| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5-7. பட²மஆஜானீயஸுத்தாதி³வண்ணனா
5-7. Paṭhamaājānīyasuttādivaṇṇanā
97-99. பஞ்சமே அனுச்ச²விகோதி ரஞ்ஞோ பரிபு⁴ஞ்ஜனயொக்³கோ³. ஹத்த²பாதா³தி³அங்க³ஸமதாயாதி ஹத்த²பாதா³தி³அவயவஸமதாய, ரஞ்ஞோ வா ஸேனாய அங்க³பூ⁴தத்தா ரஞ்ஞோ அங்க³ந்தி வுச்சதி. ஆனெத்வா ஹுனிதப்³ப³ந்தி ஆஹுனங், ஆஹுதீதி அத்த²தோ ஏகந்தி ஆஹ ‘‘ஆஹுதிஸங்கா²தங் பிண்ட³பாத’’ந்தி. தூ³ரதோபி ஆனெத்வா ஸீலவந்தேஸு தா³தப்³ப³ஸ்ஸேதங் அதி⁴வசனங். பிண்ட³பாதந்தி ச நித³ஸ்ஸனமத்தங். ஆனெத்வா ஹுனிதப்³பா³னஞ்ஹி சீவராதீ³னங் சதுன்னங் பச்சயானமேதங் அதி⁴வசனங் ஆஹுனந்தி. தங் அரஹதீதி ஆஹுனெய்யோ. படிக்³க³ஹேதுங் யுத்தோதி தஸ்ஸ மஹப்ப²லபா⁴வகரணதோ படிக்³க³ண்ஹிதுங் அனுச்ச²விகோ.
97-99. Pañcame anucchavikoti rañño paribhuñjanayoggo. Hatthapādādiaṅgasamatāyāti hatthapādādiavayavasamatāya, rañño vā senāya aṅgabhūtattā rañño aṅganti vuccati. Ānetvā hunitabbanti āhunaṃ, āhutīti atthato ekanti āha ‘‘āhutisaṅkhātaṃ piṇḍapāta’’nti. Dūratopi ānetvā sīlavantesu dātabbassetaṃ adhivacanaṃ. Piṇḍapātanti ca nidassanamattaṃ. Ānetvā hunitabbānañhi cīvarādīnaṃ catunnaṃ paccayānametaṃ adhivacanaṃ āhunanti. Taṃ arahatīti āhuneyyo. Paṭiggahetuṃ yuttoti tassa mahapphalabhāvakaraṇato paṭiggaṇhituṃ anucchaviko.
பாஹுனகப⁴த்தஸ்ஸாதி தி³ஸவிதி³ஸதோ ஆக³தானங் பியமனாபானங் ஞாதிமித்தானங் அத்தா²ய ஸக்காரே படியத்தஸ்ஸ ஆக³ந்துகப⁴த்தஸ்ஸ. தஞ்ஹி ட²பெத்வா தே ததா²ரூபே பாஹுனகே ஸங்க⁴ஸ்ஸேவ தா³துங் யுத்தங், ஸங்கோ⁴வ தங் படிக்³க³ஹேதுங் யுத்தோ. ஸங்க⁴ஸதி³ஸோ ஹி பாஹுனகோ நத்தி². ததா² ஹேஸ ஏகஸ்மிங் பு³த்³த⁴ந்தரே வீதிவத்தே தி³ஸ்ஸதி, கதா³சி அஸங்க்²யெய்யேபி கப்பே வீதிவத்தே. அப்³போ³கிண்ணஞ்ச பியமனாபதாதி³கரேஹி த⁴ம்மேஹி ஸமன்னாக³தோ. ஏவங் பாஹுனமஸ்ஸ தா³துங் யுத்தங், பாஹுனஞ்ச படிக்³க³ஹேதுங் யுத்தோதி பாஹுனெய்யோ. அயஞ்ஹெத்த² அதி⁴ப்பாயோ ‘‘ஞாதிமித்தா விப்பவுட்டா² ந சிரஸ்ஸேவ ஸமாக³ச்ச²ந்தி, அனவட்டி²தா ச தேஸு பியமனாபதா, ந ஏவமரியஸங்கோ⁴, தஸ்மா ஸங்கோ⁴வ பாஹுனெய்யோ’’தி.
Pāhunakabhattassāti disavidisato āgatānaṃ piyamanāpānaṃ ñātimittānaṃ atthāya sakkāre paṭiyattassa āgantukabhattassa. Tañhi ṭhapetvā te tathārūpe pāhunake saṅghasseva dātuṃ yuttaṃ, saṅghova taṃ paṭiggahetuṃ yutto. Saṅghasadiso hi pāhunako natthi. Tathā hesa ekasmiṃ buddhantare vītivatte dissati, kadāci asaṅkhyeyyepi kappe vītivatte. Abbokiṇṇañca piyamanāpatādikarehi dhammehi samannāgato. Evaṃ pāhunamassa dātuṃ yuttaṃ, pāhunañca paṭiggahetuṃ yuttoti pāhuneyyo. Ayañhettha adhippāyo ‘‘ñātimittā vippavuṭṭhā na cirasseva samāgacchanti, anavaṭṭhitā ca tesu piyamanāpatā, na evamariyasaṅgho, tasmā saṅghova pāhuneyyo’’ti.
த³க்க²ந்தி ஏதாய ஸத்தா யதா²தி⁴ப்பேதாஹி ஸம்பத்தீஹி வட்³ட⁴ந்தீதி த³க்கி²ணா, பரலோகங் ஸத்³த³ஹித்வா தா³னங். தங் த³க்கி²ணங் அரஹதி, த³க்கி²ணாய வா ஹிதோ யஸ்மா மஹப்ப²லகரணதாய விஸோதே⁴தீதி த³க்கி²ணெய்யோ.
Dakkhanti etāya sattā yathādhippetāhi sampattīhi vaḍḍhantīti dakkhiṇā, paralokaṃ saddahitvā dānaṃ. Taṃ dakkhiṇaṃ arahati, dakkhiṇāya vā hito yasmā mahapphalakaraṇatāya visodhetīti dakkhiṇeyyo.
புஞ்ஞத்தி²கேஹி அஞ்ஜலி கரணீயோ எத்தா²தி அஞ்ஜலிகரணீயோ. உபோ⁴ ஹெத்த² ஸிரஸி பதிட்டா²பெத்வா ஸப்³ப³லோகேன கயிரமானங் அஞ்ஜலிகம்மங் அரஹதீதி வா அஞ்ஜலிகரணீயோ. தேனாஹ ‘‘அஞ்ஜலிபக்³க³ஹணஸ்ஸ அனுச்ச²விகோ’’தி.
Puññatthikehi añjali karaṇīyo etthāti añjalikaraṇīyo. Ubho hettha sirasi patiṭṭhāpetvā sabbalokena kayiramānaṃ añjalikammaṃ arahatīti vā añjalikaraṇīyo. Tenāha ‘‘añjalipaggahaṇassa anucchaviko’’ti.
யதி³பி பாளியங் ‘‘அனுத்தர’’ந்தி வுத்தங், நத்தி² இதோ உத்தரங் விஸிட்ட²ந்தி ஹி அனுத்தரங், ஸமம்பிஸ்ஸ பன நத்தீ²தி த³ஸ்ஸெந்தோ ‘‘அஸதி³ஸ’’ந்தி ஆஹ. கி²த்தங் வுத்தங் பீ³ஜங் மஹப்ப²லபா⁴வகரணேன தாயதி ரக்க²தி, கி²பந்தி வபந்தி எத்த² பீ³ஜானீதி வா கெ²த்தங், கேதா³ராதி³, கெ²த்தங் விய கெ²த்தங், புஞ்ஞானங் கெ²த்தங் புஞ்ஞக்கெ²த்தங். யதா² ஹி ரஞ்ஞோ வா அமச்சஸ்ஸ வா ஸாலீனங் வா யவானங் வா விருஹனட்டா²னங் ‘‘ரஞ்ஞோ ஸாலிக்கே²தங் யவக்கே²த’’ந்தி வுச்சதி, ஏவங் ஸங்கோ⁴ ஸப்³ப³லோகஸ்ஸ புஞ்ஞானங் விருஹனட்டா²னங். ஸங்க⁴ங் நிஸ்ஸாய ஹி லோகஸ்ஸ நானப்பகாரஹிதஸுக²ஸங்வத்தனிகானி புஞ்ஞானி விருஹந்தி, தஸ்மா ஸங்கோ⁴ அனுத்தரங் புஞ்ஞக்கெ²த்தங் லோகஸ்ஸ. ஸேஸங் ஸுவிஞ்ஞெய்யமேவ. ச²ட்ட²ஸத்தமானி உத்தானத்தா²னேவ.
Yadipi pāḷiyaṃ ‘‘anuttara’’nti vuttaṃ, natthi ito uttaraṃ visiṭṭhanti hi anuttaraṃ, samampissa pana natthīti dassento ‘‘asadisa’’nti āha. Khittaṃ vuttaṃ bījaṃ mahapphalabhāvakaraṇena tāyati rakkhati, khipanti vapanti ettha bījānīti vā khettaṃ, kedārādi, khettaṃ viya khettaṃ, puññānaṃ khettaṃ puññakkhettaṃ. Yathā hi rañño vā amaccassa vā sālīnaṃ vā yavānaṃ vā viruhanaṭṭhānaṃ ‘‘rañño sālikkhetaṃ yavakkheta’’nti vuccati, evaṃ saṅgho sabbalokassa puññānaṃ viruhanaṭṭhānaṃ. Saṅghaṃ nissāya hi lokassa nānappakārahitasukhasaṃvattanikāni puññāni viruhanti, tasmā saṅgho anuttaraṃ puññakkhettaṃ lokassa. Sesaṃ suviññeyyameva. Chaṭṭhasattamāni uttānatthāneva.
பட²மஆஜானீயஸுத்தாதி³வண்ணனா நிட்டி²தா.
Paṭhamaājānīyasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
5. பட²மஆஜானீயஸுத்தங் • 5. Paṭhamaājānīyasuttaṃ
6. து³தியஆஜானீயஸுத்தங் • 6. Dutiyaājānīyasuttaṃ
7. ததியஆஜானீயஸுத்தங் • 7. Tatiyaājānīyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5-7. பட²மஆஜானீயஸுத்தாதி³வண்ணனா • 5-7. Paṭhamaājānīyasuttādivaṇṇanā
