| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
৬. পাযাসিৰগ্গো
6. Pāyāsivaggo
১. পঠমঅগারিযৰিমানৰণ্ণনা
1. Paṭhamaagāriyavimānavaṇṇanā
যথা ৰনং চিত্তলতং পভাসতীতি অগারিযৰিমানং। তস্স কা উপ্পত্তি? ভগৰা রাজগহে ৰিহরতি ৰেল়ুৰনে। তেন সমযেন রাজগহে একং কুলং উভতোপসন্নং হোতি সীলাচারসম্পন্নং ওপানভূতং ভিক্খূনং ভিক্খুনীনং। তে দ্ৰে জযম্পতিকা রতনত্তযং উদ্দিস্স যাৰজীৰং পুঞ্ঞানি কত্ৰা ততো চুতা তাৰতিংসেসু নিব্বত্তিংসু, তেসং দ্ৰাদসযোজনিকং কনকৰিমানং নিব্বত্তি। তে তত্থ দিব্বসম্পত্তিং অনুভৰন্তি। অথাযস্মা মহামোগ্গল্লানোতিআদি হেট্ঠা ৰুত্তনযেনেৰ ৰেদিতব্বং।
Yathāvanaṃ cittalataṃ pabhāsatīti agāriyavimānaṃ. Tassa kā uppatti? Bhagavā rājagahe viharati veḷuvane. Tena samayena rājagahe ekaṃ kulaṃ ubhatopasannaṃ hoti sīlācārasampannaṃ opānabhūtaṃ bhikkhūnaṃ bhikkhunīnaṃ. Te dve jayampatikā ratanattayaṃ uddissa yāvajīvaṃ puññāni katvā tato cutā tāvatiṃsesu nibbattiṃsu, tesaṃ dvādasayojanikaṃ kanakavimānaṃ nibbatti. Te tattha dibbasampattiṃ anubhavanti. Athāyasmā mahāmoggallānotiādi heṭṭhā vuttanayeneva veditabbaṃ.
১০৪৮.
1048.
‘‘যথা ৰনং চিত্তলতং পভাসতি, উয্যানসেট্ঠং তিদসানমুত্তমং।
‘‘Yathā vanaṃ cittalataṃ pabhāsati, uyyānaseṭṭhaṃ tidasānamuttamaṃ;
তথূপমং তুয্হমিদং ৰিমানং, ওভাসযং তিট্ঠতি অন্তলিক্খে॥
Tathūpamaṃ tuyhamidaṃ vimānaṃ, obhāsayaṃ tiṭṭhati antalikkhe.
১০৪৯.
1049.
‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং।
‘‘Deviddhipattosi mahānubhāvo, manussabhūto kimakāsi puññaṃ;
কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি॥ –
Kenāsi evaṃ jalitānubhāvo, vaṇṇo ca te sabbadisā pabhāsatī’’ti. –
থেরো পুচ্ছি।
Thero pucchi.
১০৫০.
1050.
‘‘সো দেৰপুত্তো অত্তমনো, মোগ্গল্লানেন পুচ্ছিতো।
‘‘So devaputto attamano, moggallānena pucchito;
পঞ্হং পুট্ঠো ৰিযাকাসি, যস্স কম্মস্সিদং ফলং’’॥
Pañhaṃ puṭṭho viyākāsi, yassa kammassidaṃ phalaṃ’’.
১০৫১.
1051.
‘‘অহঞ্চ ভরিযা চ মনুস্সলোকে, ওপানভূতা ঘরমাৰসিম্হ।
‘‘Ahañca bhariyā ca manussaloke, opānabhūtā gharamāvasimha;
অন্নঞ্চ পানঞ্চ পসন্নচিত্তা, সক্কচ্চ দানং ৰিপুলং অদম্হ॥
Annañca pānañca pasannacittā, sakkacca dānaṃ vipulaṃ adamha.
১০৫২.
1052.
‘‘তেন মেতাদিসো ৰণ্ণো…পে॰…
‘‘Tena metādiso vaṇṇo…pe…
ৰণ্ণো চ মে সব্বদিসা পভাসতী’’তি॥ –
Vaṇṇo ca me sabbadisā pabhāsatī’’ti. –
অত্তনো সম্পত্তিং ব্যাকাসি। গাথাসুপি অপুব্বং নত্থি।
Attano sampattiṃ byākāsi. Gāthāsupi apubbaṃ natthi.
পঠমঅগারিযৰিমানৰণ্ণনা নিট্ঠিতা।
Paṭhamaagāriyavimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ১. পঠমঅগারিযৰিমানৰত্থু • 1. Paṭhamaagāriyavimānavatthu
