| Library / Tipiṭaka / තිපිටක • Tipiṭaka / විමානවත්‌ථු-අට්‌ඨකථා • Vimānavatthu-aṭṭhakathā |
6. පායාසිවග්‌ගො
6. Pāyāsivaggo
1. පඨමඅගාරියවිමානවණ්‌ණනා
1. Paṭhamaagāriyavimānavaṇṇanā
යථා වනං චිත්‌තලතං පභාසතීති අගාරියවිමානං. තස්‌ස කා උප්‌පත්‌ති? භගවා රාජගහෙ විහරති වෙළුවනෙ. තෙන සමයෙන රාජගහෙ එකං කුලං උභතොපසන්‌නං හොති සීලාචාරසම්‌පන්‌නං ඔපානභූතං භික්‌ඛූනං භික්‌ඛුනීනං. තෙ ද්‌වෙ ජයම්‌පතිකා රතනත්‌තයං උද්‌දිස්‌ස යාවජීවං පුඤ්‌ඤානි කත්‌වා තතො චුතා තාවතිංසෙසු නිබ්‌බත්‌තිංසු, තෙසං ද්‌වාදසයොජනිකං කනකවිමානං නිබ්‌බත්‌ති. තෙ තත්‌ථ දිබ්‌බසම්‌පත්‌තිං අනුභවන්‌ති. අථායස්‌මා මහාමොග්‌ගල්‌ලානොතිආදි හෙට්‌ඨා වුත්‌තනයෙනෙව වෙදිතබ්‌බං.
Yathāvanaṃ cittalataṃ pabhāsatīti agāriyavimānaṃ. Tassa kā uppatti? Bhagavā rājagahe viharati veḷuvane. Tena samayena rājagahe ekaṃ kulaṃ ubhatopasannaṃ hoti sīlācārasampannaṃ opānabhūtaṃ bhikkhūnaṃ bhikkhunīnaṃ. Te dve jayampatikā ratanattayaṃ uddissa yāvajīvaṃ puññāni katvā tato cutā tāvatiṃsesu nibbattiṃsu, tesaṃ dvādasayojanikaṃ kanakavimānaṃ nibbatti. Te tattha dibbasampattiṃ anubhavanti. Athāyasmā mahāmoggallānotiādi heṭṭhā vuttanayeneva veditabbaṃ.
1048.
1048.
‘‘යථා වනං චිත්‌තලතං පභාසති, උය්‍යානසෙට්‌ඨං තිදසානමුත්‌තමං;
‘‘Yathā vanaṃ cittalataṃ pabhāsati, uyyānaseṭṭhaṃ tidasānamuttamaṃ;
තථූපමං තුය්‌හමිදං විමානං, ඔභාසයං තිට්‌ඨති අන්‌තලික්‌ඛෙ.
Tathūpamaṃ tuyhamidaṃ vimānaṃ, obhāsayaṃ tiṭṭhati antalikkhe.
1049.
1049.
‘‘දෙවිද්‌ධිපත්‌තොසි මහානුභාවො, මනුස්‌සභූතො කිමකාසි පුඤ්‌ඤං;
‘‘Deviddhipattosi mahānubhāvo, manussabhūto kimakāsi puññaṃ;
කෙනාසි එවං ජලිතානුභාවො, වණ්‌ණො ච තෙ සබ්‌බදිසා පභාසතී’’ති. –
Kenāsi evaṃ jalitānubhāvo, vaṇṇo ca te sabbadisā pabhāsatī’’ti. –
ථෙරො පුච්‌ඡි.
Thero pucchi.
1050.
1050.
‘‘සො දෙවපුත්‌තො අත්‌තමනො, මොග්‌ගල්‌ලානෙන පුච්‌ඡිතො;
‘‘So devaputto attamano, moggallānena pucchito;
පඤ්‌හං පුට්‌ඨො වියාකාසි, යස්‌ස කම්‌මස්‌සිදං ඵලං’’.
Pañhaṃ puṭṭho viyākāsi, yassa kammassidaṃ phalaṃ’’.
1051.
1051.
‘‘අහඤ්‌ච භරියා ච මනුස්‌සලොකෙ, ඔපානභූතා ඝරමාවසිම්‌හ;
‘‘Ahañca bhariyā ca manussaloke, opānabhūtā gharamāvasimha;
අන්‌නඤ්‌ච පානඤ්‌ච පසන්‌නචිත්‌තා, සක්‌කච්‌ච දානං විපුලං අදම්‌හ.
Annañca pānañca pasannacittā, sakkacca dānaṃ vipulaṃ adamha.
1052.
1052.
‘‘තෙන මෙතාදිසො වණ්‌ණො…පෙ.…
‘‘Tena metādiso vaṇṇo…pe…
වණ්‌ණො ච මෙ සබ්‌බදිසා පභාසතී’’ති. –
Vaṇṇo ca me sabbadisā pabhāsatī’’ti. –
අත්‌තනො සම්‌පත්‌තිං බ්‍යාකාසි. ගාථාසුපි අපුබ්‌බං නත්‌ථි.
Attano sampattiṃ byākāsi. Gāthāsupi apubbaṃ natthi.
පඨමඅගාරියවිමානවණ්‌ණනා නිට්‌ඨිතා.
Paṭhamaagāriyavimānavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / විමානවත්‌ථුපාළි • Vimānavatthupāḷi / 1. පඨමඅගාරියවිමානවත්‌ථු • 1. Paṭhamaagāriyavimānavatthu
