| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៥-៧. បឋមអាជានីយសុត្តាទិវណ្ណនា
5-7. Paṭhamaājānīyasuttādivaṇṇanā
៩៧-៩៩. បញ្ចមេ អង្គេហីតិ គុណង្គេហិ។ រាជារហោតិ រញ្ញោ អរហោ អនុច្ឆវិកោ។ រាជភោគ្គោតិ រញ្ញោ ឧបភោគភូតោ។ រញ្ញោ អង្គន្តិ រញ្ញោ ហត្ថបាទាទិអង្គសមតាយ អង្គន្តេវ សង្ខំ គច្ឆតិ។ វណ្ណសម្បន្នោតិ សរីរវណ្ណេន សម្បន្នោ។ ពលសម្បន្នោតិ កាយពលេន សម្បន្នោ។ អាហុនេយ្យោតិ អាហុតិសង្ខាតំ បិណ្ឌបាតំ បដិគ្គហេតុំ យុត្តោ។ បាហុនេយ្យោតិ បាហុនកភត្តស្ស អនុច្ឆវិកោ។ ទក្ខិណេយ្យោតិ ទសវិធទានវត្ថុបរិច្ចាគវសេន សទ្ធាទានសង្ខាតាយ ទក្ខិណាយ អនុច្ឆវិកោ។ អញ្ជលិករណីយោតិ អញ្ជលិបគ្គហណស្ស អនុច្ឆវិកោ។ អនុត្តរំ បុញ្ញក្ខេត្តំ លោកស្សាតិ សព្ពលោកស្ស អសទិសំ បុញ្ញវិរុហនដ្ឋានំ។
97-99. Pañcame aṅgehīti guṇaṅgehi. Rājārahoti rañño araho anucchaviko. Rājabhoggoti rañño upabhogabhūto. Rañño aṅganti rañño hatthapādādiaṅgasamatāya aṅganteva saṅkhaṃ gacchati. Vaṇṇasampannoti sarīravaṇṇena sampanno. Balasampannoti kāyabalena sampanno. Āhuneyyoti āhutisaṅkhātaṃ piṇḍapātaṃ paṭiggahetuṃ yutto. Pāhuneyyoti pāhunakabhattassa anucchaviko. Dakkhiṇeyyoti dasavidhadānavatthupariccāgavasena saddhādānasaṅkhātāya dakkhiṇāya anucchaviko. Añjalikaraṇīyoti añjalipaggahaṇassa anucchaviko. Anuttaraṃ puññakkhettaṃ lokassāti sabbalokassa asadisaṃ puññaviruhanaṭṭhānaṃ.
វណ្ណសម្បន្នោតិ គុណវណ្ណេន សម្បន្នោ។ ពលសម្បន្នោតិ វីរិយពលេន សម្បន្នោ។ ជវសម្បន្នោតិ ញាណជវេន សម្បន្នោ។ ថាមវាតិ ញាណថាមេន សមន្នាគតោ។ ទឡ្ហបរក្កមោតិ ថិរបរក្កមោ។ អនិក្ខិត្តធុរោតិ អដ្ឋបិតធុរោ បគ្គហិតធុរោ, អគ្គផលំ អរហត្តំ អប្បត្វា វីរិយធុរំ ន និក្ខិបិស្សាមីតិ ឯវំ បដិបន្នោ។ ឥមស្មិំ សុត្តេ ចតុសច្ចវសេន សោតាបត្តិមគ្គោ, សោតាបត្តិមគ្គេន ច ញាណជវសម្បន្នតា កថិតាតិ។ ឆដ្ឋេ តីណិ ច មគ្គានិ តីណិ ច ផលានិ, តីហិ មគ្គផលេហិ ច ញាណជវសម្បន្នតា កថិតា។ សត្តមេ អរហត្តផលំ, អរហត្តផលេនេវ ច មគ្គកិច្ចំ កថិតំ។ ផលំ បន ជវិតជវេន ឧប្បជ្ជនតោ ជវោតិ ច វត្តុំ វដ្ដតិ។
Vaṇṇasampannoti guṇavaṇṇena sampanno. Balasampannoti vīriyabalena sampanno. Javasampannoti ñāṇajavena sampanno. Thāmavāti ñāṇathāmena samannāgato. Daḷhaparakkamoti thiraparakkamo. Anikkhittadhuroti aṭṭhapitadhuro paggahitadhuro, aggaphalaṃ arahattaṃ appatvā vīriyadhuraṃ na nikkhipissāmīti evaṃ paṭipanno. Imasmiṃ sutte catusaccavasena sotāpattimaggo, sotāpattimaggena ca ñāṇajavasampannatā kathitāti. Chaṭṭhe tīṇi ca maggāni tīṇi ca phalāni, tīhi maggaphalehi ca ñāṇajavasampannatā kathitā. Sattame arahattaphalaṃ, arahattaphaleneva ca maggakiccaṃ kathitaṃ. Phalaṃ pana javitajavena uppajjanato javoti ca vattuṃ vaṭṭati.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya
៥. បឋមអាជានីយសុត្តំ • 5. Paṭhamaājānīyasuttaṃ
៦. ទុតិយអាជានីយសុត្តំ • 6. Dutiyaājānīyasuttaṃ
៧. តតិយអាជានីយសុត្តំ • 7. Tatiyaājānīyasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៥-៧. បឋមអាជានីយសុត្តាទិវណ្ណនា • 5-7. Paṭhamaājānīyasuttādivaṇṇanā
