| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. পাতালসুত্তৰণ্ণনা
4. Pātālasuttavaṇṇanā
২৫২. যত্থ পতিট্ঠা নত্থি একন্তিকাতি একন্তিকস্স মহতো পাতস্স অলন্তি অযমেত্থ অত্থো অধিপ্পেতোতি আহ ‘‘নত্থি এত্থ পতিট্ঠা’’তি। অসম্ভূতত্থন্তি ন সম্ভূতত্থং, মুসাতি অত্থো। সোতি অস্সুতৰা পুথুজ্জনো। যং তং উদকং পততীতি যোজনা। যস্মা সমুদ্দপিট্ঠে অন্তরন্তরা ৰেরম্ভৰাতসদিসো মহাৰাতো উট্ঠহিত্ৰা মহাসমুদ্দে উদকং উগ্গচ্ছাপেতি, তং কদাচি চক্কৰাল়াভিমুখং, কদাচি সিনেরুপাদাভিমুখং গন্ত্ৰা তং পতিহনতি, তস্মা ৰুত্তং ‘‘বলৰামুখং মহাসমুদ্দস্সা’’তিআদি। ৰেগেন পক্খন্দিত্ৰাতি মহতা ৰাতৰেগেন সমুদ্ধতং তেনেৰ ৰেগেন পক্খন্দন্তঞ্চ হুত্ৰা। মহানরকপপাতো ৰিযাতি যোজনাযামৰিত্থারগম্ভীরসোব্ভপপাতো ৰিয হোতি। তথারূপানন্তি তত্থ ৰসিতুং সমত্থানং। অসন্তন্তি অভূতং। অত্থৰসেন হি ৰাচা অভূতং নাম।
252. Yattha patiṭṭhā natthi ekantikāti ekantikassa mahato pātassa alanti ayamettha attho adhippetoti āha ‘‘natthi ettha patiṭṭhā’’ti. Asambhūtatthanti na sambhūtatthaṃ, musāti attho. Soti assutavā puthujjano. Yaṃ taṃ udakaṃ patatīti yojanā. Yasmā samuddapiṭṭhe antarantarā verambhavātasadiso mahāvāto uṭṭhahitvā mahāsamudde udakaṃ uggacchāpeti, taṃ kadāci cakkavāḷābhimukhaṃ, kadāci sinerupādābhimukhaṃ gantvā taṃ patihanati, tasmā vuttaṃ ‘‘balavāmukhaṃ mahāsamuddassā’’tiādi. Vegena pakkhanditvāti mahatā vātavegena samuddhataṃ teneva vegena pakkhandantañca hutvā. Mahānarakapapāto viyāti yojanāyāmavitthāragambhīrasobbhapapāto viya hoti. Tathārūpānanti tattha vasituṃ samatthānaṃ. Asantanti abhūtaṃ. Atthavasena hi vācā abhūtaṃ nāma.
ন পতিট্ঠাসীতি পতিট্ঠং ন লভি। অনিবদ্ধন্তি অনিবন্ধনত্থং যংকিঞ্চি। দুব্বলঞাণোতি ঞাণবলরহিতো। ‘‘অস্সুতৰা পুথুজ্জনো’’তি ৰত্ৰা ‘‘সুতৰা অরিযসাৰকো’’তি ৰুত্তত্তা ‘‘সোতাপন্নো ধুর’’ন্তি ৰুত্তং। ইতরেসু অরিযসাৰকেসু ৰত্তব্বমেৰ নত্থি। তেসঞ্হি ৰেদনা সুপরিঞ্ঞাতা। বলৰৰিপস্সকো…পে॰… যোগাৰচরোপি ৰট্টতি মত্তসো ৰেদনানং পরিঞ্ঞাতত্তা।
Na patiṭṭhāsīti patiṭṭhaṃ na labhi. Anibaddhanti anibandhanatthaṃ yaṃkiñci. Dubbalañāṇoti ñāṇabalarahito. ‘‘Assutavā puthujjano’’ti vatvā ‘‘sutavā ariyasāvako’’ti vuttattā ‘‘sotāpanno dhura’’nti vuttaṃ. Itaresu ariyasāvakesu vattabbameva natthi. Tesañhi vedanā supariññātā. Balavavipassako…pe… yogāvacaropi vaṭṭati mattaso vedanānaṃ pariññātattā.
পাতালসুত্তৰণ্ণনা নিট্ঠিতা।
Pātālasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. পাতালসুত্তং • 4. Pātālasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. পাতালসুত্তৰণ্ণনা • 4. Pātālasuttavaṇṇanā
