| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
ปาฎลิคามวตฺถุกถาวณฺณนา
Pāṭaligāmavatthukathāvaṇṇanā
๒๘๖. ปาฎลิคาเม นครํ มาเปนฺตีติ ปาฎลิคามสฺส สมีเป ตเสฺสว คามเขตฺตภูเต มหเนฺต อรญฺญปฺปเทเส ปาฎลิปุตฺตํ นาม นครํ มาเปนฺติฯ ยาวตา อริยํ อายตนนฺติ ยตฺตกํ อริยมนุสฺสานํ โอสรณฎฺฐานํฯ ยาวตา วณิปฺปโถติ ยตฺตกํ วาณิชานํ ภณฺฑวิกฺกีณนฎฺฐานํ, วสนฎฺฐานํ วา, อิทํ เตสํ สเพฺพสํ อคฺคนครํ ภวิสฺสตีติ อโตฺถฯ ปุฎเภทนนฺติ สกฎาทีหิ นานาเทสโต อาหฎานํ ภณฺฑปุฎานํ วิกฺกีณนตฺถาย โมจนฎฺฐานํฯ สรนฺติ ตฬากาทีสุปิ วตฺตติ , ตนฺนิวตฺตนตฺถํ ‘‘สรนฺติ อิธ นที อธิเปฺปตา’’ติ วุตฺตํ สรติ สนฺทตีติ กตฺวาฯ วินา เอว กุเลฺลน ติณฺณาติ อิทํ อปฺปมตฺตกอุทกมฺปิ อผุสิตฺวา วินา กุเลฺลน ปารปฺปตฺตาฯ
286.Pāṭaligāme nagaraṃ māpentīti pāṭaligāmassa samīpe tasseva gāmakhettabhūte mahante araññappadese pāṭaliputtaṃ nāma nagaraṃ māpenti. Yāvatā ariyaṃ āyatananti yattakaṃ ariyamanussānaṃ osaraṇaṭṭhānaṃ. Yāvatā vaṇippathoti yattakaṃ vāṇijānaṃ bhaṇḍavikkīṇanaṭṭhānaṃ, vasanaṭṭhānaṃ vā, idaṃ tesaṃ sabbesaṃ agganagaraṃ bhavissatīti attho. Puṭabhedananti sakaṭādīhi nānādesato āhaṭānaṃ bhaṇḍapuṭānaṃ vikkīṇanatthāya mocanaṭṭhānaṃ. Saranti taḷākādīsupi vattati , tannivattanatthaṃ ‘‘saranti idha nadī adhippetā’’ti vuttaṃ sarati sandatīti katvā. Vinā eva kullena tiṇṇāti idaṃ appamattakaudakampi aphusitvā vinā kullena pārappattā.
ปาฎลิคามวตฺถุกถาวณฺณนา นิฎฺฐิตาฯ
Pāṭaligāmavatthukathāvaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๑๗๔. สุนิธวสฺสการวตฺถุ • 174. Sunidhavassakāravatthu
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / ปาฎลิคามวตฺถุกถา • Pāṭaligāmavatthukathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / สุนิธวสฺสการวตฺถุกถาวณฺณนา • Sunidhavassakāravatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๑๗๓. ปาฎลิคามวตฺถุกถา • 173. Pāṭaligāmavatthukathā
