| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๔. ปาตาลสุตฺตํ
4. Pātālasuttaṃ
๒๕๒. ‘‘อสฺสุตวา , ภิกฺขเว, ปุถุชฺชโน ยํ วาจํ ภาสติ – ‘อตฺถิ มหาสมุเทฺท ปาตาโล’ติฯ ตํ โข ปเนตํ, ภิกฺขเว, อสฺสุตวา ปุถุชฺชโน อสนฺตํ อวิชฺชมานํ เอวํ วาจํ ภาสติ – ‘อตฺถิ มหาสมุเทฺท ปาตาโล’ติฯ สารีริกานํ โข เอตํ, ภิกฺขเว, ทุกฺขานํ เวทนานํ อธิวจนํ ยทิทํ ‘ปาตาโล’ติฯ อสฺสุตวา, ภิกฺขเว, ปุถุชฺชโน สารีริกาย ทุกฺขาย เวทนาย ผุโฎฺฐ สมาโน โสจติ กิลมติ ปริเทวติ อุรตฺตาฬิํ กนฺทติ สโมฺมหํ อาปชฺชติฯ อยํ วุจฺจติ, ภิกฺขเว, ‘อสฺสุตวา ปุถุชฺชโน ปาตาเล น ปจฺจุฎฺฐาสิ, คาธญฺจ นาชฺฌคา’ฯ สุตวา จ โข, ภิกฺขเว, อริยสาวโก สารีริกาย ทุกฺขาย เวทนาย ผุโฎฺฐ สมาโน เนว โสจติ, น กิลมติ, น ปริเทวติ, น อุรตฺตาฬิํ กนฺทติ, น สโมฺมหํ อาปชฺชติฯ อยํ วุจฺจติ, ภิกฺขเว, ‘สุตวา อริยสาวโก ปาตาเล ปจฺจุฎฺฐาสิ, คาธญฺจ อชฺฌคา’’’ติฯ
252. ‘‘Assutavā , bhikkhave, puthujjano yaṃ vācaṃ bhāsati – ‘atthi mahāsamudde pātālo’ti. Taṃ kho panetaṃ, bhikkhave, assutavā puthujjano asantaṃ avijjamānaṃ evaṃ vācaṃ bhāsati – ‘atthi mahāsamudde pātālo’ti. Sārīrikānaṃ kho etaṃ, bhikkhave, dukkhānaṃ vedanānaṃ adhivacanaṃ yadidaṃ ‘pātālo’ti. Assutavā, bhikkhave, puthujjano sārīrikāya dukkhāya vedanāya phuṭṭho samāno socati kilamati paridevati urattāḷiṃ kandati sammohaṃ āpajjati. Ayaṃ vuccati, bhikkhave, ‘assutavā puthujjano pātāle na paccuṭṭhāsi, gādhañca nājjhagā’. Sutavā ca kho, bhikkhave, ariyasāvako sārīrikāya dukkhāya vedanāya phuṭṭho samāno neva socati, na kilamati, na paridevati, na urattāḷiṃ kandati, na sammohaṃ āpajjati. Ayaṃ vuccati, bhikkhave, ‘sutavā ariyasāvako pātāle paccuṭṭhāsi, gādhañca ajjhagā’’’ti.
‘‘โย เอตา นาธิวาเสติ, อุปฺปนฺนา เวทนา ทุขา;
‘‘Yo etā nādhivāseti, uppannā vedanā dukhā;
สารีริกา ปาณหรา, ยาหิ ผุโฎฺฐ ปเวธติฯ
Sārīrikā pāṇaharā, yāhi phuṭṭho pavedhati.
‘‘อกฺกนฺทติ ปโรทติ, ทุพฺพโล อปฺปถามโก;
‘‘Akkandati parodati, dubbalo appathāmako;
น โส ปาตาเล ปจฺจุฎฺฐาสิ, อโถ คาธมฺปิ นาชฺฌคาฯ
Na so pātāle paccuṭṭhāsi, atho gādhampi nājjhagā.
‘‘โย เจตา อธิวาเสติ, อุปฺปนฺนา เวทนา ทุขา;
‘‘Yo cetā adhivāseti, uppannā vedanā dukhā;
สารีริกา ปาณหรา, ยาหิ ผุโฎฺฐ น เวธติ;
Sārīrikā pāṇaharā, yāhi phuṭṭho na vedhati;
ส เว ปาตาเล ปจฺจุฎฺฐาสิ, อโถ คาธมฺปิ อชฺฌคา’’ติฯ จตุตฺถํ;
Sa ve pātāle paccuṭṭhāsi, atho gādhampi ajjhagā’’ti. catutthaṃ;
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๔. ปาตาลสุตฺตวณฺณนา • 4. Pātālasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๔. ปาตาลสุตฺตวณฺณนา • 4. Pātālasuttavaṇṇanā
