| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၈. ကုမာရိဘူတဝဂ္ဂော
8. Kumāribhūtavaggo
၁-၂-၃. ပဌမ-ဒုတိယ-တတိယသိက္ခာပဒ-အတ္ထယောဇနာ
1-2-3. Paṭhama-dutiya-tatiyasikkhāpada-atthayojanā
၁၁၁၉. ကုမာရိဘူတဝဂ္ဂသ္သ ပဌမဒုတိယတတိယေသု ယာ ပန တာ မဟာသိက္ခမာနာတိ သမ္ဗန္ဓော။ သဗ္ဗပဌမာ ဒ္ဝေ မဟာသိက္ခမာနာတိ ဂဗ္ဘိနိဝဂ္ဂေ သဗ္ဗာသံ သိက္ခမာနာနံ ပဌမံ ဝုတ္တာ ဒ္ဝေ မဟာသိက္ခမာနာ။ တာ ပနာတိ မဟာသိက္ခမာနာ ပန။ သိက္ခမာနာဣစ္စေဝ ဝတ္တဗ္ဗာတိ သမ္မုတိကမ္မေသု သာမညတော ဝတ္တဗ္ဗာ။ ‘‘ဂိဟိဂတာ’’တိ ဝာ ‘‘ကုမာရိဘူတာ’’တိ ဝာ န ဝတ္တဗ္ဗာ, ဝဒန္တိ စေ, သမ္မုတိကမ္မံ ကုပ္ပတီတိ အဓိပ္ပာယော။ ဂိဟိဂတာယာတိ ဧတ္ထ ဂိဟိဂတာ နာမ ပုရိသန္တရဂတာ ဝုစ္စတိ။ သာ ဟိ ယသ္မာ ပုရိသသင္ခာတေန ဂိဟိနာ ဂမိယိတ္ထ, အဇ္ဈာစာရဝသေန, ဂိဟိံ ဝာ ဂမိတ္ထ, တသ္မာ ဂိဟိဂတာတိ ဝုစ္စတိ။ အယံ သိက္ခမာနာတိ သမ္ဗန္ဓော။ ကုမာရိဘူတာ နာမ သာမဏေရာ ဝုစ္စတိ။ သာ ဟိ ယသ္မာ အဂိဟိဂတတ္တာ ကုမာရီ ဟုတ္ဝာ ဘူတာ, ကုမာရိဘာဝံ ဝာ ဘူတာ ဂတာ, တသ္မာ ကုမာရိဘူတာတိ ဝုစ္စတိ။ တိသ္သောပီတိ ဂိဟိဂတာ ကုမာရိဘူတာ မဟာသိက္ခမာနာတိ တိသ္သောပိ။ သိက္ခမာနာတိ သိက္ခံ မာနေတီတိ သိက္ခမာနာတိ။ ပဌမ ဒုတိယ တတိယာနိ။
1119. Kumāribhūtavaggassa paṭhamadutiyatatiyesu yā pana tā mahāsikkhamānāti sambandho. Sabbapaṭhamā dve mahāsikkhamānāti gabbhinivagge sabbāsaṃ sikkhamānānaṃ paṭhamaṃ vuttā dve mahāsikkhamānā. Tā panāti mahāsikkhamānā pana. Sikkhamānāicceva vattabbāti sammutikammesu sāmaññato vattabbā. ‘‘Gihigatā’’ti vā ‘‘kumāribhūtā’’ti vā na vattabbā, vadanti ce, sammutikammaṃ kuppatīti adhippāyo. Gihigatāyāti ettha gihigatā nāma purisantaragatā vuccati. Sā hi yasmā purisasaṅkhātena gihinā gamiyittha, ajjhācāravasena, gihiṃ vā gamittha, tasmā gihigatāti vuccati. Ayaṃ sikkhamānāti sambandho. Kumāribhūtā nāma sāmaṇerā vuccati. Sā hi yasmā agihigatattā kumārī hutvā bhūtā, kumāribhāvaṃ vā bhūtā gatā, tasmā kumāribhūtāti vuccati. Tissopīti gihigatā kumāribhūtā mahāsikkhamānāti tissopi. Sikkhamānāti sikkhaṃ mānetīti sikkhamānāti. Paṭhama dutiya tatiyāni.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ဘိက္ခုနီဝိဘင္ဂ • Bhikkhunīvibhaṅga / ၁. ပဌမသိက္ခာပဒံ • 1. Paṭhamasikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၁-၂-၃. ပဌမဒုတိယတတိယသိက္ခာပဒဝဏ္ဏနာ • 1-2-3. Paṭhamadutiyatatiyasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၈. ကုမာရိဘူတဝဂ္ဂဝဏ္ဏနာ • 8. Kumāribhūtavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမာဒိသိက္ခာပဒဝဏ္ဏနာ • 1. Paṭhamādisikkhāpadavaṇṇanā
