| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
9. (батама) д̣̇звасабхад̇т̇зраг̇аат̇ааван̣н̣анаа
9. (Paṭhama) devasabhattheragāthāvaṇṇanā
уд̇д̇ин̣н̣аа бан̇габалибаад̇и ааяасмад̇о д̣̇звасабхад̇т̇зрасса г̇аат̇аа. гаа уббад̇д̇и? соби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяам̣ бун̃н̃ам̣ убажинанд̇о сикисса бхаг̇авад̇о гаалз баараавад̇аяонияам̣ ниб̣б̣ад̇д̇о згад̣̇ивасам̣ сад̇т̇аарам̣ д̣̇исваа басаннамаанасо бияаалапалам̣ убанзси. сад̇т̇аа д̇асса басаад̣̇асам̣вад̣дханад̇т̇ам̣ д̇ам̣ барибхун̃ж̇и. со д̇зна ад̇ивияа басаннажид̇д̇о худ̇ваа гаалзна гаалам̣ убасан̇гамид̇ваа ванд̣̇ид̇ваа жид̇д̇ам̣ басаад̣̇зд̇и . со д̇зна бун̃н̃агаммзна д̣̇звалогз ниб̣б̣ад̇д̇о абараабарам̣ бун̃н̃аани гад̇ваа д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з ан̃н̃ад̇арасса ман̣д̣алигаран̃н̃о буд̇д̇о худ̇ваа ниб̣б̣ад̇д̇о д̇арун̣агаалзязва раж̇ж̇з бад̇идтид̇о раж̇ж̇асукаманубхаванд̇о вуд̣̇д̇хо сад̇т̇аарам̣ убасан̇гами, д̇асса сад̇т̇аа д̇хаммам̣ д̣̇зсзси. со д̇хаммам̣ суд̇ваа бадилад̣̇д̇хасад̣̇д̇хо сам̣взг̇аж̇аад̇о раж̇ж̇ам̣ бахааяа баб̣б̣аж̇ид̇ваа вибассанааяа гаммам̣ гаронд̇о нажирассзва арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 1.14.66-72) –
Uttiṇṇā paṅkapalipāti āyasmato devasabhattherassa gāthā. Kā uppatti? Sopi purimabuddhesu katādhikāro tattha tattha bhave vivaṭṭūpanissayaṃ puññaṃ upacinanto sikhissa bhagavato kāle pārāvatayoniyaṃ nibbatto ekadivasaṃ satthāraṃ disvā pasannamānaso piyālaphalaṃ upanesi. Satthā tassa pasādasaṃvaḍḍhanatthaṃ taṃ paribhuñji. So tena ativiya pasannacitto hutvā kālena kālaṃ upasaṅkamitvā vanditvā cittaṃ pasādeti . So tena puññakammena devaloke nibbatto aparāparaṃ puññāni katvā devamanussesu saṃsaranto imasmiṃ buddhuppāde aññatarassa maṇḍalikarañño putto hutvā nibbatto taruṇakāleyeva rajje patiṭṭhito rajjasukhamanubhavanto vuddho satthāraṃ upasaṅkami, tassa satthā dhammaṃ desesi. So dhammaṃ sutvā paṭiladdhasaddho saṃvegajāto rajjaṃ pahāya pabbajitvā vipassanāya kammaṃ karonto nacirasseva arahattaṃ pāpuṇi. Tena vuttaṃ apadāne (apa. thera 1.14.66-72) –
‘‘баараавад̇о д̇ад̣̇аа аасим̣, барам̣ анубарод̇хаго;
‘‘Pārāvato tadā āsiṃ, paraṃ anuparodhako;
баб̣бхаарз сзяяам̣ габбзми, авид̣̇уурз сикисад̇т̇уно.
Pabbhāre seyyaṃ kappemi, avidūre sikhisatthuno.
‘‘сааяам̣ баад̇ан̃жа бассаами, б̣уд̣̇д̇хам̣ логаг̇г̇анааяагам̣;
‘‘Sāyaṃ pātañca passāmi, buddhaṃ lokagganāyakaṃ;
д̣̇зяяад̇хаммо жа мз над̇т̇и, д̣̇вибад̣̇инд̣̇асса д̇аад̣̇ино.
Deyyadhammo ca me natthi, dvipadindassa tādino.
‘‘бияаалапаламаад̣̇ааяа , аг̇амам̣ б̣уд̣̇д̇хасанд̇игам̣;
‘‘Piyālaphalamādāya , agamaṃ buddhasantikaṃ;
бадиг̇г̇ахзси бхаг̇аваа, логаж̇здто нараасабхо.
Paṭiggahesi bhagavā, lokajeṭṭho narāsabho.
‘‘д̇ад̇о барам̣ убаад̣̇ааяа, барижаарим̣ винааяагам̣;
‘‘Tato paraṃ upādāya, paricāriṃ vināyakaṃ;
д̇зна жид̇д̇аббасаад̣̇зна, д̇ад̇т̇а гаалан̇гад̇о ахам̣.
Tena cittappasādena, tattha kālaṅkato ahaṃ.
‘‘згад̇д̇им̣сз ид̇о габбз, яам̣ палам̣ ад̣̇ад̣̇им̣ ахам̣;
‘‘Ekattiṃse ito kappe, yaṃ phalaṃ adadiṃ ahaṃ;
д̣̇уг̇г̇ад̇им̣ наабхиж̇аанаами, палад̣̇аанассид̣̇ам̣ палам̣.
Duggatiṃ nābhijānāmi, phaladānassidaṃ phalaṃ.
‘‘ид̇о баннарасз габбз, д̇аяо аасум̣ бияаалино;
‘‘Ito pannarase kappe, tayo āsuṃ piyālino;
сад̇д̇арад̇анасамбаннаа, жаггавад̇д̇ий махаб̣б̣алаа.
Sattaratanasampannā, cakkavattī mahabbalā.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇ваа бахийнагилзсабажжавзгкан̣авасзна уббаннасоманассо уд̣̇аанам̣ уд̣̇аанзнд̇о –
Arahattaṃ pana patvā pahīnakilesapaccavekkhaṇavasena uppannasomanasso udānaṃ udānento –
89.
89.
‘‘уд̇д̇ин̣н̣аа бан̇габалибаа, баад̇аалаа бариваж̇ж̇ид̇аа;
‘‘Uttiṇṇā paṅkapalipā, pātālā parivajjitā;
муд̇д̇о огхаа жа г̇ант̇аа жа, саб̣б̣з маанаа висам̣хад̇аа’’д̇и. – г̇аат̇ам̣ абхааси;
Mutto oghā ca ganthā ca, sabbe mānā visaṃhatā’’ti. – gāthaṃ abhāsi;
д̇ад̇т̇а уд̇д̇ин̣н̣аад̇и уд̇д̇арид̇аа ад̇игганд̇аа. бан̇габалибаад̇и бан̇гаа жа балибаа жа. бан̇го вужжад̇и багад̇игад̣̇д̣̇амо. ‘‘балибо’’д̇и г̇амбхийрабут̇уло махаагад̣̇д̣̇амо. ид̇ха бана бан̇го вияаад̇и бан̇го, гаамарааг̇о асужибхааваабаад̣̇анзна жид̇д̇асса магканад̇о. балибо вияаад̇и балибо, буд̇д̇ад̣̇аараад̣̇ивисаяо б̣ахало чанд̣̇арааг̇о вуд̇д̇анаязна саммагканад̇о д̣̇уруд̇д̇аран̣ад̇о жа. д̇з маяаа анааг̇аамимаг̇г̇зна саб̣б̣асо ад̇игганд̇аад̇и ааха ‘‘уд̇д̇ин̣н̣аа бан̇габалибаа’’д̇и. баад̇аалаад̇и баад̇ааяааланд̇и баад̇аалаа, махаасамуд̣̇д̣̇з ниннад̇арабад̣̇зсаа. гзжи бана нааг̇абхаванам̣ ‘‘баад̇аала’’нд̇и вад̣̇анд̇и. ид̇ха бана аг̇аахад̣̇ураваг̇г̇аахад̣̇уруд̇д̇аран̣адтзна баад̇аалаа вияаад̇и баад̇аалаа, д̣̇идтияо. д̇з жа маяаа батамамаг̇г̇аад̇хиг̇амзнзва саб̣б̣ат̇аа важ̇ж̇ид̇аа самужчиннаад̇и ааха ‘‘баад̇аалаа бариваж̇ж̇ид̇аа’’д̇и муд̇д̇о огхаа жа г̇ант̇аа жаад̇и гаамогхаад̣̇иогхад̇о абхиж̇жхаагааяаг̇ант̇аад̣̇иг̇ант̇ад̇о жа д̇зна д̇зна маг̇г̇зна муд̇д̇о баримуд̇д̇о, буна анабхигиран̣ааг̇ант̇анавасзна ад̇игганд̇од̇и ад̇т̇о. саб̣б̣з маанаа висам̣хад̇аад̇и нававид̇хааби маанаа аг̇г̇амаг̇г̇аад̇хиг̇амзна висзсад̇о сан̇гхаад̇ам̣ винаасам̣ аабаад̣̇ид̇аа самужчиннаа ‘‘маанавид̇хаа хад̇аа’’д̇и гзжи батанд̇и, маанагодтаасаад̇и ад̇т̇о. ‘‘маанависаа’’д̇и абарз, д̇зсам̣ бана маанависасса д̣̇угкасса палад̇о маанависаад̇и ад̇т̇о д̣̇адтаб̣б̣о.
Tattha uttiṇṇāti uttaritā atikkantā. Paṅkapalipāti paṅkā ca palipā ca. Paṅko vuccati pakatikaddamo. ‘‘Palipo’’ti gambhīraputhulo mahākaddamo. Idha pana paṅko viyāti paṅko, kāmarāgo asucibhāvāpādanena cittassa makkhanato. Palipo viyāti palipo, puttadārādivisayo bahalo chandarāgo vuttanayena sammakkhanato duruttaraṇato ca. Te mayā anāgāmimaggena sabbaso atikkantāti āha ‘‘uttiṇṇā paṅkapalipā’’ti. Pātālāti pātāyālanti pātālā, mahāsamudde ninnatarapadesā. Keci pana nāgabhavanaṃ ‘‘pātāla’’nti vadanti. Idha pana agāhaduravaggāhaduruttaraṇaṭṭhena pātālā viyāti pātālā, diṭṭhiyo. Te ca mayā paṭhamamaggādhigameneva sabbathā vajjitā samucchinnāti āha ‘‘pātālā parivajjitā’’ti mutto oghā ca ganthā cāti kāmoghādioghato abhijjhākāyaganthādiganthato ca tena tena maggena mutto parimutto, puna anabhikiraṇaaganthanavasena atikkantoti attho. Sabbe mānā visaṃhatāti navavidhāpi mānā aggamaggādhigamena visesato saṅghātaṃ vināsaṃ āpāditā samucchinnā ‘‘mānavidhā hatā’’ti keci paṭhanti, mānakoṭṭhāsāti attho. ‘‘Mānavisā’’ti apare, tesaṃ pana mānavisassa dukkhassa phalato mānavisāti attho daṭṭhabbo.
(батама) д̣̇звасабхад̇т̇зраг̇аат̇ааван̣н̣анаа нидтид̇аа.
(Paṭhama) devasabhattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 9. (батама)-д̣̇звасабхад̇т̇зраг̇аат̇аа • 9. (Paṭhama)-devasabhattheragāthā
