| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៤. បាតាលសុត្តវណ្ណនា
4. Pātālasuttavaṇṇanā
២៥២. យត្ថ បតិដ្ឋា នត្ថិ ឯកន្តិកាតិ ឯកន្តិកស្ស មហតោ បាតស្ស អលន្តិ អយមេត្ថ អត្ថោ អធិប្បេតោតិ អាហ ‘‘នត្ថិ ឯត្ថ បតិដ្ឋា’’តិ។ អសម្ភូតត្ថន្តិ ន សម្ភូតត្ថំ, មុសាតិ អត្ថោ។ សោតិ អស្សុតវា បុថុជ្ជនោ។ យំ តំ ឧទកំ បតតីតិ យោជនា។ យស្មា សមុទ្ទបិដ្ឋេ អន្តរន្តរា វេរម្ភវាតសទិសោ មហាវាតោ ឧដ្ឋហិត្វា មហាសមុទ្ទេ ឧទកំ ឧគ្គច្ឆាបេតិ, តំ កទាចិ ចក្កវាឡាភិមុខំ, កទាចិ សិនេរុបាទាភិមុខំ គន្ត្វា តំ បតិហនតិ, តស្មា វុត្តំ ‘‘ពលវាមុខំ មហាសមុទ្ទស្សា’’តិអាទិ។ វេគេន បក្ខន្ទិត្វាតិ មហតា វាតវេគេន សមុទ្ធតំ តេនេវ វេគេន បក្ខន្ទន្តញ្ច ហុត្វា។ មហានរកបបាតោ វិយាតិ យោជនាយាមវិត្ថារគម្ភីរសោព្ភបបាតោ វិយ ហោតិ។ តថារូបានន្តិ តត្ថ វសិតុំ សមត្ថានំ។ អសន្តន្តិ អភូតំ។ អត្ថវសេន ហិ វាចា អភូតំ នាម។
252. Yattha patiṭṭhā natthi ekantikāti ekantikassa mahato pātassa alanti ayamettha attho adhippetoti āha ‘‘natthi ettha patiṭṭhā’’ti. Asambhūtatthanti na sambhūtatthaṃ, musāti attho. Soti assutavā puthujjano. Yaṃ taṃ udakaṃ patatīti yojanā. Yasmā samuddapiṭṭhe antarantarā verambhavātasadiso mahāvāto uṭṭhahitvā mahāsamudde udakaṃ uggacchāpeti, taṃ kadāci cakkavāḷābhimukhaṃ, kadāci sinerupādābhimukhaṃ gantvā taṃ patihanati, tasmā vuttaṃ ‘‘balavāmukhaṃ mahāsamuddassā’’tiādi. Vegena pakkhanditvāti mahatā vātavegena samuddhataṃ teneva vegena pakkhandantañca hutvā. Mahānarakapapāto viyāti yojanāyāmavitthāragambhīrasobbhapapāto viya hoti. Tathārūpānanti tattha vasituṃ samatthānaṃ. Asantanti abhūtaṃ. Atthavasena hi vācā abhūtaṃ nāma.
ន បតិដ្ឋាសីតិ បតិដ្ឋំ ន លភិ។ អនិពទ្ធន្តិ អនិពន្ធនត្ថំ យំកិញ្ចិ។ ទុព្ពលញាណោតិ ញាណពលរហិតោ។ ‘‘អស្សុតវា បុថុជ្ជនោ’’តិ វត្វា ‘‘សុតវា អរិយសាវកោ’’តិ វុត្តត្តា ‘‘សោតាបន្នោ ធុរ’’ន្តិ វុត្តំ។ ឥតរេសុ អរិយសាវកេសុ វត្តព្ពមេវ នត្ថិ។ តេសញ្ហិ វេទនា សុបរិញ្ញាតា។ ពលវវិបស្សកោ…បេ.… យោគាវចរោបិ វដ្ដតិ មត្តសោ វេទនានំ បរិញ្ញាតត្តា។
Na patiṭṭhāsīti patiṭṭhaṃ na labhi. Anibaddhanti anibandhanatthaṃ yaṃkiñci. Dubbalañāṇoti ñāṇabalarahito. ‘‘Assutavā puthujjano’’ti vatvā ‘‘sutavā ariyasāvako’’ti vuttattā ‘‘sotāpanno dhura’’nti vuttaṃ. Itaresu ariyasāvakesu vattabbameva natthi. Tesañhi vedanā supariññātā. Balavavipassako…pe… yogāvacaropi vaṭṭati mattaso vedanānaṃ pariññātattā.
បាតាលសុត្តវណ្ណនា និដ្ឋិតា។
Pātālasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៤. បាតាលសុត្តំ • 4. Pātālasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៤. បាតាលសុត្តវណ្ណនា • 4. Pātālasuttavaṇṇanā
