| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. பட²மஅக்³கி³ஸுத்தவண்ணனா
3. Paṭhamaaggisuttavaṇṇanā
46. ததியே ஸப்³பே³பி ராகா³த³யோ அனுட³ஹனட்டே²ன அக்³கீ³. ஆஹுனெய்யக்³கீ³திஆதீ³ஸு பனெத்த² ஆஹுனங் வுச்சதி ஸக்காரோ, ஆஹுனங் அரஹந்தீதி ஆஹுனெய்யா. மாதாபிதரோ ஹி புத்தானங் ப³ஹுபகாரத்தா ஆஹுனங் அரஹந்தி, தேஸு விப்படிபஜ்ஜமானா புத்தா நிரயாதீ³ஸு நிப்³ப³த்தந்தி. தஸ்மா கிஞ்சாபி மாதாபிதரோ ந அனுட³ஹந்தி, அனுட³ஹனஸ்ஸ பன பச்சயா ஹொந்தி. இதி அனுட³ஹனட்டே²னேவ ஆஹுனெய்யக்³கீ³தி வுச்சந்தி. க³ஹபதீதி பன கே³ஹஸாமிகோ வுச்சதி, ஸோ மாதுகா³மஸ்ஸ ஸயனவத்தா²லங்காராதி³அனுப்பதா³னேன ப³ஹுபகாரோ. தங் அதிசரந்தோ மாதுகா³மோ நிரயாதீ³ஸு நிப்³ப³த்ததி. தஸ்மா ஸோபி புரிமனயேனேவ அனுட³ஹனட்டே²ன க³ஹபதக்³கீ³தி வுத்தோ. த³க்கி²ணெய்யக்³கீ³தி எத்த² பன த³க்கி²ணாதி சத்தாரோ பச்சயா, பி⁴க்கு²ஸங்கோ⁴ த³க்கி²ணெய்யோ. ஸோ ஹி கி³ஹீனங் தீஸு ஸரணேஸு பஞ்சஸு ஸீலேஸு த³ஸஸு ஸீலேஸு மாதாபிதுபட்டா²னே த⁴ம்மிகஸமணப்³ராஹ்மணுபட்டா²னேதி ஏவமாதீ³ஸு கல்யாணத⁴ம்மேஸு நியோஜனேன ப³ஹுபகாரோ. தஸ்மிங் மிச்சா²படிபன்னா கி³ஹீ பி⁴க்கு²ஸங்க⁴ங் அக்கோஸித்வா பரிபா⁴ஸித்வா நிரயாதீ³ஸு நிப்³ப³த்தந்தி. தஸ்மா ஸோபி புரிமனயேனேவ அனுட³ஹனட்டே²ன த³க்கி²ணெய்யக்³கீ³தி வுத்தோ. கட்ட²தோ நிப்³ப³த்தோ பாகதிகோவ அக்³கி³ கட்ட²க்³கி³ நாம.
46. Tatiye sabbepi rāgādayo anuḍahanaṭṭhena aggī. Āhuneyyaggītiādīsu panettha āhunaṃ vuccati sakkāro, āhunaṃ arahantīti āhuneyyā. Mātāpitaro hi puttānaṃ bahupakārattā āhunaṃ arahanti, tesu vippaṭipajjamānā puttā nirayādīsu nibbattanti. Tasmā kiñcāpi mātāpitaro na anuḍahanti, anuḍahanassa pana paccayā honti. Iti anuḍahanaṭṭheneva āhuneyyaggīti vuccanti. Gahapatīti pana gehasāmiko vuccati, so mātugāmassa sayanavatthālaṅkārādianuppadānena bahupakāro. Taṃ aticaranto mātugāmo nirayādīsu nibbattati. Tasmā sopi purimanayeneva anuḍahanaṭṭhena gahapataggīti vutto. Dakkhiṇeyyaggīti ettha pana dakkhiṇāti cattāro paccayā, bhikkhusaṅgho dakkhiṇeyyo. So hi gihīnaṃ tīsu saraṇesu pañcasu sīlesu dasasu sīlesu mātāpitupaṭṭhāne dhammikasamaṇabrāhmaṇupaṭṭhāneti evamādīsu kalyāṇadhammesu niyojanena bahupakāro. Tasmiṃ micchāpaṭipannā gihī bhikkhusaṅghaṃ akkositvā paribhāsitvā nirayādīsu nibbattanti. Tasmā sopi purimanayeneva anuḍahanaṭṭhena dakkhiṇeyyaggīti vutto. Kaṭṭhato nibbatto pākatikova aggi kaṭṭhaggi nāma.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. பட²மஅக்³கி³ஸுத்தங் • 3. Paṭhamaaggisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. பட²மஅக்³கி³ஸுத்தவண்ணனா • 3. Paṭhamaaggisuttavaṇṇanā
