| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೮. ಪಾಟಲಿಪುಪ್ಫಿಯತ್ಥೇರಅಪದಾನವಣ್ಣನಾ
8. Pāṭalipupphiyattheraapadānavaṇṇanā
ಸುವಣ್ಣವಣ್ಣಂ ಸಮ್ಬುದ್ಧನ್ತಿಆದಿಕಂ ಆಯಸ್ಮತೋ ಪಾಟಲಿಪುಪ್ಫಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಜಿನವರೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ತಿಸ್ಸಸ್ಸ ಭಗವತೋ ಕಾಲೇ ಏಕಸ್ಮಿಂ ಕುಲಗೇಹೇ ಸೇಟ್ಠಿಪುತ್ತೋ ಹುತ್ವಾ ನಿಬ್ಬತ್ತೋ ವುದ್ಧಿಪ್ಪತ್ತೋ ಕುಸಲಾಕುಸಲಞ್ಞೂ ಸತ್ಥರಿ ಪಸೀದಿತ್ವಾ ಪಾಟಲಿಪುಪ್ಫಂ ಗಹೇತ್ವಾ ಸತ್ಥು ಪೂಜೇಸಿ। ಸೋ ತೇನ ಪುಞ್ಞೇನ ಬಹುಧಾ ಸುಖಸಮ್ಪತ್ತಿಯೋ ಅನುಭವನ್ತೋ ದೇವಮನುಸ್ಸೇಸು ಸಂಸರನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸತ್ಥರಿ ಪಸನ್ನೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Suvaṇṇavaṇṇaṃ sambuddhantiādikaṃ āyasmato pāṭalipupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe seṭṭhiputto hutvā nibbatto vuddhippatto kusalākusalaññū satthari pasīditvā pāṭalipupphaṃ gahetvā satthu pūjesi. So tena puññena bahudhā sukhasampattiyo anubhavanto devamanussesu saṃsaranto imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
೩೬. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಸುವಣ್ಣವಣ್ಣಂ ಸಮ್ಬುದ್ಧನ್ತಿಆದಿಮಾಹ। ತತ್ಥ ಅನ್ತರಾಪಣೇತಿ ಆ ಸಮನ್ತತೋ ಹಿರಞ್ಞಸುವಣ್ಣಾದಿಕಂ ಭಣ್ಡಂ ಪಣೇನ್ತಿ ವಿಕ್ಕಿಣನ್ತಿ ಪತ್ಥರನ್ತಿ ಏತ್ಥಾತಿ ಆಪಣಂ, ಆಪಣಸ್ಸ ಅನ್ತರಂ ವೀಥೀತಿ ಅನ್ತರಾಪಣಂ, ತಸ್ಮಿಂ ಅನ್ತರಾಪಣೇ। ಸುವಣ್ಣವಣ್ಣಂ ಕಞ್ಚನಗ್ಘಿಯಸಂಕಾಸಂ ದ್ವತ್ತಿಂಸವರಲಕ್ಖಣಂ ಸಮ್ಬುದ್ಧಂ ದಿಸ್ವಾ ಪಾಟಲಿಪುಪ್ಫಂ ಪೂಜೇಸಿನ್ತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ।
36. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Tattha antarāpaṇeti ā samantato hiraññasuvaṇṇādikaṃ bhaṇḍaṃ paṇenti vikkiṇanti pattharanti etthāti āpaṇaṃ, āpaṇassa antaraṃ vīthīti antarāpaṇaṃ, tasmiṃ antarāpaṇe. Suvaṇṇavaṇṇaṃ kañcanagghiyasaṃkāsaṃ dvattiṃsavaralakkhaṇaṃ sambuddhaṃ disvā pāṭalipupphaṃ pūjesinti attho. Sesaṃ sabbattha uttānatthamevāti.
ಪಾಟಲಿಪುಪ್ಫಿಯತ್ಥೇರಅಪದಾನವಣ್ಣನಾ ಸಮತ್ತಾ।
Pāṭalipupphiyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೮. ಪಾಟಲಿಪುಪ್ಫಿಯತ್ಥೇರಅಪದಾನಂ • 8. Pāṭalipupphiyattheraapadānaṃ
