| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৫. পঠমঅক্খন্তিসুত্তং
5. Paṭhamaakkhantisuttaṃ
২১৫. ‘‘পঞ্চিমে, ভিক্খৰে, আদীনৰা অক্খন্তিযা। কতমে পঞ্চ? বহুনো জনস্স অপ্পিযো হোতি অমনাপো, ৰেরবহুলো চ হোতি, ৰজ্জবহুলো চ, সম্মূল়্হো কালং করোতি, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি। ইমে খো, ভিক্খৰে, পঞ্চ আদীনৰা অক্খন্তিযা।
215. ‘‘Pañcime, bhikkhave, ādīnavā akkhantiyā. Katame pañca? Bahuno janassa appiyo hoti amanāpo, verabahulo ca hoti, vajjabahulo ca, sammūḷho kālaṃ karoti, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Ime kho, bhikkhave, pañca ādīnavā akkhantiyā.
‘‘পঞ্চিমে, ভিক্খৰে, আনিসংসা খন্তিযা। কতমে পঞ্চ? বহুনো জনস্স পিযো হোতি মনাপো, ন ৰেরবহুলো হোতি, ন ৰজ্জবহুলো, অসম্মূল়্হো কালং করোতি, কাযস্স ভেদা পরং মরণা সুগতিং সগ্গং লোকং উপপজ্জতি। ইমে খো, ভিক্খৰে, পঞ্চ আনিসংসা খন্তিযা’’তি। পঞ্চমং।
‘‘Pañcime, bhikkhave, ānisaṃsā khantiyā. Katame pañca? Bahuno janassa piyo hoti manāpo, na verabahulo hoti, na vajjabahulo, asammūḷho kālaṃ karoti, kāyassa bhedā paraṃ maraṇā sugatiṃ saggaṃ lokaṃ upapajjati. Ime kho, bhikkhave, pañca ānisaṃsā khantiyā’’ti. Pañcamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫. পঠমঅক্খন্তিসুত্তৰণ্ণনা • 5. Paṭhamaakkhantisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৩-১০. সীলসুত্তাদিৰণ্ণনা • 3-10. Sīlasuttādivaṇṇanā
