| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. ပာတာလသုတ္တဝဏ္ဏနာ
4. Pātālasuttavaṇṇanā
၂၅၂. ယတ္ထ ပတိဋ္ဌာ နတ္ထိ ဧကန္တိကာတိ ဧကန္တိကသ္သ မဟတော ပာတသ္သ အလန္တိ အယမေတ္ထ အတ္ထော အဓိပ္ပေတောတိ အာဟ ‘‘နတ္ထိ ဧတ္ထ ပတိဋ္ဌာ’’တိ။ အသမ္ဘူတတ္ထန္တိ န သမ္ဘူတတ္ထံ, မုသာတိ အတ္ထော။ သောတိ အသ္သုတဝာ ပုထုဇ္ဇနော။ ယံ တံ ဥဒကံ ပတတီတိ ယောဇနာ။ ယသ္မာ သမုဒ္ဒပိဋ္ဌေ အန္တရန္တရာ ဝေရမ္ဘဝာတသဒိသော မဟာဝာတော ဥဋ္ဌဟိတ္ဝာ မဟာသမုဒ္ဒေ ဥဒကံ ဥဂ္ဂစ္ဆာပေတိ, တံ ကဒာစိ စက္ကဝာဠာဘိမုခံ, ကဒာစိ သိနေရုပာဒာဘိမုခံ ဂန္တ္ဝာ တံ ပတိဟနတိ, တသ္မာ ဝုတ္တံ ‘‘ဗလဝာမုခံ မဟာသမုဒ္ဒသ္သာ’’တိအာဒိ။ ဝေဂေန ပက္ခန္ဒိတ္ဝာတိ မဟတာ ဝာတဝေဂေန သမုဒ္ဓတံ တေနေဝ ဝေဂေန ပက္ခန္ဒန္တဉ္စ ဟုတ္ဝာ။ မဟာနရကပပာတော ဝိယာတိ ယောဇနာယာမဝိတ္ထာရဂမ္ဘီရသောဗ္ဘပပာတော ဝိယ ဟောတိ။ တထာရူပာနန္တိ တတ္ထ ဝသိတုံ သမတ္ထာနံ။ အသန္တန္တိ အဘူတံ။ အတ္ထဝသေန ဟိ ဝာစာ အဘူတံ နာမ။
252. Yattha patiṭṭhā natthi ekantikāti ekantikassa mahato pātassa alanti ayamettha attho adhippetoti āha ‘‘natthi ettha patiṭṭhā’’ti. Asambhūtatthanti na sambhūtatthaṃ, musāti attho. Soti assutavā puthujjano. Yaṃ taṃ udakaṃ patatīti yojanā. Yasmā samuddapiṭṭhe antarantarā verambhavātasadiso mahāvāto uṭṭhahitvā mahāsamudde udakaṃ uggacchāpeti, taṃ kadāci cakkavāḷābhimukhaṃ, kadāci sinerupādābhimukhaṃ gantvā taṃ patihanati, tasmā vuttaṃ ‘‘balavāmukhaṃ mahāsamuddassā’’tiādi. Vegena pakkhanditvāti mahatā vātavegena samuddhataṃ teneva vegena pakkhandantañca hutvā. Mahānarakapapāto viyāti yojanāyāmavitthāragambhīrasobbhapapāto viya hoti. Tathārūpānanti tattha vasituṃ samatthānaṃ. Asantanti abhūtaṃ. Atthavasena hi vācā abhūtaṃ nāma.
န ပတိဋ္ဌာသီတိ ပတိဋ္ဌံ န လဘိ။ အနိဗဒ္ဓန္တိ အနိဗန္ဓနတ္ထံ ယံကိဉ္စိ။ ဒုဗ္ဗလဉာဏောတိ ဉာဏဗလရဟိတော။ ‘‘အသ္သုတဝာ ပုထုဇ္ဇနော’’တိ ဝတ္ဝာ ‘‘သုတဝာ အရိယသာဝကော’’တိ ဝုတ္တတ္တာ ‘‘သောတာပန္နော ဓုရ’’န္တိ ဝုတ္တံ။ ဣတရေသု အရိယသာဝကေသု ဝတ္တဗ္ဗမေဝ နတ္ထိ။ တေသဉ္ဟိ ဝေဒနာ သုပရိညာတာ။ ဗလဝဝိပသ္သကော။ပေ.။ ယောဂာဝစရောပိ ဝဋ္ဋတိ မတ္တသော ဝေဒနာနံ ပရိညာတတ္တာ။
Na patiṭṭhāsīti patiṭṭhaṃ na labhi. Anibaddhanti anibandhanatthaṃ yaṃkiñci. Dubbalañāṇoti ñāṇabalarahito. ‘‘Assutavā puthujjano’’ti vatvā ‘‘sutavā ariyasāvako’’ti vuttattā ‘‘sotāpanno dhura’’nti vuttaṃ. Itaresu ariyasāvakesu vattabbameva natthi. Tesañhi vedanā supariññātā. Balavavipassako…pe… yogāvacaropi vaṭṭati mattaso vedanānaṃ pariññātattā.
ပာတာလသုတ္တဝဏ္ဏနာ နိဋ္ဌိတာ။
Pātālasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ပာတာလသုတ္တံ • 4. Pātālasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. ပာတာလသုတ္တဝဏ္ဏနာ • 4. Pātālasuttavaṇṇanā
