| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. பாதாலஸுத்தவண்ணனா
4. Pātālasuttavaṇṇanā
252. சதுத்தே² பாதாலோதி பாதஸ்ஸ அலங் பரியத்தோ, நத்தி² எத்த² பதிட்டா²தி பாதாலோ. அஸந்தங் அவிஜ்ஜமானந்தி அஸம்பூ⁴தத்தங் அபஞ்ஞாயமானத்தங். ஏவங் வாசங் பா⁴ஸதீதி அத்தி² மஹாஸமுத்³தே³ பாதாலோதி ஏவங் வாசங். ஸோ ஹி யங் தங் ப³லவாமுக²ங் மஹாஸமுத்³த³ஸ்ஸ உத³கங் வேகே³ன பக்க²ந்தி³த்வா சக்கவாளங் வா ஸினேருங் வா ஆஹச்ச யோஜனத்³வியோஜனத³ஸயோஜனப்பமாணம்பி உக்³க³ந்த்வா புன மஹாஸமுத்³தே³ பததி, யஸ்ஸ பதிதட்டா²னே மஹானரகபபாதோ விய ஹோதி, யங் லோகே ப³லவாமுக²ந்தி வுச்சதி. தங் ஸந்தா⁴ய ஏவங் வத³தி.
252. Catutthe pātāloti pātassa alaṃ pariyatto, natthi ettha patiṭṭhāti pātālo. Asantaṃ avijjamānanti asambhūtattaṃ apaññāyamānattaṃ. Evaṃ vācaṃ bhāsatīti atthi mahāsamudde pātāloti evaṃ vācaṃ. So hi yaṃ taṃ balavāmukhaṃ mahāsamuddassa udakaṃ vegena pakkhanditvā cakkavāḷaṃ vā sineruṃ vā āhacca yojanadviyojanadasayojanappamāṇampi uggantvā puna mahāsamudde patati, yassa patitaṭṭhāne mahānarakapapāto viya hoti, yaṃ loke balavāmukhanti vuccati. Taṃ sandhāya evaṃ vadati.
யஸ்மா பன தத்த² ததா²ரூபானங் மச்ச²கச்ச²பதே³வதா³னவானங் பதிட்டா²பி ஹோதி ஸுக²னிவாஸோபி, தஸ்மா அஸந்தங் அஸங்விஜ்ஜமானங் தங் தங் வாசங் பா⁴ஸதி நாம. யஸ்மா பன ஸப்³ப³புது²ஜ்ஜனா ஸாரீரிகாய து³க்க²வேத³னாய பதிட்டா²துங் ந ஸக்கொந்தி, தஸ்மா பாதஸ்ஸ அலந்தி அத்தே²ன அயமேவ பாதாலோதி த³ஸ்ஸெந்தோ ஸாரீரிகானங் கோ² ஏதங் பி⁴க்க²வேதிஆதி³மாஹ.
Yasmā pana tattha tathārūpānaṃ macchakacchapadevadānavānaṃ patiṭṭhāpi hoti sukhanivāsopi, tasmā asantaṃ asaṃvijjamānaṃ taṃ taṃ vācaṃ bhāsati nāma. Yasmā pana sabbaputhujjanā sārīrikāya dukkhavedanāya patiṭṭhātuṃ na sakkonti, tasmā pātassa alanti atthena ayameva pātāloti dassento sārīrikānaṃ kho etaṃ bhikkhavetiādimāha.
பாதாலே ந பச்சுட்டா²ஸீதி பாதாலஸ்மிங் ந பதிட்டா²ஸி. கா³த⁴ந்தி பதிட்ட²ங். அக்கந்த³தீதி அனிப³த்³த⁴ங் விப்பலாபங் விலபந்தோ கந்த³தி. து³ப்³ப³லோதி து³ப்³ப³லஞாணோ. அப்பதா²மகோதி ஞாணதா²மஸ்ஸ பரித்ததாய பரித்ததா²மகோ. இமஸ்மிங் ஸுத்தே அரியஸாவகோதி ஸோதாபன்னோ. ஸோதாபன்னோ ஹி எத்த² து⁴ரங், ப³லவவிபஸ்ஸகோ ந திக்க²பு³த்³தி⁴ உப்பன்னங் வேத³னங் அனநுவத்தித்வா பதிட்டா²துங் ஸமத்தோ² யோகா³வசரோபி வட்டதி.
Pātālena paccuṭṭhāsīti pātālasmiṃ na patiṭṭhāsi. Gādhanti patiṭṭhaṃ. Akkandatīti anibaddhaṃ vippalāpaṃ vilapanto kandati. Dubbaloti dubbalañāṇo. Appathāmakoti ñāṇathāmassa parittatāya parittathāmako. Imasmiṃ sutte ariyasāvakoti sotāpanno. Sotāpanno hi ettha dhuraṃ, balavavipassako na tikkhabuddhi uppannaṃ vedanaṃ ananuvattitvā patiṭṭhātuṃ samattho yogāvacaropi vaṭṭati.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. பாதாலஸுத்தங் • 4. Pātālasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. பாதாலஸுத்தவண்ணனா • 4. Pātālasuttavaṇṇanā
