| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
8. පාටලිපුප්‌ඵියත්‌ථෙරඅපදානවණ්‌ණනා
8. Pāṭalipupphiyattheraapadānavaṇṇanā
සුවණ්‌ණවණ්‌ණං සම්‌බුද්‌ධන්‌තිආදිකං ආයස්‌මතො පාටලිපුප්‌ඵියත්‌ථෙරස්‌ස අපදානං. අයම්‌පි පුරිමජිනවරෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො තිස්‌සස්‌ස භගවතො කාලෙ එකස්‌මිං කුලගෙහෙ සෙට්‌ඨිපුත්‌තො හුත්‌වා නිබ්‌බත්‌තො වුද්‌ධිප්‌පත්‌තො කුසලාකුසලඤ්‌ඤූ සත්‌ථරි පසීදිත්‌වා පාටලිපුප්‌ඵං ගහෙත්‌වා සත්‌ථු පූජෙසි. සො තෙන පුඤ්‌ඤෙන බහුධා සුඛසම්‌පත්‌තියො අනුභවන්‌තො දෙවමනුස්‌සෙසු සංසරන්‌තො ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො වුද්‌ධිමන්‌වාය සත්‌ථරි පසන්‌නො පබ්‌බජිත්‌වා නචිරස්‌සෙව අරහා අහොසි.
Suvaṇṇavaṇṇaṃ sambuddhantiādikaṃ āyasmato pāṭalipupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe seṭṭhiputto hutvā nibbatto vuddhippatto kusalākusalaññū satthari pasīditvā pāṭalipupphaṃ gahetvā satthu pūjesi. So tena puññena bahudhā sukhasampattiyo anubhavanto devamanussesu saṃsaranto imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
36. සො අපරභාගෙ අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො සුවණ්‌ණවණ්‌ණං සම්‌බුද්‌ධන්‌තිආදිමාහ. තත්‌ථ අන්‌තරාපණෙති ආ සමන්‌තතො හිරඤ්‌ඤසුවණ්‌ණාදිකං භණ්‌ඩං පණෙන්‌ති වික්‌කිණන්‌ති පත්‌ථරන්‌ති එත්‌ථාති ආපණං, ආපණස්‌ස අන්‌තරං වීථීති අන්‌තරාපණං, තස්‌මිං අන්‌තරාපණෙ. සුවණ්‌ණවණ්‌ණං කඤ්‌චනග්‌ඝියසංකාසං ද්‌වත්‌තිංසවරලක්‌ඛණං සම්‌බුද්‌ධං දිස්‌වා පාටලිපුප්‌ඵං පූජෙසින්‌ති අත්‌ථො. සෙසං සබ්‌බත්‌ථ උත්‌තානත්‌ථමෙවාති.
36. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Tattha antarāpaṇeti ā samantato hiraññasuvaṇṇādikaṃ bhaṇḍaṃ paṇenti vikkiṇanti pattharanti etthāti āpaṇaṃ, āpaṇassa antaraṃ vīthīti antarāpaṇaṃ, tasmiṃ antarāpaṇe. Suvaṇṇavaṇṇaṃ kañcanagghiyasaṃkāsaṃ dvattiṃsavaralakkhaṇaṃ sambuddhaṃ disvā pāṭalipupphaṃ pūjesinti attho. Sesaṃ sabbattha uttānatthamevāti.
පාටලිපුප්‌ඵියත්‌ථෙරඅපදානවණ්‌ණනා සමත්‌තා.
Pāṭalipupphiyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 8. පාටලිපුප්‌ඵියත්‌ථෙරඅපදානං • 8. Pāṭalipupphiyattheraapadānaṃ
