட்டா²னபா⁴வனானுயுத்தானங் ஸப்³ப³யோகீ³னங் ஸப்³ப³தா³ உபகாரகா இமே த்³வே த⁴ம்மா பாரிபந்த²கஹரணதோ பா⁴வனாவட்³ட⁴னதோ ச. யதா²ஹ ‘‘த்³வே த⁴ம்மா ப³ஹுகாரா ஸதி ச ஸம்பஜஞ்ஞஞ்சா’’தி (தீ³॰ நி॰ 3.352). யுகே³ நத்³தா⁴ வியாதி யுக³னத்³தா⁴, அஞ்ஞமஞ்ஞங் நிமித்தபா⁴வேன ஸமங் பவத்தாதி அத்தோ². ‘‘புன சபரங், ஆவுஸோ, பி⁴க்கு² ஸமத²விபஸ்ஸனங் யுக³னத்³த⁴ங் பா⁴வேதீ’’தி (அ॰ நி॰ 4.170; படி॰ ம॰ 2.1) ஹி ஸுத்தே ஏதேஸங் யுக³னத்³த⁴தா வுத்தா. ஸப்³ப³குஸலத⁴ம்மேஸு லீனுத்³த⁴ச்சாபா⁴வோ ஏதேஹி த்³வீஹி ஸமங் யுத்தேஹீதி ‘‘வீரியஸமாதி⁴யோஜனத்தா²யா’’தி ஆஹ, யோக³வசனத்தா²யாதி அத்தோ².
Samaṃ , samantato vā pakārehi jānanaṃ sampajaññaṃ. Cetiyavandanādiatthaṃ abhikkamādīsu atthānatthapariggaṇhanaṃ sātthakasampajaññaṃ. Sati ca atthe sappāyāsappāyarūpādipariggaṇhanaṃ sappāyasampajaññaṃ. Gocaragāmābhikkamanādīsu kammaṭṭhānāvijahanaṃ gocarasampajaññaṃ. Abhikkamanādīnaṃ dhātuādivasena pavicayo asammohasampajaññaṃ. Sabbakammaṭṭhānabhāvanānuyuttānaṃ sabbayogīnaṃ sabbadā upakārakā ime dve dhammā pāripanthakaharaṇato bhāvanāvaḍḍhanato ca. Yathāha ‘‘dve dhammā bahukārā sati ca sampajaññañcā’’ti (dī. ni. 3.352). Yuge naddhā viyāti yuganaddhā, aññamaññaṃ nimittabhāvena samaṃ pavattāti attho. ‘‘Puna caparaṃ, āvuso, bhikkhu samathavipassanaṃ yuganaddhaṃ bhāvetī’’ti (a. ni. 4.170; paṭi. ma. 2.1) hi sutte etesaṃ yuganaddhatā vuttā. Sabbakusaladhammesu līnuddhaccābhāvo etehi dvīhi samaṃ yuttehīti ‘‘vīriyasamādhiyojanatthāyā’’ti āha, yogavacanatthāyāti attho.
Related texts:
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / பஸ்ஸத்³தா⁴தி³யுக³லவண்ணனா • Passaddhādiyugalavaṇṇanā
