| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
13. பாடலியஸுத்தவண்ணனா
13. Pāṭaliyasuttavaṇṇanā
365. தேரஸமே தூ³தெய்யானீதி தூ³தகம்மானி பண்ணானி சேவ முக²ஸாஸனானி ச. பாணாதிபாதஞ்சாஹந்தி இத³ங் கஸ்மா ஆரத்³த⁴ங்? ந கேவலங் அஹங் மாயங் ஜானாமி, அஞ்ஞம்பி இத³ஞ்சித³ஞ்ச ஜானாமீதி ஸப்³ப³ஞ்ஞுபா⁴வத³ஸ்ஸனத்த²ங் ஆரத்³த⁴ங். ஸந்தி ஹி, கா³மணி, ஏகே ஸமணப்³ராஹ்மணாதி இத³ங் ஸேஸஸமணப்³ராஹ்மணானங் லத்³தி⁴ங் த³ஸ்ஸெத்வா தஸ்ஸா பஜஹாபனத்த²ங் ஆரத்³த⁴ங்.
365. Terasame dūteyyānīti dūtakammāni paṇṇāni ceva mukhasāsanāni ca. Pāṇātipātañcāhanti idaṃ kasmā āraddhaṃ? Na kevalaṃ ahaṃ māyaṃ jānāmi, aññampi idañcidañca jānāmīti sabbaññubhāvadassanatthaṃ āraddhaṃ. Santi hi, gāmaṇi, eke samaṇabrāhmaṇāti idaṃ sesasamaṇabrāhmaṇānaṃ laddhiṃ dassetvā tassā pajahāpanatthaṃ āraddhaṃ.
மாலீ குண்ட³லீதி மாலாய மாலீ, குண்ட³லேஹி குண்ட³லீ. இத்தி²காமேஹீதி இத்தீ²ஹி ஸத்³தி⁴ங் காமா இத்தி²காமா, தேஹி இத்தி²காமேஹி. ஆவஸதா²கா³ரந்தி குலக⁴ரஸ்ஸ ஏகஸ்மிங் டா²னே ஏகேகஸ்ஸேவ ஸுக²னிவாஸத்தா²ய கதங் வாஸாகா³ரங். தேனாஹங் யதா²ஸத்தி யதா²ப³லங் ஸங்விப⁴ஜாமீதி தஸ்ஸாஹங் அத்தனோ ஸத்திஅனுரூபேன சேவ ப³லானுரூபேன ச ஸங்விபா⁴க³ங் கரோமி. அலந்தி யுத்தங். கங்க²னியே டா²னேதி கங்கி²தப்³பே³ காரணே. சித்தஸமாதி⁴ந்தி தஸ்மிங் த⁴ம்மஸமாதி⁴ஸ்மிங் டி²தோ த்வங் ஸஹ விபஸ்ஸனாய சதுன்னங் மக்³கா³னங் வஸேன சித்தஸமாதி⁴ங் ஸசே படிலபெ⁴ய்யாஸீதி த³ஸ்ஸேதி. அபண்ணகதாய மய்ஹந்தி அயங் படிபதா³ மய்ஹங் அபண்ணகதாய அனபராத⁴கதாய ஏவ ஸங்வத்ததீதி அத்தோ². கடக்³கா³ஹோதி ஜயக்³கா³ஹோ.
Mālī kuṇḍalīti mālāya mālī, kuṇḍalehi kuṇḍalī. Itthikāmehīti itthīhi saddhiṃ kāmā itthikāmā, tehi itthikāmehi. Āvasathāgāranti kulagharassa ekasmiṃ ṭhāne ekekasseva sukhanivāsatthāya kataṃ vāsāgāraṃ. Tenāhaṃ yathāsatti yathābalaṃ saṃvibhajāmīti tassāhaṃ attano sattianurūpena ceva balānurūpena ca saṃvibhāgaṃ karomi. Alanti yuttaṃ. Kaṅkhaniye ṭhāneti kaṅkhitabbe kāraṇe. Cittasamādhinti tasmiṃ dhammasamādhismiṃ ṭhito tvaṃ saha vipassanāya catunnaṃ maggānaṃ vasena cittasamādhiṃ sace paṭilabheyyāsīti dasseti. Apaṇṇakatāyamayhanti ayaṃ paṭipadā mayhaṃ apaṇṇakatāya anaparādhakatāya eva saṃvattatīti attho. Kaṭaggāhoti jayaggāho.
அயங் கோ², கா³மணி, த⁴ம்மஸமாதி⁴, தத்ர சே த்வங் சித்தஸமாதி⁴ங் படிலபெ⁴ய்யாஸீதி எத்த² த⁴ம்மஸமாதீ⁴தி த³ஸகுஸலகம்மபத²த⁴ம்மா, சித்தஸமாதீ⁴தி ஸஹ விபஸ்ஸனாய சத்தாரோ மக்³கா³. அத² வா ‘‘பாமோஜ்ஜங் ஜாயதி, பமுதி³தஸ்ஸ பீதி ஜாயதீ’’தி (அ॰ நி॰ 5.26) ஏவங் வுத்தா பாமோஜ்ஜபீதிபஸ்ஸத்³தி⁴ஸுக²ஸமாதி⁴ஸங்கா²தா பஞ்ச த⁴ம்மா த⁴ம்மஸமாதி⁴ நாம, சித்தஸமாதி⁴ பன ஸஹ விபஸ்ஸனாய சத்தாரோ மக்³கா³வ. அத² வா த³ஸகுஸலகம்மபதா² சத்தாரோ ப்³ரஹ்மவிஹாரா சாதி அயங் த⁴ம்மஸமாதி⁴ நாம, தங் த⁴ம்மஸமாதி⁴ங் பூரெந்தஸ்ஸ உப்பன்னா சித்தேகக்³க³தா சித்தஸமாதி⁴ நாம. ஏவங் த்வங் இமங் கங்கா²த⁴ம்மங் பஜஹெய்யாஸீதி ஏவங் த்வங் இமஸ்மிங் வுத்தப்பபே⁴தே³ த⁴ம்மஸமாதி⁴ஸ்மிங் டி²தோ ஸசே ஏவங் சித்தஸமாதி⁴ங் படிலபெ⁴ய்யாஸி, ஏகங்ஸேனேதங் கங்க²ங் பஜஹெய்யாஸீதி அத்தோ². ஸேஸங் ஸப்³ப³த்த² வுத்தனயமேவாதி.
Ayaṃ kho, gāmaṇi, dhammasamādhi, tatra ce tvaṃ cittasamādhiṃ paṭilabheyyāsīti ettha dhammasamādhīti dasakusalakammapathadhammā, cittasamādhīti saha vipassanāya cattāro maggā. Atha vā ‘‘pāmojjaṃ jāyati, pamuditassa pīti jāyatī’’ti (a. ni. 5.26) evaṃ vuttā pāmojjapītipassaddhisukhasamādhisaṅkhātā pañca dhammā dhammasamādhi nāma, cittasamādhi pana saha vipassanāya cattāro maggāva. Atha vā dasakusalakammapathā cattāro brahmavihārā cāti ayaṃ dhammasamādhi nāma, taṃ dhammasamādhiṃ pūrentassa uppannā cittekaggatā cittasamādhi nāma. Evaṃ tvaṃ imaṃ kaṅkhādhammaṃ pajaheyyāsīti evaṃ tvaṃ imasmiṃ vuttappabhede dhammasamādhismiṃ ṭhito sace evaṃ cittasamādhiṃ paṭilabheyyāsi, ekaṃsenetaṃ kaṅkhaṃ pajaheyyāsīti attho. Sesaṃ sabbattha vuttanayamevāti.
கா³மணிஸங்யுத்தவண்ணனா நிட்டி²தா.
Gāmaṇisaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 13. பாடலியஸுத்தங் • 13. Pāṭaliyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 13. பாடலியஸுத்தவண்ணனா • 13. Pāṭaliyasuttavaṇṇanā
