| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
८. पाटलिपुप्फियत्थेरअपदानवण्णना
8. Pāṭalipupphiyattheraapadānavaṇṇanā
सुवण्णवण्णं सम्बुद्धन्तिआदिकं आयस्मतो पाटलिपुप्फियत्थेरस्स अपदानं। अयम्पि पुरिमजिनवरेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो तिस्सस्स भगवतो काले एकस्मिं कुलगेहे सेट्ठिपुत्तो हुत्वा निब्बत्तो वुद्धिप्पत्तो कुसलाकुसलञ्ञू सत्थरि पसीदित्वा पाटलिपुप्फं गहेत्वा सत्थु पूजेसि। सो तेन पुञ्ञेन बहुधा सुखसम्पत्तियो अनुभवन्तो देवमनुस्सेसु संसरन्तो इमस्मिं बुद्धुप्पादे कुलगेहे निब्बत्तो वुद्धिमन्वाय सत्थरि पसन्नो पब्बजित्वा नचिरस्सेव अरहा अहोसि।
Suvaṇṇavaṇṇaṃ sambuddhantiādikaṃ āyasmato pāṭalipupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe seṭṭhiputto hutvā nibbatto vuddhippatto kusalākusalaññū satthari pasīditvā pāṭalipupphaṃ gahetvā satthu pūjesi. So tena puññena bahudhā sukhasampattiyo anubhavanto devamanussesu saṃsaranto imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
३६. सो अपरभागे अत्तनो पुब्बकम्मं सरित्वा सोमनस्सजातो पुब्बचरितापदानं पकासेन्तो सुवण्णवण्णं सम्बुद्धन्तिआदिमाह। तत्थ अन्तरापणेति आ समन्ततो हिरञ्ञसुवण्णादिकं भण्डं पणेन्ति विक्किणन्ति पत्थरन्ति एत्थाति आपणं, आपणस्स अन्तरं वीथीति अन्तरापणं, तस्मिं अन्तरापणे। सुवण्णवण्णं कञ्चनग्घियसंकासं द्वत्तिंसवरलक्खणं सम्बुद्धं दिस्वा पाटलिपुप्फं पूजेसिन्ति अत्थो। सेसं सब्बत्थ उत्तानत्थमेवाति।
36. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Tattha antarāpaṇeti ā samantato hiraññasuvaṇṇādikaṃ bhaṇḍaṃ paṇenti vikkiṇanti pattharanti etthāti āpaṇaṃ, āpaṇassa antaraṃ vīthīti antarāpaṇaṃ, tasmiṃ antarāpaṇe. Suvaṇṇavaṇṇaṃ kañcanagghiyasaṃkāsaṃ dvattiṃsavaralakkhaṇaṃ sambuddhaṃ disvā pāṭalipupphaṃ pūjesinti attho. Sesaṃ sabbattha uttānatthamevāti.
पाटलिपुप्फियत्थेरअपदानवण्णना समत्ता।
Pāṭalipupphiyattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ८. पाटलिपुप्फियत्थेरअपदानं • 8. Pāṭalipupphiyattheraapadānaṃ
