| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. পঠমআকাসসুত্তং
2. Paṭhamaākāsasuttaṃ
২৬০. ‘‘সেয্যথাপি, ভিক্খৰে, আকাসে ৰিৰিধা ৰাতা ৰাযন্তি। পুরত্থিমাপি ৰাতা ৰাযন্তি, পচ্ছিমাপি ৰাতা ৰাযন্তি, উত্তরাপি ৰাতা ৰাযন্তি, দক্খিণাপি ৰাতা ৰাযন্তি, সরজাপি ৰাতা ৰাযন্তি, অরজাপি ৰাতা ৰাযন্তি, সীতাপি ৰাতা ৰাযন্তি, উণ্হাপি ৰাতা ৰাযন্তি, পরিত্তাপি ৰাতা ৰাযন্তি, অধিমত্তাপি ৰাতা ৰাযন্তি। এৰমেৰ খো, ভিক্খৰে, ইমস্মিং কাযস্মিং ৰিৰিধা ৰেদনা উপ্পজ্জন্তি, সুখাপি ৰেদনা উপ্পজ্জতি, দুক্খাপি ৰেদনা উপ্পজ্জতি, অদুক্খমসুখাপি ৰেদনা উপ্পজ্জতী’’তি।
260. ‘‘Seyyathāpi, bhikkhave, ākāse vividhā vātā vāyanti. Puratthimāpi vātā vāyanti, pacchimāpi vātā vāyanti, uttarāpi vātā vāyanti, dakkhiṇāpi vātā vāyanti, sarajāpi vātā vāyanti, arajāpi vātā vāyanti, sītāpi vātā vāyanti, uṇhāpi vātā vāyanti, parittāpi vātā vāyanti, adhimattāpi vātā vāyanti. Evameva kho, bhikkhave, imasmiṃ kāyasmiṃ vividhā vedanā uppajjanti, sukhāpi vedanā uppajjati, dukkhāpi vedanā uppajjati, adukkhamasukhāpi vedanā uppajjatī’’ti.
‘‘যথাপি ৰাতা আকাসে, ৰাযন্তি ৰিৰিধা পুথূ।
‘‘Yathāpi vātā ākāse, vāyanti vividhā puthū;
পুরত্থিমা পচ্ছিমা চাপি, উত্তরা অথ দক্খিণা॥
Puratthimā pacchimā cāpi, uttarā atha dakkhiṇā.
‘‘সরজা অরজা চপি, সীতা উণ্হা চ একদা।
‘‘Sarajā arajā capi, sītā uṇhā ca ekadā;
অধিমত্তা পরিত্তা চ, পুথূ ৰাযন্তি মালুতা॥
Adhimattā parittā ca, puthū vāyanti mālutā.
‘‘তথেৰিমস্মিং কাযস্মিং, সমুপ্পজ্জন্তি ৰেদনা।
‘‘Tathevimasmiṃ kāyasmiṃ, samuppajjanti vedanā;
সুখদুক্খসমুপ্পত্তি, অদুক্খমসুখা চ যা॥
Sukhadukkhasamuppatti, adukkhamasukhā ca yā.
ততো সো ৰেদনা সব্বা, পরিজানাতি পণ্ডিতো॥
Tato so vedanā sabbā, parijānāti paṇḍito.
‘‘সো ৰেদনা পরিঞ্ঞায, দিট্ঠে ধম্মে অনাসৰো।
‘‘So vedanā pariññāya, diṭṭhe dhamme anāsavo;
কাযস্স ভেদা ধম্মট্ঠো, সঙ্খ্যং নোপেতি ৰেদগূ’’তি॥ দুতিযং।
Kāyassa bhedā dhammaṭṭho, saṅkhyaṃ nopeti vedagū’’ti. dutiyaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২-৩. পঠমআকাসসুত্তাদিৰণ্ণনা • 2-3. Paṭhamaākāsasuttādivaṇṇanā
