| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๒. ปฐมอากาสสุตฺตํ
2. Paṭhamaākāsasuttaṃ
๒๖๐. ‘‘เสยฺยถาปิ, ภิกฺขเว, อากาเส วิวิธา วาตา วายนฺติฯ ปุรตฺถิมาปิ วาตา วายนฺติ, ปจฺฉิมาปิ วาตา วายนฺติ, อุตฺตราปิ วาตา วายนฺติ, ทกฺขิณาปิ วาตา วายนฺติ, สรชาปิ วาตา วายนฺติ, อรชาปิ วาตา วายนฺติ, สีตาปิ วาตา วายนฺติ, อุณฺหาปิ วาตา วายนฺติ, ปริตฺตาปิ วาตา วายนฺติ, อธิมตฺตาปิ วาตา วายนฺติฯ เอวเมว โข, ภิกฺขเว, อิมสฺมิํ กายสฺมิํ วิวิธา เวทนา อุปฺปชฺชนฺติ, สุขาปิ เวทนา อุปฺปชฺชติ, ทุกฺขาปิ เวทนา อุปฺปชฺชติ, อทุกฺขมสุขาปิ เวทนา อุปฺปชฺชตี’’ติฯ
260. ‘‘Seyyathāpi, bhikkhave, ākāse vividhā vātā vāyanti. Puratthimāpi vātā vāyanti, pacchimāpi vātā vāyanti, uttarāpi vātā vāyanti, dakkhiṇāpi vātā vāyanti, sarajāpi vātā vāyanti, arajāpi vātā vāyanti, sītāpi vātā vāyanti, uṇhāpi vātā vāyanti, parittāpi vātā vāyanti, adhimattāpi vātā vāyanti. Evameva kho, bhikkhave, imasmiṃ kāyasmiṃ vividhā vedanā uppajjanti, sukhāpi vedanā uppajjati, dukkhāpi vedanā uppajjati, adukkhamasukhāpi vedanā uppajjatī’’ti.
‘‘ยถาปิ วาตา อากาเส, วายนฺติ วิวิธา ปุถู;
‘‘Yathāpi vātā ākāse, vāyanti vividhā puthū;
ปุรตฺถิมา ปจฺฉิมา จาปิ, อุตฺตรา อถ ทกฺขิณาฯ
Puratthimā pacchimā cāpi, uttarā atha dakkhiṇā.
‘‘สรชา อรชา จปิ, สีตา อุณฺหา จ เอกทา;
‘‘Sarajā arajā capi, sītā uṇhā ca ekadā;
อธิมตฺตา ปริตฺตา จ, ปุถู วายนฺติ มาลุตาฯ
Adhimattā parittā ca, puthū vāyanti mālutā.
‘‘ตเถวิมสฺมิํ กายสฺมิํ, สมุปฺปชฺชนฺติ เวทนา;
‘‘Tathevimasmiṃ kāyasmiṃ, samuppajjanti vedanā;
สุขทุกฺขสมุปฺปตฺติ, อทุกฺขมสุขา จ ยาฯ
Sukhadukkhasamuppatti, adukkhamasukhā ca yā.
ตโต โส เวทนา สพฺพา, ปริชานาติ ปณฺฑิโตฯ
Tato so vedanā sabbā, parijānāti paṇḍito.
‘‘โส เวทนา ปริญฺญาย, ทิเฎฺฐ ธเมฺม อนาสโว;
‘‘So vedanā pariññāya, diṭṭhe dhamme anāsavo;
กายสฺส เภทา ธมฺมโฎฺฐ, สงฺขฺยํ โนเปติ เวทคู’’ติฯ ทุติยํ;
Kāyassa bhedā dhammaṭṭho, saṅkhyaṃ nopeti vedagū’’ti. dutiyaṃ;
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๒-๓. ปฐมอากาสสุตฺตาทิวณฺณนา • 2-3. Paṭhamaākāsasuttādivaṇṇanā
