| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৪. পাতালসুত্তৰণ্ণনা
4. Pātālasuttavaṇṇanā
২৫২. চতুত্থে পাতালোতি পাতস্স অলং পরিযত্তো, নত্থি এত্থ পতিট্ঠাতি পাতালো। অসন্তং অৰিজ্জমানন্তি অসম্ভূতত্তং অপঞ্ঞাযমানত্তং। এৰং ৰাচং ভাসতীতি অত্থি মহাসমুদ্দে পাতালোতি এৰং ৰাচং। সো হি যং তং বলৰামুখং মহাসমুদ্দস্স উদকং ৰেগেন পক্খন্দিত্ৰা চক্কৰাল়ং ৰা সিনেরুং ৰা আহচ্চ যোজনদ্ৰিযোজনদসযোজনপ্পমাণম্পি উগ্গন্ত্ৰা পুন মহাসমুদ্দে পততি, যস্স পতিতট্ঠানে মহানরকপপাতো ৰিয হোতি, যং লোকে বলৰামুখন্তি ৰুচ্চতি। তং সন্ধায এৰং ৰদতি।
252. Catutthe pātāloti pātassa alaṃ pariyatto, natthi ettha patiṭṭhāti pātālo. Asantaṃ avijjamānanti asambhūtattaṃ apaññāyamānattaṃ. Evaṃ vācaṃ bhāsatīti atthi mahāsamudde pātāloti evaṃ vācaṃ. So hi yaṃ taṃ balavāmukhaṃ mahāsamuddassa udakaṃ vegena pakkhanditvā cakkavāḷaṃ vā sineruṃ vā āhacca yojanadviyojanadasayojanappamāṇampi uggantvā puna mahāsamudde patati, yassa patitaṭṭhāne mahānarakapapāto viya hoti, yaṃ loke balavāmukhanti vuccati. Taṃ sandhāya evaṃ vadati.
যস্মা পন তত্থ তথারূপানং মচ্ছকচ্ছপদেৰদানৰানং পতিট্ঠাপি হোতি সুখনিৰাসোপি, তস্মা অসন্তং অসংৰিজ্জমানং তং তং ৰাচং ভাসতি নাম। যস্মা পন সব্বপুথুজ্জনা সারীরিকায দুক্খৰেদনায পতিট্ঠাতুং ন সক্কোন্তি, তস্মা পাতস্স অলন্তি অত্থেন অযমেৰ পাতালোতি দস্সেন্তো সারীরিকানং খো এতং ভিক্খৰেতিআদিমাহ।
Yasmā pana tattha tathārūpānaṃ macchakacchapadevadānavānaṃ patiṭṭhāpi hoti sukhanivāsopi, tasmā asantaṃ asaṃvijjamānaṃ taṃ taṃ vācaṃ bhāsati nāma. Yasmā pana sabbaputhujjanā sārīrikāya dukkhavedanāya patiṭṭhātuṃ na sakkonti, tasmā pātassa alanti atthena ayameva pātāloti dassento sārīrikānaṃ kho etaṃ bhikkhavetiādimāha.
পাতালে ন পচ্চুট্ঠাসীতি পাতালস্মিং ন পতিট্ঠাসি। গাধন্তি পতিট্ঠং। অক্কন্দতীতি অনিবদ্ধং ৰিপ্পলাপং ৰিলপন্তো কন্দতি। দুব্বলোতি দুব্বলঞাণো। অপ্পথামকোতি ঞাণথামস্স পরিত্ততায পরিত্তথামকো। ইমস্মিং সুত্তে অরিযসাৰকোতি সোতাপন্নো। সোতাপন্নো হি এত্থ ধুরং, বলৰৰিপস্সকো ন তিক্খবুদ্ধি উপ্পন্নং ৰেদনং অননুৰত্তিত্ৰা পতিট্ঠাতুং সমত্থো যোগাৰচরোপি ৰট্টতি।
Pātālena paccuṭṭhāsīti pātālasmiṃ na patiṭṭhāsi. Gādhanti patiṭṭhaṃ. Akkandatīti anibaddhaṃ vippalāpaṃ vilapanto kandati. Dubbaloti dubbalañāṇo. Appathāmakoti ñāṇathāmassa parittatāya parittathāmako. Imasmiṃ sutte ariyasāvakoti sotāpanno. Sotāpanno hi ettha dhuraṃ, balavavipassako na tikkhabuddhi uppannaṃ vedanaṃ ananuvattitvā patiṭṭhātuṃ samattho yogāvacaropi vaṭṭati.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. পাতালসুত্তং • 4. Pātālasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. পাতালসুত্তৰণ্ণনা • 4. Pātālasuttavaṇṇanā
