| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೨. ಪಠಮಆಕಾಸಸುತ್ತಂ
2. Paṭhamaākāsasuttaṃ
೨೬೦. ‘‘ಸೇಯ್ಯಥಾಪಿ, ಭಿಕ್ಖವೇ, ಆಕಾಸೇ ವಿವಿಧಾ ವಾತಾ ವಾಯನ್ತಿ। ಪುರತ್ಥಿಮಾಪಿ ವಾತಾ ವಾಯನ್ತಿ, ಪಚ್ಛಿಮಾಪಿ ವಾತಾ ವಾಯನ್ತಿ, ಉತ್ತರಾಪಿ ವಾತಾ ವಾಯನ್ತಿ, ದಕ್ಖಿಣಾಪಿ ವಾತಾ ವಾಯನ್ತಿ, ಸರಜಾಪಿ ವಾತಾ ವಾಯನ್ತಿ, ಅರಜಾಪಿ ವಾತಾ ವಾಯನ್ತಿ, ಸೀತಾಪಿ ವಾತಾ ವಾಯನ್ತಿ, ಉಣ್ಹಾಪಿ ವಾತಾ ವಾಯನ್ತಿ, ಪರಿತ್ತಾಪಿ ವಾತಾ ವಾಯನ್ತಿ, ಅಧಿಮತ್ತಾಪಿ ವಾತಾ ವಾಯನ್ತಿ। ಏವಮೇವ ಖೋ, ಭಿಕ್ಖವೇ, ಇಮಸ್ಮಿಂ ಕಾಯಸ್ಮಿಂ ವಿವಿಧಾ ವೇದನಾ ಉಪ್ಪಜ್ಜನ್ತಿ, ಸುಖಾಪಿ ವೇದನಾ ಉಪ್ಪಜ್ಜತಿ, ದುಕ್ಖಾಪಿ ವೇದನಾ ಉಪ್ಪಜ್ಜತಿ, ಅದುಕ್ಖಮಸುಖಾಪಿ ವೇದನಾ ಉಪ್ಪಜ್ಜತೀ’’ತಿ।
260. ‘‘Seyyathāpi, bhikkhave, ākāse vividhā vātā vāyanti. Puratthimāpi vātā vāyanti, pacchimāpi vātā vāyanti, uttarāpi vātā vāyanti, dakkhiṇāpi vātā vāyanti, sarajāpi vātā vāyanti, arajāpi vātā vāyanti, sītāpi vātā vāyanti, uṇhāpi vātā vāyanti, parittāpi vātā vāyanti, adhimattāpi vātā vāyanti. Evameva kho, bhikkhave, imasmiṃ kāyasmiṃ vividhā vedanā uppajjanti, sukhāpi vedanā uppajjati, dukkhāpi vedanā uppajjati, adukkhamasukhāpi vedanā uppajjatī’’ti.
‘‘ಯಥಾಪಿ ವಾತಾ ಆಕಾಸೇ, ವಾಯನ್ತಿ ವಿವಿಧಾ ಪುಥೂ।
‘‘Yathāpi vātā ākāse, vāyanti vividhā puthū;
ಪುರತ್ಥಿಮಾ ಪಚ್ಛಿಮಾ ಚಾಪಿ, ಉತ್ತರಾ ಅಥ ದಕ್ಖಿಣಾ॥
Puratthimā pacchimā cāpi, uttarā atha dakkhiṇā.
‘‘ಸರಜಾ ಅರಜಾ ಚಪಿ, ಸೀತಾ ಉಣ್ಹಾ ಚ ಏಕದಾ।
‘‘Sarajā arajā capi, sītā uṇhā ca ekadā;
ಅಧಿಮತ್ತಾ ಪರಿತ್ತಾ ಚ, ಪುಥೂ ವಾಯನ್ತಿ ಮಾಲುತಾ॥
Adhimattā parittā ca, puthū vāyanti mālutā.
‘‘ತಥೇವಿಮಸ್ಮಿಂ ಕಾಯಸ್ಮಿಂ, ಸಮುಪ್ಪಜ್ಜನ್ತಿ ವೇದನಾ।
‘‘Tathevimasmiṃ kāyasmiṃ, samuppajjanti vedanā;
ಸುಖದುಕ್ಖಸಮುಪ್ಪತ್ತಿ, ಅದುಕ್ಖಮಸುಖಾ ಚ ಯಾ॥
Sukhadukkhasamuppatti, adukkhamasukhā ca yā.
ತತೋ ಸೋ ವೇದನಾ ಸಬ್ಬಾ, ಪರಿಜಾನಾತಿ ಪಣ್ಡಿತೋ॥
Tato so vedanā sabbā, parijānāti paṇḍito.
‘‘ಸೋ ವೇದನಾ ಪರಿಞ್ಞಾಯ, ದಿಟ್ಠೇ ಧಮ್ಮೇ ಅನಾಸವೋ।
‘‘So vedanā pariññāya, diṭṭhe dhamme anāsavo;
ಕಾಯಸ್ಸ ಭೇದಾ ಧಮ್ಮಟ್ಠೋ, ಸಙ್ಖ್ಯಂ ನೋಪೇತಿ ವೇದಗೂ’’ತಿ॥ ದುತಿಯಂ।
Kāyassa bhedā dhammaṭṭho, saṅkhyaṃ nopeti vedagū’’ti. dutiyaṃ;
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨-೩. ಪಠಮಆಕಾಸಸುತ್ತಾದಿವಣ್ಣನಾ • 2-3. Paṭhamaākāsasuttādivaṇṇanā
