| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
(১২) ২. পচ্চোরোহণিৰগ্গো
(12) 2. Paccorohaṇivaggo
১. পঠমঅধম্মসুত্তং
1. Paṭhamaadhammasuttaṃ
১১৩. 1 ‘‘অধম্মো চ, ভিক্খৰে, ৰেদিতব্বো অনত্থো চ; ধম্মো চ ৰেদিতব্বো অত্থো চ। অধম্মঞ্চ ৰিদিত্ৰা অনত্থঞ্চ, ধম্মঞ্চ ৰিদিত্ৰা অত্থঞ্চ যথা ধম্মো যথা অত্থো তথা পটিপজ্জিতব্বং।
113.2 ‘‘Adhammo ca, bhikkhave, veditabbo anattho ca; dhammo ca veditabbo attho ca. Adhammañca viditvā anatthañca, dhammañca viditvā atthañca yathā dhammo yathā attho tathā paṭipajjitabbaṃ.
‘‘কতমো চ, ভিক্খৰে, অধম্মো চ অনত্থো চ? মিচ্ছাদিট্ঠি, মিচ্ছাসঙ্কপ্পো, মিচ্ছাৰাচা, মিচ্ছাকম্মন্তো, মিচ্ছাআজীৰো, মিচ্ছাৰাযামো, মিচ্ছাসতি, মিচ্ছাসমাধি, মিচ্ছাঞাণং, মিচ্ছাৰিমুত্তি – অযং ৰুচ্চতি, ভিক্খৰে, অধম্মো চ অনত্থো চ।
‘‘Katamo ca, bhikkhave, adhammo ca anattho ca? Micchādiṭṭhi, micchāsaṅkappo, micchāvācā, micchākammanto, micchāājīvo, micchāvāyāmo, micchāsati, micchāsamādhi, micchāñāṇaṃ, micchāvimutti – ayaṃ vuccati, bhikkhave, adhammo ca anattho ca.
‘‘কতমো চ, ভিক্খৰে, ধম্মো চ অত্থো চ? সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি, সম্মাঞাণং, সম্মাৰিমুত্তি – অযং ৰুচ্চতি, ভিক্খৰে, ধম্মো চ অত্থো চ।
‘‘Katamo ca, bhikkhave, dhammo ca attho ca? Sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi, sammāñāṇaṃ, sammāvimutti – ayaṃ vuccati, bhikkhave, dhammo ca attho ca.
‘‘‘অধম্মো চ, ভিক্খৰে, ৰেদিতব্বো অনত্থো চ; ধম্মো চ ৰেদিতব্বো অত্থো চ। অধম্মঞ্চ ৰিদিত্ৰা অনত্থঞ্চ, ধম্মঞ্চ ৰিদিত্ৰা অত্থঞ্চ যথা ধম্মো যথা অত্থো তথা পটিপজ্জিতব্ব’ন্তি, ইতি যং তং ৰুত্তং, ইদমেতং পটিচ্চ ৰুত্ত’’ন্তি। পঠমং।
‘‘‘Adhammo ca, bhikkhave, veditabbo anattho ca; dhammo ca veditabbo attho ca. Adhammañca viditvā anatthañca, dhammañca viditvā atthañca yathā dhammo yathā attho tathā paṭipajjitabba’nti, iti yaṃ taṃ vuttaṃ, idametaṃ paṭicca vutta’’nti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১-২. অধম্মসুত্তদ্ৰযৰণ্ণনা • 1-2. Adhammasuttadvayavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৪. পঠমঅধম্মসুত্তাদিৰণ্ণনা • 1-4. Paṭhamaadhammasuttādivaṇṇanā
