| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
(১৭) ২. আঘাতৰগ্গো
(17) 2. Āghātavaggo
১-৫. পঠমআঘাতপটিৰিনযসুত্তাদিৰণ্ণনা
1-5. Paṭhamaāghātapaṭivinayasuttādivaṇṇanā
১৬১-১৬৫. দুতিযস্স পঠমে নত্থি ৰত্তব্বং। দুতিযে আঘাতো পটিৰিনযতি এত্থ, এতেহীতি ৰা আঘাতপটিৰিনযা। তেনাহ ‘‘আঘাতো এতেহি পটিৰিনেতব্বো’’তিআদি।
161-165. Dutiyassa paṭhame natthi vattabbaṃ. Dutiye āghāto paṭivinayati ettha, etehīti vā āghātapaṭivinayā. Tenāha ‘‘āghāto etehi paṭivinetabbo’’tiādi.
নন্তকন্তি অনন্তকং, অন্তৰিরহিতং ৰত্থখণ্ডং। যদি হি তস্স অন্তো ভৰেয্য, ‘‘পিলোতিকা’’তি সঙ্খং ন গচ্ছেয্য।
Nantakanti anantakaṃ, antavirahitaṃ vatthakhaṇḍaṃ. Yadi hi tassa anto bhaveyya, ‘‘pilotikā’’ti saṅkhaṃ na gaccheyya.
সেৰালেনাতি বীজকণ্ণিককেসরাদিভেদেন সেৰালেন। উদকপপ্পটকেনাতি নীলমণ্ডূকপিট্ঠিৰণ্ণেন উদকপিট্ঠিং ছাদেত্ৰা নিব্বত্তেন উদকপিট্ঠিকেন। ঘম্মেন অনুগতোতি ঘম্মেন ফুট্ঠো অভিভূতো। চিত্তুপ্পাদন্তি পটিঘসম্পযুত্তচিত্তুপ্পাদং।
Sevālenāti bījakaṇṇikakesarādibhedena sevālena. Udakapappaṭakenāti nīlamaṇḍūkapiṭṭhivaṇṇena udakapiṭṭhiṃ chādetvā nibbattena udakapiṭṭhikena. Ghammena anugatoti ghammena phuṭṭho abhibhūto. Cittuppādanti paṭighasampayuttacittuppādaṃ.
ৰিসভাগৰেদনুপ্পত্তিযা ককচেনেৰ ইরিযাপথপৰত্তিনিৰারণেন ছিন্দন্তো আবাধতি পীল়েতীতি আবাধো, সো অস্স অত্থীতি আবাধিকো। তংসমুট্ঠানেন দুক্খিতো সঞ্জাতদুক্খো। বাল়্হগিলানোতি অধিমত্তগিলানো। গামন্তনাযকস্সাতি গামন্তসম্পাপকস্স।
Visabhāgavedanuppattiyā kakaceneva iriyāpathapavattinivāraṇena chindanto ābādhati pīḷetīti ābādho, so assa atthīti ābādhiko. Taṃsamuṭṭhānena dukkhito sañjātadukkho. Bāḷhagilānoti adhimattagilāno. Gāmantanāyakassāti gāmantasampāpakassa.
পসন্নভাৰেন উদকস্স অচ্ছভাৰো ৰেদিতব্বোতি আহ ‘‘অচ্ছোদকাতি পসন্নোদকা’’তি। সাদুরসতায সাততাতি আহ ‘‘মধুরোদকা’’তি। তনুকমেৰ সলিলং ৰিসেসতো সীতলং, ন বহলাতি আহ ‘‘তনুসীতসলিলা’’তি। সেতকাতি নিক্কদ্দমা। সচিক্খল্লাদিৰসেন হি উদকস্স ৰিৰণ্ণতা। সভাৰতো পন তং সেতৰণ্ণমেৰ। ততিযাদীনি উত্তানত্থানেৰ।
Pasannabhāvena udakassa acchabhāvo veditabboti āha ‘‘acchodakāti pasannodakā’’ti. Sādurasatāya sātatāti āha ‘‘madhurodakā’’ti. Tanukameva salilaṃ visesato sītalaṃ, na bahalāti āha ‘‘tanusītasalilā’’ti. Setakāti nikkaddamā. Sacikkhallādivasena hi udakassa vivaṇṇatā. Sabhāvato pana taṃ setavaṇṇameva. Tatiyādīni uttānatthāneva.
পঠমআঘাতপটিৰিনযসুত্তাদিৰণ্ণনা নিট্ঠিতা।
Paṭhamaāghātapaṭivinayasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
১. পঠমআঘাতপটিৰিনযসুত্তং • 1. Paṭhamaāghātapaṭivinayasuttaṃ
২. দুতিযআঘাতপটিৰিনযসুত্তং • 2. Dutiyaāghātapaṭivinayasuttaṃ
৩. সাকচ্ছসুত্তং • 3. Sākacchasuttaṃ
৪. সাজীৰসুত্তং • 4. Sājīvasuttaṃ
৫. পঞ্হপুচ্ছাসুত্তং • 5. Pañhapucchāsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
১. পঠমআঘাতপটিৰিনযসুত্তৰণ্ণনা • 1. Paṭhamaāghātapaṭivinayasuttavaṇṇanā
২. দুতিযআঘাতপটিৰিনযসুত্তৰণ্ণনা • 2. Dutiyaāghātapaṭivinayasuttavaṇṇanā
৫. পঞ্হপুচ্ছাসুত্তৰণ্ণনা • 5. Pañhapucchāsuttavaṇṇanā
