| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
பாடலிகா³மவத்து²கதா²
Pāṭaligāmavatthukathā
285. ஸப்³ப³ஸந்த²ரிந்தி யதா² ஸப்³ப³ங் ஸந்த²தங் ஹோதி, ஏவங்.
285.Sabbasantharinti yathā sabbaṃ santhataṃ hoti, evaṃ.
286. ஸுனித⁴வஸ்ஸகாராதி ஸுனிதோ⁴ ச வஸ்ஸகாரோ ச த்³வே ப்³ராஹ்மணா மக³த⁴ரஞ்ஞோ மஹாமத்தா மஹாமச்சா. வஜ்ஜீனங் படிபா³ஹாயாதி வஜ்ஜிராஜகுலானங் ஆயமுக²பச்சி²ந்த³னத்த²ங். வத்தூ²னீதி க⁴ரவத்தூ²னி. சித்தானி நமந்தி நிவேஸனானி மாபேதுந்தி தா கிர தே³வதா வத்து²விஜ்ஜாபாட²கானங் ஸரீரே அதி⁴முச்சித்வா ஏவங் சித்தானி நாமெந்தி. கஸ்மா? அம்ஹாகங் யதா²னுரூபங் ஸக்காரங் கரிஸ்ஸந்தீதி அத்தோ². தாவதிங்ஸேஹீதி லோகே கிர ஸக்கங் தே³வராஜானங் விஸ்ஸகம்மஞ்ச உபாதா³ய தாவதிங்ஸா பண்டி³தாதி ஸத்³தோ³ அப்³பு⁴க்³க³தோ, தேனேவாஹ தாவதிங்ஸேஹீதி, தாவதிங்ஸேஹி ஸத்³தி⁴ங் மந்தெத்வா விய மாபெந்தீதி அத்தோ². யாவதா அரியங் ஆயதனந்தி யத்தகங் அரியமனுஸ்ஸானங் ஓஸரணட்டா²னங் நாம அத்தி². யாவதா வணிப்பதோ²தி யத்தகங் வாணிஜானங் ஆப⁴தப⁴ண்ட³ஸ்ஸ ராஸிவஸேனேவ கயவிக்கயட்டா²னங் நாம அத்தி². இத³ங் அக்³க³னக³ரந்தி தேஸங் அரியாயதனவணிப்பதா²னங் இத³ங் அக்³க³னக³ரங் ப⁴விஸ்ஸதி. புடபே⁴த³னந்தி புடபே⁴த³னட்டா²னங் மோசனட்டா²னந்தி வுத்தங் ஹோதி. அக்³கி³தோ வாதிஆதீ³ஸு ஸமுச்சயத்தோ² வா ஸத்³தோ³. தத்ர ஹி ஏகஸ்ஸ கொட்டா²ஸஸ்ஸ அக்³கி³தோ, ஏகஸ்ஸ உத³கதோ, ஏகஸ்ஸ அப்³ப⁴ந்தரதோ, அஞ்ஞமஞ்ஞபே⁴தா³ அந்தராயோ ப⁴விஸ்ஸதி. உளும்பந்தி பாரக³மனத்தா²ய ஆணியோ ஆகோடெத்வா கதங். குல்லந்தி வல்லிஆதீ³ஹி ப³ந்தி⁴த்வா கதங்.
286.Sunidhavassakārāti sunidho ca vassakāro ca dve brāhmaṇā magadharañño mahāmattā mahāmaccā. Vajjīnaṃ paṭibāhāyāti vajjirājakulānaṃ āyamukhapacchindanatthaṃ. Vatthūnīti gharavatthūni. Cittāni namanti nivesanāni māpetunti tā kira devatā vatthuvijjāpāṭhakānaṃ sarīre adhimuccitvā evaṃ cittāni nāmenti. Kasmā? Amhākaṃ yathānurūpaṃ sakkāraṃ karissantīti attho. Tāvatiṃsehīti loke kira sakkaṃ devarājānaṃ vissakammañca upādāya tāvatiṃsā paṇḍitāti saddo abbhuggato, tenevāha tāvatiṃsehīti, tāvatiṃsehi saddhiṃ mantetvā viya māpentīti attho. Yāvatā ariyaṃ āyatananti yattakaṃ ariyamanussānaṃ osaraṇaṭṭhānaṃ nāma atthi. Yāvatā vaṇippathoti yattakaṃ vāṇijānaṃ ābhatabhaṇḍassa rāsivaseneva kayavikkayaṭṭhānaṃ nāma atthi. Idaṃ agganagaranti tesaṃ ariyāyatanavaṇippathānaṃ idaṃ agganagaraṃ bhavissati. Puṭabhedananti puṭabhedanaṭṭhānaṃ mocanaṭṭhānanti vuttaṃ hoti. Aggito vātiādīsu samuccayattho vā saddo. Tatra hi ekassa koṭṭhāsassa aggito, ekassa udakato, ekassa abbhantarato, aññamaññabhedā antarāyo bhavissati. Uḷumpanti pāragamanatthāya āṇiyo ākoṭetvā kataṃ. Kullanti valliādīhi bandhitvā kataṃ.
அண்ணவந்தி ஸப்³ப³ந்திமேன பரிச்சே²தே³ன யோஜனமத்தங் க³ம்பீ⁴ரஸ்ஸ ச புது²ல்லஸ்ஸ ச உத³கட்டா²னஸ்ஸேதங் அதி⁴வசனங். ஸரந்தி இத⁴ நதீ³ அதி⁴ப்பேதா. இத³ங் வுத்தங் ஹோதி – யே க³ம்பீ⁴ரங் வித்த²தங் தண்ஹாஸரங் தரந்தி, தே அரியமக்³க³ஸங்கா²தங் ஸேதுங் கத்வான விஸஜ்ஜ பல்லலானி அனாமஸித்வாவ உத³கப⁴ரிதானி நின்னட்டா²னானி; அயங் பன இத³ங் அப்பமத்தகங் உத³கங் உத்தரிதுகாமோபி குல்லஞ்ஹி பரிஜனோ ப³ந்த⁴தி, பு³த்³தா⁴ பன பு³த்³த⁴ஸாவகா ச வினா ஏவ குல்லேன திண்ணா மேதா⁴வினோ ஜனாதி.
Aṇṇavanti sabbantimena paricchedena yojanamattaṃ gambhīrassa ca puthullassa ca udakaṭṭhānassetaṃ adhivacanaṃ. Saranti idha nadī adhippetā. Idaṃ vuttaṃ hoti – ye gambhīraṃ vitthataṃ taṇhāsaraṃ taranti, te ariyamaggasaṅkhātaṃ setuṃ katvāna visajja pallalāni anāmasitvāva udakabharitāni ninnaṭṭhānāni; ayaṃ pana idaṃ appamattakaṃ udakaṃ uttaritukāmopi kullañhi parijano bandhati, buddhā pana buddhasāvakā ca vinā eva kullena tiṇṇā medhāvino janāti.
287. அனநுபோ³தா⁴தி அபு³ஜ்ஜ²னேன. ஸந்தா⁴விதந்தி ப⁴வதோ ப⁴வங் க³மனவஸேன ஸந்தா⁴விதங். ஸங்ஸரிதந்தி புனப்புனங் க³மனவஸேன ஸங்ஸரிதங். மமஞ்சேவ தும்ஹாகஞ்சாதி மயா ச தும்ஹேஹி ச. அத² வா ஸந்தா⁴விதங் ஸங்ஸரிதந்தி ஸந்தா⁴வனங் ஸங்ஸரணங் மமஞ்சேவ தும்ஹாகஞ்ச அஹோஸீதி ஏவமெத்த² அத்தோ² த³ட்ட²ப்³போ³. ஸங்ஸிதந்தி ஸங்ஸரிதங். ப⁴வனெத்தி ஸமூஹதாதி ப⁴வதோ ப⁴வக³மனா ஸந்தா⁴வனா தண்ஹாரஜ்ஜு ஸுட்டு² ஹதா சி²ன்னா அப்பவத்திகதா.
287.Ananubodhāti abujjhanena. Sandhāvitanti bhavato bhavaṃ gamanavasena sandhāvitaṃ. Saṃsaritanti punappunaṃ gamanavasena saṃsaritaṃ. Mamañceva tumhākañcāti mayā ca tumhehi ca. Atha vā sandhāvitaṃ saṃsaritanti sandhāvanaṃ saṃsaraṇaṃ mamañceva tumhākañca ahosīti evamettha attho daṭṭhabbo. Saṃsitanti saṃsaritaṃ. Bhavanetti samūhatāti bhavato bhavagamanā sandhāvanā taṇhārajju suṭṭhu hatā chinnā appavattikatā.
289. நீலாதி இத³ங் ஸப்³ப³ஸங்கா³ஹகங். நீலவண்ணாதிஆதி³ தஸ்ஸேவ விபா⁴க³த³ஸ்ஸனத்த²ங். தத்த² ந தேஸங் பகதிவண்ணா நீலா, நீலவிலேபனானங் விசித்ததாவஸேனேதங் வுத்தங். படிவட்டேஸீதி பஹாரேஸி. ஸாஹாரங் த³ஜ்ஜெய்யாதா²தி ஸஜனபத³ங் த³தெ³ய்யாத². அங்கு³லிங் போ²டேஸுந்தி அங்கு³லிங் சாலேஸுங். அம்ப³காயாதி இத்தி²காய. ஓலோகேதா²தி பஸ்ஸத². அபலோகேதா²தி புனப்புனங் பஸ்ஸத². உபஸங்ஹரதா²தி உபனேத². இமங் லிச்ச²விபரிஸங் தும்ஹாகங் சித்தேன தாவதிங்ஸபரிஸங் ஹரத², தாவதிங்ஸஸ்ஸ ஸமகங் கத்வா பஸ்ஸதா²தி அத்தோ².
289.Nīlāti idaṃ sabbasaṅgāhakaṃ. Nīlavaṇṇātiādi tasseva vibhāgadassanatthaṃ. Tattha na tesaṃ pakativaṇṇā nīlā, nīlavilepanānaṃ vicittatāvasenetaṃ vuttaṃ. Paṭivaṭṭesīti pahāresi. Sāhāraṃ dajjeyyāthāti sajanapadaṃ dadeyyātha. Aṅguliṃ phoṭesunti aṅguliṃ cālesuṃ. Ambakāyāti itthikāya. Olokethāti passatha. Apalokethāti punappunaṃ passatha. Upasaṃharathāti upanetha. Imaṃ licchaviparisaṃ tumhākaṃ cittena tāvatiṃsaparisaṃ haratha, tāvatiṃsassa samakaṃ katvā passathāti attho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
173. பாடலிகா³மவத்து² • 173. Pāṭaligāmavatthu
174. ஸுனித⁴வஸ்ஸகாரவத்து² • 174. Sunidhavassakāravatthu
175. கோடிகா³மே ஸச்சகதா² • 175. Koṭigāme saccakathā
177. லிச்ச²வீவத்து² • 177. Licchavīvatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
பாடலிகா³மவத்து²கதா²வண்ணனா • Pāṭaligāmavatthukathāvaṇṇanā
ஸுனித⁴வஸ்ஸகாரவத்து²கதா²வண்ணனா • Sunidhavassakāravatthukathāvaṇṇanā
கோடிகா³மே ஸச்சகதா²வண்ணனா • Koṭigāme saccakathāvaṇṇanā
லிச்ச²வீவத்து²கதா²வண்ணனா • Licchavīvatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / யாகு³மது⁴கோ³ளகாதி³கதா²வண்ணனா • Yāgumadhugoḷakādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā
பாடலிகா³மவத்து²கதா²வண்ணனா • Pāṭaligāmavatthukathāvaṇṇanā
கோடிகா³மேஸச்சகதா²வண்ணனா • Koṭigāmesaccakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 173. பாடலிகா³மவத்து²கதா² • 173. Pāṭaligāmavatthukathā
