| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
4. පාතාලසුත්‌තවණ්‌ණනා
4. Pātālasuttavaṇṇanā
252. යත්‌ථ පතිට්‌ඨා නත්‌ථි එකන්‌තිකාති එකන්‌තිකස්‌ස මහතො පාතස්‌ස අලන්‌ති අයමෙත්‌ථ අත්‌ථො අධිප්‌පෙතොති ආහ ‘‘නත්‌ථි එත්‌ථ පතිට්‌ඨා’’ති. අසම්‌භූතත්‌ථන්‌ති න සම්‌භූතත්‌ථං, මුසාති අත්‌ථො. සොති අස්‌සුතවා පුථුජ්‌ජනො. යං තං උදකං පතතීති යොජනා. යස්‌මා සමුද්‌දපිට්‌ඨෙ අන්‌තරන්‌තරා වෙරම්‌භවාතසදිසො මහාවාතො උට්‌ඨහිත්‌වා මහාසමුද්‌දෙ උදකං උග්‌ගච්‌ඡාපෙති, තං කදාචි චක්‌කවාළාභිමුඛං, කදාචි සිනෙරුපාදාභිමුඛං ගන්‌ත්‌වා තං පතිහනති, තස්‌මා වුත්‌තං ‘‘බලවාමුඛං මහාසමුද්‌දස්‌සා’’තිආදි. වෙගෙන පක්‌ඛන්‌දිත්‌වාති මහතා වාතවෙගෙන සමුද්‌ධතං තෙනෙව වෙගෙන පක්‌ඛන්‌දන්‌තඤ්‌ච හුත්‌වා. මහානරකපපාතො වියාති යොජනායාමවිත්‌ථාරගම්‌භීරසොබ්‌භපපාතො විය හොති. තථාරූපානන්‌ති තත්‌ථ වසිතුං සමත්‌ථානං. අසන්‌තන්‌ති අභූතං. අත්‌ථවසෙන හි වාචා අභූතං නාම.
252. Yattha patiṭṭhā natthi ekantikāti ekantikassa mahato pātassa alanti ayamettha attho adhippetoti āha ‘‘natthi ettha patiṭṭhā’’ti. Asambhūtatthanti na sambhūtatthaṃ, musāti attho. Soti assutavā puthujjano. Yaṃ taṃ udakaṃ patatīti yojanā. Yasmā samuddapiṭṭhe antarantarā verambhavātasadiso mahāvāto uṭṭhahitvā mahāsamudde udakaṃ uggacchāpeti, taṃ kadāci cakkavāḷābhimukhaṃ, kadāci sinerupādābhimukhaṃ gantvā taṃ patihanati, tasmā vuttaṃ ‘‘balavāmukhaṃ mahāsamuddassā’’tiādi. Vegena pakkhanditvāti mahatā vātavegena samuddhataṃ teneva vegena pakkhandantañca hutvā. Mahānarakapapāto viyāti yojanāyāmavitthāragambhīrasobbhapapāto viya hoti. Tathārūpānanti tattha vasituṃ samatthānaṃ. Asantanti abhūtaṃ. Atthavasena hi vācā abhūtaṃ nāma.
න පතිට්‌ඨාසීති පතිට්‌ඨං න ලභි. අනිබද්‌ධන්‌ති අනිබන්‌ධනත්‌ථං යංකිඤ්‌චි. දුබ්‌බලඤාණොති ඤාණබලරහිතො. ‘‘අස්‌සුතවා පුථුජ්‌ජනො’’ති වත්‌වා ‘‘සුතවා අරියසාවකො’’ති වුත්‌තත්‌තා ‘‘සොතාපන්‌නො ධුර’’න්‌ති වුත්‌තං. ඉතරෙසු අරියසාවකෙසු වත්‌තබ්‌බමෙව නත්‌ථි. තෙසඤ්‌හි වෙදනා සුපරිඤ්‌ඤාතා. බලවවිපස්‌සකො…පෙ.… යොගාවචරොපි වට්‌ටති මත්‌තසො වෙදනානං පරිඤ්‌ඤාතත්‌තා.
Na patiṭṭhāsīti patiṭṭhaṃ na labhi. Anibaddhanti anibandhanatthaṃ yaṃkiñci. Dubbalañāṇoti ñāṇabalarahito. ‘‘Assutavā puthujjano’’ti vatvā ‘‘sutavā ariyasāvako’’ti vuttattā ‘‘sotāpanno dhura’’nti vuttaṃ. Itaresu ariyasāvakesu vattabbameva natthi. Tesañhi vedanā supariññātā. Balavavipassako…pe… yogāvacaropi vaṭṭati mattaso vedanānaṃ pariññātattā.
පාතාලසුත්‌තවණ්‌ණනා නිට්‌ඨිතා.
Pātālasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 4. පාතාලසුත්‌තං • 4. Pātālasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. පාතාලසුත්‌තවණ්‌ණනා • 4. Pātālasuttavaṇṇanā
