| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៤. បាតាលសុត្តវណ្ណនា
4. Pātālasuttavaṇṇanā
២៥២. ចតុត្ថេ បាតាលោតិ បាតស្ស អលំ បរិយត្តោ, នត្ថិ ឯត្ថ បតិដ្ឋាតិ បាតាលោ។ អសន្តំ អវិជ្ជមានន្តិ អសម្ភូតត្តំ អបញ្ញាយមានត្តំ។ ឯវំ វាចំ ភាសតីតិ អត្ថិ មហាសមុទ្ទេ បាតាលោតិ ឯវំ វាចំ។ សោ ហិ យំ តំ ពលវាមុខំ មហាសមុទ្ទស្ស ឧទកំ វេគេន បក្ខន្ទិត្វា ចក្កវាឡំ វា សិនេរុំ វា អាហច្ច យោជនទ្វិយោជនទសយោជនប្បមាណម្បិ ឧគ្គន្ត្វា បុន មហាសមុទ្ទេ បតតិ, យស្ស បតិតដ្ឋានេ មហានរកបបាតោ វិយ ហោតិ, យំ លោកេ ពលវាមុខន្តិ វុច្ចតិ។ តំ សន្ធាយ ឯវំ វទតិ។
252. Catutthe pātāloti pātassa alaṃ pariyatto, natthi ettha patiṭṭhāti pātālo. Asantaṃ avijjamānanti asambhūtattaṃ apaññāyamānattaṃ. Evaṃ vācaṃ bhāsatīti atthi mahāsamudde pātāloti evaṃ vācaṃ. So hi yaṃ taṃ balavāmukhaṃ mahāsamuddassa udakaṃ vegena pakkhanditvā cakkavāḷaṃ vā sineruṃ vā āhacca yojanadviyojanadasayojanappamāṇampi uggantvā puna mahāsamudde patati, yassa patitaṭṭhāne mahānarakapapāto viya hoti, yaṃ loke balavāmukhanti vuccati. Taṃ sandhāya evaṃ vadati.
យស្មា បន តត្ថ តថារូបានំ មច្ឆកច្ឆបទេវទានវានំ បតិដ្ឋាបិ ហោតិ សុខនិវាសោបិ, តស្មា អសន្តំ អសំវិជ្ជមានំ តំ តំ វាចំ ភាសតិ នាម។ យស្មា បន សព្ពបុថុជ្ជនា សារីរិកាយ ទុក្ខវេទនាយ បតិដ្ឋាតុំ ន សក្កោន្តិ, តស្មា បាតស្ស អលន្តិ អត្ថេន អយមេវ បាតាលោតិ ទស្សេន្តោ សារីរិកានំ ខោ ឯតំ ភិក្ខវេតិអាទិមាហ។
Yasmā pana tattha tathārūpānaṃ macchakacchapadevadānavānaṃ patiṭṭhāpi hoti sukhanivāsopi, tasmā asantaṃ asaṃvijjamānaṃ taṃ taṃ vācaṃ bhāsati nāma. Yasmā pana sabbaputhujjanā sārīrikāya dukkhavedanāya patiṭṭhātuṃ na sakkonti, tasmā pātassa alanti atthena ayameva pātāloti dassento sārīrikānaṃ kho etaṃ bhikkhavetiādimāha.
បាតាលេ ន បច្ចុដ្ឋាសីតិ បាតាលស្មិំ ន បតិដ្ឋាសិ។ គាធន្តិ បតិដ្ឋំ។ អក្កន្ទតីតិ អនិពទ្ធំ វិប្បលាបំ វិលបន្តោ កន្ទតិ។ ទុព្ពលោតិ ទុព្ពលញាណោ។ អប្បថាមកោតិ ញាណថាមស្ស បរិត្តតាយ បរិត្តថាមកោ។ ឥមស្មិំ សុត្តេ អរិយសាវកោតិ សោតាបន្នោ។ សោតាបន្នោ ហិ ឯត្ថ ធុរំ, ពលវវិបស្សកោ ន តិក្ខពុទ្ធិ ឧប្បន្នំ វេទនំ អននុវត្តិត្វា បតិដ្ឋាតុំ សមត្ថោ យោគាវចរោបិ វដ្ដតិ។
Pātālena paccuṭṭhāsīti pātālasmiṃ na patiṭṭhāsi. Gādhanti patiṭṭhaṃ. Akkandatīti anibaddhaṃ vippalāpaṃ vilapanto kandati. Dubbaloti dubbalañāṇo. Appathāmakoti ñāṇathāmassa parittatāya parittathāmako. Imasmiṃ sutte ariyasāvakoti sotāpanno. Sotāpanno hi ettha dhuraṃ, balavavipassako na tikkhabuddhi uppannaṃ vedanaṃ ananuvattitvā patiṭṭhātuṃ samattho yogāvacaropi vaṭṭati.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៤. បាតាលសុត្តំ • 4. Pātālasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៤. បាតាលសុត្តវណ្ណនា • 4. Pātālasuttavaṇṇanā
