| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. පඤ්‌චඞ්‌ගිකවග්‌ගො
3. Pañcaṅgikavaggo
1. පඨමඅගාරවසුත්‌තං
1. Paṭhamaagāravasuttaṃ
21. ‘‘සො වත, භික්‌ඛවෙ, භික්‌ඛු අගාරවො අප්‌පතිස්‌සො අසභාගවුත්‌තිකො ‘සබ්‍රහ්‌මචාරීසු ආභිසමාචාරිකං ධම්‌මං පරිපූරෙස්‌සතී’ති නෙතං ඨානං විජ්‌ජති. ‘ආභිසමාචාරිකං ධම්‌මං අපරිපූරෙත්‌වා සෙඛං 1 ධම්‌මං පරිපූරෙස්‌සතී’ති නෙතං ඨානං විජ්‌ජති. ‘සෙඛං ධම්‌මං අපරිපූරෙත්‌වා සීලානි පරිපූරෙස්‌සතී’ති නෙතං ඨානං විජ්‌ජති. ‘සීලානි අපරිපූරෙත්‌වා සම්‌මාදිට්‌ඨිං පරිපූරෙස්‌සතී’ති නෙතං ඨානං විජ්‌ජති. ‘සම්‌මාදිට්‌ඨිං අපරිපූරෙත්‌වා සම්‌මාසමාධිං පරිපූරෙස්‌සතී’ති නෙතං ඨානං විජ්‌ජති.
21. ‘‘So vata, bhikkhave, bhikkhu agāravo appatisso asabhāgavuttiko ‘sabrahmacārīsu ābhisamācārikaṃ dhammaṃ paripūressatī’ti netaṃ ṭhānaṃ vijjati. ‘Ābhisamācārikaṃ dhammaṃ aparipūretvā sekhaṃ 2 dhammaṃ paripūressatī’ti netaṃ ṭhānaṃ vijjati. ‘Sekhaṃ dhammaṃ aparipūretvā sīlāni paripūressatī’ti netaṃ ṭhānaṃ vijjati. ‘Sīlāni aparipūretvā sammādiṭṭhiṃ paripūressatī’ti netaṃ ṭhānaṃ vijjati. ‘Sammādiṭṭhiṃ aparipūretvā sammāsamādhiṃ paripūressatī’ti netaṃ ṭhānaṃ vijjati.
‘‘සො වත, භික්‌ඛවෙ, භික්‌ඛු සගාරවො සප්‌පතිස්‌සො සභාගවුත්‌තිකො ‘සබ්‍රහ්‌මචාරීසු ආභිසමාචාරිකං ධම්‌මං පරිපූරෙස්‌සතී’ති ඨානමෙතං විජ්‌ජති. ‘ආභිසමාචාරිකං ධම්‌මං පරිපූරෙත්‌වා සෙඛං ධම්‌මං පරිපූරෙස්‌සතී’ති ඨානමෙතං විජ්‌ජති. ‘සෙඛං ධම්‌මං පරිපූරෙත්‌වා සීලානි පරිපූරෙස්‌සතී’ති ඨානමෙතං විජ්‌ජති. ‘සීලානි පරිපූරෙත්‌වා සම්‌මාදිට්‌ඨිං පරිපූරෙස්‌සතී’ති ඨානමෙතං විජ්‌ජති. ‘සම්‌මාදිට්‌ඨිං පරිපූරෙත්‌වා සම්‌මාසමාධිං පරිපූරෙස්‌සතී’ති ඨානමෙතං විජ්‌ජතී’’ති. පඨමං.
‘‘So vata, bhikkhave, bhikkhu sagāravo sappatisso sabhāgavuttiko ‘sabrahmacārīsu ābhisamācārikaṃ dhammaṃ paripūressatī’ti ṭhānametaṃ vijjati. ‘Ābhisamācārikaṃ dhammaṃ paripūretvā sekhaṃ dhammaṃ paripūressatī’ti ṭhānametaṃ vijjati. ‘Sekhaṃ dhammaṃ paripūretvā sīlāni paripūressatī’ti ṭhānametaṃ vijjati. ‘Sīlāni paripūretvā sammādiṭṭhiṃ paripūressatī’ti ṭhānametaṃ vijjati. ‘Sammādiṭṭhiṃ paripūretvā sammāsamādhiṃ paripūressatī’ti ṭhānametaṃ vijjatī’’ti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1. පඨමඅගාරවසුත්‌තවණ්‌ණනා • 1. Paṭhamaagāravasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-2. පඨමඅගාරවසුත්‌තාදිවණ්‌ණනා • 1-2. Paṭhamaagāravasuttādivaṇṇanā
