| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
२. पठमआकाससुत्तं
2. Paṭhamaākāsasuttaṃ
२६०. ‘‘सेय्यथापि, भिक्खवे, आकासे विविधा वाता वायन्ति। पुरत्थिमापि वाता वायन्ति, पच्छिमापि वाता वायन्ति, उत्तरापि वाता वायन्ति, दक्खिणापि वाता वायन्ति, सरजापि वाता वायन्ति, अरजापि वाता वायन्ति, सीतापि वाता वायन्ति, उण्हापि वाता वायन्ति, परित्तापि वाता वायन्ति, अधिमत्तापि वाता वायन्ति। एवमेव खो, भिक्खवे, इमस्मिं कायस्मिं विविधा वेदना उप्पज्जन्ति, सुखापि वेदना उप्पज्जति, दुक्खापि वेदना उप्पज्जति, अदुक्खमसुखापि वेदना उप्पज्जती’’ति।
260. ‘‘Seyyathāpi, bhikkhave, ākāse vividhā vātā vāyanti. Puratthimāpi vātā vāyanti, pacchimāpi vātā vāyanti, uttarāpi vātā vāyanti, dakkhiṇāpi vātā vāyanti, sarajāpi vātā vāyanti, arajāpi vātā vāyanti, sītāpi vātā vāyanti, uṇhāpi vātā vāyanti, parittāpi vātā vāyanti, adhimattāpi vātā vāyanti. Evameva kho, bhikkhave, imasmiṃ kāyasmiṃ vividhā vedanā uppajjanti, sukhāpi vedanā uppajjati, dukkhāpi vedanā uppajjati, adukkhamasukhāpi vedanā uppajjatī’’ti.
‘‘यथापि वाता आकासे, वायन्ति विविधा पुथू।
‘‘Yathāpi vātā ākāse, vāyanti vividhā puthū;
पुरत्थिमा पच्छिमा चापि, उत्तरा अथ दक्खिणा॥
Puratthimā pacchimā cāpi, uttarā atha dakkhiṇā.
‘‘सरजा अरजा चपि, सीता उण्हा च एकदा।
‘‘Sarajā arajā capi, sītā uṇhā ca ekadā;
अधिमत्ता परित्ता च, पुथू वायन्ति मालुता॥
Adhimattā parittā ca, puthū vāyanti mālutā.
‘‘तथेविमस्मिं कायस्मिं, समुप्पज्जन्ति वेदना।
‘‘Tathevimasmiṃ kāyasmiṃ, samuppajjanti vedanā;
सुखदुक्खसमुप्पत्ति, अदुक्खमसुखा च या॥
Sukhadukkhasamuppatti, adukkhamasukhā ca yā.
ततो सो वेदना सब्बा, परिजानाति पण्डितो॥
Tato so vedanā sabbā, parijānāti paṇḍito.
‘‘सो वेदना परिञ्ञाय, दिट्ठे धम्मे अनासवो।
‘‘So vedanā pariññāya, diṭṭhe dhamme anāsavo;
कायस्स भेदा धम्मट्ठो, सङ्ख्यं नोपेति वेदगू’’ति॥ दुतियं।
Kāyassa bhedā dhammaṭṭho, saṅkhyaṃ nopeti vedagū’’ti. dutiyaṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / २-३. पठमआकाससुत्तादिवण्णना • 2-3. Paṭhamaākāsasuttādivaṇṇanā
