| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
(१७) २. आघातवग्गो
(17) 2. Āghātavaggo
१-५. पठमआघातपटिविनयसुत्तादिवण्णना
1-5. Paṭhamaāghātapaṭivinayasuttādivaṇṇanā
१६१-१६५. दुतियस्स पठमे नत्थि वत्तब्बं। दुतिये आघातो पटिविनयति एत्थ, एतेहीति वा आघातपटिविनया। तेनाह ‘‘आघातो एतेहि पटिविनेतब्बो’’तिआदि।
161-165. Dutiyassa paṭhame natthi vattabbaṃ. Dutiye āghāto paṭivinayati ettha, etehīti vā āghātapaṭivinayā. Tenāha ‘‘āghāto etehi paṭivinetabbo’’tiādi.
नन्तकन्ति अनन्तकं, अन्तविरहितं वत्थखण्डं। यदि हि तस्स अन्तो भवेय्य, ‘‘पिलोतिका’’ति सङ्खं न गच्छेय्य।
Nantakanti anantakaṃ, antavirahitaṃ vatthakhaṇḍaṃ. Yadi hi tassa anto bhaveyya, ‘‘pilotikā’’ti saṅkhaṃ na gaccheyya.
सेवालेनाति बीजकण्णिककेसरादिभेदेन सेवालेन। उदकपप्पटकेनाति नीलमण्डूकपिट्ठिवण्णेन उदकपिट्ठिं छादेत्वा निब्बत्तेन उदकपिट्ठिकेन। घम्मेन अनुगतोति घम्मेन फुट्ठो अभिभूतो। चित्तुप्पादन्ति पटिघसम्पयुत्तचित्तुप्पादं।
Sevālenāti bījakaṇṇikakesarādibhedena sevālena. Udakapappaṭakenāti nīlamaṇḍūkapiṭṭhivaṇṇena udakapiṭṭhiṃ chādetvā nibbattena udakapiṭṭhikena. Ghammena anugatoti ghammena phuṭṭho abhibhūto. Cittuppādanti paṭighasampayuttacittuppādaṃ.
विसभागवेदनुप्पत्तिया ककचेनेव इरियापथपवत्तिनिवारणेन छिन्दन्तो आबाधति पीळेतीति आबाधो, सो अस्स अत्थीति आबाधिको। तंसमुट्ठानेन दुक्खितो सञ्जातदुक्खो। बाळ्हगिलानोति अधिमत्तगिलानो। गामन्तनायकस्साति गामन्तसम्पापकस्स।
Visabhāgavedanuppattiyā kakaceneva iriyāpathapavattinivāraṇena chindanto ābādhati pīḷetīti ābādho, so assa atthīti ābādhiko. Taṃsamuṭṭhānena dukkhito sañjātadukkho. Bāḷhagilānoti adhimattagilāno. Gāmantanāyakassāti gāmantasampāpakassa.
पसन्नभावेन उदकस्स अच्छभावो वेदितब्बोति आह ‘‘अच्छोदकाति पसन्नोदका’’ति। सादुरसताय सातताति आह ‘‘मधुरोदका’’ति। तनुकमेव सलिलं विसेसतो सीतलं, न बहलाति आह ‘‘तनुसीतसलिला’’ति। सेतकाति निक्कद्दमा। सचिक्खल्लादिवसेन हि उदकस्स विवण्णता। सभावतो पन तं सेतवण्णमेव। ततियादीनि उत्तानत्थानेव।
Pasannabhāvena udakassa acchabhāvo veditabboti āha ‘‘acchodakāti pasannodakā’’ti. Sādurasatāya sātatāti āha ‘‘madhurodakā’’ti. Tanukameva salilaṃ visesato sītalaṃ, na bahalāti āha ‘‘tanusītasalilā’’ti. Setakāti nikkaddamā. Sacikkhallādivasena hi udakassa vivaṇṇatā. Sabhāvato pana taṃ setavaṇṇameva. Tatiyādīni uttānatthāneva.
पठमआघातपटिविनयसुत्तादिवण्णना निट्ठिता।
Paṭhamaāghātapaṭivinayasuttādivaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
१. पठमआघातपटिविनयसुत्तं • 1. Paṭhamaāghātapaṭivinayasuttaṃ
२. दुतियआघातपटिविनयसुत्तं • 2. Dutiyaāghātapaṭivinayasuttaṃ
३. साकच्छसुत्तं • 3. Sākacchasuttaṃ
४. साजीवसुत्तं • 4. Sājīvasuttaṃ
५. पञ्हपुच्छासुत्तं • 5. Pañhapucchāsuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
१. पठमआघातपटिविनयसुत्तवण्णना • 1. Paṭhamaāghātapaṭivinayasuttavaṇṇanā
२. दुतियआघातपटिविनयसुत्तवण्णना • 2. Dutiyaāghātapaṭivinayasuttavaṇṇanā
५. पञ्हपुच्छासुत्तवण्णना • 5. Pañhapucchāsuttavaṇṇanā
