| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(12) 2. பச்சோரோஹணிவக்³கோ³
(12) 2. Paccorohaṇivaggo
1-4. பட²மஅத⁴ம்மஸுத்தாதி³வண்ணனா
1-4. Paṭhamaadhammasuttādivaṇṇanā
113-6. து³தியஸ்ஸ பட²மது³தியானி உத்தானத்தா²னி. ததியே ஜானங் ஜானாதீதி ஸப்³ப³ஞ்ஞுதஞ்ஞாணேன ஜானிதப்³ப³ங் ஸப்³ப³ங் ஜானாதி ஏவ. ந ஹி பதே³ஸஞாணே டி²தோ ஜானிதப்³ப³ங் ஸப்³ப³ங் ஜானாதி. உக்கட்ட²னித்³தே³ஸேன ஹி அவிஸேஸக்³க³ஹணேன ச ‘‘ஜான’’ந்தி இமினா நிரவஸேஸங் ஞெய்யஜாதங் பரிக்³க³ய்ஹதீதி தப்³பி³ஸயாய ஜானநகிரியாய ஸப்³ப³ஞ்ஞுதஞ்ஞாணமேவ கரணங் ப⁴விதுங் யுத்தங், பகரணவஸேன ‘‘ப⁴க³வா’’தி ஸத்³த³ந்தரஸன்னிதா⁴னேன ச அயமத்தோ² விபா⁴வேதப்³போ³. பஸ்ஸிதப்³ப³மேவ பஸ்ஸதீதி தி³ப்³ப³சக்கு²பஞ்ஞாசக்கு²த⁴ம்மசக்கு²பு³த்³த⁴சக்கு²ஸமந்தசக்கு²ஸங்கா²தேஹி ஞாணசக்கூ²ஹி பஸ்ஸிதப்³ப³ங் பஸ்ஸதி ஏவ. அத² வா ஜானங் ஜானாதீதி யதா² அஞ்ஞே ஸவிபல்லாஸா காமரூபபரிஞ்ஞாவாதி³னோ ஜானந்தாபி விபல்லாஸவஸேன ஜானந்தி, ந ஏவங் ப⁴க³வா. ப⁴க³வா பன பஹீனவிபல்லாஸத்தா ஜானந்தோ ஜானாதி ஏவ, தி³ட்டி²த³ஸ்ஸனஸ்ஸ அபா⁴வா பஸ்ஸந்தோ பஸ்ஸதியேவாதி அத்தோ². சக்கு² விய பூ⁴தோதி த³ஸ்ஸனபரிணாயகட்டே²ன சக்கு² விய பூ⁴தோ. யதா² ஹி சக்கு² ஸத்தானங் த³ஸ்ஸனத்த²ங் பரிணேதி ஸாதே⁴தி, ஏவங் லோகஸ்ஸ யாதா²வத³ஸ்ஸனஸாத⁴னதோபி த³ஸ்ஸனகிச்சபரிணாயகட்டே²ன சக்கு² விய பூ⁴தோ, பஞ்ஞாசக்கு²மயத்தா வா ஸயம்பு⁴ஞாணேன பஞ்ஞாசக்கு²ங் பூ⁴தோ பத்தோதி வா சக்கு²பூ⁴தோ.
113-6. Dutiyassa paṭhamadutiyāni uttānatthāni. Tatiye jānaṃ jānātīti sabbaññutaññāṇena jānitabbaṃ sabbaṃ jānāti eva. Na hi padesañāṇe ṭhito jānitabbaṃ sabbaṃ jānāti. Ukkaṭṭhaniddesena hi avisesaggahaṇena ca ‘‘jāna’’nti iminā niravasesaṃ ñeyyajātaṃ pariggayhatīti tabbisayāya jānanakiriyāya sabbaññutaññāṇameva karaṇaṃ bhavituṃ yuttaṃ, pakaraṇavasena ‘‘bhagavā’’ti saddantarasannidhānena ca ayamattho vibhāvetabbo. Passitabbameva passatīti dibbacakkhupaññācakkhudhammacakkhubuddhacakkhusamantacakkhusaṅkhātehi ñāṇacakkhūhi passitabbaṃ passati eva. Atha vā jānaṃ jānātīti yathā aññe savipallāsā kāmarūpapariññāvādino jānantāpi vipallāsavasena jānanti, na evaṃ bhagavā. Bhagavā pana pahīnavipallāsattā jānanto jānāti eva, diṭṭhidassanassa abhāvā passanto passatiyevāti attho. Cakkhu viya bhūtoti dassanapariṇāyakaṭṭhena cakkhu viya bhūto. Yathā hi cakkhu sattānaṃ dassanatthaṃ pariṇeti sādheti, evaṃ lokassa yāthāvadassanasādhanatopi dassanakiccapariṇāyakaṭṭhena cakkhu viya bhūto, paññācakkhumayattā vā sayambhuñāṇena paññācakkhuṃ bhūto pattoti vā cakkhubhūto.
ஞாணஸபா⁴வோதி விதி³தகரணட்டே²ன ஞாணஸபா⁴வோ. அவிபரீதஸபா⁴வட்டே²ன பரியத்தித⁴ம்மப்பவத்தனதோ வா ஹத³யேன சிந்தெத்வா வாசாய நிச்சா²ரிதத⁴ம்மமயோதி த⁴ம்மபூ⁴தோ. தேனாஹ ‘‘த⁴ம்மஸபா⁴வோ’’தி. த⁴ம்மா வா போ³தி⁴பக்கி²யா தேஹி உப்பன்னத்தா லோகஸ்ஸ ச தது³ப்பாத³னதோ, அனஞ்ஞஸாதா⁴ரணங் வா த⁴ம்மங் பத்தோ அதி⁴க³தோதி த⁴ம்மபூ⁴தோ. ஸெட்ட²ட்டே²ன ப்³ரஹ்மபூ⁴தோதி ஆஹ ‘‘ஸெட்ட²ஸபா⁴வோ’’தி. அத² வா ப்³ரஹ்மா வுச்சதி மக்³கோ³, தேன உப்பன்னத்தா லோகஸ்ஸ ச தது³ப்பாத³னதோ, தஞ்ச ஸயம்பு⁴ஞாணேன பத்தோதி ப்³ரஹ்மபூ⁴தோ. சதுஸச்சத⁴ம்மங் வத³தீதி வத்தா. சிரங் ஸச்சப்படிவேத⁴ங் பவத்தெந்தோ வத³தீதி பவத்தா. அத்த²ங் நீஹரித்வாதி து³க்கா²தி³அத்த²ங் தத்தா²பி பீளனாதி³அத்த²ங் உத்³த⁴ரித்வா. பரமத்த²ங் வா நிப்³பா³னங் பாபயிதா நின்னேதா. அமதாதி⁴க³மபடிபத்திதே³ஸனாய அமதஸச்சி²கிரியங் ஸத்தேஸு உப்பாதெ³ந்தோ அமதங் த³தா³தீதி அமதஸ்ஸ தா³தா. போ³தி⁴பக்கி²யத⁴ம்மானங் ததா³யத்தபா⁴வதோ த⁴ம்மஸாமீ. சதுத்தே² நத்தி² வத்தப்³ப³ங்.
Ñāṇasabhāvoti viditakaraṇaṭṭhena ñāṇasabhāvo. Aviparītasabhāvaṭṭhena pariyattidhammappavattanato vā hadayena cintetvā vācāya nicchāritadhammamayoti dhammabhūto. Tenāha ‘‘dhammasabhāvo’’ti. Dhammā vā bodhipakkhiyā tehi uppannattā lokassa ca taduppādanato, anaññasādhāraṇaṃ vā dhammaṃ patto adhigatoti dhammabhūto. Seṭṭhaṭṭhena brahmabhūtoti āha ‘‘seṭṭhasabhāvo’’ti. Atha vā brahmā vuccati maggo, tena uppannattā lokassa ca taduppādanato, tañca sayambhuñāṇena pattoti brahmabhūto. Catusaccadhammaṃ vadatīti vattā. Ciraṃ saccappaṭivedhaṃ pavattento vadatīti pavattā. Atthaṃ nīharitvāti dukkhādiatthaṃ tatthāpi pīḷanādiatthaṃ uddharitvā. Paramatthaṃ vā nibbānaṃ pāpayitā ninnetā. Amatādhigamapaṭipattidesanāya amatasacchikiriyaṃ sattesu uppādento amataṃ dadātīti amatassa dātā. Bodhipakkhiyadhammānaṃ tadāyattabhāvato dhammasāmī. Catutthe natthi vattabbaṃ.
பட²மஅத⁴ம்மஸுத்தாதி³வண்ணனா நிட்டி²தா.
Paṭhamaadhammasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. பட²மஅத⁴ம்மஸுத்தங் • 1. Paṭhamaadhammasuttaṃ
2. து³தியஅத⁴ம்மஸுத்தங் • 2. Dutiyaadhammasuttaṃ
3. ததியஅத⁴ம்மஸுத்தங் • 3. Tatiyaadhammasuttaṃ
4. அஜிதஸுத்தங் • 4. Ajitasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
1-2. அத⁴ம்மஸுத்தத்³வயவண்ணனா • 1-2. Adhammasuttadvayavaṇṇanā
3. ததியஅத⁴ம்மஸுத்தவண்ணனா • 3. Tatiyaadhammasuttavaṇṇanā
4. அஜிதஸுத்தவண்ணனா • 4. Ajitasuttavaṇṇanā
