| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๕-๗. ปฐมอาชานียสุตฺตาทิวณฺณนา
5-7. Paṭhamaājānīyasuttādivaṇṇanā
๙๗-๙๙. ปญฺจเม อเงฺคหีติ คุณเงฺคหิฯ ราชารโหติ รโญฺญ อรโห อนุจฺฉวิโกฯ ราชโภโคฺคติ รโญฺญ อุปโภคภูโตฯ รโญฺญ องฺคนฺติ รโญฺญ หตฺถปาทาทิองฺคสมตาย องฺคเนฺตว สงฺขํ คจฺฉติฯ วณฺณสมฺปโนฺนติ สรีรวเณฺณน สมฺปโนฺนฯ พลสมฺปโนฺนติ กายพเลน สมฺปโนฺนฯ อาหุเนโยฺยติ อาหุติสงฺขาตํ ปิณฺฑปาตํ ปฎิคฺคเหตุํ ยุโตฺตฯ ปาหุเนโยฺยติ ปาหุนกภตฺตสฺส อนุจฺฉวิโกฯ ทกฺขิเณโยฺยติ ทสวิธทานวตฺถุปริจฺจาควเสน สทฺธาทานสงฺขาตาย ทกฺขิณาย อนุจฺฉวิโกฯ อญฺชลิกรณีโยติ อญฺชลิปคฺคหณสฺส อนุจฺฉวิโกฯ อนุตฺตรํ ปุญฺญเกฺขตฺตํ โลกสฺสาติ สพฺพโลกสฺส อสทิสํ ปุญฺญวิรุหนฎฺฐานํฯ
97-99. Pañcame aṅgehīti guṇaṅgehi. Rājārahoti rañño araho anucchaviko. Rājabhoggoti rañño upabhogabhūto. Rañño aṅganti rañño hatthapādādiaṅgasamatāya aṅganteva saṅkhaṃ gacchati. Vaṇṇasampannoti sarīravaṇṇena sampanno. Balasampannoti kāyabalena sampanno. Āhuneyyoti āhutisaṅkhātaṃ piṇḍapātaṃ paṭiggahetuṃ yutto. Pāhuneyyoti pāhunakabhattassa anucchaviko. Dakkhiṇeyyoti dasavidhadānavatthupariccāgavasena saddhādānasaṅkhātāya dakkhiṇāya anucchaviko. Añjalikaraṇīyoti añjalipaggahaṇassa anucchaviko. Anuttaraṃ puññakkhettaṃ lokassāti sabbalokassa asadisaṃ puññaviruhanaṭṭhānaṃ.
วณฺณสมฺปโนฺนติ คุณวเณฺณน สมฺปโนฺนฯ พลสมฺปโนฺนติ วีริยพเลน สมฺปโนฺนฯ ชวสมฺปโนฺนติ ญาณชเวน สมฺปโนฺนฯ ถามวาติ ญาณถาเมน สมนฺนาคโตฯ ทฬฺหปรกฺกโมติ ถิรปรกฺกโมฯ อนิกฺขิตฺตธุโรติ อฎฺฐปิตธุโร ปคฺคหิตธุโร, อคฺคผลํ อรหตฺตํ อปฺปตฺวา วีริยธุรํ น นิกฺขิปิสฺสามีติ เอวํ ปฎิปโนฺนฯ อิมสฺมิํ สุเตฺต จตุสจฺจวเสน โสตาปตฺติมโคฺค, โสตาปตฺติมเคฺคน จ ญาณชวสมฺปนฺนตา กถิตาติฯ ฉเฎฺฐ ตีณิ จ มคฺคานิ ตีณิ จ ผลานิ, ตีหิ มคฺคผเลหิ จ ญาณชวสมฺปนฺนตา กถิตาฯ สตฺตเม อรหตฺตผลํ, อรหตฺตผเลเนว จ มคฺคกิจฺจํ กถิตํฯ ผลํ ปน ชวิตชเวน อุปฺปชฺชนโต ชโวติ จ วตฺตุํ วฎฺฎติฯ
Vaṇṇasampannoti guṇavaṇṇena sampanno. Balasampannoti vīriyabalena sampanno. Javasampannoti ñāṇajavena sampanno. Thāmavāti ñāṇathāmena samannāgato. Daḷhaparakkamoti thiraparakkamo. Anikkhittadhuroti aṭṭhapitadhuro paggahitadhuro, aggaphalaṃ arahattaṃ appatvā vīriyadhuraṃ na nikkhipissāmīti evaṃ paṭipanno. Imasmiṃ sutte catusaccavasena sotāpattimaggo, sotāpattimaggena ca ñāṇajavasampannatā kathitāti. Chaṭṭhe tīṇi ca maggāni tīṇi ca phalāni, tīhi maggaphalehi ca ñāṇajavasampannatā kathitā. Sattame arahattaphalaṃ, arahattaphaleneva ca maggakiccaṃ kathitaṃ. Phalaṃ pana javitajavena uppajjanato javoti ca vattuṃ vaṭṭati.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya
๕. ปฐมอาชานียสุตฺตํ • 5. Paṭhamaājānīyasuttaṃ
๖. ทุติยอาชานียสุตฺตํ • 6. Dutiyaājānīyasuttaṃ
๗. ตติยอาชานียสุตฺตํ • 7. Tatiyaājānīyasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๕-๗. ปฐมอาชานียสุตฺตาทิวณฺณนา • 5-7. Paṭhamaājānīyasuttādivaṇṇanā
