| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
(೧೭) ೨. ಆಘಾತವಗ್ಗೋ
(17) 2. Āghātavaggo
೧-೫. ಪಠಮಆಘಾತಪಟಿವಿನಯಸುತ್ತಾದಿವಣ್ಣನಾ
1-5. Paṭhamaāghātapaṭivinayasuttādivaṇṇanā
೧೬೧-೧೬೫. ದುತಿಯಸ್ಸ ಪಠಮೇ ನತ್ಥಿ ವತ್ತಬ್ಬಂ। ದುತಿಯೇ ಆಘಾತೋ ಪಟಿವಿನಯತಿ ಏತ್ಥ, ಏತೇಹೀತಿ ವಾ ಆಘಾತಪಟಿವಿನಯಾ। ತೇನಾಹ ‘‘ಆಘಾತೋ ಏತೇಹಿ ಪಟಿವಿನೇತಬ್ಬೋ’’ತಿಆದಿ।
161-165. Dutiyassa paṭhame natthi vattabbaṃ. Dutiye āghāto paṭivinayati ettha, etehīti vā āghātapaṭivinayā. Tenāha ‘‘āghāto etehi paṭivinetabbo’’tiādi.
ನನ್ತಕನ್ತಿ ಅನನ್ತಕಂ, ಅನ್ತವಿರಹಿತಂ ವತ್ಥಖಣ್ಡಂ। ಯದಿ ಹಿ ತಸ್ಸ ಅನ್ತೋ ಭವೇಯ್ಯ, ‘‘ಪಿಲೋತಿಕಾ’’ತಿ ಸಙ್ಖಂ ನ ಗಚ್ಛೇಯ್ಯ।
Nantakanti anantakaṃ, antavirahitaṃ vatthakhaṇḍaṃ. Yadi hi tassa anto bhaveyya, ‘‘pilotikā’’ti saṅkhaṃ na gaccheyya.
ಸೇವಾಲೇನಾತಿ ಬೀಜಕಣ್ಣಿಕಕೇಸರಾದಿಭೇದೇನ ಸೇವಾಲೇನ। ಉದಕಪಪ್ಪಟಕೇನಾತಿ ನೀಲಮಣ್ಡೂಕಪಿಟ್ಠಿವಣ್ಣೇನ ಉದಕಪಿಟ್ಠಿಂ ಛಾದೇತ್ವಾ ನಿಬ್ಬತ್ತೇನ ಉದಕಪಿಟ್ಠಿಕೇನ। ಘಮ್ಮೇನ ಅನುಗತೋತಿ ಘಮ್ಮೇನ ಫುಟ್ಠೋ ಅಭಿಭೂತೋ। ಚಿತ್ತುಪ್ಪಾದನ್ತಿ ಪಟಿಘಸಮ್ಪಯುತ್ತಚಿತ್ತುಪ್ಪಾದಂ।
Sevālenāti bījakaṇṇikakesarādibhedena sevālena. Udakapappaṭakenāti nīlamaṇḍūkapiṭṭhivaṇṇena udakapiṭṭhiṃ chādetvā nibbattena udakapiṭṭhikena. Ghammena anugatoti ghammena phuṭṭho abhibhūto. Cittuppādanti paṭighasampayuttacittuppādaṃ.
ವಿಸಭಾಗವೇದನುಪ್ಪತ್ತಿಯಾ ಕಕಚೇನೇವ ಇರಿಯಾಪಥಪವತ್ತಿನಿವಾರಣೇನ ಛಿನ್ದನ್ತೋ ಆಬಾಧತಿ ಪೀಳೇತೀತಿ ಆಬಾಧೋ, ಸೋ ಅಸ್ಸ ಅತ್ಥೀತಿ ಆಬಾಧಿಕೋ। ತಂಸಮುಟ್ಠಾನೇನ ದುಕ್ಖಿತೋ ಸಞ್ಜಾತದುಕ್ಖೋ। ಬಾಳ್ಹಗಿಲಾನೋತಿ ಅಧಿಮತ್ತಗಿಲಾನೋ। ಗಾಮನ್ತನಾಯಕಸ್ಸಾತಿ ಗಾಮನ್ತಸಮ್ಪಾಪಕಸ್ಸ।
Visabhāgavedanuppattiyā kakaceneva iriyāpathapavattinivāraṇena chindanto ābādhati pīḷetīti ābādho, so assa atthīti ābādhiko. Taṃsamuṭṭhānena dukkhito sañjātadukkho. Bāḷhagilānoti adhimattagilāno. Gāmantanāyakassāti gāmantasampāpakassa.
ಪಸನ್ನಭಾವೇನ ಉದಕಸ್ಸ ಅಚ್ಛಭಾವೋ ವೇದಿತಬ್ಬೋತಿ ಆಹ ‘‘ಅಚ್ಛೋದಕಾತಿ ಪಸನ್ನೋದಕಾ’’ತಿ। ಸಾದುರಸತಾಯ ಸಾತತಾತಿ ಆಹ ‘‘ಮಧುರೋದಕಾ’’ತಿ। ತನುಕಮೇವ ಸಲಿಲಂ ವಿಸೇಸತೋ ಸೀತಲಂ, ನ ಬಹಲಾತಿ ಆಹ ‘‘ತನುಸೀತಸಲಿಲಾ’’ತಿ। ಸೇತಕಾತಿ ನಿಕ್ಕದ್ದಮಾ। ಸಚಿಕ್ಖಲ್ಲಾದಿವಸೇನ ಹಿ ಉದಕಸ್ಸ ವಿವಣ್ಣತಾ। ಸಭಾವತೋ ಪನ ತಂ ಸೇತವಣ್ಣಮೇವ। ತತಿಯಾದೀನಿ ಉತ್ತಾನತ್ಥಾನೇವ।
Pasannabhāvena udakassa acchabhāvo veditabboti āha ‘‘acchodakāti pasannodakā’’ti. Sādurasatāya sātatāti āha ‘‘madhurodakā’’ti. Tanukameva salilaṃ visesato sītalaṃ, na bahalāti āha ‘‘tanusītasalilā’’ti. Setakāti nikkaddamā. Sacikkhallādivasena hi udakassa vivaṇṇatā. Sabhāvato pana taṃ setavaṇṇameva. Tatiyādīni uttānatthāneva.
ಪಠಮಆಘಾತಪಟಿವಿನಯಸುತ್ತಾದಿವಣ್ಣನಾ ನಿಟ್ಠಿತಾ।
Paṭhamaāghātapaṭivinayasuttādivaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya
೧. ಪಠಮಆಘಾತಪಟಿವಿನಯಸುತ್ತಂ • 1. Paṭhamaāghātapaṭivinayasuttaṃ
೨. ದುತಿಯಆಘಾತಪಟಿವಿನಯಸುತ್ತಂ • 2. Dutiyaāghātapaṭivinayasuttaṃ
೩. ಸಾಕಚ್ಛಸುತ್ತಂ • 3. Sākacchasuttaṃ
೪. ಸಾಜೀವಸುತ್ತಂ • 4. Sājīvasuttaṃ
೫. ಪಞ್ಹಪುಚ್ಛಾಸುತ್ತಂ • 5. Pañhapucchāsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā)
೧. ಪಠಮಆಘಾತಪಟಿವಿನಯಸುತ್ತವಣ್ಣನಾ • 1. Paṭhamaāghātapaṭivinayasuttavaṇṇanā
೨. ದುತಿಯಆಘಾತಪಟಿವಿನಯಸುತ್ತವಣ್ಣನಾ • 2. Dutiyaāghātapaṭivinayasuttavaṇṇanā
೫. ಪಞ್ಹಪುಚ್ಛಾಸುತ್ತವಣ್ಣನಾ • 5. Pañhapucchāsuttavaṇṇanā
