| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
அங்கு³த்தரனிகாயே
Aṅguttaranikāye
ச²க்கனிபாத-டீகா
Chakkanipāta-ṭīkā
1. பட²மபண்ணாஸகங்
1. Paṭhamapaṇṇāsakaṃ
1. ஆஹுனெய்யவக்³கோ³
1. Āhuneyyavaggo
1. பட²மஆஹுனெய்யஸுத்தவண்ணனா
1. Paṭhamaāhuneyyasuttavaṇṇanā
1. ச²க்கனிபாதஸ்ஸ பட²மே சக்கு²னா ரூபங் தி³ஸ்வாதி நிஸ்ஸயவோஹாரேன வுத்தங். ஸஸம்பா⁴ரகனித்³தே³ஸோயங் யதா² ‘‘த⁴னுனா விஜ்ஜ²தீ’’தி, தஸ்மா நிஸ்ஸயஸீஸேன நிஸ்ஸிதஸ்ஸ க³ஹணங் த³ட்ட²ப்³ப³ங். தேனாயமத்தோ² ‘‘சக்கு²த்³வாரே ரூபாரம்மணே ஆபாத²க³தே தங் ரூபங் சக்கு²விஞ்ஞாணேன தி³ஸ்வா’’தி. நேவ ஸுமனோ ஹோதீதி ஜவனக்க²ணே இட்டே² ஆரம்மணே ராக³ங் அனுப்பாதெ³ந்தோ நேவ ஸுமனோ ஹோதி கே³ஹஸ்ஸிதபேமவஸேனபி மக்³கே³ன ஸப்³ப³ஸோ ராக³ஸ்ஸ ஸமுச்சி²ன்னத்தா. ந து³ம்மனோதி அனிட்டே² அது³ஸ்ஸந்தோ ந து³ம்மனோ. பஸாத³ஞ்ஞத²த்தவஸேனபி இட்டே²பி அனிட்டே²பி மஜ்ஜ²த்தேபி ஆரம்மணே ந ஸமங் ஸம்மா அயோனிஸோ க³ஹணங் அஸமபெக்க²னங். அயஞ்சஸ்ஸ படிபத்தி ஸதிவேபுல்லப்பத்தியா பஞ்ஞாவேபுல்லப்பத்தியா சாதி ஆஹ ‘‘ஸதோ ஸம்பஜானோ ஹுத்வா’’தி. ஸதியா யுத்தத்தா ஸதோ. ஸம்பஜஞ்ஞேன யுத்தத்தா ஸம்பஜானோ. ஞாணுப்பத்திபச்சயரஹிதகாலேபி பவத்திபே⁴த³னதோ ‘‘ஸததவிஹாரோ கதி²தோ’’தி வுத்தங். ஸததவிஹாரோதி கீ²ணாஸவஸ்ஸ நிச்சவிஹாரோ ஸப்³ப³தா³ பவத்தனகவிஹாரோ. ட²பெத்வா ஹி ஸமாபத்திவேலங் ப⁴வங்க³வேலஞ்ச கீ²ணாஸவா இமினாவ ச²ளங்கு³பெக்கா²விஹாரேன விஹரந்தி.
1. Chakkanipātassa paṭhame cakkhunā rūpaṃ disvāti nissayavohārena vuttaṃ. Sasambhārakaniddesoyaṃ yathā ‘‘dhanunā vijjhatī’’ti, tasmā nissayasīsena nissitassa gahaṇaṃ daṭṭhabbaṃ. Tenāyamattho ‘‘cakkhudvāre rūpārammaṇe āpāthagate taṃ rūpaṃ cakkhuviññāṇena disvā’’ti. Neva sumano hotīti javanakkhaṇe iṭṭhe ārammaṇe rāgaṃ anuppādento neva sumano hoti gehassitapemavasenapi maggena sabbaso rāgassa samucchinnattā. Na dummanoti aniṭṭhe adussanto na dummano. Pasādaññathattavasenapi iṭṭhepi aniṭṭhepi majjhattepi ārammaṇe na samaṃ sammā ayoniso gahaṇaṃ asamapekkhanaṃ. Ayañcassa paṭipatti sativepullappattiyā paññāvepullappattiyā cāti āha ‘‘sato sampajāno hutvā’’ti. Satiyā yuttattā sato. Sampajaññena yuttattā sampajāno. Ñāṇuppattipaccayarahitakālepi pavattibhedanato ‘‘satatavihāro kathito’’ti vuttaṃ. Satatavihāroti khīṇāsavassa niccavihāro sabbadā pavattanakavihāro. Ṭhapetvā hi samāpattivelaṃ bhavaṅgavelañca khīṇāsavā imināva chaḷaṅgupekkhāvihārena viharanti.
எத்த² ச ‘‘ச²ஸு த்³வாரேஸுபி உபெக்க²கோ விஹரதீ’’தி இமினா ச²ளங்கு³பெக்கா² கதி²தா. ‘‘ஸம்பஜானோ’’தி வசனதோ பன சத்தாரி ஞாணஸம்பயுத்தசித்தானி லப்³ப⁴ந்தி தேஹி வினா ஸம்பஜானதாய அஸம்ப⁴வதோ. ஸததவிஹாரபா⁴வதோ அட்ட² மஹாகிரியசித்தானி லப்³ப⁴ந்தி. ‘‘நேவ ஸுமனோ ந து³ம்மனோ’’தி வசனதோ அட்ட² மஹாகிரியசித்தானி, ஹஸிதுப்பாதோ³, வொட்ட²ப்³ப³னஞ்சாதி த³ஸ சித்தானி லப்³ப⁴ந்தி. ராக³தோ³ஸஸஹஜாதானங் ஸோமனஸ்ஸதோ³மனஸ்ஸானங் அபா⁴வோ தேஸம்பி ஸாதா⁴ரணோதி ச²ளங்கு³பெக்கா²வஸேன ஆக³தானங் இமேஸங் ஸததவிஹாரானங் ஸோமனஸ்ஸங் கத²ங் லப்³ப⁴தீதி சே? ஆஸேவனதோ. கிஞ்சாபி கீ²ணாஸவோ இட்டா²னிட்டே²பி ஆரம்மணே மஜ்ஜ²த்தோ விய ப³ஹுலங் உபெக்க²கோ விஹரதி அத்தனோ பரிஸுத்³த⁴பகதிபா⁴வாவிஜஹனதோ, கதா³சி பன ததா² சேதோபி⁴ஸங்கா²ராபா⁴வே யங் தங் ஸபா⁴வதோ இட்ட²ங் ஆரம்மணங், தஸ்ஸ யாதா²வஸபா⁴வக்³க³ஹணவஸேனபி அரஹதோ சித்தங் புப்³பா³ஸேவனவஸேன ஸோமனஸ்ஸஸஹக³தங் ஹுத்வா பவத்ததேவ.
Ettha ca ‘‘chasu dvāresupi upekkhako viharatī’’ti iminā chaḷaṅgupekkhā kathitā. ‘‘Sampajāno’’ti vacanato pana cattāri ñāṇasampayuttacittāni labbhanti tehi vinā sampajānatāya asambhavato. Satatavihārabhāvato aṭṭha mahākiriyacittāni labbhanti. ‘‘Neva sumano na dummano’’ti vacanato aṭṭha mahākiriyacittāni, hasituppādo, voṭṭhabbanañcāti dasa cittāni labbhanti. Rāgadosasahajātānaṃ somanassadomanassānaṃ abhāvo tesampi sādhāraṇoti chaḷaṅgupekkhāvasena āgatānaṃ imesaṃ satatavihārānaṃ somanassaṃ kathaṃ labbhatīti ce? Āsevanato. Kiñcāpi khīṇāsavo iṭṭhāniṭṭhepi ārammaṇe majjhatto viya bahulaṃ upekkhako viharati attano parisuddhapakatibhāvāvijahanato, kadāci pana tathā cetobhisaṅkhārābhāve yaṃ taṃ sabhāvato iṭṭhaṃ ārammaṇaṃ, tassa yāthāvasabhāvaggahaṇavasenapi arahato cittaṃ pubbāsevanavasena somanassasahagataṃ hutvā pavattateva.
பட²மஆஹுனெய்யஸுத்தவண்ணனா நிட்டி²தா.
Paṭhamaāhuneyyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. பட²மஆஹுனெய்யஸுத்தங் • 1. Paṭhamaāhuneyyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. பட²மஆஹுனெய்யஸுத்தவண்ணனா • 1. Paṭhamaāhuneyyasuttavaṇṇanā
