| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৫-৭. পঠমআজানীযসুত্তাদিৰণ্ণনা
5-7. Paṭhamaājānīyasuttādivaṇṇanā
৯৭-৯৯. পঞ্চমে অনুচ্ছৰিকোতি রঞ্ঞো পরিভুঞ্জনযোগ্গো। হত্থপাদাদিঅঙ্গসমতাযাতি হত্থপাদাদিঅৰযৰসমতায, রঞ্ঞো ৰা সেনায অঙ্গভূতত্তা রঞ্ঞো অঙ্গন্তি ৰুচ্চতি। আনেত্ৰা হুনিতব্বন্তি আহুনং, আহুতীতি অত্থতো একন্তি আহ ‘‘আহুতিসঙ্খাতং পিণ্ডপাত’’ন্তি। দূরতোপি আনেত্ৰা সীলৰন্তেসু দাতব্বস্সেতং অধিৰচনং। পিণ্ডপাতন্তি চ নিদস্সনমত্তং। আনেত্ৰা হুনিতব্বানঞ্হি চীৰরাদীনং চতুন্নং পচ্চযানমেতং অধিৰচনং আহুনন্তি। তং অরহতীতি আহুনেয্যো। পটিগ্গহেতুং যুত্তোতি তস্স মহপ্ফলভাৰকরণতো পটিগ্গণ্হিতুং অনুচ্ছৰিকো।
97-99. Pañcame anucchavikoti rañño paribhuñjanayoggo. Hatthapādādiaṅgasamatāyāti hatthapādādiavayavasamatāya, rañño vā senāya aṅgabhūtattā rañño aṅganti vuccati. Ānetvā hunitabbanti āhunaṃ, āhutīti atthato ekanti āha ‘‘āhutisaṅkhātaṃ piṇḍapāta’’nti. Dūratopi ānetvā sīlavantesu dātabbassetaṃ adhivacanaṃ. Piṇḍapātanti ca nidassanamattaṃ. Ānetvā hunitabbānañhi cīvarādīnaṃ catunnaṃ paccayānametaṃ adhivacanaṃ āhunanti. Taṃ arahatīti āhuneyyo. Paṭiggahetuṃ yuttoti tassa mahapphalabhāvakaraṇato paṭiggaṇhituṃ anucchaviko.
পাহুনকভত্তস্সাতি দিসৰিদিসতো আগতানং পিযমনাপানং ঞাতিমিত্তানং অত্থায সক্কারে পটিযত্তস্স আগন্তুকভত্তস্স। তঞ্হি ঠপেত্ৰা তে তথারূপে পাহুনকে সঙ্ঘস্সেৰ দাতুং যুত্তং, সঙ্ঘোৰ তং পটিগ্গহেতুং যুত্তো। সঙ্ঘসদিসো হি পাহুনকো নত্থি। তথা হেস একস্মিং বুদ্ধন্তরে ৰীতিৰত্তে দিস্সতি, কদাচি অসঙ্খ্যেয্যেপি কপ্পে ৰীতিৰত্তে। অব্বোকিণ্ণঞ্চ পিযমনাপতাদিকরেহি ধম্মেহি সমন্নাগতো। এৰং পাহুনমস্স দাতুং যুত্তং, পাহুনঞ্চ পটিগ্গহেতুং যুত্তোতি পাহুনেয্যো। অযঞ্হেত্থ অধিপ্পাযো ‘‘ঞাতিমিত্তা ৰিপ্পৰুট্ঠা ন চিরস্সেৰ সমাগচ্ছন্তি, অনৰট্ঠিতা চ তেসু পিযমনাপতা, ন এৰমরিযসঙ্ঘো, তস্মা সঙ্ঘোৰ পাহুনেয্যো’’তি।
Pāhunakabhattassāti disavidisato āgatānaṃ piyamanāpānaṃ ñātimittānaṃ atthāya sakkāre paṭiyattassa āgantukabhattassa. Tañhi ṭhapetvā te tathārūpe pāhunake saṅghasseva dātuṃ yuttaṃ, saṅghova taṃ paṭiggahetuṃ yutto. Saṅghasadiso hi pāhunako natthi. Tathā hesa ekasmiṃ buddhantare vītivatte dissati, kadāci asaṅkhyeyyepi kappe vītivatte. Abbokiṇṇañca piyamanāpatādikarehi dhammehi samannāgato. Evaṃ pāhunamassa dātuṃ yuttaṃ, pāhunañca paṭiggahetuṃ yuttoti pāhuneyyo. Ayañhettha adhippāyo ‘‘ñātimittā vippavuṭṭhā na cirasseva samāgacchanti, anavaṭṭhitā ca tesu piyamanāpatā, na evamariyasaṅgho, tasmā saṅghova pāhuneyyo’’ti.
দক্খন্তি এতায সত্তা যথাধিপ্পেতাহি সম্পত্তীহি ৰড্ঢন্তীতি দক্খিণা, পরলোকং সদ্দহিত্ৰা দানং। তং দক্খিণং অরহতি, দক্খিণায ৰা হিতো যস্মা মহপ্ফলকরণতায ৰিসোধেতীতি দক্খিণেয্যো।
Dakkhanti etāya sattā yathādhippetāhi sampattīhi vaḍḍhantīti dakkhiṇā, paralokaṃ saddahitvā dānaṃ. Taṃ dakkhiṇaṃ arahati, dakkhiṇāya vā hito yasmā mahapphalakaraṇatāya visodhetīti dakkhiṇeyyo.
পুঞ্ঞত্থিকেহি অঞ্জলি করণীযো এত্থাতি অঞ্জলিকরণীযো। উভো হেত্থ সিরসি পতিট্ঠাপেত্ৰা সব্বলোকেন কযিরমানং অঞ্জলিকম্মং অরহতীতি ৰা অঞ্জলিকরণীযো। তেনাহ ‘‘অঞ্জলিপগ্গহণস্স অনুচ্ছৰিকো’’তি।
Puññatthikehi añjali karaṇīyo etthāti añjalikaraṇīyo. Ubho hettha sirasi patiṭṭhāpetvā sabbalokena kayiramānaṃ añjalikammaṃ arahatīti vā añjalikaraṇīyo. Tenāha ‘‘añjalipaggahaṇassa anucchaviko’’ti.
যদিপি পাল়িযং ‘‘অনুত্তর’’ন্তি ৰুত্তং, নত্থি ইতো উত্তরং ৰিসিট্ঠন্তি হি অনুত্তরং, সমম্পিস্স পন নত্থীতি দস্সেন্তো ‘‘অসদিস’’ন্তি আহ। খিত্তং ৰুত্তং বীজং মহপ্ফলভাৰকরণেন তাযতি রক্খতি, খিপন্তি ৰপন্তি এত্থ বীজানীতি ৰা খেত্তং, কেদারাদি, খেত্তং ৰিয খেত্তং, পুঞ্ঞানং খেত্তং পুঞ্ঞক্খেত্তং। যথা হি রঞ্ঞো ৰা অমচ্চস্স ৰা সালীনং ৰা যৰানং ৰা ৰিরুহনট্ঠানং ‘‘রঞ্ঞো সালিক্খেতং যৰক্খেত’’ন্তি ৰুচ্চতি, এৰং সঙ্ঘো সব্বলোকস্স পুঞ্ঞানং ৰিরুহনট্ঠানং। সঙ্ঘং নিস্সায হি লোকস্স নানপ্পকারহিতসুখসংৰত্তনিকানি পুঞ্ঞানি ৰিরুহন্তি, তস্মা সঙ্ঘো অনুত্তরং পুঞ্ঞক্খেত্তং লোকস্স। সেসং সুৰিঞ্ঞেয্যমেৰ। ছট্ঠসত্তমানি উত্তানত্থানেৰ।
Yadipi pāḷiyaṃ ‘‘anuttara’’nti vuttaṃ, natthi ito uttaraṃ visiṭṭhanti hi anuttaraṃ, samampissa pana natthīti dassento ‘‘asadisa’’nti āha. Khittaṃ vuttaṃ bījaṃ mahapphalabhāvakaraṇena tāyati rakkhati, khipanti vapanti ettha bījānīti vā khettaṃ, kedārādi, khettaṃ viya khettaṃ, puññānaṃ khettaṃ puññakkhettaṃ. Yathā hi rañño vā amaccassa vā sālīnaṃ vā yavānaṃ vā viruhanaṭṭhānaṃ ‘‘rañño sālikkhetaṃ yavakkheta’’nti vuccati, evaṃ saṅgho sabbalokassa puññānaṃ viruhanaṭṭhānaṃ. Saṅghaṃ nissāya hi lokassa nānappakārahitasukhasaṃvattanikāni puññāni viruhanti, tasmā saṅgho anuttaraṃ puññakkhettaṃ lokassa. Sesaṃ suviññeyyameva. Chaṭṭhasattamāni uttānatthāneva.
পঠমআজানীযসুত্তাদিৰণ্ণনা নিট্ঠিতা।
Paṭhamaājānīyasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৫. পঠমআজানীযসুত্তং • 5. Paṭhamaājānīyasuttaṃ
৬. দুতিযআজানীযসুত্তং • 6. Dutiyaājānīyasuttaṃ
৭. ততিযআজানীযসুত্তং • 7. Tatiyaājānīyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫-৭. পঠমআজানীযসুত্তাদিৰণ্ণনা • 5-7. Paṭhamaājānīyasuttādivaṇṇanā
