| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৭-১০. পঠমঅগতিসুত্তাদিৰণ্ণনা
7-10. Paṭhamaagatisuttādivaṇṇanā
১৭-২০. সত্তমে ছন্দাগতিন্তি এত্থ সন্ধিৰসেন সরলোপোতি দস্সেন্তো আহ ‘‘ছন্দেন অগতি’’ন্তি। ছন্দাতি হেতুম্হি নিস্সক্কৰচনন্তি আহ ‘‘ছন্দেনা’’তি, পেমেনাতি অত্থো। ছন্দসদ্দো হেত্থ তণ্হাপরিযাযো, অকুসলচ্ছন্দপরিযাযো ৰা। সেসেসূতি ‘‘দোসাগতিং গচ্ছতী’’তিআদীসু।
17-20. Sattame chandāgatinti ettha sandhivasena saralopoti dassento āha ‘‘chandena agati’’nti. Chandāti hetumhi nissakkavacananti āha ‘‘chandenā’’ti, pemenāti attho. Chandasaddo hettha taṇhāpariyāyo, akusalacchandapariyāyo vā. Sesesūti ‘‘dosāgatiṃ gacchatī’’tiādīsu.
এত্থ চ যো ‘‘অযং মে মিত্তোতি ৰা, সন্দিট্ঠোতি ৰা, ঞাতকোতি ৰা, লঞ্চং ৰা পন মে দেতী’’তি ছন্দৰসেন অস্সামিকং সামিকং করোতি, অযং ছন্দেন অকত্তব্বং করোতি নাম। যো ‘‘অযং মে ৰেরী’’তি চিরকালানুবদ্ধৰেরৰসেন ৰা, তঙ্খণুপ্পন্নকোধৰসেন ৰা সামিকং অস্সামিকং করোতি, অযং দোসেন অকত্তব্বং করোতি নাম। যো পন মন্দত্তা মোমূহত্তা যং ৰা তং ৰা অযুত্তং অকারণং ৰত্ৰা অস্সামিকং সামিকং করোতি, অযং মোহেন অকত্তব্বং করোতি নাম। যো পন ‘‘অযং রাজৰল্লভোতি ৰা ৰিসমে চোরাদিকে ৰিসমানি ৰা কাযদুচ্চরিতাদীনি সমাদায ৰত্তনেন ৰিসমনিস্সিতো ৰা, অনত্থম্পি মে করেয্যা’’তি ভীতো অস্সামিকং সামিকং করোতি, অযং ভযেন অকত্তব্বং করোতি নাম।
Ettha ca yo ‘‘ayaṃ me mittoti vā, sandiṭṭhoti vā, ñātakoti vā, lañcaṃ vā pana me detī’’ti chandavasena assāmikaṃ sāmikaṃ karoti, ayaṃ chandena akattabbaṃ karoti nāma. Yo ‘‘ayaṃ me verī’’ti cirakālānubaddhaveravasena vā, taṅkhaṇuppannakodhavasena vā sāmikaṃ assāmikaṃ karoti, ayaṃ dosena akattabbaṃ karoti nāma. Yo pana mandattā momūhattā yaṃ vā taṃ vā ayuttaṃ akāraṇaṃ vatvā assāmikaṃ sāmikaṃ karoti, ayaṃ mohena akattabbaṃ karoti nāma. Yo pana ‘‘ayaṃ rājavallabhoti vā visame corādike visamāni vā kāyaduccaritādīni samādāya vattanena visamanissito vā, anatthampi me kareyyā’’ti bhīto assāmikaṃ sāmikaṃ karoti, ayaṃ bhayena akattabbaṃ karoti nāma.
যো পন কিঞ্চি ভাজেন্তো ‘‘অযং মে সন্দিট্ঠো ৰা সম্ভত্তো ৰা’’তি পেমৰসেন অতিরেকং দেতি, ‘‘অযং মে ৰেরী’’তি দোসৰসেন ঊনকং দেতি , যো মুয্হন্তো দিন্নাদিন্নং অজানমানো কস্সচি ঊনং, কস্সচি অধিকং দেতি, ‘‘অযং ইমস্মিং অদীযমানে ময্হং অনত্থম্পি করেয্যা’’তি সীতো কস্সচি অতিরেকং দেতি, সো চতুব্বিধোপি যথানুক্কমেন ছন্দাগতিআদীনি গচ্ছন্তো অকত্তব্বং করোতি নাম।
Yo pana kiñci bhājento ‘‘ayaṃ me sandiṭṭho vā sambhatto vā’’ti pemavasena atirekaṃ deti, ‘‘ayaṃ me verī’’ti dosavasena ūnakaṃ deti , yo muyhanto dinnādinnaṃ ajānamāno kassaci ūnaṃ, kassaci adhikaṃ deti, ‘‘ayaṃ imasmiṃ adīyamāne mayhaṃ anatthampi kareyyā’’ti sīto kassaci atirekaṃ deti, so catubbidhopi yathānukkamena chandāgatiādīni gacchanto akattabbaṃ karoti nāma.
নিহীযতি তস্স যসোতি তস্স অগতিগামিনো কিত্তিযসোপি পরিৰারযসোপি নিহীযতি পরিহাযতি। যস্সতি তেন কিত্তীযতীতি হি যসো, কিত্তি থুতিঘোসো। যস্সতি তেন পুরেচরানুচরভাৰেন পরিৰারযতীতি যসো, পরিৰারো। অট্ঠমনৰমদসমানি উত্তানত্থানেৰ।
Nihīyati tassa yasoti tassa agatigāmino kittiyasopi parivārayasopi nihīyati parihāyati. Yassati tena kittīyatīti hi yaso, kitti thutighoso. Yassati tena purecarānucarabhāvena parivārayatīti yaso, parivāro. Aṭṭhamanavamadasamāni uttānatthāneva.
চরৰগ্গো দুতিযো।
Caravaggo dutiyo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৭. পঠমঅগতিসুত্তং • 7. Paṭhamaagatisuttaṃ
৮. দুতিযঅগতিসুত্তং • 8. Dutiyaagatisuttaṃ
৯. ততিযঅগতিসুত্তং • 9. Tatiyaagatisuttaṃ
১০. ভত্তুদ্দেসকসুত্তং • 10. Bhattuddesakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
৭. পঠমঅগতিসুত্তৰণ্ণনা • 7. Paṭhamaagatisuttavaṇṇanā
১০. ভত্তুদ্দেসকসুত্তৰণ্ণনা • 10. Bhattuddesakasuttavaṇṇanā
