| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
८. पसूरसुत्तं
8. Pasūrasuttaṃ
८३०.
830.
इधेव सुद्धि इति वादयन्ति 1, नाञ्ञेसु धम्मेसु विसुद्धिमाहु।
Idheva suddhi iti vādayanti 2, nāññesu dhammesu visuddhimāhu;
यं निस्सिता तत्थ सुभं वदाना, पच्चेकसच्चेसु पुथू निविट्ठा॥
Yaṃ nissitā tattha subhaṃ vadānā, paccekasaccesu puthū niviṭṭhā.
८३१.
831.
ते वादकामा परिसं विगय्ह, बालं दहन्ती मिथु अञ्ञमञ्ञं।
Te vādakāmā parisaṃ vigayha, bālaṃ dahantī mithu aññamaññaṃ;
वदन्ति ते अञ्ञसिता कथोज्जं, पसंसकामा कुसला वदाना॥
Vadanti te aññasitā kathojjaṃ, pasaṃsakāmā kusalā vadānā.
८३२.
832.
युत्तो कथायं परिसाय मज्झे, पसंसमिच्छं विनिघाति होति।
Yutto kathāyaṃ parisāya majjhe, pasaṃsamicchaṃ vinighāti hoti;
अपाहतस्मिं पन मङ्कु होति, निन्दाय सो कुप्पति रन्धमेसी॥
Apāhatasmiṃ pana maṅku hoti, nindāya so kuppati randhamesī.
८३३.
833.
यमस्स वादं परिहीनमाहु, अपाहतं पञ्हविमंसकासे।
Yamassa vādaṃ parihīnamāhu, apāhataṃ pañhavimaṃsakāse;
परिदेवति सोचति हीनवादो, उपच्चगा मन्ति अनुत्थुनाति॥
Paridevati socati hīnavādo, upaccagā manti anutthunāti.
८३४.
834.
एते विवादा समणेसु जाता, एतेसु उग्घाति निघाति होति।
Ete vivādā samaṇesu jātā, etesu ugghāti nighāti hoti;
एतम्पि दिस्वा विरमे कथोज्जं, न हञ्ञदत्थत्थिपसंसलाभा॥
Etampi disvā virame kathojjaṃ, na haññadatthatthipasaṃsalābhā.
८३५.
835.
पसंसितो वा पन तत्थ होति, अक्खाय वादं परिसाय मज्झे।
Pasaṃsito vā pana tattha hoti, akkhāya vādaṃ parisāya majjhe;
सो हस्सती उण्णमती 3 च तेन, पप्पुय्य तमत्थं यथा मनो अहु॥
So hassatī uṇṇamatī 4 ca tena, pappuyya tamatthaṃ yathā mano ahu.
८३६.
836.
या उण्णती 5 सास्स विघातभूमि, मानातिमानं वदते पनेसो।
Yā uṇṇatī 6 sāssa vighātabhūmi, mānātimānaṃ vadate paneso;
एतम्पि दिस्वा न विवादयेथ, न हि तेन सुद्धिं कुसला वदन्ति॥
Etampi disvā na vivādayetha, na hi tena suddhiṃ kusalā vadanti.
८३७.
837.
सूरो यथा राजखादाय पुट्ठो, अभिगज्जमेति पटिसूरमिच्छं।
Sūro yathā rājakhādāya puṭṭho, abhigajjameti paṭisūramicchaṃ;
येनेव सो तेन पलेहि सूर, पुब्बेव नत्थि यदिदं युधाय॥
Yeneva so tena palehi sūra, pubbeva natthi yadidaṃ yudhāya.
८३८.
838.
ये दिट्ठिमुग्गय्ह विवादयन्ति 7, इदमेव सच्चन्ति च वादयन्ति।
Ye diṭṭhimuggayha vivādayanti 8, idameva saccanti ca vādayanti;
ते त्वं वदस्सू न हि तेध अत्थि, वादम्हि जाते पटिसेनिकत्ता॥
Te tvaṃ vadassū na hi tedha atthi, vādamhi jāte paṭisenikattā.
८३९.
839.
विसेनिकत्वा पन ये चरन्ति, दिट्ठीहि दिट्ठिं अविरुज्झमाना।
Visenikatvā pana ye caranti, diṭṭhīhi diṭṭhiṃ avirujjhamānā;
तेसु त्वं किं लभेथो पसूर, येसीध नत्थी परमुग्गहीतं॥
Tesu tvaṃ kiṃ labhetho pasūra, yesīdha natthī paramuggahītaṃ.
८४०.
840.
अथ त्वं पवितक्कमागमा, मनसा दिट्ठिगतानि चिन्तयन्तो।
Atha tvaṃ pavitakkamāgamā, manasā diṭṭhigatāni cintayanto;
धोनेन युगं समागमा, न हि त्वं सक्खसि सम्पयातवेति॥
Dhonena yugaṃ samāgamā, na hi tvaṃ sakkhasi sampayātaveti.
पसूरसुत्तं अट्ठमं निट्ठितं।
Pasūrasuttaṃ aṭṭhamaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ८. पसूरसुत्तवण्णना • 8. Pasūrasuttavaṇṇanā
