| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
(17) 2. ආඝාතවග්‌ගො
(17) 2. Āghātavaggo
1-5. පඨමආඝාතපටිවිනයසුත්‌තාදිවණ්‌ණනා
1-5. Paṭhamaāghātapaṭivinayasuttādivaṇṇanā
161-165. දුතියස්‌ස පඨමෙ නත්‌ථි වත්‌තබ්‌බං. දුතියෙ ආඝාතො පටිවිනයති එත්‌ථ, එතෙහීති වා ආඝාතපටිවිනයා. තෙනාහ ‘‘ආඝාතො එතෙහි පටිවිනෙතබ්‌බො’’තිආදි.
161-165. Dutiyassa paṭhame natthi vattabbaṃ. Dutiye āghāto paṭivinayati ettha, etehīti vā āghātapaṭivinayā. Tenāha ‘‘āghāto etehi paṭivinetabbo’’tiādi.
නන්‌තකන්‌ති අනන්‌තකං, අන්‌තවිරහිතං වත්‌ථඛණ්‌ඩං. යදි හි තස්‌ස අන්‌තො භවෙය්‍ය, ‘‘පිලොතිකා’’ති සඞ්‌ඛං න ගච්‌ඡෙය්‍ය.
Nantakanti anantakaṃ, antavirahitaṃ vatthakhaṇḍaṃ. Yadi hi tassa anto bhaveyya, ‘‘pilotikā’’ti saṅkhaṃ na gaccheyya.
සෙවාලෙනාති බීජකණ්‌ණිකකෙසරාදිභෙදෙන සෙවාලෙන. උදකපප්‌පටකෙනාති නීලමණ්‌ඩූකපිට්‌ඨිවණ්‌ණෙන උදකපිට්‌ඨිං ඡාදෙත්‌වා නිබ්‌බත්‌තෙන උදකපිට්‌ඨිකෙන. ඝම්‌මෙන අනුගතොති ඝම්‌මෙන ඵුට්‌ඨො අභිභූතො. චිත්‌තුප්‌පාදන්‌ති පටිඝසම්‌පයුත්‌තචිත්‌තුප්‌පාදං.
Sevālenāti bījakaṇṇikakesarādibhedena sevālena. Udakapappaṭakenāti nīlamaṇḍūkapiṭṭhivaṇṇena udakapiṭṭhiṃ chādetvā nibbattena udakapiṭṭhikena. Ghammena anugatoti ghammena phuṭṭho abhibhūto. Cittuppādanti paṭighasampayuttacittuppādaṃ.
විසභාගවෙදනුප්‌පත්‌තියා කකචෙනෙව ඉරියාපථපවත්‌තිනිවාරණෙන ඡින්‌දන්‌තො ආබාධති පීළෙතීති ආබාධො, සො අස්‌ස අත්‌ථීති ආබාධිකො. තංසමුට්‌ඨානෙන දුක්‌ඛිතො සඤ්‌ජාතදුක්‌ඛො. බාළ්‌හගිලානොති අධිමත්‌තගිලානො. ගාමන්‌තනායකස්‌සාති ගාමන්‌තසම්‌පාපකස්‌ස.
Visabhāgavedanuppattiyā kakaceneva iriyāpathapavattinivāraṇena chindanto ābādhati pīḷetīti ābādho, so assa atthīti ābādhiko. Taṃsamuṭṭhānena dukkhito sañjātadukkho. Bāḷhagilānoti adhimattagilāno. Gāmantanāyakassāti gāmantasampāpakassa.
පසන්‌නභාවෙන උදකස්‌ස අච්‌ඡභාවො වෙදිතබ්‌බොති ආහ ‘‘අච්‌ඡොදකාති පසන්‌නොදකා’’ති. සාදුරසතාය සාතතාති ආහ ‘‘මධුරොදකා’’ති. තනුකමෙව සලිලං විසෙසතො සීතලං, න බහලාති ආහ ‘‘තනුසීතසලිලා’’ති. සෙතකාති නික්‌කද්‌දමා. සචික්‌ඛල්‌ලාදිවසෙන හි උදකස්‌ස විවණ්‌ණතා. සභාවතො පන තං සෙතවණ්‌ණමෙව. තතියාදීනි උත්‌තානත්‌ථානෙව.
Pasannabhāvena udakassa acchabhāvo veditabboti āha ‘‘acchodakāti pasannodakā’’ti. Sādurasatāya sātatāti āha ‘‘madhurodakā’’ti. Tanukameva salilaṃ visesato sītalaṃ, na bahalāti āha ‘‘tanusītasalilā’’ti. Setakāti nikkaddamā. Sacikkhallādivasena hi udakassa vivaṇṇatā. Sabhāvato pana taṃ setavaṇṇameva. Tatiyādīni uttānatthāneva.
පඨමආඝාතපටිවිනයසුත්‌තාදිවණ්‌ණනා නිට්‌ඨිතා.
Paṭhamaāghātapaṭivinayasuttādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
1. පඨමආඝාතපටිවිනයසුත්‌තං • 1. Paṭhamaāghātapaṭivinayasuttaṃ
2. දුතියආඝාතපටිවිනයසුත්‌තං • 2. Dutiyaāghātapaṭivinayasuttaṃ
3. සාකච්‌ඡසුත්‌තං • 3. Sākacchasuttaṃ
4. සාජීවසුත්‌තං • 4. Sājīvasuttaṃ
5. පඤ්‌හපුච්‌ඡාසුත්‌තං • 5. Pañhapucchāsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā)
1. පඨමආඝාතපටිවිනයසුත්‌තවණ්‌ණනා • 1. Paṭhamaāghātapaṭivinayasuttavaṇṇanā
2. දුතියආඝාතපටිවිනයසුත්‌තවණ්‌ණනා • 2. Dutiyaāghātapaṭivinayasuttavaṇṇanā
5. පඤ්‌හපුච්‌ඡාසුත්‌තවණ්‌ණනා • 5. Pañhapucchāsuttavaṇṇanā
