| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
(༡༧) ༢. ཨཱགྷཱཏཝགྒོ
(17) 2. Āghātavaggo
༡. པཋམཨཱགྷཱཏཔཊིཝིནཡསུཏྟཾ
1. Paṭhamaāghātapaṭivinayasuttaṃ
༡༦༡. ‘‘པཉྩིམེ , བྷིཀྑཝེ, ཨཱགྷཱཏཔཊིཝིནཡཱ ཡཏྠ བྷིཀྑུནོ ཨུཔྤནྣོ ཨཱགྷཱཏོ སབྦསོ པཊིཝིནེཏབྦོ། ཀཏམེ པཉྩ? ཡསྨིཾ, བྷིཀྑཝེ, པུགྒལེ ཨཱགྷཱཏོ ཛཱཡེཐ, མེཏྟཱ ཏསྨིཾ པུགྒལེ བྷཱཝེཏབྦཱ; ཨེཝཾ ཏསྨིཾ པུགྒལེ ཨཱགྷཱཏོ པཊིཝིནེཏབྦོ། ཡསྨིཾ, བྷིཀྑཝེ, པུགྒལེ ཨཱགྷཱཏོ ཛཱཡེཐ, ཀརུཎཱ ཏསྨིཾ པུགྒལེ བྷཱཝེཏབྦཱ; ཨེཝཾ ཏསྨིཾ པུགྒལེ ཨཱགྷཱཏོ པཊིཝིནེཏབྦོ། ཡསྨིཾ, བྷིཀྑཝེ, པུགྒལེ ཨཱགྷཱཏོ ཛཱཡེཐ, ཨུཔེཀྑཱ ཏསྨིཾ པུགྒལེ བྷཱཝེཏབྦཱ; ཨེཝཾ ཏསྨིཾ པུགྒལེ ཨཱགྷཱཏོ པཊིཝིནེཏབྦོ། ཡསྨིཾ, བྷིཀྑཝེ, པུགྒལེ ཨཱགྷཱཏོ ཛཱཡེཐ, ཨསཏིཨམནསིཀཱརོ ཏསྨིཾ པུགྒལེ ཨཱཔཛྫིཏབྦོ; ཨེཝཾ ཏསྨིཾ པུགྒལེ ཨཱགྷཱཏོ པཊིཝིནེཏབྦོ། ཡསྨིཾ , བྷིཀྑཝེ, པུགྒལེ ཨཱགྷཱཏོ ཛཱཡེཐ, ཀམྨསྶཀཏཱ ཏསྨིཾ པུགྒལེ ཨདྷིཊྛཱཏབྦཱ – ‘ཀམྨསྶཀོ ཨཡམཱཡསྨཱ ཀམྨདཱཡཱདོ ཀམྨཡོནི ཀམྨབནྡྷུ ཀམྨཔྤཊིསརཎོ, ཡཾ ཀམྨཾ ཀརིསྶཏི ཀལྱཱཎཾ ཝཱ པཱཔཀཾ ཝཱ ཏསྶ དཱཡཱདོ བྷཝིསྶཏཱི’ཏི; ཨེཝཾ ཏསྨིཾ པུགྒལེ ཨཱགྷཱཏོ པཊིཝིནེཏབྦོ། ཨིམེ ཁོ, བྷིཀྑཝེ, པཉྩ ཨཱགྷཱཏཔཊིཝིནཡཱ, ཡཏྠ བྷིཀྑུནོ ཨུཔྤནྣོ ཨཱགྷཱཏོ སབྦསོ པཊིཝིནེཏབྦོ’’ཏི། པཋམཾ།
161. ‘‘Pañcime , bhikkhave, āghātapaṭivinayā yattha bhikkhuno uppanno āghāto sabbaso paṭivinetabbo. Katame pañca? Yasmiṃ, bhikkhave, puggale āghāto jāyetha, mettā tasmiṃ puggale bhāvetabbā; evaṃ tasmiṃ puggale āghāto paṭivinetabbo. Yasmiṃ, bhikkhave, puggale āghāto jāyetha, karuṇā tasmiṃ puggale bhāvetabbā; evaṃ tasmiṃ puggale āghāto paṭivinetabbo. Yasmiṃ, bhikkhave, puggale āghāto jāyetha, upekkhā tasmiṃ puggale bhāvetabbā; evaṃ tasmiṃ puggale āghāto paṭivinetabbo. Yasmiṃ, bhikkhave, puggale āghāto jāyetha, asatiamanasikāro tasmiṃ puggale āpajjitabbo; evaṃ tasmiṃ puggale āghāto paṭivinetabbo. Yasmiṃ , bhikkhave, puggale āghāto jāyetha, kammassakatā tasmiṃ puggale adhiṭṭhātabbā – ‘kammassako ayamāyasmā kammadāyādo kammayoni kammabandhu kammappaṭisaraṇo, yaṃ kammaṃ karissati kalyāṇaṃ vā pāpakaṃ vā tassa dāyādo bhavissatī’ti; evaṃ tasmiṃ puggale āghāto paṭivinetabbo. Ime kho, bhikkhave, pañca āghātapaṭivinayā, yattha bhikkhuno uppanno āghāto sabbaso paṭivinetabbo’’ti. Paṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡. པཋམཨཱགྷཱཏཔཊིཝིནཡསུཏྟཝཎྞནཱ • 1. Paṭhamaāghātapaṭivinayasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༥. པཋམཨཱགྷཱཏཔཊིཝིནཡསུཏྟཱདིཝཎྞནཱ • 1-5. Paṭhamaāghātapaṭivinayasuttādivaṇṇanā
