| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
(១៧) ២. អាឃាតវគ្គោ
(17) 2. Āghātavaggo
១-៥. បឋមអាឃាតបដិវិនយសុត្តាទិវណ្ណនា
1-5. Paṭhamaāghātapaṭivinayasuttādivaṇṇanā
១៦១-១៦៥. ទុតិយស្ស បឋមេ នត្ថិ វត្តព្ពំ។ ទុតិយេ អាឃាតោ បដិវិនយតិ ឯត្ថ, ឯតេហីតិ វា អាឃាតបដិវិនយា។ តេនាហ ‘‘អាឃាតោ ឯតេហិ បដិវិនេតព្ពោ’’តិអាទិ។
161-165. Dutiyassa paṭhame natthi vattabbaṃ. Dutiye āghāto paṭivinayati ettha, etehīti vā āghātapaṭivinayā. Tenāha ‘‘āghāto etehi paṭivinetabbo’’tiādi.
នន្តកន្តិ អនន្តកំ, អន្តវិរហិតំ វត្ថខណ្ឌំ។ យទិ ហិ តស្ស អន្តោ ភវេយ្យ, ‘‘បិលោតិកា’’តិ សង្ខំ ន គច្ឆេយ្យ។
Nantakanti anantakaṃ, antavirahitaṃ vatthakhaṇḍaṃ. Yadi hi tassa anto bhaveyya, ‘‘pilotikā’’ti saṅkhaṃ na gaccheyya.
សេវាលេនាតិ ពីជកណ្ណិកកេសរាទិភេទេន សេវាលេន។ ឧទកបប្បដកេនាតិ នីលមណ្ឌូកបិដ្ឋិវណ្ណេន ឧទកបិដ្ឋិំ ឆាទេត្វា និព្ពត្តេន ឧទកបិដ្ឋិកេន។ ឃម្មេន អនុគតោតិ ឃម្មេន ផុដ្ឋោ អភិភូតោ។ ចិត្តុប្បាទន្តិ បដិឃសម្បយុត្តចិត្តុប្បាទំ។
Sevālenāti bījakaṇṇikakesarādibhedena sevālena. Udakapappaṭakenāti nīlamaṇḍūkapiṭṭhivaṇṇena udakapiṭṭhiṃ chādetvā nibbattena udakapiṭṭhikena. Ghammena anugatoti ghammena phuṭṭho abhibhūto. Cittuppādanti paṭighasampayuttacittuppādaṃ.
វិសភាគវេទនុប្បត្តិយា កកចេនេវ ឥរិយាបថបវត្តិនិវារណេន ឆិន្ទន្តោ អាពាធតិ បីឡេតីតិ អាពាធោ, សោ អស្ស អត្ថីតិ អាពាធិកោ។ តំសមុដ្ឋានេន ទុក្ខិតោ សញ្ជាតទុក្ខោ។ ពាឡ្ហគិលានោតិ អធិមត្តគិលានោ។ គាមន្តនាយកស្សាតិ គាមន្តសម្បាបកស្ស។
Visabhāgavedanuppattiyā kakaceneva iriyāpathapavattinivāraṇena chindanto ābādhati pīḷetīti ābādho, so assa atthīti ābādhiko. Taṃsamuṭṭhānena dukkhito sañjātadukkho. Bāḷhagilānoti adhimattagilāno. Gāmantanāyakassāti gāmantasampāpakassa.
បសន្នភាវេន ឧទកស្ស អច្ឆភាវោ វេទិតព្ពោតិ អាហ ‘‘អច្ឆោទកាតិ បសន្នោទកា’’តិ។ សាទុរសតាយ សាតតាតិ អាហ ‘‘មធុរោទកា’’តិ។ តនុកមេវ សលិលំ វិសេសតោ សីតលំ, ន ពហលាតិ អាហ ‘‘តនុសីតសលិលា’’តិ។ សេតកាតិ និក្កទ្ទមា។ សចិក្ខល្លាទិវសេន ហិ ឧទកស្ស វិវណ្ណតា។ សភាវតោ បន តំ សេតវណ្ណមេវ។ តតិយាទីនិ ឧត្តានត្ថានេវ។
Pasannabhāvena udakassa acchabhāvo veditabboti āha ‘‘acchodakāti pasannodakā’’ti. Sādurasatāya sātatāti āha ‘‘madhurodakā’’ti. Tanukameva salilaṃ visesato sītalaṃ, na bahalāti āha ‘‘tanusītasalilā’’ti. Setakāti nikkaddamā. Sacikkhallādivasena hi udakassa vivaṇṇatā. Sabhāvato pana taṃ setavaṇṇameva. Tatiyādīni uttānatthāneva.
បឋមអាឃាតបដិវិនយសុត្តាទិវណ្ណនា និដ្ឋិតា។
Paṭhamaāghātapaṭivinayasuttādivaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya
១. បឋមអាឃាតបដិវិនយសុត្តំ • 1. Paṭhamaāghātapaṭivinayasuttaṃ
២. ទុតិយអាឃាតបដិវិនយសុត្តំ • 2. Dutiyaāghātapaṭivinayasuttaṃ
៣. សាកច្ឆសុត្តំ • 3. Sākacchasuttaṃ
៤. សាជីវសុត្តំ • 4. Sājīvasuttaṃ
៥. បញ្ហបុច្ឆាសុត្តំ • 5. Pañhapucchāsuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā)
១. បឋមអាឃាតបដិវិនយសុត្តវណ្ណនា • 1. Paṭhamaāghātapaṭivinayasuttavaṇṇanā
២. ទុតិយអាឃាតបដិវិនយសុត្តវណ្ណនា • 2. Dutiyaāghātapaṭivinayasuttavaṇṇanā
៥. បញ្ហបុច្ឆាសុត្តវណ្ណនា • 5. Pañhapucchāsuttavaṇṇanā
